Jueces 10:6 - Biblia Dc en Mixe de Quetzaltepec

⁶ E yë Israel ja'ayëty ojts jatëkok t'ëxmatstë ja Wintsën ja nyë'ë'aaw tyu'u'aaw, jä'ä ojts tpanëjkxtëkëtë ja Baal ets ja Astarté, ka'apë tyiosëtyën mëti'ipë yë Siria ja'ayëty y'ëwtajtëpën; näjyëtu'un yë Sidónja'ayëty, Moab ja'ayëty, Amón ja'ayëty ets filistejë ja'ayëty. Yë Israel ja'ayëty ojts t'ëxmajtsnëtë Wintsën ets ka'ap ojts t'ëkmëjja'awënëtë.

Biblia Mixe de Quetzaltepec

⁶ E yë Israel ja'ayëty ojts jatëkok t'ëxmatstë ja Wintsën ja nyë'ë'aaw tyu'u'aaw, jä'ä ojts tpanëjkxtëkëtë ja Baal ets ja Astarté, ka'apë tyiosëtyën mëti'ipë yë Siria ja'ayëty y'ëwtajtëpën; näjyëtu'un yë Sidónja'ayëty, Moab ja'ayëty, Amón ja'ayëty ets filistejë ja'ayëty. Yë Israel ja'ayëty ojts t'ëxmajtsnëtë Wintsën ets ka'ap ojts t'ëkmëjja'awënëtë.

Jueces 10:6 Iomraidhean Croise

1 Reyes 11:33

Jä'ä ko Salomón ixtijyës xyaj'ijtnë, wiink Wintsën të tpanëjkxtëjkënë ets të t'ëwtajnë ja Astarté yë Sidónja'ayëty nyaaxpotsyëty; näjyëtu'un ja Quemós, mëti'ipë y'ëwtajtëpën yë Moab ja'ayëty ets ja Milcom mëti'ipë Amón ja'ayëty y'ëwtajtëpën. Ëjts ka'apës oy n'ixy ijxtëm yë'ë winë tunyën ets ka'ap t'ëkuuytyuunë ja n'ënä'ämënës ntëyajtënës ets ja aaw ayuk jëtu'un tä tuunyën ja David, mëti'ipë Salomón tyeety'ajtën, mëti'ipës ojts ntukmëwë'ëmyën.

1 Reyes 11:5

Salomón ojts t'ëwtajnë ja tsaatsetsy mëti'ipë ijty tyijtëpën Astarté, mëti'ipë ja Sidónja'ayëty wyintaj'ajtëpën ets ojts näjyëtu'un t'ëwtajnë wiinkpë ja tsaatsetsy mëti'ipë tyijtëpën Milcom, yë'ë Amón ja'ayëty ijty tyijtëp Wintsën, tu'uk awinax mëti'ipë ka'ap yë Wintsën ninu'un timy'ixa'anyën.

1 Reyes 11:7

Jä'ä xëëw jä'ä jëmëjt yë Salomón ojts tu'uk tyajkojy yë tsyajptëjk ja Quemós, jamtsow awinm ma Jerusalén kajpnën, mëti'ipë yë Moab ja'ayëty myëjja'awëtëpën, ka'apë ninu'un y'ijxnëtyën ets ja Moloc mëti'ipë yë Amón ja'ayëty myëjja'awëtëpën; jam ojts tkojy ja tsajptëjk kopkkëjxm ma ja Jerusalén kajpn pa'tkën, maatsow yë xëëw pyëtsimyën.

1 Reyes 16:31

jä'ä ko yë'ë ka'ap ojts ninu'un tmëkjawë ko nän yë'ë ja poky tyuunpy mëti'ipë ja Jeroboam tyuunën, Nabat yë myaank. Ni'ik yë'ë, jä'ä ko ojts mëët pyiky ja Jezabel, yë nyëëx yë Et-baal, mëti'ipë yajkutujkpën jam Sidón ets ojts t'ëwtajnë ja Baal.

2 Reyes 17:16

Wa'ats tja'atyëkooytyääytyë ja Wintsën ja y'ënä'ämën tyiyajtën ets ojts tyajkojtë mäjtsk ja tsajpkaa aak pujxnëmpë; ojts tyajnikojtu'utë ja Aserá, ja mëtsa'a ets Baal.

2 Reyes 23:13

Ojts may tjijtë'ëky ja tsajptëjk mëti'ipë jamën awinmtsow ma ja Jerusalén kajpnën ets ëpa'tkë'ëmtsow ma ja Olivos kopkën mëti'ipë ojts ja Salomón tkojyën, jampë yajkutujkyën Israel; jä'ä tyuknikojëy ja Astarté, mëti'ipë ja Sidónja'ay ja'ayëty y'ëwtajtëpën mëti'ipë ja Wintsën ëxëëk t'ixyën; ojts tnikojë näjyëtu'un ja Quemós, mëti'ipë yë Moab ja'ayëty y'ëwtajtëpën ets tuknikojëy näjyëtu'un yë Milcom, mëti'ipë y'ëwtajtën yë Amón ja'ayëty.

2 Crónicas 28:23

Ni'ikyënëm ojts ja wyintsë'kën tmo'oy ja tios mëti'ipë Damaskë ja'ay y'ëwtajtëpën, yë'ë ojts yajtëkoyë. Jëtu'un ojts myäy tyäjy pën tyaapë tios yë'ë të tputëkë yë Sirië yajkutujkpë näjyëtu'un nëjkx pyutëkëty ko tmo'ojëty yë wyintsë'kën. E yë'ë ni'ikyënëm ojts o'ktëy yajjatyë ets o'ktëy ja nyaax kyajpn tyajjajty tyajkëpejty.

Salmos 106:36

ojts t'ëwtajnëtë wiink tios mëti'ipë ok ëxëëk myëjajt myëkëpäjtën,

Isaías 23:4

Mtsëtyunëp mijts Sidón, ma mëj'äämpy të m'ityën ko të xytyukmeenypyääty ja juukymyejy, jä'ä ko nëjkxëp jëna'a m'ëna'any: Ëjts ka'apës ja n'u'unk nmaay n'ëkpatnë, ka'ap jëtu'un ja njotës y'ëkpëjknë tä ijty tëëyëpën koos n'u'unk'ijxy. Ka'apës ja n'u'unk nmaay n'ëkmëët'ajnë mëti'ipës nyajyääkëpën ets mëti'ipës nyaj'ijxpëkëpën.

Jeremias 2:13

Yë nnaax nkajpnës mäjtsk ok nipëtë'ëkës të xymyëtëkoy: ojtsës xy'ëxmatstë ma ënety ëjts xywya'antën nëëkopkën mëti'ipë yajjuuky'ajtpën, ojts tnitajëtë kë'ëm ja nyëë ma ja nëë tëyë nyäxyën.

Jeremias 2:20

Tëëyëp xyajtso'ontä'äky maas je'eyë xykyäjpxykyumëtoownaxyën, maas ka'ap xymyëmëtoyën. Je'eyë m'ënany: Ëjts ka'apës tii ntuna'any. Jam muum kepypya'tkë'ëm, jam muum kopkëjxm, je'eyë ojts jam mpokytyuny, ko wiink tios xy'ëwtajty, jëtu'un tä to'oxytyëjk jyot nyini'kx tookyën ets kanaak yë ye'etyëjk tmëët'aty.

Jeremias 32:23

E ko jyajtë jam ma ja it naaxwiinyëtën mëti'ipë ënety të xymyo'oyën ets tpëjktaaytyë ja nyaax kyamëty, ka'ap ojts m'ëk mëmëtoowënëtë ets ka'ap ojts jëtu'un t'ëktuunëtë tä ënety të m'ënë'ëmxëtyën, nimëti'ipë tkatuuntë mëti'ipë mjatuk'ënëmaayën. Paaty xytyuknikejxy ja ëyo'on jotmay mëti'ipë tyam tuunëpen jajtëpën.

Ezequiel 27:16

Yë Edom ajuuy ato'kp ijty mëët mijts, jä'ä ko kanaakpëky winë xymyëëtëty: Yë'ë ijty mooyëp yë oyëtypë uky tsaa ets wit oyëtypë mëti'ipë jo'okyën; mëti'ipë linë witën ets myëët'ajtyp yë nëëtsaa ets tsapts tsaa.

Deuteronomio 13:6

Pën yë mëkä'äx, ëkë m'u'unk, ëkë mnëëx, ëkë mto'oxytyëjk mëti'ipë oy mtsojkpy mja'apën, ëkë mjëëky mëku'uk, ni'ikyë mjanty'ënë'ëmxëty ets wiinkpë wintsën xy'ëwtatëty, mëti'ipë miitsëty ets m'ap m'ok ka'ap t'ixy'atën,

Deuteronomio 13:8

mijts këtiimës xykyupëkëty, tä jya'ëna'anyën. Këtii xymyëjpëjkta'akëty ja wyinma'any ko ënety tii ëyo'on tiijotmay tpatnë, ninu'un xykyapa'ëyowëty ets këtii xynyimon xynyitukëty, ni xykyakuyu'utsëty, ko ënety pën y'ixjëtijt pyajëtijtënë.

Deuteronomio 31:16

Ënet yë Wintsën t'ënëmaay yë Moisés: Wäänë y'itëty tääts m'o'knëty. E ya'atë naax kajpn ënätyë yë jyot wyinma'any tyajtëkoya'antë ets wiink wintsën ënätyë pyanëjkxantëp pën jëtu'unyë y'itë, ko ja Wintsën t'ëwtatëty mëti'ipë jam yajpatëpën ma ja naax kajpnën, mëti'ipë nyiwa'akantëpën. Ëjts nëjkxëpës xyjyä'äytyëkooynyëtë ets ja käjpxytyu'unën ka'ap nëjkx t'ëktuunëtë këwentë.

Deuteronomio 31:17

E ëjts nëjkxëpës ja ntukjoot'anpëktë ets nëjkxëpës n'ëxmajtsnëtë, tiijës n'ëkmëmaay n'ëkmëtajnëp, tyam ja ëyo'on jotmay ma yë'ëjëtyën ni'ikyë nëjkx myëjwiinë kyëjääjë ets koonëm y'ëna'antëty: ¿Këtii jëtäätën yë'ëkyëjxmëty yam o'ktëy tjajtëmë ko ja Wintsën ka'ap y'ëkyajpatnë ma ëëtsajtëmënë?

Deuteronomio 32:15

Yë Jesurún ja'ayëty yajxon të nyi'kxëtë, je'eyë y'atë'kxnëtë mëët ko ku'uxyë jotkëtä'äky të jyë'kxtë; tyam amëj akëjxm nyäjya'awënëtë. Ko jëtu'un të y'ixë'aty ënät ja Wintsën të tja'atyëkoyëtë mëti'ipë ojts yajkoj pyëjkta'akëtën; tyam ixtijy tyajnajxnëtë ja mëti'ipë këwent'ajtëtëpën ets mëti'ipë yajnitsokëtëpën.

Josue 13:31

Yë'ë jyaak niwa'ktë kujkwä'kxy ja Galaad ets ja kajpn mëti'ipë xyëëwajtëpën Astarot ets Edrei. Tëkokyë ya'atë it naaxwiinyëtë yë'ë ojts tpëktë ja Maquir ja y'u'unk y'ok nikujkwä'kxy, ja Manasés ja myaank, jëtu'un yajtuknikäkëtyääytyë tä ënety nyiwinë'atën.

Jueces 10:5

Ko ojts yë Jair y'o'knë, jam nyaaxtëjkëy Camón.

Jueces 11:24

Yë Quemós mëti'ipë mTios'ajtypyën, ko tii mo'oyë, mijts mjä'äniwäämpy yë'ë: ¿Këtiijë? E näjyëtu'untsën ëëtsëty Tiosës ya'atë naaxwiinyëtë të xymyo'otë, paatyës njä'äniwa'antë.

Jueces 13:1

Yë Israel ja'ayëty ojts jatëkok ja jyot wyima'any tyajtëkooykyojnëtëpë ets ëxëëkjaty winë tuuntë Dios wintum, paaty ojts yë Wintsën tyim'ijxmatsëtë ets ëxëëk tyuunëtë yë filistejë ja'ayëty wëxtyikxy jëmëjt.

Jueces 16:23

Ja kutuunktëjkëty ets ja mëjja'aytyëjk mëti'ipë ënety jam yajpatëpën ma ja filistejë kajpnën ojts nyäwyoowmukëtë ets tnixëëwtuna'antë ko ënety të myëta'aktë. Ma ja xëëw tuntën yajxon ojts y'ätstë ja mayjyä'äy ets ja wyintsë'kën tmooytyë ja tyios Dagón. Ënet t'ëëwtë ya'atë ëy: Yë ntios'ajtëm Dagón yë'ë të tkë'ëyäky yë Sansón ma ëëtsajtëmën, mëti'ipë ënety xymyëtsip'ajtëmën.

Jueces 3:7

Yë Israel ja'ayëty ka'ap ojts winë oy tuntë tkajpxtë Dios wintum ojts ja Wintsën tja'atyëkooynyëtë ets ojts t'ëwtajnëtë ja Baal ja y'awinax ets ja Astarté ja y'awinax.

Jueces 4:1

Ko ojts ja Ehud y'o'knë, yë Israel ja'ayëty ojts jatëkok yë jyot wyinma'any tyajtëkoytyë ets ëxëëk winë tuuntë Dios wintum.

Jueces 6:1

E ja Israel ja'ayëty ëxëëk ja jyot wyinma'any ojts tyajkëxë'ëktë Dios wintum, paatykyëjxm ojts kyë'ëyakëtë ma ja Madián ja'ayëtyën wëxtujk jëmëjt ets ëxëëk tyuunëtë.

Jueces 8:33

Ko yë Gedeón ojts y'o'knë, yë Israel ja'ayëty ojts t'ëxmatstë jatëkok yë Wintsën ets tpanëjkxtëjkëtyë ja wiink tios mëti'ipë yajtijpën Baal; yë'ë ojts twin'ixtë t'ëwtata'antë tu'uk awinax mëti'ipë tyijtëpën Baal-berit.

1 Samuel 5:2

Ko jam tmëja'ajtë jap tpëjktaktë ma ja tyiosëty jap yajpaatyë mëti'ipë xyëëwajtypyën Dagón.