Apocalipsis 11:1 - Biblia Dc en Mixe de Quetzaltepec

¹ Tëë nyajmo'oyës tu'uk ja kepy mëti'ipë yajtukkijpxpën winë, jëtu'un kyëxë'ëky ijxtëm yë tsajkäpynyën ets nyajnëmaayës: Pëtë'ëk ets xykijpxëty ja Dios ja tyëjk ets ja wintsë'këntyakn ets näjyëtu'un xymyëtyowëty mëti'ipë wyintsë'këtëpën ja Dios.

Biblia Mixe de Quetzaltepec

¹ Tëë nyajmo'oyës tu'uk ja kepy mëti'ipë yajtukkijpxpën winë, jëtu'un kyëxë'ëky ijxtëm yë tsajkäpynyën ets nyajnëmaayës: Pëtë'ëk ets xykijpxëty ja Tios ja tyëjk ets ja wintsë'këntyakn ets näjyëtu'un xymyëtyowëty mëti'ipë wyintsë'këtëpën ja Tios.

Apocalipsis 11:1 Iomraidhean Croise

Isaías 28:17

Tääpë potsy yë'ë nëjkx mëët yajtuk'ijxtë ja mëtëypyë ja nipaye'eyën. Ja tsoktakn mëti'ipë ënety të xyjya'ixta'atën mëët ja win'ë'ënën antakën yë'ë nëjkx yaj'atëkoyë ja tëtsn tuu, ets mëti'ipë ënety mnätyuk'apëjktujkëtëpën, jëtu'unyë nëjkx jam komnëë yajwinpajë'ëtyë.

Daniel 7:27

E ja kuttujkën, mëk'ajtën ets ja mëj'ajt oyajtën mëti'ipë naaxwiinyëtë apëtsëmy yajpatpën yë'ë nëjkx yajmooytya'atë ja Dios Ni'ik ja nyaax kyajpn. Yë kyutujkën xëmëkyëjxm nëjkx yajpaaty ets tëkokyë yë naax kajpn naaxwiinyëtë apëtsëmy yë'ë nëjkx tmëtuntë ets tmëmëtowtë.

2 Corintios 6:16

Ka'ap tjëkyepy tu'ukyë yajpaatëty yë Dios yë jyëën tyëjk mëët yë awinax. Jä'ä ko jëtu'un ja Juukpyë Dios xyajwa'anëmë tsyënaaytyaknën. Jëtu'un ijxtëm ja Dios y'ënä'änyën: Tsëënëjaanpës ets juuky'ataanpës ma yë'ëjëtyën, yë'ëjës xyWyintsën'attëp, ets yë'ëjës nja'ay'attëp.

1 Pedro 2:5

Näyjyëtu'un miits ja Dios myajnaxa'anëtë ijxtëm ja tsaajën mëti'ipë juukyën, tu'uk ja tsajptëjk ma ja Dios yajwintsë'ëkëtyën, tu'uk ja teety wa'atspë; ko tëë ja Jesukristë xymyëpëktë ets ja wintsë'kën xyaktëty mëti'ipë ja Dios y'oyjya'apën.

1 Pedro 2:9

E miitsëty Dios të mwin'ixëtë ets m'itëty tu'kjëëky tu'kmëku'ukpën, tä tu'uk ja teety tmëtunyën ja yajkutujkpë, ijxtëm ja wa'atspë ja kajpnën mëti'ipë ja Dios jä'äniwanëpën. Ets jëtu'un tkajpxwa'kxtëty ja Dios ja y'oyajtën, mëti'ipë të myajpëtsëmëtë akootstum ets m'itëty ajajëntuuy.

Apocalipsis 10:11

Ënet xynyëmaaytyës: Kopkpëky ko xykyajpxwa'kxëty ja Dios ja y'aaw y'ayuk, ma ja ja'ayëtyën mëti'ipë yajpatëpën naaxwiinyëtë apëtsëmy, ma mëti'ipë kyajpxtëpën kanaakpëky ja aaw ayuk ets maajaty ja ënä'ämpë kutujkpën.

Apocalipsis 21:15

Ja tsajpjotmëtë kukäjpxy mëti'ipës xymyëmëtyakpën, myëët'ajtyp tu'uk ja kepy mëti'ipë yajtukkijpxpën winë, aak pu'ts pujxn mëët y'oytyunyën ets tukijpxa'any ja kajpn, ja tëjk'aaw ets ja potsy.