EFESIOS 1:18 - Nuevo Testamento en Quichua Cañar 1996

¹⁸ Cancuna pai c'ayacpi imata shuyana cashcata yachachun, shinallatac paipaclla caccunaman Dios cusha nishcaca sumac cashcata yachachunmi, alli yuyaita cuchun nishpa Diosman mañani.

Dios Rimashcata Quillcashcami

¹⁸ Cancuna pai cayacpi imata shuyana cashcata yachachun, shinallatac paipaclla caccunaman Dios cusha nishcaca sumac cashcata yachachunmi, alli yuyaita cuchun nishpa mañani.

EFESIOS 1:18 Iomraidhean Croise

SAN MATEO 13:15

Cai gentecunapac shunguca, rumi shina sinchimi tucushca. Chashna cacpimi paicunapac rinrica tapashca shina, ñahuipish huichcashca shina tucushca. Paicunaca ñahuihuan ricushpapish, rinrihuan uyashpapish, shunguhuan yuyarishpapish, ñucapacman ama cutirichun, shinallatac ñuca ama alliyachichun chashnaca tucushca’ nishcami.

MARCOS 10:17

Jesús chaimanta llucshishpa ñanta ricucpimi, shuc moso paipac ñaupaman callpamushpa cungurirca. Shina cungurishpaca: —Alli yachachiclla, ñuca huiñai causaita charingapacca, ¿imatatac ruhuana cani?— nishpa tapurca.

SAN LUCAS 24:45

Shina nishpaca, paicunaman yuyaita cushpami, Dios quillcachishcata alli yachachirca.

HECHOS 16:14

Chai huarmicunapurapica, Tiatira pueblomanta Lidia huarmimi ñucanchic yachachishcataca uyacurca. Chai huarmica morado sumac liensota c'atucmi carca, shinallatac Taita Diosta yuyaricmi carca. Chai huarmimanmi Apunchic Jesusca Pablo tucui imalla nishcata uyashpa cazuchun, alli yuyaita curca.

HECHOS 26:18

Canmi paicuna amsapi shina causacuccunataca, ñahuita pascac shina alli yuyaita cungui. Chashna ruhuacpimi, Satanás*f** mandacushcamanta anchurishpa, Taita Dios mandashca causangacuna. Ñucata cricpimi, Taita Dios paicunapac juchacunata perdonanga. Shinallatac Taita Dios paipaclla cachun acllashcacunaman cusha nishcatapish chasquingacunami’ nircami.

ROMANOS 11:29

Taita Diosca cushpapish mana quichunchu. Shinallatac pai c'ayashpapish, “mana c'ayashcanica” nishpaca mana ninchu.

ROMANOS 2:4

Taita Dios paipac c'uyaillamanta paipacman c'ayashcata mana yuyarishpaca, pai punzhanta llaquicushcatapish, mana p'iñarishpa shuyacushcatapish yangapimi churacungui.

2 CORINTIOS 4:4

Ashtahuanpish paicunaca mana crinchu. Dios ima shina cashcata ricuchic, sumac Cristomanta achicyachic luz shina alli huillaita ama entendichunmi, paicunapac yuyaitaca cai pachapi mandac Satanasca*f** amsayachishpa charicun.

2 CORINTIOS 4:6

Taita Diosca amsata luz achicyachichun nircami. Paillatacmi luz shina ñucanchic shungupi achicyachirca. Jesucristopac ñahuipi Dios sumaimana cashcata shuccunaman ricuchichunmi, chashnaca ruhuarca.

GÁLATAS 5:5

Shina cacpipish ñucanchic crishcallamanta, shinallatac Diospac Espíritu imatapish ruhuaclla cashcamantaca, Taita Dioshuan alli tucuna yuyaillami canchic.

EFESIOS 1:11

Cristohuan shuc shinalla cashcamanta pai cusha nishcata ñucanchic japichunmi, Taita Diosca pai munashca shina ñaupaman ña acllashca. Tucui imatapish pai munashca shinami ruhuan.

EFESIOS 1:7

Taita Diosca mai c'uyashcamantami, paipac Churi yahuarta jichashcamanta ñucanchictaca huatashca shinamanta cacharichishpa, juchacunata perdonarca.

EFESIOS 2:12

Ñaupa mana Cristohuan cashpami, israelcunamanta ch'icanyachishca carcanguichic. Chaimantami Dios c'uyashpa ari nishcatapish, pai cusha nishcatapish mana charircanguichic. Chashnami cai pachapica Diostapish, imata shuyanatapish mana charishpa causarcanguichic.

EFESIOS 3:16

Paipac sumaimana charishcacunata cancunaman cushpa, paipac Espirituhuan yuyaita allichishpa, sinchi criccunata ruhuachunmi, Taita Diosman mañacuni.

EFESIOS 3:8

Ñucami Diospaclla cac tucui criccunamantaca ashtahuan yangalla cani. Shina cacpipish Taita Dios c'uyashpami, cai alli huillaita mana israelcunaman huillashpa sumac ruhuanata ñucamanca mingarca. Cai huillanaca Cristo tucuimanta yalli allicunata cuc cashcata huillanami.

EFESIOS 4:1

Chaimantami Apunchic Jesuspacta ruhuacushcamanta carcelpi tiyacuc Pablo cancunamanca cashna nini: Cancunaca Taita Dios ima shina causachun c'ayashca shina causaichic.

EFESIOS 4:4

Diospac Espirituca shucllami. Chaimantami tandanacushca criccunaca shuc cuerpo shinalla can. Taita Diospish cancunata shuclla japina cashcata cushicushpa shuyachunmi c'ayarca.

EFESIOS 5:8

Ñaupaca amsallapimi cancunaca causarcanguichic. Cunanca Apunchic Jesushuan shuc shinalla tucushcamanta achic luzpimi causacunguichic. Shina cashcamantaca achic luzpi causacuc shina causaichic.

FILIPENSES 3:14

Jesucristomanta Taita Dios cusha nishca tucuimanta yalli alli cacpimi, chaita japingapac chayana yuyailla ricuni.

COLOSENSES 1:12

Diosta pagui nishpa, cushicushpa apanguichiclla. Paimi Diospaclla caccuna japina cashcata cancunapish paipac achiclla mandacucpi japiccuna cachun ruhuarca.

COLOSENSES 1:23

Shina cacpimi sapiyashca shina allita crina canguichic. Chashnami alli huillaita huillashcata uyashcamanta, tucui shunguhuan japina cashcata shuyacunamantaca mana anchurina canguichic. Cai alli huillaitami, tucui cai pachapi tiyac llactacunapi huillashca cashca. Chaillatatacmi ñucapish huillashpa ayudacuni.

COLOSENSES 1:27

Chashnami Taita Diosca paipaclla causaccunaman yachachishpa, pacashca cashca sumaimana alli cashcata tucui gentecunaman ricuchisha nirca. Chai pacashca huillasha nicushcaca, cancunapi causacuc Cristomi can. Cristo cancunapi causacushcamantami, japina cashca sumaimana cashcataca ricuna yuyailla canguichic.

COLOSENSES 1:5

Cashcata nic alli huillaitaca ñami uyarcanguichic. Chaita uyashpami, cancunaca jahua pachapi Taita Dios huacaichishcapi shunguta churashpa shuyacunguichic. Chaita crishpami, cancunaca c'uyanacushpa causacunguichic.

COLOSENSES 2:2

Paicuna tucui shunguhuan crishpa, c'uyanacushpa, sinchiyashpa c'atichunmi, chashnaca ruhuacuni. Chashna ruhuacpimi, Dios pacashca ima shina cashcataca tucui allita yachanga. Chaica Cristomi.

COLOSENSES 3:15

Cristollatac cancunapac shungupica, apanacushpa causana yuyaita cushca cachun. Chai shina apanacushpa causachunmi, Taita Diosca cancunata acllashpa, shuc cuerpo shinallatac ruhuarca. Chaimantami paita pagui nina canguichic.

1 TESALONICENSES 2:12

Shinallatac “Diospac huahuacuna ima shina causana cashca shina causaichic” nishpami yachachircanchic. Cancunataca Diosllatacmi paihuan mandachun, shinallatac sumac cachunpish acllarca.

1 TESALONICENSES 5:8

Ashtahuanpish ñucanchicca punzhapi shina causacushcamantaca, alli yuyaihuanmi c'atina canchic. Fierro churanata churaric shinaca, Apunchic Jesusta crishpa, c'uyaihuan causanami canchic. Chashnallatac umapi fierro cascota churaric shinaca, quishpirina yuyaihuanmi cushicushpa shuyana canchic.

2 TESALONICENSES 1:11

Imatapish ruhuaclla ñucanchic Diosllatac cancunata c'ayashcamanta, cancuna pai munashca shina causachunmi, cancunamanta punzhanta mañacunchic. Shinallatac cancuna crishcamanta alli ruhuaicunatapish, alli yuyaicunatapish pai munashca shina pactachinata ayudachunmi, cancunamanta mañacunchic.

2 TESALONICENSES 2:16

Ñucanchicta c'uyac Taita Diosllatac, shinallatac pai c'uyashcallamanta huiñai huiñaita cushi canatapish, cushicushpa shuyanatapish cuc ñucanchic Apunchic Jesucristollatac

1 TIMOTEO 6:12

Huiñai causaita japingapacca, macanacuipi mishac shina crishca yuyaihuan alli c'atingui. Cantaca achcacunapac ñaupapi “tucui shunguhuan crinimi” nicpimi, chai causaita japichun Taita Diosca acllashca.

TITO 2:13

Shinallatac chai c'uyaimi, ñucanchicta Mandac Dios Quishpichic Jesucristo sumaimana cashcahuan, cutimuna cushicui punzha pactanata shuyanata yachachicun.

TITO 3:7

Taita Dios yallita c'uyashpami, paihuan alli tucushpa, ñucanchic shuyacushca huiñai causaita japichun chashnaca ruhuarca.

HEBREOS 10:32

Ñaupa punzhacunapi Dios yuyaita cucpi, jatun llaquicunata macanacuc shina apashcata cancunallatac yachanguichicmi.

HEBREOS 6:4

Maijanpish Taita Dios yuyaita achicyachicpi, mishquilliric shina Dios cushcacunata yachashpa, Diospac Espiritutapish chasquishpa,

1 PEDRO 1:3

¡Ñucanchic Apunchic Jesucristopac Taita Diostaca “allimari cangui” nishunchic! Ñucanchic huiñaita causagrina yuyailla cachunmi, paipac sumaimana c'uyaimanta Jesucristota causachishpa, ñucanchictaca cutin huacharishca shinata ruhuarca.

1 PEDRO 3:9

Shuccuna mana allita ruhuacpipish, ama cancunapish chai shinallatac ruhuaichicchu. Shinallatac c'amishpa rimacpipish, ama cancunapish chai shinallatac rimaichicchu. Chaipac randica Taita Dios allicunata cuchun nishpa munaichic. Taita Diosca allicunata chasquichunmi, cancunataca c'ayarca.

1 PEDRO 5:10

Ashtahuanpish asha punzhacaman llaquicunata cancuna apashca q'uipaca, Diosllatacmi pi mana juchanchipacta ruhuashpa, alli sinchiyachishca shina alli c'aticta ruhuanga. Paillatacmi ñucanchictaca Jesucristohuan shuc shinalla tucushcamantaca, paipac jatun c'uyaimanta huiñaita sumacyachishca cachun acllarca.