Jeremías 5:4 - Tayta Diosninchi Isquirbichishan

⁴ Nogaga yarparä: «Imatapis mana yachajcunallami yarpayniynajnöga ruran. Paycunallami mana musyanchu Tayta Dios munashanta, ni imano rurananpaj Tayta Dios mandashantapis.

Jeremías 5:4 Iomraidhean Croise

Isaías 27:11

Chaychöga yörapa rämancunapis chaquir shicwanga. Chay shicwajta shuntarcurnami warmicuna yanuconga. Chaynöga canga chay runacuna yarpayniynaj captinmi. Chaypitami paycunata Camaj Diosga mana cuyapangachu ni llaquipangapischu.

Isaías 29:12

Liguiyta mana-yachaj runata chay rölluta liguipänanpaj «Tayta cayta liguipämay» niptin chay runaga nenga: «Manami liguiyta yachächu» nir.

Jeremías 10:8

Paycunaga llapanpis yarpayniynajllami. Manami tantiyayta atipanchu. Llagllasha gueruga paycunata manami imatapis yachachinchu.

Jeremías 4:22

Chaura Tayta Dios niran: «Acrashä runacunaga upa, mana tantiyacojmi. Manami rejsimanchu. Mana tantiyacoj yarpayniynaj wamräcunami. Allita ruraytaga manami yachanchu. Mana allita ruraytami ichanga fiyupa yachan.»

Jeremías 7:8

« ‹Gamcunaga yäracurcaycanqui llullapar nishushayquimanmi. Chay nishushayquega manami rasunpachu.

Jeremías 8:7

Äbicunapis musyanmi imay wichan yapay cutimunanpaj cashanta, imay wichan juc-läman witinan cashantapis. Gamcunami ichanga laynëcuna imano niycashantapis mana musyanquichu.

Jeremías 9:3

Tayta Diosga nin: «Chay runacunaga lëchawan illapananpaj camaricusha caycajnörämi llullacunanpäga listu carcaycan. Cay nasyunchöga llapanpis llullallami; manami rasun cajtaga parlanchu. Paycunaga ‹rejsëmi› nirpis manami rejsimanchu. Waranllanta waranllantami mas piyur ricacuycan.

Oseas 4:6

«Acrashä runacunaga manami mayganpis ‹gammi Diosnë canqui› nimashachu. Chaypitami paycunaga ushacaycan. Ni gamcunapis cüracuna manami ‹Diosnë› nimashcanquinachu. Chaypitami mana munänachu cürä canayquitapis. Gamcunaga yachachicuynëta gongaycärishcanquimi. Chaynöllami nogapis gongaycushaj gamcunapita mirar aywajcunata.

Mateo 11:5

Gapracuna ricannami. Mana purejcuna purinnami. Leprawan gueshyajcuna allchacashanami. Upacuna wiyannami. Wañushacuna cawarimushami. Pobricunapis Tayta Diospa willacuyninta wiyaycannami.