Efesios 2:2 - Biblia Dc en Mixe de Quetzaltepec

² Yë'ë ijty mpatuuntëp ja naaxwiinyëtë ja'ay ja wyinma'any ets ja ku'oypyë mëti'ipë jëtijtpën pojjotm ets tjotmëkmo'oy ja ja'ay mëti'ipë ka'ap tmëmëtowtën ja Dios.

Biblia Mixe de Quetzaltepec

² Yë'ë ijty mpatuuntëp ja naaxwiinyëtë ja'ay ja wyinma'any ets ja ku'oypyë mëti'ipë jëtijtpën pojjotm ets tjotmëkmo'oy ja ja'ay mëti'ipë ka'ap tmëmëtowtën ja Tios.

Efesios 2:2 Iomraidhean Croise

Job 1:16

Tam ënety kyamëtyakta'aynyëm ya'atë ja'ay ko wiinkpë myiiny ets y'ënäny: Tëë ënääw tyukëtä'äkyë yë kupixyny ets mëti'ipë kupixyny këwent'ajtëpën tëë y'o'kta'atë. Ëjtsyë të njake'eky etsës nikajpxa'any ma mijtsën mëti'ipë të tyuny të jyätyën.

Job 1:19

ko tu'uk mëkjëënpoj, të myiny mëti'ipë jam të tsyoonyën të'ëts'itjotm ets yajxonën mëk të pyojy ets ja tëjk të jyity ma të nyijijtpäjta'atën ja m'u'unk m'ëna'k. Ëjtsyë të njake'eky etsës nikajpxa'any ma mijtsën mëti'ipë të tyuny të jyätyën.

Job 1:7

Tä ja Wintsën yajtëëwë: ¿Maa mtsoony? Tä ja tsajpjotmëtë kukäjpxy y'ëtsooy: Naaxwiinyëtë ojts të n'aye'eyës.

Job 31:7

Pën tëëjës njëjpye'eytyu'uty ja tëytyu'u, pën tëëjës winë n'atsoky, pën tëë yajpaaty winë maas ntëjkën mëti'ipës ka'ap njä'äjëtyën,

Salmos 17:14

Mëët yë mëk'ajtën, Wintsën, yajpëtsëëmkës jap ma yë'ëjëtyën. Wä'än yaa tyajpaatë naaxwiiny ma kyuma'ayën të yajmo'otën. Wä'än näyajkumeenytya'akëtë ets wä'än yë y'u'unk tkaytyë t'uuktë ku'uxyë koonëm pyëjwa'kxtëty ets jyaak natëkëty mëti'ipë y'ok'u'unk y'ok'ëna'k tyukjë'kxëpën.

Isaías 30:1

Jëtu'un ja Wintsën y'ënä'äny: Janty mon janty tuk yajpaatë ja u'unk ëna'k mëti'ipë ka'ap jyä'äkyukëtën, mëti'ipë winë tyuknipëjktakëtyëpën ets ka'apës xyajtëwtë, mëti'ipë tii tyuuntëpën ets ka'apës y'ëjtsëty nwinma'anymyo'otë, jëtu'un ni'ikyë ja pyoky tyajmayëtë.

Isaías 57:4

¿Pën mtukxiktëp? ¿Pën m'ëxwa'an m'ixtijtëp? ¿Pën mwiin m'aaw mtuk'ijxtëp? Miitsëty poky të xytyukmin të xytyukkä'äxëtë, yë'ë m'u'unk'ajtëtëp mëti'ipë je'eyë win'ë'ënpën,

Jeremias 23:10

Ujts yë naax kajpn yajpaaty mëët yë ja'ay mëti'ipë ka'ap twintsë'ëkëtën yë pëjkën ukën, yi'iyë tyuuntëp kyajpxtëp yë ëxëëkpë, je'eyë tyäty ënä'äma'antë tyäty yajkutuka'antë ets tëkatsy winë tnipaye'eytyë. Paaty ojts yë Wintsën tpoky yë naaxwiinyëtë ets ja naaxwiinyëtë tyëëtsë'ky, ojts tyëtstëkoy ja aay ujts jampë të'ëts'itjotmën.

Oseas 10:9

Jëtu'un yë Wintsën y'ënä'äny: Yë Israel ninu'un pyoky tka'ëxmatsy, tyajtso'ontäky jam Guibeá. Ni'ikyë pyokytyuun'ëtë'ëtsy. Paatykyëjxm yë tsip pyaata'anëtë yë ëxëëkja'aytyëjk jampë yajpaatën Guibeá.

Mateo 11:19

Ets ënät ja naaxwiinyëtë ja'ay y'U'unk të jyamiinpë, mëti'ipë kääpy ukpën ijxtëm ja ja'ay kaxpën, miitsëty jä'ä m'ëna'antë koos nkäxëty koos n'ajëënëty ets ko yë'ëjës mëët oy nämyäyë ëxëëkja'aytyëjk ets yajkukëpäjtpëtëjk mëti'ipë Roma myëtuuntëpën. Temë jää nyikëxë'ëky ja Dios ja wyijy'ajtën kyejyajtën ma winë yajtunyën.

Mateo 13:22

Ja tëëmt mëti'ipë ojts kyä'äyën äpny akujk, jëtu'un jä'ä ijxtëm ja ja'ay Dios y'aaw y'ayuk t'amëtoow'ijtëtën, je'eyëp ko yë'ë myëmaay myëtajtëp ja ajuuy ato'k ets mëk tsojkën'atë ja wit meeny ets yë'ë nyätyukwin'ëënëtë. Tu'kë'ëyë ya'atë, yë'ë yajkumo'onëtyääpy ja Dios ja y'aaw y'ayuk mëti'ipë të tjamëtoow'ityën ets ka'ap maa wyinkëxë'ëky.

Mateo 13:38

e yë naaxwiinyëtë, yë'ë kam'ajtp. Ja oypyë tëëmt yë'ë ja ja'ayëty mëti'ipë yajpatëpën ma tsajpjotmëtë kuttujkën, e ja ëxëëk ujts yë'ë ja ja'ayëty mëti'ipë ja mëjku'u jä'ä'ajtëtëpën.

Marcos 4:19

je'eyëp ko jä'ä myëmaay myëtajtëp wi'ixjaty yaa naaxwiiny ja ëyo'on jotmayën, ets ja meeny yajtukwin'ë'ëntë ets y'aaktsojktaaytyëp winë. Jëtu'unts ja Dios ja y'aaw y'ayuk ka'ap tyajwinkëxë'ëktë.

Lucas 16:8

Tääts ja wintsën tnija'awëy ko ja tuunpë ka'apë oy myëtunyën, tëë oy tniwijy'äty wi'ix tii tunëtyën. Jëtu'un yë ja'ayëty y'ëtë'ëtstë nyiwijy'ajtëp ja kyë'ëmtuunkëty, ets ni'ik mëti'ipë akootstuuy yajpatëpën këtiinëm mëti'ipë tëë ja të'kxën jajën tpaatën.

Lucas 22:31

Näyjyëtu'un ja Wintsën y'ënäny: Simón, Simón, tëë yë mëjku'u m'amëtowëtë ets myajwinxitëty ijxtëm ja'ay yë tsajpmoktë'ëts twinxityën,

Juan 12:31

Tyam të tpaaty ma ja naaxwiinyëtë ja'ay yajpaye'etyëtyën ets yaj'ëxwopëty mëti'ipë nyiwintsën'ajtypyën ja naaxwiinyëtë winma'any.

Juan 13:2

Ja mëjku'u tëë ënety tuktëkë ja Judas Iscariote, Simón yë myaank ets ja Jesús tkë'ëyaka'any. Nyija'ap ja Jesús ko tsyoony ma Tiosën ets ko jatëkok nyëjkxa'any ma Tiosën ets ko ja Tyeety ënety tu'kë'ëyë kuttujkën ets mëk'ajtën të myooytyä'äyë; paatykyëjxm pyëti'ky, tam ënety y'a'ux'atë, ets ja nyijän ojts tjeny ets nyätyukwë'ënë tu'uk ja wit myoxkëjxy.

Juan 13:27

Je'eyë ja Judas tna'ëxajëy ja tsajpkääky ets ja mëjku'u ojts tyuktëkëty ets ja Jesús y'ënëmaayë: Pën tii mtunäämpy, tun tyämyë.

Juan 14:30

Ka'apës nëkooyë n'ëkmëtya'akanë mëët miitsëty, jä'ä ko tää wyinkony mëti'ipë ënä'ämpën yaa naaxwiiny; oy tkamëët'aty nitii mëk'ajtën ma ëjtsën,

Juan 15:19

Ko jeexyë miits näjyëtu'un m'ëtë'ëtstë ijxtëm yë'ëjëtyën, mtsojkëtëp jeexyë ijxtëm tsoktën ja jyä'äy. E jä'ä koos miits të nwin'ixtë ma ja ja'ayëtyën mëti'ipë yajtuuntëpën ja naaxwiinyëtë winma'any ets ka'ap jëtu'un m'ëtë'ëtstë ijxtëm yë'ëjëtyën, paaty mka'oy'ixëtë.

Juan 16:11

pën nëjkx t'ëxajëtë ja Dios ja tyiytyu'unën: mëti'ipë ënä'ämpën yaa naaxwiiny naaxkëjxy, tëë nyitukë.

Juan 7:7

Mëti'ipë ka'ap ja Dios nijawëtën ka'ap tjëkyepy miits m'ëxëëk'ixëtëty; je'eyëp koos xy'ëxëëk'ijxtëpës yë'ëjëty, jä'ä koos nnikäjpxy ko ka'ap tii oy tuntë.

Juan 8:23

Tä ja Jesús y'ënëmaayëtë: Miitsëty, yaa naaxwiiny mmintë mkä'äxtë; e ëjts tsajpjotmës ntsoony. Naaxwiinyëtë ja'ay miitsëty; e ëjts ka'apës naaxwiinyëtë ja'ayëty.

Juan 8:44

Ja mëjku'u miits mteety'ajtëp, yë'ë miits mtuuntëp mëti'ipë yë'ë tsyojkpyën. Tëëyëp yë mëjku'u tyajtso'ontä'äky ko je'eyë yajja'ay'ooky. Nijëna'a tëypyë jaantypë tkatuny ets nijëna'a mëtëypyë tkakäjpxy. Ko wyin'ëëny, kyë'ëm jä'ä kyäjpxyp, jä'ä ko win'ë'ënpë yë'ë ets yë'ë yajtso'ontak ja win'ë'ënën.

Hechos 19:35

Ja jääpyë jampë kajpnjotmën, ojts tyaj'amony ja mayjyä'äy ets t'ënëmaay: Miits Éfeso ja'ayëty, mëtowtë. Nyija'awëtëp ni'ëmukë yë naaxwiinyëtë ja'ay ko ya'atë naax kajpn yë'ë kyëwent'ajtyp yë nwintaj'ajtëm Artemisa tsyajptëjk ets y'awinax yë'ë mëti'ipë tso'onpën tsajpjotm.

Hechos 5:3

Tääts ja Pedro t'ënëmaay ja Ananías: Ananías, ¿tii ko ja mëjku'u të mnätyuk'ëne'emyë ets xywyin'ëënëty ja kënu'kxymyëk'ajtën ko të xymyëwë'ëmy tu'kpëky ja naaxtsow?

Romanos 12:2

Këtii m'ëkjuuky'ajnëtëty ijxtëm ja ja'ayëtyën mëti'ipë ja naaxwiinyëtë winma'any yajtuuntëpën, yajtëkatstë ja mwinma'anyëty ets ja mjuukyajtënëty, jëtu'un xynyijawëtëty mëti'ipë ja Dios tsyojkpyën, mëti'ipë oyën, mëti'ipë y'oyjya'apën ets mëti'ipë mëtëyën.

1 Corintios 5:10

Ets ko jëtu'un n'ënanyës, ka'ap xyjyä'äkyukëtëty ets ënät xytyimkukä'äktëty ja mëti'ipë jyot nyini'kx kyë'ëyäjkpyën, mëti'ipë tii kyuyu'tsypyën, mëti'ipë mä'tspën, mëti'ipë ja tsaatsetsy, kepy tsyetsy y'ëwtajtypyën. Ko jeexyë jyëtu'unëty, mtimy'ijxmajtstëp jeexyë ja naaxwiinyëtë juuky'at.

1 Corintios 6:11

Ets jëtu'un ijty jam pënëty ma miitsëtyën jënaakën mja'ay'atë; je'eyëp ko tyam, tëë ja Dios myajwa'atsëtë, tëë mnätyukë'ëtëkëtë ja Dios. Oy të mwë'ëmtë mëët ja Dios ets mëët ja Wintsën Jesukristë.

2 Corintios 4:4

Jä'ä ko ka'ap myëpëktë, ja mëpëjkën yääyëpë naaxwiinyëtën yë'ë yajwinma'anytyëkajtsëtëp këtiipë t'ijxpaatëty ja jajën të'kxën, ja oy aaw oy ayuk ma yajnimëtyä'äkyën ja Kristë ja myëj'ajt jyääntyajtën, ja Kristë mëti'ipë Dios nyäjxypyën.

Gálatas 1:4

Mëti'ipë të tku'ookën ja npoky'ajtëmë, ijxtëm ja Dios tsokyën ets n'ëwaatsëpëtsë'ëmëty ma tyampë tiempën ëxëëkpë tsaatsypyën.

Efesios 1:21

ojts tpëjktä'äky ets tnikopk'atëty tu'kë'ëyë ja ënä'ämën kuttujkën, mëk'ajtën ets ma tu'kë'ëyë mëti'ipë jää'ajtëpën, ma tyampën ets mëti'ipë miimp këtakpën.

Efesios 2:11

Jëtu'un miitsëty, mëti'ipë ka'ap jyutiis'atën, ka'apë tsyuky'atën ets mëti'ipë nätyijëtëp ko tsyuky'atë, mëti'ipë tëë yajnatsujk'ëwtitën ja ye'etyëjk'ajtënëty,

Efesios 2:13

E tyam, miitsëty mëti'ipë ijty ijtëpën jëkäm, tëë xymyëwinkontë ja Kristë ets të xymyëpëktë; jä'ä ko ja nye'pyny të tyajtsuny të tyajkxe'kxy.

Efesios 2:3

Näyjyëtu'un ijty njuuky'ajtëm ni'ëmukë, yë'ë npatu'unëm ja nkë'ëm winma'any'ajtëm, ja poky ets ja ëxëëk atsojkën. Jëtu'un ijty n'ijtëm ijxtëm ja ja'ay oy pyënëtyën, paatykyëjxm ijty xypyaat'ajtëm ja Dios ja myëj tëytyu'unën.

Efesios 4:17

Ya'atës nnikäjpxyp ets yë'ë yam ntukkë'ëtëjkëtyëp ma ja Wintsën Jesukristë ja xyëëwën: Ko ka'ap jëtu'un m'ëkjuuky'ajnëtëty ijxtëm ja ja'ayëtyën mëti'ipë ka'ap ja Dios tnijawëtën, mëti'ipë jëtu'un juuky'ajtëpën ijxtëm ja kyë'ëm jot kyë'ëm winma'anyëtyën,

Efesios 4:22

Ixmajtsta'atë wi'ix ijty miits tëëyëp mjuuky'atën, ëxmatstë ja m'ëxëëk winma'anyëty mëti'ipë mnätyukwin'ë'ënëtëpën, jä'ä tëkokyë tääpë tëë mya'ta'ay ko yi'iyë të yaj'atsoky ka'apë myëtëyëtyën.

Efesios 5:6

Këtii pën mnätyukwin'ëënëtëty mëët ja aaw ayuk mëti'ipë ka'ap tyunyën; jä'ä ko yë'ëkyëjxm jëtu'un ja Dios ja tsyäätsy tyu'unën myina'any ma ja ja'ayëtyën mëti'ipë ka'ap të myëmëtoyën.

Efesios 5:8

Miitsëty jam ijty mjuuky'atë akootstum, e tyam ko m'ijnëtë mëët ja Wintsën jam myajpatnëtë ma tyi'kxy jyäjyën. Jëtu'un winë tuntë ijxtëm ja ja'ayëtyën mëti'ipë yajpatëpën ajajëntuuy.

Efesios 6:12

Jä'ä ko ka'ap jyä'äyëty mëët ntsiptu'unëm, yë'ë mëët ntsiptuntë mëti'ipë tsajpwinm yajkutujktëpën; kutujkënmëëtpë, mëk'ajtënmëëtpë ets mëti'ipë ënä'ämtëpën ma ja ja'ay tkamëmëtowtën ja Dios.

Colosenses 1:21

Miitsëty, jëpyaat jëpyo'kxy ets mëtsip ijty myajpaatë ma Tiosën. Mmëtsip'ajtëp ijty ja Dios mëët ja m'ëxëëkjot m'ëxëëk winma'anyëty ko ëxëëk xytyuntë.

2 Timoteo 4:10

Ja Demas, tëëjës ja xynyikäknë, mëti'ipë yi'iyë tsyojkën'ajtypyën yaapë naaxwiinyën, tëë ja tsyo'onë ets të nyëjkxnë jam Tesalónica. Yë Crescente jam të nyijkx Galacia y'itjotm, e yë Tito të nyijkx jam Dalmacia y'itjotm.

Santiago 1:27

Ja mëpëjkën oypyë ets wa'atspë Dios Teety wintumpë yë'ë ya'atë: yajputëjkëp ja ku'ooky u'unk ets ja ku'ooky tyo'oxytyëjk mëti'ipë maaytyëp tajtëpën, näjyëtu'un yajputëkëty ka'apë nyäyaj'ëxëëkëtyën mëët ja ëxëëkajtën yaapë naaxwiinyëtën.

Santiago 1:7

Pën jëtu'un'ajtpën, ka'ap tjëjp'ixëty ets ja Wintsën tii myo'ojëtëty,

Santiago 4:4

Miitsëty, mëti'ipë ja Dios të y'ëxmatstën, ¿tii këtii xynyijawëtë ko ja Dios ka'ap tsoky ets ja naaxwiinyëtë winma'any n'atsojkmëtyë? Oy tyimpënëty mëti'ipë ja naaxwiinyëtë winma'any y'atsojkpyën, ja Dios myëtsipëjkpy.

1 Pedro 1:14

Jëtu'un m'itëty ijxtëm ja pi'k ëna'kën mëti'ipë tyeety myëmëtoowtëpën. Këtii jëtu'un mjuuky'atëty ijxtëm të m'itën ko ja Dios ijty xykyanijawëtë.

1 Pedro 4:3

Jeky ojts miitsëty jëtu'un winë xytyuntë xykyajpxtë ijxtëm ja ja'ayëtyën ka'ap ja Dios tnijawëtën, jä'ä ko jam ijty mjuuky'atë ma ja ëxëëkpën; ma yaj'atsokyën winë, ma tëkatsy ja winma'any jyä'tyën, ma ja'ay ja kyë'ëm winma'any tyajtuntën, ma ja'ay y'uuktë myu'ukëtën, kyäytyë y'uuktën ku'uxyë jotkëtä'äky, tyuuntëkoytyë kyajpxtëkoytyë, twintsë'ëkëtë ja tsaa ets kepy.

2 Pedro 2:14

Yi'iyë y'ijxtëp tyuuntëp wi'ix ja to'oxytyëjk t'ëkmëpokytyuntën, ka'ap ja pokytyu'unën tsyipëtë. Jëtu'un twin'ëën twinxajtë mëti'ipë ka'anëm ja myëpëjkën oy tmëët'atynyëm; je'eyë tii tjanty atsoktë; ëxëëk ja'ay yë'ëjëty.

1 Juan 3:10

Nikëxë'kp ja ja'ay mëti'ipë ja Dios u'unk'ajtëpën ets mëti'ipë ja mëjku'u u'unk'ajtëpën. Pën ja oypyë kyatuumpyën ëkë ka'ap ja myëku'uk ttsoky tjawë, ka'ap ja Dios y'u'unk'atyë.

1 Juan 3:8

Pën xëmë pokytyuunp, ja mëjku'u jä'ä'ajtëp; jä'ä ko yë mëjku'u ojts tyajtso'ontä'äky yë pokytyu'unën. Paatykyëjxm ja Dios U'unk të myiny yaa naaxwiiny ets tyajkutëkooytya'aja'any tu'kë'ëyë ja mëjku'u ja tyuunk.

1 Juan 4:4

U'unk maayëty, Dios miits m'u'unk'ajtëtëp. Tëë ja win'ë'ëmpëtëjk xymyëmëta'aktë, jä'ä ko wäänëni'ik ja mëk'ajtën tmëëtëty mëti'ipë mëët m'itën këtiinëm ja mëti'ipë naaxwiinyëtën.

1 Juan 5:19

Nnija'awëm ko ëëtsajtëm Dios xyjyä'ä''ajtëm, tu'kë'ëyë ja naaxwiinyëtë atsojkën ku'oypyë jä'ä'ajtëp.

1 Juan 5:4

tëkokyë pën ja Dios u'unk'ajtëp myëmëtaktääpy ja naaxwiinypë. Ja nmëpëjkën'ajtëm yë'ë xyajmëtakëm naaxwiinyëtë.

Apocalipsis 12:9

Jëtu'un yaj'ixkejxy ya'atë mëj tsa'any, mëti'ipë yajtijpën mëjku'u ets Satanás, mëti'ipë wyin'ë'ëmpyën ni'ëmukë ja naaxwiinyëtë ja'ay. Yë'ëts ojts naaxwiinyëtë yajkujëpijpnaxy mëët ja ëxëëkpë ja anklëstëjk.

Apocalipsis 13:14

Jëtu'un'äämpy ja ja'ay twin'ëëny twinxajy ko ja myëk'ajtën tyaj'ixyë. Tääts twin'ë'ëny ja naaxwiinyëtë ja'ay ets t'ënëmaay ets t'oytyuntëty tu'uk ja awinax ijxtëm ja mëjëwyiinpë ja mëj jëyujkën mëti'ipë ka'ap të y'ookyën, oy të jyayajpuxy.

Apocalipsis 13:8

Ja naaxwiinyëtë ja'ayëty wyintsë'ëkëjantëp ja mëj jëyujk, mëti'ipë ja xyëëw ka'ap jap myintën kuja'ay ma ja nokyën mëti'ipë myë'ijtypyën ja Kupixyny U'unk ja jyuukyajtën, mëti'ipë ja ja'ay yajkruuts päjtën.

Apocalipsis 16:17

Tääts ja mëwëxtujkpë ja tsajpjotmëtë kukäjpxy tyajtukwatsy ja y'a'ukën po'ojotm ets yajmëtooy ja ayuk mëk mëti'ipë tso'onpën ma Dios ja tyëjkën, ma ja kutujktaknën ets y'ënä'äny: Tëë tyunyë jyätyë.

Apocalipsis 20:2

Tyaapë tsajpjotmëtë kukäjpxy myajts ja mëj tsa'any mëti'ipë yajtijpën mëjku'u ets Satanás ets tkë'ëtsuumy tekytsyuumy mëët ja mëj pujxntejpxy ets jëtu'un tu'uk mil jëmëjt y'itëty tsumy matsy.