II Bruă Mtao 21:6 - Klei Aê Diê Blŭ 2015

⁶ Ñu čuh anak êkei ñu jing mnơ̆ng myơr, leh anăn ñu ngă klei hưn êlâo leh anăn klei mdian, leh anăn mă bruă mbĭt hŏng phung mjâo leh anăn phung mdian. Ñu ngă lu klei jhat ti anăp ală Yêhôwa, mčhur Gơ̆ ngêñ.

II Bruă Mtao 21:6 Iomraidhean Croise

Klei Mphŭn Dơ̆ng 13:13

Phung mnuih ƀuôn Sôdôm măk ƀai leh anăn ngă soh prŏng snăk hŏng Yêhôwa.

II Bruă Mtao 16:3

Ƀiădah ñu êbat hlăm êlan phung mtao Israel. Wăt ñu čuh leh anak êkei ñu jing mnơ̆ng myơr, jing sa mta klei Yêhôwa bi êmut snăk phung găp djuê ngă, phung Yêhôwa suôt leh ti anăp phung ƀuôn sang Israel.

II Bruă Mtao 17:17

Diñu čuh phung anak êkei diñu leh anăn phung anak mniê diñu jing mnơ̆ng myơr, leh anăn yua klei mdian leh anăn klei mjâo, leh anăn čhĭ diñu pô čiăng ngă klei jhat ti anăp ală Yêhôwa, mčhur Gơ̆ ngêñ.

II Bruă Mtao 23:24

Êbeh kơ anăn Y-Jôsia suôt hĕ jih jang phung mjâo leh anăn phung mdian, rup yang têraphim leh anăn rup yang, leh anăn jih jang mnơ̆ng Yêhôwa bi êmut mâo hlăm čar Yuđa leh anăn hlăm ƀuôn Yêrusalem, čiăng kơ ñu dưi bi kjăp klei blŭ hlăm klei bhiăn čih leh hlăm hdruôm hră Y-Hilkia khua ngă yang ƀuh hlăm sang Yêhôwa.

I Klei Yăl Dliê 10:13

Snăn Y-Sôl djiê kyua ñu amâo dôk sĭt suôr ôh; ñu amâo mâo jing sĭt suôr ôh hŏng Yêhôwa hlăm klei ñu amâo djă pioh ôh klei Yêhôwa mtă, leh anăn msĕ mơh ñu êmuh leh kơ sa čô mjâo čiăng duah klei kčĕ,

II Klei Yăl Dliê 28:3

Ñu čuh mnơ̆ng ƀâo mngưi hlăm tlung anak êkei Y-Hinôm, leh anăn čuh phung anak êkei ñu pô jing mnơ̆ng myơr, tui si bruă Yêhôwa bi êmut phung găp djuê mnuih Yêhôwa suôt leh mơ̆ng anăp phung ƀuôn sang Israel.

II Klei Yăl Dliê 33:6

Ñu čuh phung anak êkei ñu jing mnơ̆ng myơr hlăm tlung anak êkei Y-Hinôm, ksiêm mnơ̆ng čiăng hưn êlâo, ngă klei mdian, ngă bruă mjâo, leh anăn duah phung blŭ hrăm hŏng phung mnuih djiê, leh anăn phung mdian. Ñu ngă lu klei jhat ti anăp ală Yêhôwa bi mčhur ai ngêñ Gơ̆.

Y-Êsai 19:3

Phung Êjip srăng êdu ai, leh anăn Kâo srăng bi luč hdră diñu trông čhai. Diñu srăng duah êmuh phung rup yang leh anăn phung mjâo, phung blŭ hŏng phung djiê leh anăn phung mdian.

Y-Êsai 66:4

Kâo msĕ mơh srăng ruah klei bi knap kơ diñu, leh anăn bi truh kơ diñu klei diñu huĭ. Kyuadah tơdah Kâo iêô, amâo mâo pô lŏ wĭt lač ôh, tơdah Kâo blŭ, diñu amâo hmư̆ ôh, ƀiădah diñu ngă leh klei jhat ti anăp ală Kâo, leh anăn ruah klei amâo bi mơak kơ Kâo ôh.”

Y-Êsai 8:19

Leh anăn tơdah diñu srăng lač kơ diih, “Brei diih ksiêm êmuh kơ phung blŭ hŏng phung djiê leh anăn kơ phung mdian, phung blŭ msĕ si čĭm mñê leh anăn blŭ amâo mngač ôh,” wĭt lač bĕ: amâo djŏ hĕ phung ƀuôn sang srăng êmuh kơ Aê Diê diñu? Djŏ mơ̆ arăng srăng duah êmuh phung djiê leh čiăng thâo klei djŏ kơ phung hdĭp?

Y-Yêrêmi 19:4

Kyuadah phung ƀuôn sang lui wir Kâo leh, leh anăn bi mčhŏ leh anôk anei hŏng klei diñu čuh mnơ̆ng ƀâo mngưi kơ yang mkăn, diñu, phung aê diñu, phung mtao Yuđa amâo tuôm thâo kral ôh; leh anăn kyuadah diñu bi bŏ leh anôk anei hŏng êrah amâo tuôm soh ôh.

Y-Yêrêmi 19:5

Leh anăn diñu mdơ̆ng anôk dlông kơ yang Baal čiăng čuh anak êkei diñu hlăm pui jing mnơ̆ng myơr čuh kơ yang Baal, klei anăn Kâo amâo tuôm mtă kăn tuôm hrŭn rei, kăn Kâo tuôm mĭn kơ klei anăn rei.’

Y-Êsêkiêl 23:39

Kyuadah tơdah diñu bi mdjiê leh phung anak diñu jing mnơ̆ng ngă yang kơ rup yang diñu, hlăm hruê anăn diñu mŭt hlăm adŭ doh jăk Kâo čiăng bi čhŏ gơ̆. Anăn yơh klei diñu ngă leh hlăm sang Kâo.

Bruă Lêwi 18:21

Đăm brei ôh sa čô hlăm phung anak ih čiăng jao gơ̆ brei pui ƀơ̆ng kơ yang Môlok, kyuanăn ih bi čhŏ anăn Aê Diê ih. Kâo jing Yêhôwa.

Bruă Lêwi 19:26

Đăm ƀơ̆ng kđeh mbĭt hŏng êrah ôh. Đăm ksiêm mnơ̆ng čiăng hưn êlâo amâodah ngă klei mdian ôh.

Bruă Lêwi 19:31

Đăm nao kơ phung blŭ hrăm hŏng yang jhat amâodah kơ phung mjâo; đăm tui duah diñu ôh, bi čhŏ diih pô kyua diñu. Kâo jing Yêhôwa Aê Diê diih.

Y-Mika 6:7

Yêhôwa srăng mơak mơ̆ hŏng lu êbâo drei biăp knô, hŏng lu klăk klai hnoh êa boh ôliwơ mơ̆? Kâo srăng myơr mơ̆ anak kâo kkiêng tal êlâo kyua klei kâo gao klei bhiăn, boh mơ̆ng tian prôč kâo kyua klei soh mngăt kâo?”

Bruă Phung Khua Ƀĭng Kna 16:16

Êjai hmei nao kơ anôk wah lač, hmei tuôm hŏng sa čô dĭng buăl mniê mâo yang jhat thâo hưn êlâo klei srăng truh ngă. Hŏng klei ñu blŭ klei mdian, ñu bi mdrŏng kơ phung khua ñu.

Klei Mtô Mñă Klei Bhiăn 32:16

Diñu mčhur brei Yêhôwa trih hŏng phung yang tue; hŏng mnơ̆ng ñu bi êmut kheh diñu bi riêl ai brei Ñu ăl.

Klei Mtô Mñă Klei Bhiăn 32:21

Diñu mčhur leh Kâo brei trih hŏng pô amâo jing Aê Diê ôh; diñu bi riêl ai Kâo hŏng rup yang diñu. Snăn Kâo srăng mčhur diñu brei trih hŏng phung amâo jing sa phung ƀuôn sang ôh; Kâo srăng bi riêl ai diñu hŏng sa phung găp djuê mluk.