Daniel 7:1 - Biblia Dc en Mixe de Quetzaltepec

¹ Tëkok ojts yë Daniel wyinkuma'ay, koots ënety, mëët tu'kjëmëjt ënety kyëjääjë yë Belsasar yajkutuky jam Babilonyë. Ko myä'äypyëti'ky, ënät tkujaaytyääy tiijaty ënety të twinkuma'ayën. Jëtu'un tjaaypyejty:

Biblia Mixe de Quetzaltepec

¹ Tëkok ojts yë Daniel wyinkuma'ay, koots ënäty, mëët tu'kjëmëjt ënäty kyëjääjë yë Belsasar yajkutuky jam Babilonyë. Ko myä'äypyëti'ky, ënät tkujaaytyääy tiijaty ënäty të twinkuma'ayën. Jëtu'un tjaaypyejty:

Daniel 7:1 Iomraidhean Croise

Génesis 15:1

Ënet yë Dios ojts tmëkäjpxy yë Abram kuma'ayjoty ets t'ënëmaay: Këtii mtsë'ëkë Abram, jä'ä ko ëjts mijts nkuwäämpy. Yë mkuma'ayën mëj y'ita'any.

Génesis 46:2

Jä'ä koots ojts yë Jacob myëkäjpxyë yë Dios kuma'ayjoty, yë xyëëw tukmëkajpxë, tä y'ëtsooy: Tsyajës jä'ä.

Job 4:13

Koots, tim je'eyës të nmanaxy täätsës të nwinkuma'ay etsës të n'amëkë.

Isaías 30:8

Min ets xykyëxja'ajëty kepykyijxy, jëtu'un jam xykyëxja'ajëty tä ja'ay muum tii tkëxtsa'ayën yë'ë ijxpäjn wa'anëp xëmëkyëjxm.

Isaías 8:1

Jëtu'unës ja Wintsën të xy'ënëëmë: Jam tu'uk yë kepy xy'ixta'ajëty, tu'kpuxyën ets jam xykyëxja'ajëty Maher-salal-hasbaz. Mëjjatyëty xyjya'ajëty ets yaj'ixkapëty.

Jeremias 23:28

Ko tu'uk yë käjpxynyajxpë wyinkuma'ajëty, wä'än t'ëna'any ko tëë wyinkuma'ay; e pën tëë t'ëxajë yë n'aaw n'ayukës, wä'än mëtëy tnimëtyä'äky. Ka'ap tu'knax tsyowpaaty yë tsajpmok ets nyikepy. Tä jëën tsyä'äyën jëtu'un yë n'aaw n'ayukës yajmëtoy ets tä pujxnka'tsnën mëti'ipë piw nuuk yë tsaa tyuunpyën. Ëjts Wintsën, ëjts ënaanp.

Jeremias 27:7

Tu'kë'ëyë yë naax kajpn aakjam yajpata'aja'antë ma yë'ëjën ets ma y'u'unk y'ëna'kën ets ma y'ok'u'unk y'ok'ëna'kën; koonëm wiinkëtypë naax kajpn wäänë mëkpë pyëtsëmëty mëti'ipë nëjkx tyukja'tyën ets pyëjkëtëty ja kyutujkën.

Jeremias 36:32

Ënet ja Jeremías t'ijxy tu'uk yë noky ets tmooy ja Baruc, mëti'ipë yajjääpyën ets ja Baruc jatëkok tjaaytyääy wi'ix ja Jeremías y'ënä'änyën, yë'ë ja aaw ayuk mëti'ipë ënety jap të t'ëkjääpyën ma ja mëjëyëjpën mëti'ipë Joaquim yajkutujkpë nyino'kën. Ojts yë Jeremías tjaakyajkëxja'ayë wiinkpë aaw ayuk jëtu'unpë kyäjpxyën.

Jeremias 36:4

Ënet yë Jeremías tuknipëjky yë Baruc, yë Nerías yë myaank ets tnajtskajpxëy jëtu'un tä ënety ja Wintsën të y'ënë'ëmxëtyën. Yë Baruc wa'ats tkëxjaaytyääy.

Ezequiel 1:1

Ëjts, yë teety Ezequiel, yë Buzí myaank; tëkok ojts nwin'ixyës, jamës näjyawëty ntänë ma Quebar mëjnëëjën, jam Babilonyë; ma ënety yajpaatën ja ja'ayëty mëti'ipë tsumy matsy të yajmënëjkxtën. Ënet ja tsajp y'ëwatsy ets nwin'ijxyës yë Dios. Jää ma myëmëkoxk anyën yë mëmajktaxk po'opë, ma y'apetyën ja më'i'px majk jëmëjtpë, tëë ënety mëkoxk jëmëjt nyajxnë ma ja Joaquín yajkutujkpë yajmënëjkxyën tsumy matsy. Ënet ja Wintsën ojts xykyë'ë nnixajyës.

Daniel 1:17

Ya'atë nimajktaxkpë ëna'ktëjk, wijy ojts pyëtsëmtë ets këpety wyinja'awëtyääytyë wa'ats ja ijxpëjkën ets nija'awën. Yë Daniel nän yajniwijtääpy ijty yë kuma'ay ets ko tii yaj'a'ijxnaxy.

Daniel 2:1

Ma ënety mëmäjtsk jëmëjt ja Nabucodonosor yajkutukyën, ojts kanaak ok jää wyinkuma'ay, ja wyinkuma'ay jä'ä tyäty myëmääpy tyäty myëtäjpy paaty ka'ap oy y'ëkmaa y'ëkpo'kxnë.

Daniel 2:26

Ënet ja yajkutujkpë t'ënëmaay ja Daniel, mëti'ipë ënety tyijtëpën Beltsasar: ¿Mjanty yajniwijëp yë nkëma'ayësë mëti'ipës të nwinkëma'ayënë?

Daniel 4:13

Ënätës ajotkumonë të n'ixy tu'uk kyëtä'äky yë tsajpjotmëtë kukäjpxy,

Daniel 4:5

Ets tëkok ojts jyäty kyëpety, koots, ko'knääpyës ënety koos ojts nwinkuma'ay, nëkooyës ojts ntsë'kënë. Jä'ä ko atsë'ëk ajawës ojts nwinkuma'ay.

Daniel 5:1

Ënet yë Belsasar tnipëjktakëy tu'uk ja ka'ayën ukën ets twoomujktaay yë wintsëntëjk mëj'äämpyëtypë y'itën mëti'ipë jamëtyën Babilonyë; yajxon ojts kom y'uknëtë ma ja ka'ayën ukën y'ijtyën.

Daniel 5:22

E tyam, mijts Belsasar yajkutujkpë, ja myaank ja mëti'ipë yam ntukmëmëtyäkpyën; mijts nän najëtu'un yaj'ixy kyëjääjë xyajtso'ontä'äky yë mjuukyajtën, amëj akëjxm yaj'ixy mja'ay'äty.

Daniel 5:30

Jä'ä tsu'um ja Belsasar yajkutujkpë tyaj'o'ktë, mëti'ipë ënety jam yajkutujkpën ma Caldeo ja'ayëtyën,

Daniel 7:13

Tamës jëtu'un nwinkumaa ëtë'ëtsy koots. Ko ajotkumonë të n'ixyës: Ja'ayën myiny yootsjoty, naaxwiinyëtë ja'ayën yaj'ixy, jä'ä të tninëjkxy ja Mëjja'ay ets të yaj'ënëëmë ets wyinkonëty.

Daniel 7:15

Ëjts Daniel, jëtu'unës të näjyawëty nxujxta'ay; ets mëkës të nmëmay të nmëtajy mëti'ipës të n'ixyën,

Daniel 7:7

Ja mëmajktaxkpë ja mëj jëyujk atsë'ëk ajawë yaj'ixy ets nëkooyë myëk'ajnë. Yë'ë tyëts'ajtyp yë pujxn; aak tyimtsu'tstääpy tii tyimpatyp ets tnaxmëtäänë mëti'ipë natëjkëpën. Tëkatsy tääpë ja mëj jëyujk y'ixëty, ka'ap jyëtu'un'atë ja mëti'ipës ënety mëjëyëjp të n'ixyën, tam tmëëtëty majk yë wyaj ma kyëpajkën.

Daniel 8:1

Ma ënety mëtëkëëk jëmëjt y'ëne'emyën yë Belsasar, ëjts Daniel, ojts nwinkuma'ay, ëpëky mëti'ipës ënety të n'ëk wiinkumaapën.

Joel 2:28

Ko ënety jëtu'un të tyuny të jyätyë, täätsës nëjkx nyajkëtä'äky yë nmëk'ajtënës ma nitëkokyë ja'ayëtyën: yë m'u'unk m'ëna'këty ye'etyëjkpë ets to'oxytyëjkpë nëjkxëp yë n'ayukës tkajpxnaxtë ma miitsëtyën; yë mëjja'aytyëjk nëjkxëp mya'atë pyo'kxtë ets ëna'ktëjkëty oyëty nëjkx wyikëma'atë.

Amós 3:7

Yë Wintsën ka'ap tii tuny ajotkumonë pën ka'ap jëyëjp të tuk'ëwaanë yë tyuunpë mëti'ipë käjpxynyajxpën.

Habacuc 2:2

Tëës yë Wintsën xy'ëtsoy ets të xy'ënëëmës: Jam këxjaaytya'a mëti'ipë yam ntuk'ënëëmëjäämpyën ma naaxmajën tëëpë tyëkäjkë'ëkyën ets jyëkyäpëp yajwinpakajpxëty.

Romanos 15:4

Paaty ojts tu'kë'ëyë winë yajjaaywyi'imy ets xytyuk'ijx xytyuknija'awëmëty, ets amëk jotmëk nmëtënä'ämyëty ja ëyo'on mëti'ipë nmënajx nyajnajxëmën, jëtu'un nmëët'ajtmëty ja jotkujk'ajtën ko ja Dios ëmuumtu'ukjot njëjp'ijxëmë.

2 Corintios 12:1

Ni pën tkatuk'oy'äty ko pën kë'ëm nyämyëjpëjktä'äkyë. Oy jyajëtu'unëty, tyamës nnikajpxa'any wi'ixës ojts ja Wintsën xytyuk'ixyën winë.

Apocalipsis 1:19

Kuja'a mëti'ipë të xy'ixyën ets mëti'ipë tyam tuunëp jajtëpën ets mëti'ipë tunan jatanëpën ok.

Apocalipsis 10:4

Tamës ënety ntimkëjxja'ajanë wi'ix ja ënääw y'ëna'antën koos nmëtooy tu'uk ja ayuk tsajpjotm ets xynyëmaayës: Këtii xykyëxja'ay wi'ix të y'ëna'antën yë ënääw, yu'utsy mëët'at,