Bruă Phung Khua Ƀĭng Kna 26:18 - Klei Aê Diê Blŭ 2015

¹⁸ čiăng mblang ală diñu, brei diñu đuĕ mơ̆ng klei mmăt wir phă kơ klei mngač, leh anăn mơ̆ng klei myang Satan wir phă klei myang Aê Diê, čiăng kơ diñu dưi mă tŭ klei pap brei kơ klei soh leh anăn dưn ngăn mbĭt hŏng phung jing doh jăk leh hŏng klei đăo kơ Kâo.’ ”

Bruă Phung Khua Ƀĭng Kna 26:18 Iomraidhean Croise

Klei Mmuñ Hđăp 119:18

Mblang ală kâo čiăng kơ kâo dưi ƀuh klei yuôm bhăn hlăm klei bhiăn Ih.

Klei Mmuñ Hđăp 146:8

Yêhôwa mblang ală phung bum, Yêhôwa lŏ bi kơrŭ phung gô leh. Yêhôwa khăp kơ phung kpă ênô.

Y-Êsai 29:18

Hlăm hruê anăn phung kngăl srăng hmư̆ klei blŭ mơ̆ng sa pŏk hdruôm hră klĭt, leh anăn mơ̆ng klei mmăt leh anăn mlam ală phung bum srăng ƀuh mngač.

Y-Êsai 32:3

Hlăk anăn ală phung thâo ƀuh amâo srăng pĭt hĕ ôh, leh anăn knga phung thâo hmư̆ srăng mđing.

Y-Êsai 35:5

Hlăk anăn ală phung bum srăng ƀuh mngač, leh anăn knga phung kngăl srăng thâo hmư̆.

Y-Êsai 42:16

Kâo srăng atăt phung bum ală ti êlan diñu amâo tuôm thâo kral ôh, Kâo srăng gai diñu hlăm êlan điêt diñu amâo thâo bĭt ôh. Kâo srăng bi mlih klei mmăt jing klei mngač ti anăp diñu, leh anăn anôk lăn ƀlŭng êhŭt jing lăn dap. Snăn yơh Kâo srăng ngă, leh anăn amâo lui diñu ôh.

Y-Êsai 42:7

čiăng mblang ală phung bum, čiăng bi kbiă phung mnă mơ̆ng ƀăng arăng krư̆, leh anăn čiăng bi êngiê mơ̆ng sang mnă phung dôk hlăm klei mmăt.

Y-Êsai 43:8

Atăt ba bĕ phung ƀuôn sang anei mâo ală ƀiădah bum, leh anăn phung mâo knga ƀiădah kngăl!

Y-Êsai 49:6

Ñu lač, “Jing klei điêt đei kơ ih jing dĭng buăl Kâo čiăng lŏ kơrŭ phung găp djuê Yakôp leh anăn čiăng lŏ mdơ̆ng phung Israel adôk. Kâo msĕ mơh srăng brei ih jing klei mngač kơ phung tue, čiăng kơ klei Kâo bi mtlaih dưi truh ti knhal lăn ala.”

Y-Êsai 9:2

Phung ƀuôn sang êbat leh hlăm klei mmăt ƀuh leh klei mngač prŏng. Klei mngač mtrang leh kơ phung dôk hlăm čar mmăt tĭt.

Y-Malaki 4:2

Ƀiădah kơ diih phung huĭ mpŭ kơ anăn Kâo, yang hruê klei kpă ênô srăng ƀlĕ mâo klei bi hlao hlăm siap ñu. Diih srăng kbiă kdăt msĕ si êđai êmô mơ̆ng war.

Y-Mathiơ 4:10

Yêsu lač kơ ñu, “Đuĕ bĕ Satan! Kyuadah Klei Aê Diê Blŭ čih leh snei: ‘Brei ih kkuh mpŭ kơ Khua Yang Aê Diê ih, leh anăn brei ih mă bruă knŏng kơ Ñu yơh.’ ”

Y-Mathiơ 4:16

phung mnuih ƀuôn sang hdĭp hlăm klei mmăt ƀuh leh klei mngač prŏng, leh anăn klei mngač mtrang leh kơ phung mnuih hdĭp hlăm anôk leh anăn êyui klei djiê.”

Y-Luk 1:77

čiăng brei kơ phung ƀuôn sang Ñu klei thâo săng kơ klei bi mtlaih hŏng klei pap brei klei soh diñu,

Y-Luk 1:79

čiăng mtrang bi mngač phung dôk gŭ hlăm klei mmăt leh anăn hlăm êyui klei djiê, čiăng atăt drei êbat hlăm êlan klei êđăp ênang.”

Y-Luk 2:32

jing klei mngač brei klei bi êdah kơ phung tue, leh anăn jing klei guh kơang kơ phung ƀuôn sang Ih Israel.”

Y-Luk 24:45

Leh anăn Yêsu pŏk klei mĭn diñu, čiăng kơ diñu dưi thâo săng Klei Aê Diê Blŭ.

Y-Luk 24:47

leh anăn djŏ kơ klei arăng srăng mtô hlăm anăn Ñu kơ jih jang găp djuê mnuih dơ̆ng mơ̆ng ƀuôn Yêrusalem, klei kmhal leh anăn klei pap brei kơ klei soh.

Y-Luk 4:18

“Mngăt Myang Khua Yang dôk ti Kâo, kyuadah Ñu trôč êa ƀâo mngưi ti Kâo leh, čiăng Kâo hưn klei mrâo mrang jăk kơ phung ƀun ƀin. Ñu tiŏ hriê Kâo brei hưn klei bi êngiê kơ phung mnă, brei kơ phung bum ală klei lŏ dưi ƀuh, bi êngiê phung arăng ktư̆ juă leh,

Y-Yôhan 17:17

Bi doh jăk diñu hŏng klei sĭt nik; klei Ih blŭ jing klei sĭt nik.

Y-Yôhan 3:19

Snei jing klei phat kđi: klei mngač truh leh hlăm lăn ala, ƀiădah mnuih khăp kơ klei mmăt lu hĭn kơ klei mngač, kyuadah bruă diñu jing jhat.

Y-Yôhan 4:10

Yêsu lŏ wĭt lač kơ gơ̆, “Tơdah ih thâo mnơ̆ng Aê Diê thiê brei, leh anăn tơdah ih thâo kral Pô dôk blŭ hŏng ih, lač, ‘Brei êa Kâo mnăm đa,’ snăn ih pô srăng akâo kơ Ñu, leh anăn Ñu srăng brei êa hdĭp kơ ih.”

Y-Yôhan 4:14

ƀiădah hlei pô mnăm êa Kâo brei amâo srăng lŏ mhao ôh; êa Kâo brei srăng jing hlăm ñu sa bĭt akŏ êa bluh truh kơ klei hdĭp hlŏng lar.”

Y-Yôhan 8:12

Yêsu lŏ blŭ kơ phung diñu, lač, “Kâo jing klei mngač kơ lăn ala. Hlei pô tui hlue Kâo amâo srăng êbat hlăm klei mmăt ôh, ƀiădah srăng mâo klei mngač kơ klei hdĭp.”

Y-Yôhan 9:39

Yêsu lač, “Kâo hriê leh ti lăn ala čiăng phat kđi, čiăng kơ mnuih amâo thâo ƀuh ôh dưi ƀuh, leh anăn čiăng kơ mnuih thâo ƀuh jing hĕ bum ală.”

Y-Yôhan 9:5

Êjai Kâo dôk hlăm lăn ala, Kâo jing klei mngač kơ lăn ala.”

Bruă Phung Khua Ƀĭng Kna 10:43

Jih jang phung khua pô hưn êlâo hưn leh hlei pô đăo kơ Ñu mâo klei pap brei kơ klei soh hlăm anăn Ñu.”

Bruă Phung Khua Ƀĭng Kna 13:47

Kyuadah msĕ snăn Khua Yang mtă leh kơ hmei, lač, ‘Kâo mjing ih leh klei mngač kơ phung tue, čiăng kơ ih dưi ba klei bi mtlaih truh ti knhal lăn ala.’ ”

Bruă Phung Khua Ƀĭng Kna 15:9

Ñu amâo yap mdê ôh phung drei hŏng phung digơ̆, ƀiădah Ñu bi doh ai tiê digơ̆ hŏng klei digơ̆ đăo.

Bruă Phung Khua Ƀĭng Kna 2:38

Y-Pêtrôs lač kơ diñu, “Kmhal bĕ kơ klei soh diih, leh anăn brei grăp čô diih tŭ klei ƀaptem hlăm anăn Yêsu Krist, čiăng mâo klei pap brei kơ klei soh diih; leh anăn diih srăng mă tŭ Yang Mngăt Jăk Aê Diê brei.

Bruă Phung Khua Ƀĭng Kna 20:21

Kâo mtô kơ phung Yuđa leh anăn kơ phung Grĕk klei kmhal kơ klei soh hŏng Aê Diê, leh anăn klei đăo hlăm Khua Yang drei Yêsu Krist.

Bruă Phung Khua Ƀĭng Kna 20:32

Ară anei kâo jao diih kơ Aê Diê leh anăn kơ klei Ñu blŭ pap, klei blŭ anăn dưi brei diih hriê kơ prŏng leh anăn brei diih dưn ngăn mbĭt hŏng jih jang phung Aê Diê bi doh jăk leh.

Bruă Phung Khua Ƀĭng Kna 26:19

“Snăn Ơ Mtao Agripa, kâo amâo hngah ôh kơ klei bi ƀuh mơ̆ng adiê anăn.

Bruă Phung Khua Ƀĭng Kna 26:23

čiăng lač Yang Krist srăng tŭ klei knap mñai, leh anăn kyua Ñu jing Pô kbiă lŏ hdĭp tal êlâo hĭn mơ̆ng phung djiê, Ñu srăng hưn klei mngač kơ phung ƀuôn sang leh anăn kơ phung tue.”

Bruă Phung Khua Ƀĭng Kna 3:19

Kyuanăn kmhal bĕ kơ klei soh diih leh anăn lŏ wĭt kơ Aê Diê, čiăng kơ Ñu pap brei klei soh diih,

Bruă Phung Khua Ƀĭng Kna 5:31

Aê Diê mđĭ brei Pô anăn dôk leh tĭng hnuă Ñu jing Khua Mil Čhil leh anăn Pô Bi Mtlaih, čiăng brei phung Israel kmhal leh anăn mâo klei pap brei kơ klei soh.

Hră Y-Pôl Mơĭt kơ Phung Rôm 8:17

Leh anăn tơdah drei jing phung anak, drei jing mơh phung dưn ngăn, phung dưn ngăn Aê Diê, leh anăn phung dưn ngăn mbĭt hŏng Krist, sĭt nik tơdah drei tŭ klei knap mñai mbĭt hŏng Ñu, drei srăng dưi mâo klei guh kơang mbĭt hŏng Ñu msĕ mơh.

I Kôrantô 1:2

Čih mơĭt kơ Phung Sang Aê Diê ti ƀuôn Kôrantô, kơ phung doh jăk leh hlăm Krist Yêsu, phung Aê Diê iêô leh brei jing phung doh jăk mbĭt hŏng jih jang phung dôk tar ƀar anôk iêô wah lač kơ anăn Khua Yang drei Yêsu Krist, Khua Yang diñu leh anăn Khua Yang drei.

I Kôrantô 1:30

Aê Diê jing akŏ klei hdĭp diih hlăm Krist Yêsu, Pô Aê Diê mjing leh kơ drei klei thâo mĭn, klei kpă ênô, klei doh jăk, leh anăn klei bi tui.

II Kôrantô 4:4

Kơ phung amâo đăo anăn, yang ênuk anei guôm hĕ leh klei mĭn diñu, čiăng đăm brei diñu thâo săng klei mngač mơ̆ng klei mrâo mrang jăk kơ klei guh kơang Krist, Pô jing rup Aê Diê.

II Kôrantô 4:6

Kyuadah Aê Diê Pô lač leh, “Brei klei mngač mtrang hlăm anôk mmăt,” mtrang leh hlăm ai tiê hmei, čiăng brei klei mngač mơ̆ng klei thâo săng klei guh kơang Aê Diê mtrang mơ̆ng ƀô̆ mta Krist.

II Kôrantô 6:14

Đăm bi mđua knông hŏng phung amâo đăo ôh. Kyuadah ya klei bi mguôp dưi mâo klei kpă hŏng klei wê? Amâodah ya klei bi mguôp klei mngač dưi mâo hŏng klei mmăt?

Galati 2:20

Arăng pơ̆ng leh kâo ti kyâo bi kal mbĭt hŏng Krist; snăn amâo djŏ ôh kâo pô dôk hdĭp, ƀiădah Krist dôk hdĭp hlăm kâo. Leh anăn klei kâo dôk hdĭp hlăm kđeh ară anei, jing kâo dôk hdĭp hŏng klei đăo kơ Anak Aê Diê, Pô khăp kơ kâo leh anăn jao leh Ñu pô kyua kâo.

Galati 3:14

čiăng kơ klei jăk jĭn Aê Diê ƀuăn leh kơ Y-Abraham dưi truh kơ phung tue hlăm Krist Yêsu, snăn drei dưi mă tŭ hŏng klei đăo klei Aê Diê ƀuăn leh jing Yang Mngăt Jăk.

Galati 3:2

Brei kâo thâo knŏng klei anei: diih mă tŭ leh Yang Mngăt Jăk hŏng bruă tui si klei bhiăn mơ̆, amâodah kyua klei đăo mơ̆ng klei diih hmư̆?

Êphêsô 1:11

Hlăm Krist, drei jing pô dưn ngăn tui si klei čuăn mơ̆ng Pô ngă jih jang mnơ̆ng tui si hdră Ñu čiăng,

Êphêsô 1:14

Yang Mngăt Jăk anăn jing mnơ̆ng ƀuăn rơ̆ng kơ klei drei dưn ngăn, tơl drei mă tŭ ngăn dưn anăn, pioh bi mni kơ klei guh kơang Ñu.

Êphêsô 1:18

čiăng kơ ală ai tiê diih jing mngač, snăn kơh diih dưi thâo ya jing klei čang hmăng diih mâo kyua klei Ñu iêô diih leh, ya jing klei mdrŏng klei dưn ngăn guh kơang Ñu hlăm phung doh jăk,

Êphêsô 1:7

Hlăm Pô anăn drei mâo klei bi tui hŏng êrah Gơ̆, klei pap brei kơ klei soh drei, tui si klei mdrŏng klei Ñu pap,

Êphêsô 2:8

Kyuadah hŏng klei pap yơh diih tlaih leh kyua klei đăo. Klei bi mtlaih anăn amâo kbiă hriê mơ̆ng diih pô ôh, ƀiădah jing klei Aê Diê brei —

Êphêsô 4:18

Klei thâo săng diñu jing hĕ mmăt leh, bi ktlah leh mơ̆ng klei hdĭp Aê Diê kyua klei diñu mluk kbiă hriê mơ̆ng ai tiê khăng diñu.

Êphêsô 5:11

Đăm bi mguôp ôh hlăm bruă amâo mâo klei tŭ dưn mơ̆ng klei mmăt, ƀiădah brei diih bi êdah klă ya bruă anăn jing.

Êphêsô 5:14

Kyua anăn Klei Aê Diê Blŭ lač leh, “Ơ pô dôk pĭt, mdih leh anăn kgŭ bĕ ih mơ̆ng phung djiê, leh anăn Krist srăng bi mngač ih.”

Êphêsô 5:8

Mphŭn dô diih dôk hlăm klei mmăt, ƀiădah ară anei diih mâo klei mngač hlăm Khua Yang. Êbat bĕ msĕ si phung anak klei mngač,

Êphêsô 6:12

Kyuadah drei amâo bi kdơ̆ng hŏng kđeh leh anăn êrah ôh, ƀiădah hŏng phung khua kiă kriê, hŏng phung mâo klei dưi, hŏng phung khua mtao lăn ala ênuk mmăt anei, hŏng phung yang jhat ƀai dôk hlăm jih adiê.

II Y-Timôthê 2:26

leh anăn diñu lŏ hdơr leh anăn đuĕ mơ̆ng kđông yang jhat, pô mă čăp leh diñu brei ngă klei ñu čiăng.

Hêbrơ 10:10

Hŏng klei Aê Diê čiăng anăn Yêsu Krist bi doh jăk drei leh hŏng klei myơr asei mlei Ñu pô sa blư̆ man djăp kơ jih jang ênuk.

Hêbrơ 10:14

Kyuadah hŏng knŏng sa mnơ̆ng myơr Ñu mjing jăk klă leh kơ jih jang ênuk phung Ñu bi doh jăk leh.

Hêbrơ 11:6

Leh anăn tơdah amâo mâo klei đăo, amâo dưi bi mơak kơ Aê Diê ôh. Kyuadah hlei pô čiăng nao giăm Aê Diê, brei đăo mâo Aê Diê, leh anăn Aê Diê mưn hlei pô duah Ñu.

Hêbrơ 9:15

Kyuanăn Krist jing Pô ti krah kơ klei bi mguôp mrâo, čiăng kơ phung mâo leh klei iêô dưi mă tŭ ngăn dưn hlŏng lar Aê Diê ƀuăn leh, kyuadah Ñu djiê leh čiăng bi tui phung mnuih mơ̆ng klei soh diñu ngă leh ti gŭ klei bi mguôp tal êlâo.

Y-Yakơ 2:5

Hmư̆ bĕ, Ơ phung ayŏng adei kâo khăp. Amâo djŏ hĕ Aê Diê tuôm ruah leh phung ƀun ƀin hlăm lăn ala brei jing mdrŏng hlăm klei đăo, leh anăn jing phung dưn ƀuôn ala mtao Ñu ƀuăn leh kơ phung khăp kơ Ñu?

I Y-Pêtrôs 1:4

Leh anăn Ñu brei mơh kơ drei ngăn dưn amâo thâo rai, amâo thâo čhŏ, amâo thâo dliu ôh, pioh leh hlăm adiê kơ diih,

I Y-Pêtrôs 2:25

Kyuadah diih klah đuĕ leh msĕ si biăp, ƀiădah ară anei diih wĭt leh kơ Mgăt Biăp leh anăn Pô Kiă mngăt diih.

I Y-Pêtrôs 2:9

Ƀiădah diih jing sa phung găp djuê Aê Diê ruah leh, phung khua ngă yang kơ mtao, sa phung găp djuê doh jăk, phung ƀuôn sang Aê Diê pô, čiăng kơ diih dưi hưn bruă yuôm bhăn Pô iêô leh diih kbiă mơ̆ng klei mmăt truh kơ klei mngač yuôm bhăn Ñu.

I Y-Yôhan 1:9

Tơdah drei hưn klei soh drei, Ñu jing sĭt suôr leh anăn kpă, srăng pap brei klei soh drei leh anăn bi doh hĕ drei mơ̆ng jih jang klei wê.

I Y-Yôhan 2:12

Ơ phung anak điêt, kâo čih kơ diih, kyuadah klei soh diih Aê Diê pap brei leh kyua anăn Ñu.

I Y-Yôhan 3:8

Hlei pô ngă soh jing anak yang jhat; kyuadah yang jhat ngă soh leh mơ̆ng mphŭn dơ̆ng. Anak Aê Diê bi êdah leh čiăng bi rai bruă yang jhat.

I Y-Yôhan 5:19

Drei thâo kơ drei jing anak Aê Diê, leh anăn jih lăn ala dôk ti gŭ klei myang yang jhat.

Y-Yut 1:1

Kâo gơ̆ Y-Yut, sa čô dĭng buăl Yêsu Krist leh anăn adei Y-Yakơ, čih mơĭt kơ phung Aê Diê iêô leh, phung Aê Diê Ama khăp leh anăn pioh leh kơ Yêsu Krist.

Klei Bi Êdah 21:27

Ƀiădah amâo mâo mnơ̆ng čhŏ amâodah pô ngă klei Aê Diê bi êmut kheh amâodah klei luar srăng mŭt tinăn ôh, ƀiădah knŏng phung mâo anăn arăng čih leh hlăm hdruôm hră klei hdĭp Êđai Biăp.