Apocalipsis 18:9 - Biblia Dc en Mixe de Quetzaltepec

⁹ E ko ja yajkutujkpëtëjk ets ja ënä'ämpëtëjk t'ixtëty ja jok ko ënety të tyooypyëjknë, ënät tpajë'ë tpaya'axtë mëti'ipë ënety të tmëpokytyuntën.

Biblia Mixe de Quetzaltepec

⁹ E ko ja yajkutujkpëtëjk ets ja ënä'ämpëtëjk t'ixtëty ja jok ko ënäty të tyooypyëjknë, ënät tpajë'ë tpaya'axtë mëti'ipë ënäty të tmëpokytyuntën.

Apocalipsis 18:9 Iomraidhean Croise

Génesis 19:28

Ënet ojts jam nyas'ixë Sodomë ets Gomorra ets ma pya'ajën nyuxën ets t'ijxy ko jam yë jëënjok pyëti'iky ijxtëm jeexyë tsijtkjoty yë jëën tyoyën.

Salmos 58:10

Jotkujk nyäjyawëja'anyë ja wa'ats ja'ay ko ënety të yajnipaye'ey ma ëxëëk të jyäty të kyëpetyën; jëtu'unyë nëjkx t'ateeny tukteeny ja jyot nye'pyny ja myëtsip ëxëëkpë jyä'äy'ätyën.

Isaías 13:19

E ja Babilonyë ja'ayëty mëti'ipë kumeenyëtyën, ja naax kajpn ma yajpaatyën winë mëti'ipë oyëtyën ets tsowëtyën, ma ja Caldeo ja'ayëty tpaatën ja jyotkujk'ajtënëty, o'ktëy nëjkx jyatë kyëpätë jëtu'un tä ja Sodomë ja'ayëty ets Gomorra ja'ayëty jyajtën kyëpäjtën koos nyajkutëkooy ja kajpn.

Isaías 30:33

Tëëyëp yë Asiria ja'ayëty ets kyutujkpëtëjkëty ojts yajtuknipëjktaakëtë yë ëyoowtakn mëjpë ets këkpë, tu'uk ja o'ktakn ma nyitoytyëtyën mëët ja ja'axy kepy. Yë Wintsën wyimpiixëjäämpy yë jëënmëët ja azufre.

Jeremias 50:40

Jëtu'un y'awinpita'any tä yë Sodomë kajpnën ets Gomorra kajpnën, mëët ja naax kajpn mëti'ipë mëët nyämëtsëpa'an'atyën. Ni pën nëjkx jam kya'ëktsënaaynyë ets ni pën nëjkx jam kya'ëknajxnë. Ëjts Wintsën, ëjts ënaanp.

Jeremias 50:46

Ko ënety ja Babilonyë o'ktëy jyäty kyëpety, nëkooyë mëk y'ëna'ananë; nëjkxëp ja naaxwiinyëtë yu'kxypëky ets yajxon nëjkx ja'ay yaxnëtë jyojknëtë, jampaat yajmëtoownë ma wiink naax wiink kajpnën jëkämpë yajpaatën.

Jeremias 51:8

Ajotkumonë yë Babilonyë kajpn të y'ëkëtykyuka'anaxy ets xit ko'ow të jyajta'ay. Nijë'ë niya'axtë tääpë kajpn. Mëmintë yë nyi'aay nyitsooy yë tsyëtyut ets yaj'ixëty pën tsokp.

Ezequiel 27:35

Tëkokyë ja naax kajpn mëti'ipë yajpatëpën nëëpë'aay aak tsë'kënëtëp mëët ijxtëm të mjaty të mkëpetyën; yë kyutujkpëtëjkëty aak je'eyë myoonëtë tyujknëtë ets aak yaj'ijxnëtëp ma wyiinëty jyëjpëtyën ko tsë'këtyëp.

Daniel 4:14

ets mëk të yajmëtoy y'ënä'äny: Yajkëtawtë tääpë kepy, winpujxta'atë yë xye'enty, yajjënajktaayëtë y'ääy ets ixko'owta'atë yë tyëëm. Wä'än tkäkta'atë yë jëyujkëty mëti'ipë pya'tmaatëpën ma nyinikën ets wä'än tkäkta'atë yë joonëty mëti'ipë jam yë pyä'än të t'oytyuntën.

Deuteronomio 29:23

Ets t'ixtëty ko ja naaxwiinyëtë je'eyë ënety të y'awinpijnë naaxwayën, naaxtooyën ets kaanën. Ka'ap nëjkx tjëkyepy wi'ix pën nyi'ipëtyën ets nitii'aay nitii'ujts nëjkx kyayony, jëtu'un jyata'any tä jam Sodomë ets Gomorra jyäjty kyëpejtyën ets jam Admá ets Seboím mëti'ipë ja Wintsën yajkutëkooyën ko tukjoot'anpëjky.

1 Timoteo 5:11

Ka'ap xykyuja'ajëty ja ku'ookytyo'oxy mëti'ipë ka'anëm nëkoo myëjja'ayënëm; jä'ä ko wä'änxyëp nëjkx ok pyiky ko ënety ja Kristë ka'ap t'ëkmëpëkanë,

Apocalipsis 14:11

Xëmëkyëjxm ja jëënjok jap pyëtsimy ëyoowtaknjoty, ka'ap jap ja po'kxën maa, xëëny koots jap y'ëyowëty mëti'ipë ja mëj jëyujk ets ja awinax wyintsë'këpën ets mëti'ipë kyupëjkpyën ja nätsya'ajë.

Apocalipsis 17:2

Yë yajkutujkpëtëjk mëti'ipë yaajëtyën naaxwiiny, tëë mëët pyokytyuntë yë mëj ku'into'oxy ets ja naaxwiinyëtë ja'ay tëë ni'ik wyinma'anytyëkooynyë mëët ja ku'into'oxy ja pyoky.

Apocalipsis 18:18

Ko të t'ixtë ja jok ko të tyooypyëjknë ja kajpn ets ayaxp ajojkp y'ëna'antë: Nimaa ja kajpn jëtu'unpë të kyajaty ijxtëm ya'atë të jyätyën.

Apocalipsis 18:20

Mijts, tsajpjotmëpë yajpaatën, xoonta'aktë mëët ko jëtu'un të jyäty tääpë kajpn; ets miitsëty wa'ats kajpnëty, ayuk kajpxnajxpëty, käjpxynyajxpëtëjkëty xoonta'aktë jä'ä ko tëë ja Dios tuny ja paye'eyën ko të tyajkutëkoy tääpë kajpn.

Apocalipsis 18:3

Jä'äkyëjxm jëtu'un jyäty ko ja naaxwiinyëtë ja'ay të tuktuny ja y'ëxëëktu'unën, tëë ja yajkutujkpë tmëpokytyuny ets näjyëtu'un ko ja ajuuy ato'kpë ijty myeenypyaatë ko tooktë mëti'ipë yë Babilonyë yajtuuntëkoopyën mëj këjää.

Apocalipsis 18:7

Tëytyuntë tsaatyuntë ijxtëm pyaat'atyën, jä'ä ko tëë tuntë winë ëxëëk. Jëtu'un y'ënä'äny jyootjoty wyinma'anyjoty: Tyaajës n'u'unyë ijxtëm tu'uk yë yajkutujkpën to'oxytyëjkpë. Ka'apës nku'ooky tyo'oxyëty ets ka'apës n'ëyowa'any.

Apocalipsis 19:3

Tääts jatëkok y'ënaankojnëpë: Tukxoontä'äky mëjjawë yë Dios yë xyëëw nyaxëty. Nijëna'a yë kajpn kyatooy'ëtukëty, xëmë jam jok yaj'ixëty.

Apocalipsis 2:22

Paatyës ja yuu pa'am nmo'oja'any, etsës nyaj'ooka'any ja y'u'unk y'ëna'k, näjyëtu'un mëti'ipë mëët tyuuntëkoyën. Pën ka'ap tyaj'oyë ja jyot wyinma'any ntuknikäxäämpyës ja ëyo'on jotmay. Jëtu'un tëkokyë ja mëpëjkpëtëjk nijawëtëty koos nija'apës tiijaty ja'ay tyuunpy kyäjpxypën ets tii myääpy tyäjpyën; ets nitu'ukjaty miits nmo'oja'antë ja näykyumayë wi'ixjaty ënety winë të xytyuntën.