SAN JUAN 3:35 - Nuevo Testamento en Quichua Cañar 1996

³⁵ Taita Diosca paipac Churita c'uyashpami, tucuita pai mandachun cushca.

Dios Rimashcata Quillcashcami

³⁵ Diosca paipac Churita yallitami cuyan. Chaimantami tucuita pai mandachun cushca.

SAN JUAN 3:35 Iomraidhean Croise

SAN MATEO 11:27

Ñuca Taitaca tucuitami ñucamanca curca. Ñuca pipac Churi cashcataca, pi mana yachanchu, ñuca Taitallami yachan. Ñuca Taita pi cashcataca, pi mana yachanchu, ñucallami yachani. Shinallatac pipish ñuca yuyaita cucllapimi, ñuca Taita pi cashcataca yachancuna.

SAN MATEO 17:5

Pedro chashna nicucpiracmi, yuranlla p'uyu paicunataca quillparca. Chai p'uyu ucumanta shuc rimashca uyarishpaca: —Caimi ñuca c'uyashca Churi. Paillami ñucataca cushichin. Pai ima nishcata uyanguichic— nirca.

SAN MATEO 28:18

Jesús paicunapacman cuchuyashpaca: —Taita Diosca ñucataca, cai pachapi jahua pachapi tucui imatapish Mandactami ruhuarca.

SAN MATEO 3:17

Shinallatac jahua pachamanta rimashpaca: “Caimi ñuca c'uyashca Churica. Paillami ñucataca cushichin” nishcami uyarirca.

SAN LUCAS 10:22

Chashnallatacmi Jesusca: —Ñuca Taitaca tucuitami ñucaman curca. Ñuca pipac Churi cashcataca pi mana yachanchu, ñuca Taitallami yachan. Ñuca Taita pi cashcataca, pi mana yachanchu, ñucallami yachani. Shinallatac pipish ñuca yuyaita cucllapimi, ñuca Taita pi cashcataca yachancuna— nirca.

SAN JUAN 13:3

Jesusca Taita Dios cachashca shamushcatapish, paipacman cutina cashcatapish, shinallatac pi mana ruhuaipaccunata Taita Dios ruhuachun cushcatapish yacharcami.

SAN JUAN 15:9

Ñucaca ñuca Taita ñucata c'uyac shinallatacmi, cancunataca c'uyani. Cancunaca chashna c'uyanacushpa c'atichiclla.

SAN JUAN 17:2

Canca huiñai causaita ñucaman cushcacunaman cuchunmi, tucui gentecunataca ñuca maquipi churashcangui.

SAN JUAN 17:23

Ñucaca paicunahuan, canca ñucahuan cacpimi, paicunaca shuc shinalla canga. Shina cacpimi, cai pachapi causaccunaca can cachashcata, shinallatac ñucata ima shinami c'uyangui, chashnallatac paicunatapish c'uyac cashcata yachangacuna.

SAN JUAN 17:26

Can ñucata c'uyac shinallatac paicunapish c'uyanacuchun, shinallatac ñucahuan shuc shinalla cachunmi, can ima shina cashcataca ricsichini, shinallatac ricsichishpa c'atishami— nirca.

SAN JUAN 5:20

Ñuca Taitaca ñucata c'uyashcamantami, pai tucui imalla ruhuacushcataca ñucamanca ricuchin. Ashtahuanpish caicunamanta yalli ruhuashcacunatapish ricuchingaracmi. Chaita ricushpaca, cancunaca mana amirishpami saquiringuichic.

SAN JUAN 5:22

Ñuca Taitaca pita imata mana taripangachu, ashtahuanpish tucui imata taripana cashcataca ñucamanmi cushca.

1 CORINTIOS 15:27

Diosca Cristopac chaqui sarunapimi chaicunataca tucuita churashca. Chashna tucuita churashpapish, tucuita churac Taita Diosca paipish Cristopac ñaupapi cumurishca canataca, mana nisha ninchu.

EFESIOS 1:22

Chashna cashcamantami tucui ima tiyashcacunata Cristo mandachun Taita Diosca curca. Shinallatac tandanacushca criccunata mandachunpish, Cristollamantacmi Diosca curca.

HEBREOS 1:2

Shina cacpipish cunan tucuri punzhacunapica, paipac Churitami ñucanchicmanca huillachirca. Taita Diosca Paillahuantacmi, cai pachatapish ruhuarca. Shinallatac tucui ima tiyashcatapish, Paillamantacmi cushca.

1 PEDRO 3:22

Jesucristomi jahua pachaman rishpa, Taita Diospac alli maquiman tiyacun. Paimi angelcunatapish, poderta charic mandac espiritucunatapish mandacun.