2 തെച്ചലോനിക്കെര 1:9 - പുദിയ നേമ

^9-10 കറുത്താവു ബന്റ ജിനാത്തി അദു ബലിബലിയദു എന്റു തന്റ ചുദ്ദമത്ത നെരേയ പറേവൊരു. ഈ നെരേയണ്ടൊന്റ എങ്കട ബാക്കു കേട്ടിന്തിച്ചു കറുത്താവുനെ നമ്പിന നീങ്കമു ഇപ്പെരി. അദുനെ നമ്പിന ഒക്കാ മയിച്ചെരമു ആ ജിനാത്തി അദിച്ചെയപടുവൊരു. അങ്ങാണെ ഈച്ചിരന്റ നല്ലബാക്കുനെ കേട്ടിരാദെ നടാന്തെര കറുത്താവുന്റ മിരാട്ടിലിന്തു കാണദാവനുമു ബലിബലിയദാന അദുന്റ നിലേമു ബിലേമു അയിരക്കു നട്ടമാവനുമു ചെയിവൊയ്. അയിതന്നെയല്ല ഒരുന്നമു തീരത്ത ഗിരാച്ചാര അയിരക്കു ബരുത്തിച്ചു കറുത്താവു അയിരളെ ചിച്ചിപ്പു.

2 തെച്ചലോനിക്കെര 1:9 Iomraidhean Croise

മത്തായി 16:27

മയിച്ചമഗെനാച്ചു ബന്ത നാനു എന്റ അപ്പെനാന ഈച്ചിരന്റ ബുളാങ്കിന്റ ബെളിച്ചത്തി ദേവദൂദെരണ്ടൊന്റ ബരുവടെക്കു ഓരോരുത്തെരക്കുമു താങ്ക ചെയിദെങ്കു കണാക്കായി പഗേര കൊടുപ്പെയ്.

മത്തായി 22:13

എമ്മടെക്കു റാജാവു തന്റ പണിക്കാറെരണ്ടൊന്റ പല്ല പറേഞ്ചു: ‘ഇമ്മലെമി, ഏന്റ കയികാലൊക്ക കെട്ടിച്ചു പുറാത്തുകീന്റ കാവുളഗെട്ട ജാഗത്തെക്കു ഇട്ടുക്കാമി. അവുടെ കിരേച്ചിലുമു പല്ലുകടിമു ആയിപ്പൊയ്.’”

മത്തായി 24:30

“എമ്മടെക്കു മയിച്ചമഗെനാച്ചു ബന്ത നാനു ബന്റെന്റ അടിയള മോടഗേരത്തി കണ്ടുബരുവൊയ്. ആ ഗളിഗെലി ബൂമിലികീന്റ ഒക്കാ ജാദിലിപട്ടെരളുമു അയ്യബുളിപ്പൊരു. നാനു ബലിയ ചഗുത്തിലിമു ബുളാങ്കിന്റ ബെളിച്ചത്തിമു മാവുകാരിലി ബന്റെനെ അയിര മെലേവൊരു.

മത്തായി 25:41

പിന്നെ റാജാവു തന്റ ഇടാത്തുബരിലി നിന്റുകീന്റെരണ്ടൊന്റ ഇങ്ങാണെ പറേവു: ‘ചാപ്പ പുടിച്ചെരളേ, നീങ്ക എന്നാത്തിന്തു പേയിക്കുമു അയിന്റ ജൊദെയക്കുമു ഒരുക്കിബെച്ചുകീന്റ ഒരുന്നമു മഞ്ചുപോഗത്ത തീക്കു പോമി.

മത്തായി 25:46

അങ്ങാണെ അയിരക്കു എപ്പൊണെക്കുമുകീന്റ ചിച്ചെമു നേരുകാറെരക്കു എപ്പൊണെക്കുമു ബദുക്കുവകീന്റ ഉഗിരുമു കിട്ടുവൊയ്.”

മത്തായി 26:24

മയിച്ചമഗെനാച്ചു ബന്ത എന്നെപറ്റി എവുദികീന്റപല്ലെതന്നെ നാനു ഉറേപ്പാച്ചുമു ചാവെയ്. എന്റദെമു മയിച്ചമഗെനാച്ചു ബന്ത എന്നെ ബുളേവിലി കാട്ടികൊടുക്കിന്റ മയിച്ചെങ്കു ചാല ഗിരാച്ചാരമായിപ്പൊയ്! ഇബിയപ്പ, ആ മയിച്ചെയ് പുറാഗദിന്തിന്തെങ്കി അയിങ്കു നല്ലെനായിന്തയ്.”

മത്തായി 7:23

എമ്മടെക്കു നാനു അയിരണ്ടൊന്റ: ‘എനാക്കു നിങ്കളെ ഗൊത്തേകാണി. കെട്ടകാരിയ ചെയിന്റെരളേ, എന്നാത്തിന്തു പോമി’ എന്റു പറേവെയ്.”

ലൂക്കോച്ചു 13:27

എമ്മടെക്കു കുള്ളുകാറെയ്: ‘നീങ്ക എവുടിന്തു ബന്തെരി എന്റു എനാക്കു ഗൊത്തുകാണി. നീങ്ക പാപ്പകറുമ ചെയിന്റെരളാന്റു. നീങ്ക ഒക്കായിമു എന്നാത്തിന്തു പോമി’ എന്റു പറേവൊയ്.

ഓഗെന്നാനു 5:14

എന്റെങ്കി കുറെകവുഞ്ചപ്പൊ ഏച്ചു അയിനെ ദേവരുഗുടിലിന്തു മെലേഞ്ചു. അദു അയിന്റൊന്റ: “ഇമ്മലേ, നീ ചാരിയാനെയില്ല, നീക്കു ഇഞ്ഞിമു ബലിയ കട്ടപ്പാടു ബാരദിപ്പബേണ്ടി ഇഞ്ഞിതൊട്ടു പാപ്പ ചെയിവനാഗയ്” എന്റു പറേഞ്ചു.

പിലിപ്പിയെര 3:19

ഏരക്കു തീനരാഗ തന്നെയാന്റു ഗിരാച്ചാര. എന്നെഗെന്റെങ്കി അയിരണ്ട ഈച്ചിര ബാറാന്റു. നാണകെട്ടെനൊക്ക ചെയിന്റെയെയ് ബലിയ കാരിയ എന്റാന്റു ഏര കണാക്കാക്കിന്റെയെയ്. അയിതന്നെയല്ല ഈ ബൂമിലികീന്റ കാരിയത്തിനെപറ്റി മാത്തിരമാന്റു ഏര നിനേക്കിന്റെയെയ്.

1 തെച്ചലോനിക്കെര 5:3

എന്റെങ്കി ഈച്ചിരനെ നമ്പത്ത മയിച്ചെര: “ഒക്കാ കാരിയമു ബെടുപ്പായി നടാക്കിന്റൊയ്, എങ്കക്കു ഒന്റുമു ബാരയ്” എന്റു പല്ല പറേവൊരു. ഒരു ബാറുകാറത്തിക്കു പെറുവളേങ്കു നോവു ബന്റപല്ലെ ആ മയിച്ചെരക്കു ബിരേന്റു ഗിരാച്ചാര ബരുവൊയ്. അയിരക്കു അയിലിന്തു രെച്ചപടുവനുമു പറ്റയ്.

2 തെച്ചലോനിക്കെര 2:8

എമ്മടെക്കു അയിനെ കണ്ടുബരുവൊയ്. എന്റെങ്കി കറുത്താവാന ഏച്ചു ബലിയ അദിഗാരകീന്റദാച്ചു ബരുവടെക്കു തന്റ ബായിലിന്തു ബന്റ ഉച്ചിലുകോണ്ടു കെട്ടകാരിയ ചെയിന്റ അയിനെ കാണദെമാടിച്ചു അയിന്റ ചഗുത്തിമു അദിഗാരമൊക്ക ഒന്റുക്കുമല്ലദാക്കുവു.

എബ്ബുറായെര 10:29

അങ്ങാണാനെങ്കി ഈച്ചിരന്റ മഗേനെ തള്ളിപറേവനുമു തന്നെ ചുദ്ദമാക്കിന നേമത്തിന്റ ചോരെനെ ചുദ്ദകാണത്ത ചോരെ എന്റു കണാക്കാക്കുവനുമു ദരുമകാട്ടിന നുവേലുനെ മാനകെടുത്തുവനുമു ചെയിദെങ്കി അങ്ങാണെ ചെയിന്റെങ്കു എത്തെനെ ബലിയ ചിച്ചെ കിട്ടുവൊയ് എന്റു നിനേച്ചു നോക്കുമി.

2 പത്തുറോച്ചു 2:17

കാണത്തെനെ പടേപ്പിക്കിന്റ ഏര നീരുകാണത്ത കിണാറുനെപല്ലെമു ചുറ്റിലെ കാറ്റടിപ്പടെക്കു പോന്റ മാവുകാരുനെ പല്ലെമാന്റു. ഏരളെകോണ്ടു മയിച്ചെരക്കു ഒരു ഉബഗാരമുകാണി. അയിരക്കുബേണ്ടി കാവുളഗെട്ട ഒരു ജാഗ ഈച്ചിര ഒരുക്കിബെച്ചുകീന്റു.

2 പത്തുറോച്ചു 3:7

ഈ കാരിയമൊക്ക ചെയിദ ഈച്ചിരതന്നെ ഇപ്പൊണില മോടത്തിനെമു ബൂമിനെമു തീലി കാണദെമാടുവെന്റു പറേഞ്ചുകീന്റു. ഈച്ചിരനെ പേടികാണത്ത മയിച്ചെരളെ അദു കുറ്റബിദിപ്പനുമു കാണദെമാടുവനുമു ചെയിന്റ ജിന ബന്റബരേമു അദു ഈ മോടത്തിനെമു ബൂമിനെമു ബെച്ചുകീന്റു.

ഊദെ എവുദിന കത്തു 1:13

കടേലില ബലിയ തിരെമാലെ അങ്കെക്കുമു ഇങ്കെക്കുമു അലേച്ചിച്ചു നിരെ പൊങ്കിബന്റപല്ലെ ഏര ചെയിന്റ നാണകെട്ട കാരിയമൊക്ക ഒക്കായിമു അറിവൊരു. പൊരുബൊവ്വു തപ്പികോണ്ടു പോന്റ ബെള്ളിമീനുവളെ പല്ലത്തെരളാന്റു ഏര. ഇങ്ങാണത്ത മയിച്ചെരക്കുബേണ്ടി കറുത്താവു എപ്പൊണെക്കുമായി ഇറുട്ടുകുത്തിന കാവുളകീന്റ ജാഗമാന്റു മാടിബെച്ചുകീന്റെയെയ്.

കാട്ടികൊടുത്ത കാരിയ 20:11

അയികവുഞ്ചിച്ചു നാനു ബലിയെനുമു ബെളുത്തെനുമാന ഒരു ബുളാങ്കിന്റ കച്ചാലെമു അയിലി ഒരുത്തെയ് ഉളേച്ചുകീന്റെനെമു മെലേഞ്ചെയ്. അദുന്റ മുല്ലെലക്കെലിന്തു മോടമു ബൂമിമു ഓടി ഒളിച്ചൊണ്ടയ്. അയിനെ പിന്നെ കണ്ടുബരുവനേകാണി.

കാട്ടികൊടുത്ത കാരിയ 20:14

ചാവുനെമു പാദാളത്തിനെമു തീഗുണ്ടുക്കു തള്ളിയിട്ടരു. ഈ തീഗുണ്ടു രാണ്ടാമത്തില ചാവാന്റു.

കാട്ടികൊടുത്ത കാരിയ 21:8

എന്റെങ്കി പേടികോണ്ടു ബൊവ്വക്കെ നില്ലിന്റെരക്കുമു നമ്പെലുകാണത്തെരക്കുമു ഗോപ്പളഗെട്ടെരക്കുമു മയിച്ചെരളെ കൊല്ലിന്റെരക്കുമു ചുള്ളത്തിന്റെരക്കുമു ജേട്ടെമാടിന്റെരക്കുമു കൂടത്തിനെ തൊവുന്റെരക്കുമു കള്ള പറേന്റ ഏവെങ്കുമു കിട്ടിന്റ ഓദി തീഗുണ്ടു ആയിപ്പൊയ്. അവുടെ ഗെന്തഗമു തീമു കത്തികോണ്ടേ ഇപ്പൊയ്. ഏനാന്റു രാണ്ടാമത്തില ചാവു.”

കാട്ടികൊടുത്ത കാരിയ 22:15

നായിവമു ജേട്ടെമാടിന്റെരമു ചുള്ളത്തികോണ്ടു നടാക്കിന്റെരമു കൊല്ലിന്റെരമു കൂടത്തിനെ തൊവുന്റെരളുമു കള്ളബാക്കു പറേവ അലാക്കിന്റെരളുമു കള്ള പറേന്റ ഏവെരളാനദെമു പുറാത്താവൊരു.”