Êphêsô 2:10 - Klei Aê Diê Blŭ 2015

¹⁰ Kyuadah drei jing bruă Ñu, Ñu hrih leh hlăm Krist Yêsu pioh kơ bruă jăk Aê Diê mkra leh mơ̆ng êlâo, čiăng brei drei tui ngă.

Êphêsô 2:10 Iomraidhean Croise

Klei Mmuñ Hđăp 100:3

Brei diih thâo kơ Yêhôwa jing Aê Diê. Ñu yơh mjing drei leh, drei jing dŏ Ñu; drei jing phung ƀuôn sang Ñu, phung biăp hlăm kdrăn rơ̆k Ñu.

Klei Mmuñ Hđăp 119:3

Phung anăn amâo ngă klei wê ôh, ƀiădah diñu êbat hlăm êlan Yêhôwa.

Klei Mmuñ Hđăp 138:8

Yêhôwa srăng bi sĭt jih klei Ñu čuăn kơ kâo; Ơ Yêhôwa, klei khăp Ih dôk nanao hlŏng lar. Đăm lui hĕ ôh bruă kngan Ih pô ngă leh.

Klei Mmuñ Hđăp 51:10

Ơ Aê Diê, hrih hlăm kâo ai tiê doh, leh anăn dưm hlăm kâo ai tiê mrâo leh anăn kpă.

Klei Mmuñ Hđăp 81:13

Ơ, čiăng snăk kơ phung ƀuôn sang Kâo dôk hmư̆ Kâo, čiăng kơ phung Israel êbat hlăm êlan Kâo!

Y-Êsai 19:25

phung Yêhôwa kơ phung kahan hơêč hmưi leh, lač, “Jăk mơak yơh kơ čar Êjip phung ƀuôn sang Kâo, leh anăn čar Asiri bruă kngan Kâo, leh anăn čar Israel ngăn dưn Kâo.”

Y-Êsai 29:23

Kyuadah tơdah diñu ƀuh phung anak diñu jing bruă kngan Kâo ngă ti krah diñu, diñu srăng bi doh jăk, kơ Pô Doh Jăk Y-Yakôp, leh anăn srăng huĭ mpŭ kơ Aê Diê Y-Israel.

Y-Êsai 43:21

phung ƀuôn sang Kâo mjing leh kơ Kâo pô, čiăng kơ diñu dưi hưn klei bi mni kơ Kâo.

Y-Êsai 43:7

grăp čô hlei pô arăng iêô hŏng anăn Kâo, phung Kâo hrih leh kơ klei guh kơang Kâo, phung Kâo mmuôn leh anăn mjing leh.”

Y-Êsai 44:21

Brei diih hdơr kơ klei anei, Ơ phung Yakôp, leh anăn Ơ phung Israel, kyuadah diih jing phung dĭng buăl Kâo. Kâo mjing diih leh, diih jing dĭng buăl Kâo, Ơ phung Israel, Kâo amâo srăng wơr bĭt diih ôh.

Y-Êsai 60:21

Hlăk anăn jih jang phung ƀuôn sang ih srăng jing kpă ênô sơăi; diñu srăng dưn čar nanao hlŏng lar. Diñu jing kƀiêng Kâo pla leh, bruă kngan Kâo ngă leh, čiăng kơ Kâo mâo klei guh kơang.

Y-Êsai 61:3

čiăng brei kơ phung kơŭ kyăm hlăm ƀuôn Siôn — čiăng brei kơ diñu kwang mnga hrô kơ hbâo, êa ƀâo mngưi klei hơ̆k hrô kơ klei kơŭ kyăm, čhiăm ao klei bi mni hrô kơ klei mĭn êdu ai. Arăng srăng pia diñu kyâo klei kpă ênô mnơ̆ng Yêhôwa pla leh, čiăng kơ Yêhôwa dưi mâo klei guh kơang.

Y-Yêrêmi 31:33

“Ƀiădah snei jing klei bi mguôp Kâo srăng ngă hŏng sang Israel leh êgao ênuk anăn,” Yêhôwa lač: “Kâo srăng dưm klei bhiăn Kâo hlăm lam diñu, leh anăn Kâo srăng čih klei bhiăn anăn ti ai tiê diñu; leh anăn Kâo srăng jing Aê Diê diñu leh anăn diñu srăng jing phung ƀuôn sang Kâo.

Y-Mathiơ 5:16

Msĕ mơh brei klei mngač diih mtrang ti anăp mnuih, čiăng kơ diñu dưi ƀuh bruă jăk diih ngă leh anăn diñu mpŭ mni kơ Ama diih hlăm adiê.”

Y-Yôhan 3:21

Ƀiădah hlei pô ngă klei sĭt nik hriê kơ klei mngač, čiăng dưi bi êdah klă ñu ngă leh bruă tui si Aê Diê čiăng.

Bruă Phung Khua Ƀĭng Kna 9:31

Snăn Phung Sang Aê Diê hlăm tar ƀar čar Yuđa, čar Galilê, leh anăn čar Samari mâo klei êđăp ênang, hriê kơ prŏng; leh anăn kyuadah Phung Sang Aê Diê êbat hlăm klei huĭ mpŭ kơ Khua Yang leh anăn klei Yang Mngăt Jăk đru, diñu lŏ jing lu hĭn êjai.

Bruă Phung Khua Ƀĭng Kna 9:36

Mâo ti ƀuôn Jôpa hlăm phung ƀĭng kna sa čô mniê đăo, anăn gơ̆ H'Tabitha, čiăng lač Dôrkas (amâodah Ktŏng). Gơ̆ ngă lu bruă jăk leh anăn brei lu mnơ̆ng pap.

Hră Y-Pôl Mơĭt kơ Phung Rôm 8:1

Kyuanăn ară anei hin amâo lŏ mâo klei bi kmhal ôh kơ phung dôk hlăm Krist Yêsu.

Hră Y-Pôl Mơĭt kơ Phung Rôm 8:29

Kyuadah phung Ñu thâo kral leh mơ̆ng êlâo, Ñu čuăn leh mơh brei digơ̆ jing msĕ si rup Anak Ñu, čiăng kơ Anak Ñu jing ayŏng khua kơ lu phung ayŏng adei.

I Kôrantô 3:9

Kyuadah hmei jing phung mă bruă mbĭt kơ Aê Diê. Diih jing hma Aê Diê; diih jing sang Aê Diê.

II Kôrantô 5:17

Kyuanăn tơdah sa čô dôk hlăm Krist, ñu jing mnuih hrih mrâo leh; mnơ̆ng hđăp êgao tuč leh, nĕ anei, jih jang mnơ̆ng jing mrâo leh sơăi.

II Kôrantô 5:5

Aê Diê jing Pô mkra kơ drei klei anăn, Pô brei leh Mngăt Myang kơ drei jing mnơ̆ng ƀuăn.

II Kôrantô 9:8

Leh anăn Aê Diê dưi brei kơ diih jih klei pap êbeh dlai, čiăng kơ diih dưi mâo djăp mta mnơ̆ng nanao, leh anăn dưi brei lu êbeh kơ djăp mta bruă jăk.

Galati 6:15

Kyuadah klei khăt klĭt amâo jing yuôm ôh, amâodah klei amâo khăt klĭt kăn jing yuôm rei, knŏng klei jing mnuih Aê Diê hrih mrâo jing yuôm.

Êphêsô 1:1

Kâo gơ̆ Y-Pôl, sa čô khua ƀĭng kna Krist Yêsu, tui si klei Aê Diê čiăng, Čih mơĭt kơ phung doh jăk dôk ti Êphêsô, phung sĭt suôr hlăm Krist Yêsu.

Êphêsô 1:4

Ñu ruah leh drei hlăm Krist êlâo kơ klei hrih lăn ala, čiăng kơ drei jing doh jăk leh anăn amâo mâo klei ƀuah ôh ti anăp Ñu.

Êphêsô 2:13

Mphŭn dô diih dôk kbưi, ƀiădah ară anei hlăm Krist Yêsu diih dôk giăm leh kyua hŏng êrah Krist.

Êphêsô 2:15

hŏng klei Ñu lăm klei bhiăn leh anăn klei mtă hlăm asei mlei Ñu pô, čiăng kơ Ñu dưi brei dua găp djuê jing sa phung hrih mrâo hlăm Ñu pô. Snăn Ñu ngă klei êđăp ênang,

Êphêsô 2:2

hlăm klei diih dôk dơ̆ng ƀơ̆ng huă mphŭn dô, tui hlue klei mưng lăn ala anei, tui hlue khua mâo klei dưi hlăm êngĭt, yang anăn dôk mă bruă ară anei hin hlăm phung amâo thâo gưt asăp ôh.

Êphêsô 2:6

Ñu bi kbiă lŏ hdĭp drei leh mbĭt hŏng Krist Yêsu, leh anăn Ñu brei drei dôk gŭ mbĭt hŏng Gơ̆ ti jih anôk hlăm adiê,

Êphêsô 4:1

Snăn kâo gơ̆, sa čô jing mnă kyua Khua Yang, kwưh kơ diih dôk dơ̆ng ƀơ̆ng huă năng hŏng klei Aê Diê iêô diih leh,

Êphêsô 4:24

leh anăn brei diih hơô knuih mrâo, hrih leh msĕ si Aê Diê hlăm klei kpă ênô leh anăn klei doh jăk sĭt nik.

Klei Mtô Mñă Klei Bhiăn 32:6

Msĕ snăn hĕ diih bi wĭt kơ Yêhôwa, Ơ phung ƀuôn sang mluk leh anăn amâo mâo klei thâo mĭn ôh? Amâo djŏ Ñu hĕ jing ama ih, Pô hrih, Pô mjing leh anăn bi kjăp ih leh?

Klei Mtô Mñă Klei Bhiăn 5:33

Brei diih êbat djŏ hlăm jih jang êlan Aê Diê diih mtă leh kơ diih, čiăng kơ diih dưi dôk hdĭp, čiăng kơ klei truh kơ diih jing jăk mơak, leh anăn čiăng kơ diih dưi dôk sui hlăm čar diih srăng mă bha.”

Philip 1:6

Kâo thâo sĭt kơ Pô dơ̆ng leh bruă jăk hlăm diih srăng bi ênŭm bruă anăn tơl truh Hruê Yêsu Krist.

Philip 2:13

Kyuadah Aê Diê dôk mă bruă hlăm diih mjing hlăm diih wăt klei čiăng leh anăn klei dưi ngă klei bi mơak kơ Ñu.

Kôlôs 1:10

čiăng kơ diih hdĭp năng kơ Khua Yang, bi mơak kơ Ñu hlăm jih jang klei, mâo boh tŭ dưn hlăm jih jang bruă jăk, lŏ bi mđĭ klei thâo kral Aê Diê.

Kôlôs 3:10

leh anăn hơô leh mnuih mrâo, mnuih mrâo anăn Aê Diê dôk bi mrâo hlăm klei thâo săng tui si rup Pô hrih ñu.

II Têsalônik 2:17

bi juh leh anăn bi kjăp ai tiê diih hlăm djăp mta bruă jăk leh anăn klei blŭ jăk.

I Y-Timôthê 2:10

Ƀiădah brei bruă jăk jing kdrăp diñu, tui si jing djŏ kơ phung mniê hưn diñu jing phung mă bruă kơ Aê Diê.

I Y-Timôthê 5:10

Brei ñu mâo hing ang mă bruă jăk, msĕ si sa čô tuôm rông leh phung anak, thâo jum phung tue, tuôm rao jơ̆ng phung doh jăk, thâo đru phung knap mñai, leh anăn jao ñu pô ngă djăp mta bruă jăk.

I Y-Timôthê 5:25

Msĕ snăn mơh bruă jăk bi êdah mngač, leh anăn wăt tơdah amâo bi êdah mngač, diñu amâo dưi dôk hgăm nanao ôh.

I Y-Timôthê 6:18

Mtă kơ diñu ngă jăk, jing mdrŏng hlăm bruă jăk, jing kmah leh anăn thâo bi mbha kơ arăng.

II Y-Timôthê 2:21

Kyuanăn hlei bi doh ñu pô mơ̆ng klei čhŏ mrŏ anăn, ñu srăng jing čhiên mngan khua yua kơ bruă mpŭ, doh jăk, leh anăn tŭ dưn kơ khua ñu, pioh kơ jih bruă jăk.

II Y-Timôthê 3:17

čiăng kơ mnuih Aê Diê dưi jing klă, mâo klei mprăp leh dưi ngă djăp mta bruă jăk.

Y-Tit 2:14

Ñu jao leh Ñu pô kyua drei čiăng bi tui drei mơ̆ng jih jang klei wê, leh anăn čiăng bi doh jăk drei pioh kơ Ñu pô sa phung ƀuôn sang hur har kơ bruă jăk.

Y-Tit 2:7

Hlăm jih jang klei bi êdah ih pô jing klei bi hmô hlăm bruă jăk, leh anăn hlăm klei ih mtô bi êdah klei doh jăk, klei năng,

Y-Tit 3:1

Bi hdơr bĕ kơ diñu brei thâo đup gưt kơ phung khua kiă kriê leh anăn kơ phung mâo klei dưi hlăm knŭk kna, thâo gưt asăp, kăp ngă jih bruă jăk,

Y-Tit 3:14

Brei phung đăo tinăn gĭr ngă bruă jăk čiăng dưi đru mtam tơdah mâo klei kƀah jêč, snăn đăm diñu kƀah mboh klei thâo đru.

Y-Tit 3:8

Klei blŭ anăn jing sĭt. Kâo čiăng kơ ih mtă bi sĭt kơ klei anăn, čiăng kơ phung đăo leh kơ Aê Diê srăng pioh jih ai tiê ngă bruă jăk. Klei anăn jăk snăk leh anăn yuôm kơ mnuih.

Hêbrơ 10:24

Brei drei bi mĭn si drei dưi mtrŭt hdơ̆ng drei pô kơ klei khăp leh anăn kơ klei ngă bruă jăk.

Hêbrơ 13:21

brei kơ diih klei dưi ngă djăp mta bruă jăk, čiăng kơ diih dưi ngă klei Ñu čiăng, êjai Ñu mă bruă hlăm diih klei bi mơak kơ Ñu hlăm Yêsu Krist. Kơ Ñu yơh brei mâo klei guh kơang hlăm jih jang ênuk. Amen.

I Y-Pêtrôs 2:12

Brei diih dôk dơ̆ng ƀơ̆ng huă jăk nanao ti krah phung amâo đăo, čiăng kơ tơdah diñu mčeh kơ diih jing mnuih ngă jhat, diñu dưi ƀuh bruă jăk diih ngă leh anăn mpŭ mni kơ Aê Diê ti hruê Ñu srăng lŏ hriê.

I Y-Yôhan 1:7

Ƀiădah tơdah drei êbat hlăm klei mngač msĕ si Ñu dôk hlăm klei mngač, drei mâo klei bi mguôp hdơ̆ng drei, leh anăn êrah Yêsu Anak Ñu bi doh hĕ drei mơ̆ng jih jang klei soh.

I Y-Yôhan 2:6

hlei pô lač ñu dôk hlăm Yêsu, brei ñu êbat msĕ si Yêsu pô êbat leh.