1 Samuel 4:3 - Biblia Dc en Mixe de Quetzaltepec

³ Ko yë Israel ja'ayëty jam wyimpijtë ma jyajta'aktën, ënät ja mëjja'aytyëjk y'ënantë: ¿Tii ko yë Wintsën të t'ëwa'atsy ets tyam o'ktëy njajtmëty ma filistejë ja'ayëtyën? Ja'amtë nyajtso'onëmë yë kaaxë jam Siló mëti'ipë ja käjpxytyu'unën myë'ijtypyën mëti'ipë ja Wintsën jyä'ä'ajtypyën. Yë'ë itkujky nyajnëjkxmëp ets xykyuwa'anmëty ma ja nmëtsip'ajtëmën.

Biblia Mixe de Quetzaltepec

³ Ko yë Israel ja'ayëty jam wyimpijtë ma jyajta'aktën, ënät ja mëjja'aytyëjk y'ënantë: ¿Tii ko yë Wintsën të t'ëwa'atsy ets tyam o'ktëy njajtmëty ma filistejë ja'ayëtyën? Ja'amtë nyajtso'onëmë yë kaaxë jam Siló mëti'ipë ja käjpxytyu'unën myë'ijtypyën mëti'ipë ja Wintsën jyä'ä'ajtypyën. Yë'ë itkujky nyajnëjkxmëp ets xykyuwa'anmëty ma ja nmëtsip'ajtëmën.

1 Samuel 4:3 Iomraidhean Croise

2 Samuel 15:25

E ja ënä'ämpë ojts t'ënëëmë ja Sadoc: Mënëjkx yë Wintsën yë kyaaxë jam kajpnjotm, pën yë'ë xypyutëjkëpës etsës oy mëk nwinpitëty nëjkxëpës jam jatëkok npaaty ya'atë kaaxë ma të yajkëëytyä'äkyën.

1 Crónicas 17:1

Ko ja David ënety të tpatnë ja kyutujktakn, ënät t'ënëmaay ja Natán, ja käjpxynyajxpë: Ëk'ix, ëjts tëkotyës n'ity ets janty'oy ja jëën tëjk maas nyajpaatyën, e yë Wintsën ja jyëën tyëjk je'eyë ja oywyi'ix wyitnitëyëty.

Salmos 74:1

Dios, ¿wi'ix koos xëmëkyëjxm xy'ëxmats xymyajtstu'utë? ¿Wi'ix ko nëkooyë të xytyimtukjoot'anpëky yë m'u'unk m'ëna'k mëti'ipë jëtu'un mmëët'ajtypyën tä yë kupixyny ëna'k myäytyänëtën mëëykyijxy ujtskëjxy?

Salmos 74:11

¿Wi'ix ko yë mkë'ë xyu'utsy xykyi'iy mëti'ipë mëk'ajtën mëëtën? ¿Wi'ix ko je'eyë mnäkyë'ëmëkijtënë?

Isaías 50:1

Jëtu'un ja Wintsën y'ënä'äny: Miitsëty këtii m'ëna'antëty ko paatyës ja Israel kajpn të n'ëxmatsy, mëti'ipë miits mtaak'ajtëpën ëkë paatyës të ntooky ma wiink kajpnën jä'äkyëjxm koos ënety pën nmënu'kxy'äty. Miitsëty paaty të myajtooktë wiink naax wiink kajpn jä'äkyëjxm ko të mpokytyuntë; ja Israel kajpn paaty të yaj'ëxmatsy jä'ä ko miitsëty je'eyë të mkäjpxykyumëtoownaxtë.

Isaías 58:3

ets ënät jatëkok kyajpxwinpitë ets y'ëna'antë: ¿Tii ko n'ayuu'ajtmëty pën ka'ap ja Wintsën t'ixy? ¿Tii ko ni'ikyë nnäyaj'ëyo'owëmëty pën ka'ap tii tmëjpëjktä'äky? Ma m'ayuu'atën jää miitsëty mtooktë myaktë ets jää mtuunpë wäänë mëk xyajtuntë.

Isaías 59:1

Yë Wintsën yë myëk'ajtën ka'ap jëtu'un kyixy nyäxy tä oy tiijën ets ka'ap yajnitso'okëty, ka'ap nyatëty ets pën y'ëna'anëty ko ka'ap myëtoy.

Isaías 59:2

Jä'äjën tëy, yë'ëkyëjxm ko miitsëty të mpokytyuntë paaty ja Dios të mmëjëkämkä'äkëtë; yë'ëkyëjxm ko të mpokytyuntë paaty je'eyë ja tyatsk të t'apääntuky këtiipë tmëtowëty mëti'ipë mkajpxtëpën.

Jeremias 3:16

E ko ënety të mnimayëtë ets myäyëtë ja m'u'unk m'ëna'këty, ka'ap nëjkx ni pën t'ëkja'amyäjtsnë ja Wintsën ja kyaaxë mëti'ipë ja käjpxytyu'unën myë'ijtypyën, ni pën nëjkx tkamëmay tkamëtajy ets ni pën tkaja'amyätsa'any; jä'ä ko ka'ap nëjkx y'ëkopkpëky'ajnë. Ëjts Wintsën, ëjts ënaanp.

Jeremias 7:4

Këtii xymyëpëktë mëti'ipë mwin'ë'ënëtëpën ko y'ëna'antë: Tyaa ja Wintsën ja tsyajptëjk, tyaa ja Wintsën ja tsyajptëjk.

Deuteronomio 29:24

Ënet nëjkx yë ja'ay nyäyajtëwëtë: ¿E tyam wi'ix ko ënät yë Wintsën jëtu'un ya'atë naax kajpn të tuny? ¿Wi'ix ko nëkooyë të tukjoot'anpëky?

Deuteronomio 31:26

Ya'atë noky jam nëjkx xypyëjktä'äky kaaxëpë'am, mëti'ipë myë'ijtypyën ja käjpxytyu'unën. Yë'ë mtuk'ixtëp ets mtukja'amyätstëp ko ënety ja ëxëëktu'un ëxëëkajpxën jä'ä xypyanëjkxtëjkënyëtë.

2 Timoteo 3:5

Jëtu'un nyäpyëjkta'aka'anëtë ijxtëm jeexyë myëpëktën, je'eyëp ko ma winë tuntën aakjä'ä ma'atpë ets tëkatsypë. Këtii jëtu'unpë ja'ay xykyutëkëtëty. Janty mëpëjkpë ja'ay nyäyajnaxa'anëtëty, jëtu'unpë ja'ay këtii xymyëjwa'kpätëty.

Hebreos 9:4

jap yajpaaty tu'uk ja wintsë'këntyakn aak pu'ts pujxnëmpë ma ja poom tyoyën ets tu'uk ja kaaxë aak pu'ts pujxnëmpë mëët y'oytyunyëtyën. Japts kaaxëjoty tu'uk ja tu'ts aak pu'ts pujxnëmpë mëti'ipë myëët'ajtypyën ja maná ets nän jap kaaxëjoty ja Aarón ja tyajk mëti'ipë ojts jyi'tspëkyën ets mäjtsk ja tsaa ma kyëxja'ayëtyën ja Dios ja kyäjpxytyu'unën.

Josue 4:7

Tääts xy'ëtsowtëty: Ëk'ix u'unk, ya'atë yë'ë nyikäjpxyp, ko tëëyëp ma ja Wintsën ja kyaaxë ojts yajmënaxyën ma ja Jordán mëjnëëjën ojts mäjtskpëky nyäwyä'kxyë ets jëtu'un'äämpy ojts të'ëts wa'ats yajmënaxy. E tyaapë tsaa nipiiwpetypë y'ityën yë'ë ijtp ijxpät ets yaja'amyätsëty mëti'ipë ojts tëëyëp tyunyën jyätyën.

Josue 6:6

Ënet ja Josué ojts tmëkajpxmujkta'ay ja teetytyëjkëty ets t'ënëmaay: Mënëjkxtë yë kaaxë mëti'ipë yë käjpxytyu'unën myë'ijtypyën, mëti'ipë yë Dios jyä'ä'ajtypyën; niwëxtujk jam mnäwyimpiwëtëty mëti'ipë jëjp'am nëjkxtëpën ma ja kaaxë yajmëye'eyën ets yë'ë tyukxu'uxtëp ja tsajppaxwaj.

Josue 7:7

Tääts ja Josué ojts y'ënä'äny: Wintsën Dios, nikë oy jeexyë të xykyayajnaxtës ma mëjnëëjën. ¿Ix je'eyë ëëts yam o'ktëy njajnëtës nkëpäjnëtës ma Amor ja'ayëtyën, ëkë paatyën të xyajnaxtës ets ënät yë'ëjëty xyaj'ook xyajtëkoytyëtyësë? Ni'ik oy jeexyë ëëts jam të ntimwyë'ëmtë Jordán nëë'awinaxy.

Josue 7:8

Wintsën. E tyam ¿tii ayukës ënät npaatëp ma tyam ja Israel ja'ayëty ka'ap ja myëtsip yajmëta'akëtën?

1 Pedro 3:21

Ya'atë nëë, jëtu'un ja nyäxy ijxtëm ja nëëpäjtënën, mëti'ipë ëëtsajtëm tyam ntuk'oy'ajtëmën. Ka'ap yë'ëjëty ja nëëpäjtën mëti'ipë ja ni'kx kopk yajwatsypyën, yë'ë mëti'ipë ja jot winma'any wa'ats yaj'itëpën Dios wyintum, jëtu'unts ja nitsokën npatmëty ko ja Jesukristë jyuukpyijky ma ënety të y'ookyën,

Judas 1:5

Oy miits të xyjyanijawëtë, ntukja'amyäjtstëp yam jatëkok ko ja Wintsën ojts tyajpëtsëmy ja Israel ja'ay jap Egiptë ets ojts tyajkutëkoy mëti'ipë kamëpëjkëtën.

1 Samuel 1:24

E ko ojts ja tyi'tsk tuk'ëxmajtsnë mutsknëm ënety oy, ënät ojts tmënëjkxnë ma ja Wintsën ja jyëën tyëjkën jam Siló. Ojts näjyëtu'un mëët tmënëjkxy tëkëëk yë tsajpkaa'u'unk, i'px tëkëëk tsim yë tsajpmokway ets tu'kxuty yë tsatsym nyëë.

1 Samuel 14:18

E jä'ä xëëw tam ënety tmëët'ajtëpë ja Dios ja kyejky yä'äp mëti'ipë mëët winë tuknijawëtën. Paatykyëjxm ja Saúl t'ënëmaay ja Ahías: Yajmin yë kejky yä'äp mëti'ipë yë Dios jyä'ä'ajtypyën.

1 Samuel 4:2

Jam ja filistejë ja'ayëty tnitsoontë ja Israel ja'ayëty ets mëët tyëjkëtyë tsiptuunpë. Yë filistejë ja'ayëty yë'ë ojts myëta'aktë, jä'ä y'o'ktë yë Israel ja'ayëty nimajktaxk mil jam tsipjotm.