1 Samuel 10:1 - Biblia Dc en Mixe de Quetzaltepec

¹ Ënet yë Samuel ojts tpëjkë'ëky tu'k'apëjkën yë on ets tukuja'axy yë Saúl, tä t'ënëmaay: Yë Wintsën yë'ë tyam mtuknipëjkëp ets mijts xy'ënä'ämëty yë Israel kajpn ma mijts mkukajpnëtyën. Mijts jëtu'un mtsiptunëp ets xyajtso'okëty ma myëtsiptëjkën. E ya'atë mtuk'ixëp ets xymyëpëkëty ko mijts jëtu'un tyam myajtukmëkënu'kxëp ets xy'ënä'ämëty yë nyaax kyajpn.

Biblia Mixe de Quetzaltepec

¹ Ënät yë Samuel ojts tpëjkë'ëky tu'k'apëjkën yë on ets tukuja'axy yë Saúl, tä t'ënëmaay: Yë Wintsën yë'ë tyam mtuknipëjkëp ets mijts xy'ënä'ämëty yë Israel kajpn ma mijts mkukajpnëtyën. Mijts jëtu'un mtsiptunëp ets xyajtso'okëty ma myëtsiptëjkën. E ya'atë mtuk'ixëp ets xymyëpëkëty ko mijts jëtu'un tyam myajtukmëkënu'kxëp ets xy'ënä'ämëty yë nyaax kyajpn.

1 Samuel 10:1 Iomraidhean Croise

2 Samuel 1:14

¿E wi'ixtsën ko mijts të xy'ëknixajë'kpë ja ja'ay mëti'ipës mëj ënä'ämpë'ajtëpën mëti'ipë ja Dios kë'ëm win'ijxën? Jëtu'un ja David mëk y'ënäny.

2 Samuel 19:39

Tëkokyë ja ja'ayëty ojts ja Jordán mëjnëë tuknajxta'atë. E ko ja yajkutujkpë ojts tuknajxtaaynyë ja mëjnëë, ënät ojts mëët ja Barzilai nyäjyëkajpxënë. Jëtu'un'äämpy ja Barzilai ojts jam nyëjkxnë ma kyajpnën.

2 Samuel 20:19

Ëëts yë nkajpnëty, oy jotkujk yë mëët nyäyaj'ityë oymyëti'ipë kajpnëty, ka'ap ni pën mëët tsyiptuny ma Israel kajpn yajpaatyën ets ya'atë kajpn mëj'äämpy näjyëtu'un y'ity. Je'eyëp ko tyam jëtu'un yowë yaj'ixy ko mijts xyajkutëkoyä'äny. ¿Wi'ix ko jëtu'unpë winma'any xypyääty ets xyajkutëkoyaanpë mëti'ipë kë'ëm yë Wintsën të tyajnaaxkëtä'äkyën?

2 Samuel 5:2

e tä të y'ityën, oyën ja Saúl ënety jä'ä jya'ënä'ämpë, mijtsyëm ijty mtu'uwinye'eypy ja naax kajpn ko muum tsyippaaty. Tëë kë'ëm ja Wintsën y'ënä'äny ko mijts jëtu'un mwinye'epy ja Israel kajpn ets xy'ënä'ämëty.

1 Reyes 1:34

e ko ënety ja teety Sadoc ets ja Natán tkënu'kxtë ets yë'ë yajkutukëty ma ja Israel kajpnën, mtukxu'uxtëp ënätyë ja tsajpkaawaj ets mëk m'ëna'antëty: Wä'än ja yajkutujkpë Salomón jeky tjuuky'äty.

1 Reyes 19:18

E kajts ënät ntimy ëna'anmëty ja'ay tyim o'kta'aja'antë, nyajwë'ëmäämpyës jam ma Israel kajpnën niwëxtujk mil yë ja'ay mëti'ipë ka'ap të twinkoxtänëtën yë Baal ets nän ka'ap të tsu'kxtë.

2 Reyes 20:5

Wimpit ets ënëëmë yë Ezequías, mëti'ipë nyiwintsën'ajtypyën yë nnaaxës nkajpnës: Yë Wintsën, mëti'ipë m'apteety David y'ëwtajtën, jëtu'un y'ënä'äny: Tëës nmëtoow'ity ja mjëëytyak mnu'kxtakën ets mjë'ëyën myaxën. Oy'atëp, tyam nyajtso'okëty, ko jyatëkëëk xëëw'atëty jyëkyäpëp mnëjkxëty ma tsajptëjkën.

2 Reyes 9:1

Ja käjpxynyajxpë Elisejë, ojts tmëkäjpxy tu'uk ja myëku'uk mëti'ipë jam yajpatëpën ma të ye'eymyuktën ets t'ënëmaay: Näjyëjp'ixët ets mtsoonëty. Tyaa ya'atë on kon ets mnëjkxëty jam Galaad ma Ramot y'itjotmën;

2 Reyes 9:12

Këtiijës xywyin'ëëntëty, tukmëmëtyaktëkës wi'ix të m'ënë'ëmxëty. Ënet ja Jehú y'ëtsoowëtë: Tyam ntuk'ëwaanëtëty wi'ixës të xy'ënëëmën: Jëtu'un yë Wintsën y'ënä'äny: Mijts yam nkënu'kxyp ets m'ënä'äm myajkutukëty ma Israel kajpnën.

Salmos 135:4

Yë'ë ojts twin'ixy yë Jacob mëti'ipë yajtijpën Israel, ets yë'ë jëtu'un tjawëja'any tä kyë'ëm wit kyë'ëm meenyën.

Salmos 78:71

Ojts jam tjëwoy ma kyupixyny kyëwent'atyën, ets ojts jä'ä tuknipëky ja nyaax kyajpn tkëwent'atëty, jëtu'unts yë'ë tniwintsën'atëty ets twoow'it twijts'itëty ja Israel kajpn.

Éxodo 30:23

Ëxta'a mijts kë'ëm yë aay ujts mëti'ipë pa'akxu'kpën, tëtujk tsim mëti'ipë ni'ik pa'akxu'kpën, tëkëëk tsim yë canelë, tëkëëk tsim yë waxk mëti'ipë pa'akxu'kpën,

Jeremias 10:16

Yë Dios mëti'ipë Jacob Tyios'ajtypyën tëkatsy yë'ë, yë'ë yajkoj winë. Ojts twin'ixy yë Israel ko yë'ë tkajpn'ata'any. Jä'ä txëëwaty Wintsën mëti'ipë maaytyääyëpën winë.

Ezequiel 16:13

Nituky ojts mwë'ëmy mëët yë pu'ts pujxn ets poop pujxn; linë wit ojts xywyit'aty, oyëtypë wit myajtuun, kanaak ujkën. Oyjyäty ijty mkay m'uuky, yë'ë uuxpa'ak ets olivë on mjë'kxyp. Janty oy myaj'ijxy, m'awinpijty jëtu'un tä tu'uk to'oxytyëjkën mëti'ipë yajkutujkpën.

Oseas 13:2

Ja ja'ayëty je'eyëm pyokytyuun'ëtë'ëtstë. Yajjëëytyëëwtëp yë poop pujxn ets t'oytyuntë y'awinax jëtu'un ijxtëm wyinma'anypyaatën ets jëtu'un ijxtëm yë pujxn'oytyuunpë t'oy'ixyën ets y'ëna'antë: Mo'otë wyintsë'kën ets ja ja'ay tjanty tsyu'kxtë ja y'awinaxëty mëti'ipë jëtu'un këxë'kpën tä tsajpkaa'u'unkën.

Hechos 13:21

Tääts t'amëtoowtë tu'uk ja yajkutujkpë mëti'ipë ënä'ämëpën. Ënet ja Dios tu'uk myooyëtë ja yajkutujkpë mëti'ipë xyëëwajtypyën Saúl, yë'ë Quis ja myaank, Benjamín y'u'unk y'ok. Jä'ä ojts yajkutuky wëxtyikxy jëmëjt.

Deuteronomio 32:9

Jä'ä ko mëti'ipë yë Wintsën kyuma'ayën'ajtypyën yë'ë yë Jacob yë y'u'unk y'ëna'k ets yë'ë jyä'ä'ajtyp.

1 Tesalonicenses 5:26

Kajpxpo'kxtë ni'ëmukë ja nmëku'uk'ajtëmë ijxtëm ja Dios tsokyën.

Hebreos 2:10

Tu'kë'ëyë mëti'ipë jää'ajtpën aak Dios jyä'ä'ajtääpy ets yaj'ijtääpy, jä'ä ko tsyojkpy ets ja y'u'unk y'ëna'k näjyëtu'un tpaatëty ja myëj'ajtën y'oyajtën; Dios ojts tyaj'awinpity ja Jesukristë wa'ats ko y'ëyooy, mëti'ipë të yajnitso'okëtën.

Apocalipsis 5:8

Ko t'ëxajëy, ënät ja nimajktaxkpë ja juuky'ajtpë ets ja i'px taxkpë ja mëjja'aytyëjk nyäkyoxtënaaytyakëtë jam wyintum ma ja mëti'ipë yajtijpën Kupixynyën U'unk. Ja mëjja'aytyëjk, këëkjä'ä tmëët'atë ja kow, ets näjyëtu'un tmëët'atë ja poom ato'oyën aak pu'ts pujxnpë. Jä'ä jëtu'un nyiwijy ja Dios ja'amyäjtsën mëti'ipë tyuuntëpën ja mëpëjkpëtëjk.

1 Samuel 12:3

E tsyaatsës miits xymyëët'atës: Miits mnija'awëtyëp pën tëëjës pën yë jyëyujk tsyajpkaa npëjkë, pën tëëjës pën nkamëj'ixy ëkë ëxëëk ntuny n'ënëëmë, ëkë pën tëëjës ja wit meeny ja'ay npëjkë, maas ëjts ntuk'oy'ätyën; pën tëëjës ëxëëk ja'ay ntuny oypyënëty, ëkë tëëjës ja'ay wit meeny muum xytyukwin'ëëny maajës ja ëxëëkpë ntunyën, jyëkyejpyës xytyukwinmëtowtëty Dios wintum ets yajkutujkpëwintuuy mëti'ipës yë'ë të twin'ixyën. Ëjts jëjp'ixyës nyajpaaty ets nkumëtowëtyës pën jamës muum të nkamëtä'äky.

1 Samuel 13:14

E tyam ënät yë mkutujkën jëjptukaanp yë'ë. Yë Wintsën yë'ë ënät kë'ëm y'ixta'ajëp pën tsyojkpy ets ënät tpëjkta'akëty ënä'ämpë ma kyajpnën, mëët jä'äkyëjxm ko mijts ka'ap të xytyuny tä ënety të mja'ënëmxëtyën.

1 Samuel 15:1

Tu'kxëëw tu'kjëmëjt ojts yë Samuel tninëkxy yë Saúl ets t'ënëmaay: Yë Wintsën yë'ëjës ojts tëkok xykyexy ets mijts nkënu'kxëty ets m'ënä'ämëty ma Israel ja'ayëtyën mëti'ipë yë'ë kyajpn'ajtypyën. Paaty tyam mëtoow'it ënät mëti'ipë yë'ë mtuknijawëjanëyëpën.

1 Samuel 15:17

Tä ja Samuel y'ënëmaayë: ¿Ti këtiijën ënety mnätyijyë ko mijts ka'ap tii xykyëjxmëtyë? tyam ënä'ämpë myajpatnë ma Israel ja'ayëtyën, ko ja Wintsën mpëjktakë ets myajkutukëty.

1 Samuel 16:1

Ënet ja Wintsën t'ënëmaay ja Samuel: ¿Mapaatën mon tuk m'ita'any mëëtkyëjxm yë Saúl? Ëjts ka'apës n'ëktsojknë ets yë'ë y'ënä'ämëty ma Israel kajpnën. Yaj'uts yë mxuty mëët yë on ets mnëjkxëty jam Belén ma Jesé tsyëënën, jä'ä ko tëëjës tu'uk yë myaank nwin'ijxë ets yë'ë y'ënä'ämëty ma Israel kajpnën.

1 Samuel 16:13

Tä ja Samuel tu'ktsim yë on tpëjkë'ky. Ja nëë jëtu'unpë kyëxë'ëkyën waay tsyooyën ets tukuja'axy ja David tam ënety ja myëkä'äxtëjk y'ixëtë. Ko jëtu'un tyuunë jyajtë, ënätyë ja Wintsën ja myëk'ajtën y'oyajtën tyukëtakë. Ok ja Samuel ojts tsyo'onë ets nyëjkxnë jam Ramá.

1 Samuel 2:10

Yë Wintsën piw nuuk yë myëtsip tuna'any mëët yë ënääw mëti'ipë ënety yajtso'ompyën jam tsajpjotm. Yë Wintsën yë'ë nëjkx tukwinmëtoowta'ay nitu'ukjaty ja naaxwiinyëtë ja'ay wi'ix jyä'äy'atën; nëjkxëp tkutujkënmo'oy ja yajkutujkpë mëti'ipë ënety yë'ë kë'ëm të twin'ixyën ets nëjkx tyajmëj tyajkëjääjë ja kyutujkën.

1 Samuel 24:6

ets t'ënëmaay ja jyä'äy: Tiosës xypyutëkëp ets ka'apës wi'ix ntunëty yë Saúl, yë nwintsënës mëti'ipë yajkutujkpën. Pën yajkutujkpë yajpaaty, yë'ëkyëjxm yajkutuky mëët ko yë Wintsën të wyin'ixyë.

1 Samuel 26:11

Yë Wintsën yë'ëjës xykyuwa'anëp ets ka'ap wi'ix ntunëtyës ja mëj'ënä'ämpë mëti'ipë yë'ë kë'ëm të twin'ixyën. Paaty yam n'ënëëmë ni'ik yi'iyë pëjkë'kë yë nyëë'a'ukëm ets kyu'umën tampë kyëpäjky tyaj'ityën.

1 Samuel 26:9

E ja David tyaa y'ëtsooy: Ka'ap, këtii xyaj'ookëty, jä'ä ko pën kyë'ënixäjpy ja mëj'ënä'ämpë mëti'ipë yë Wintsën kë'ëm të twin'ixyën, ka'ap yë'ë jëtu'unyë nyäyajna'ixëty.

1 Samuel 8:19

Ja kajpn tyaa ojts y'ëtsoy ko Samuel tyukmëmëtyaktaayëtë wi'ix ënety y'ixë'atyën: Wä'än timwyi'ixëty, ëëtsëty ntsojktëpës tu'uk yë yajkutujkpë,

1 Samuel 8:9

Paaty n'ënëëmë ko kupëk je'eyë ijxtëm y'ëna'atën; je'eyëp ko tuk'ëwaanë wi'ix nëjkx ja yajkutujkpë jyä'äy'ätyën ets ijxtëm nëjkx winë tunyën ma yë'ëjëtyën mëti'ipë ënety ënä'ämëtëpën.

1 Samuel 9:16

Jëpom ntuknikäxa'any tu'uk yë ja'ay, jam tsyoony ma Benjamín yë y'itjotmën, mëti'ipë mkënu'kxëpën ets yë'ë y'ënä'ämëty maas yë nnaax nkajpnën, yë Israel kajpn. Yë'ë nëjkx tyaj'ëwaatsëpëtsëmy yë Israel kajpn ma ëxëëk jyatën kyëpätën, mëët yë filistejë ja'ayëty, jä'ä ko npa'ëyoowtëpës ko ka'ap jyotkujk'atë.

1 Samuel 9:27

E ko jam kajpnpë'am jyajtë, tä ja Samuel t'ënëmaay ja Saúl: Ënëëmë yë mtuunpë wä'än tjaamë'ëky ets mijts ëwxitmës wäänë, jä'ä ko ayuk yam tu'uk nmo'ojäämpy mëti'ipës yë Wintsën të xytyuk'ëwaanën.