SAN MATEO 5:12 - Nuevo Testamento en Quichua Cañar 1996

¹² Cancunata chashna llaquichicpipish, ¡cushicuichiclla! Taita Diosca jahua pachapimi, cancuna japina cashcata yallita cunga. Chashnallatacmi ñaupa punzhapica, Diosmanta ñaupa huillaccunatapish llaquichircacuna.

Dios Rimashcata Quillcashcami

¹² Chashna llaquichicpipish, ¡cushicuichiclla! Diosca jahua pachapimi, cancuna japina cashcata yallita cunga. Ñaupa punzhapipish Dios ima nishcata huillaccunataca llaquichircacunami.

SAN MATEO 5:12 Iomraidhean Croise

SAN MATEO 16:27

Ashtahuanpish Runa Tucungapac shamushca*f** ñucaca, ñuca Taitapac sumaimana achiclla cashcahuan, shinallatac paipac angelcunahuan cutimushpaca, tucuimanmi imata ruhuashca shinallatac ricushpa cusha.

SAN MATEO 6:16

Cancuna ayunashpaca, ama chai mishqui shimi, jayac shungucuna shina, llaquilla ñahui tucushpa ayunaichicchu. Paicuna chashna ruhuashpaca, cai pachapacllami alli nishca cancuna. Chaica chashnatacmi can.

SAN LUCAS 13:34

¡Aij, Jerusalenpi causaccunalla! Cancunaca Diosmanta ñaupa huillaccunataca huañuchiccunami canguichic. Diosmanta huillachun cachashcacunatapish rumicunahuan shitaccunami canguichic. Cancunataca tauca cutinmi mama huallpa huahuacunata c'ayashpa ucllac shina, tandachisha nircani. Chashna tandachisha nicucpipish, cancunaca mana uyarcanguichicchu.

SAN LUCAS 6:23

Cancunata chashna llaquichicpipish, ¡cushicuichiclla! Taita Diosca jahua pachapica, cancuna japina cashcataca achcatami cunga. Diosmanta ñaupa huillaccunatapish, chai gentecunapac ñaupa taitacunaca chashnallatacmi llaquichic carcacuna.

SAN LUCAS 6:35

Ashtahuanpish cancunaca p'iñaccunata c'uyashpami, allita ruhuana canguichic. Imata mañachishpaca, chaimanta imata japinataca mana yuyanachu canguichic. Chashna ruhuashpami, cancunaca allicunata japinguichic. Jahua pachapi causac Taita Diospac huahuacunapish canguichicmi. Taita Diosca mana paita pagui niccunatapish, millaicunatapish llaquinmi.

HECHOS 16:25

Chashna huatashca cashpapish, Pabloca Silasndic chaupi tuta shinataca Taita Diosman mañashpa cantacucpimi, chaipi cac caishuc prezucunapish chaita uyarcacuna.

HECHOS 5:41

Ña mandaccuna cacharicpi llucshishpaca: “¡Jesús llaquita apashca shinami, paita c'aticushcamanta Taita Diosca ñucanchictapish llaquita apachun saquishca!” nishpami, Jesús acllashca huillaccunaca munai cushicushpa rircacuna.

ROMANOS 5:3

Mana chaillamantachu cushicunchic, ashtahuanpish llaquita apashcamantapish cushicunchicmi. Chai llaquicunami mishangapac ashtahuan alli crina yuyaita cun.

1 CORINTIOS 3:8

Shina cashcamanta tarpucpish, parcucpish chai shinallatacmi canchic. Shina cacpipish quiquin imata ruhuashcata ricushpami, Taita Diosca cunga.

2 CORINTIOS 4:17

Cai causaipica ashacamanllami llaquita apacunchic. Chaica tucuringami. Ashtahuanpish chai llaquicunaca tucuimanta yalli huiñai causaiyuctami ruhuacun.

FILIPENSES 1:29

Taita Dios cancunata acllashpaca, mana Cristota crichunllachu acllashca, ashtahuanpish paimanta llaquita apachunpish acllarca.

FILIPENSES 2:17

Cancuna crishpaca, Taita Diosman cushpa rupachic shinami cushcanguichic. Chaita pactachingapacca, ñuca quiquin causaita chingachina cacpipish chingachishallami. Chashna yuyashpami, tucui cancunahuan cushicuni.

COLOSENSES 1:24

Cancunamanta llaquita apacushcamantaca, cunanca cushicunimi. Chashnami, Cristo paipac cuerpo shina criccunamanta llaquita apashca shina, ñucapish ñuca cuerpopi llaquita apana cashcataca llaquita apacuni.

COLOSENSES 3:24

Cancuna allita ruhuashcamantaca, criccuna japichun Dios huacaichishcata japigrina cashcata yuyaichic. Jesucristo cancunapac Amo cacpimi, cancunaca imata ruhuashpapish, paipacta ruhuacunguichic.

1 TESALONICENSES 2:15

Diosmanta ñaupa huillaccunata huañuchishca shinallatacmi, Apunchic Jesustaca chai israelcunallatac huañuchircacuna. Cutin ñucanchictaca p'iñashpami llaquichircacuna. Chai shina tucuita p'iñashpaca, Taita Diostapish p'iñancunami.

HEBREOS 10:34

Cancunaca carcelpi caccunamantaca, cancuna cashca shinallatacmi llaquircanguichic. Cancuna jahua pachapi huiñai huiñaipac tucuimanta yalli allita charishcamantaca, tucui charishcata quichucpipish, cushilla carcanguichicmi.

HEBREOS 11:26

Egipto llactapi achcata charic canatapish saquishpami, Cristohuan pacta llaquita apashca canata munarca. Chaitaca Dios cuna cashcata japina yuyailla shina cashpami acllarca.

HEBREOS 11:33

Crishcamantami llactata mandaccunahuan macanacushpa mishashpa, paicunaca cashcata ruhuac mandaccunapish tucurcacuna. Dios cushami nishca allicunatapish japircacunami. Shinallatac leoncunapac shimicunatapish, ama imata ruhuachun huichcarcacunami.

HEBREOS 11:6

Taita Diosman cuchuyangapacca, pai tiyashcatapish, paiman mañaccunaman pai imallata cuna cashcatapish crinami can. Mana crishpaca, Taita Diospac munaitaca ima shina mana ruhuaipacmi.

SANTIAGO 1:2

Ñuca c'uyashca criccuna, cancunata ima llaquicuna japicpipish, cushicuita cuna cashcatami yuyana canguichic.

SANTIAGO 5:10

C'uyashca criccuna, Diosmanta ñaupa huillaccuna Dios ima nishcata huillashpa, alli shunguhuan mana p'iñarishpa llaquita apashcata yuyarishpa, chai shina ruhuaichic.

1 PEDRO 4:13

Chaipac randica, Cristo llaquita apashca shina llaquita apacushcamantaca cushicuichiclla. Chashna cashpami, Cristo sumaimana cashcahuan cutimucpica cushicunguichic.