Isaías 1:4 - Tayta Diosninchi Isquirbichishan

⁴ Ay imanöraj canqui juchasapa runacuna, mana allita rurar jucha aparicoj runacuna, juchasapacunapita mirajcuna, pirdicasha wamracuna. Gamcunaga Tayta Diospitami witicurishcanqui. Israelcunapa Santo Diosnintami manacajman churashcanqui. Paytaga gongaycärishcanquinami.

Isaías 1:4 Iomraidhean Croise

Génesis 13:13

Sodomachöga llapanpis fiyu runacunalla tiyaran. Tayta Diosta rabyachishpan fiyupa juchallatana ruraran.

2 Reyes 21:22

Unay caj awiluncuna adurashan Tayta Diostaga gongaycuranna. Manana rurarannachu Tayta Dios munashannöga.

2 Crónicas 12:1

Roboamga llapanta sumaj camacarcachir ray carga munayniyojna caran. Chaura Tayta Diospa laynincunata manana cumlirannachu. Llapan Israelcunapis mana cumlirannachu.

2 Crónicas 27:2

Jotam Tayta Diosta wiyacur rurashancunaga papänin Uzías rurashanno allilla caran. Tayta Diospa Templunman ichanga mana yaycuranchu. Runacunaga sïguir jucha rurayllacho caycaran.

Nehemías 1:7

Ricaycämaptiquimi fiyupa mana allillata rurashcäcuna. Manami cumlishcäcunachu sirbishojniqui Moiseswan willachimashayqui mandamintuyquicunata, layniquicunata, yachachimashayquicunatapis.

Salmos 58:3

Fiyu runacunaga manaräpis yurillarnami fiyu. Mamanpa pachancho caycällarnami llulla.

Salmos 71:22

Tayta Diosnë, nogaga alli cashayquipitami alabashayquipaj. Israelcunapa Santo Diosnin captiquimi alabansacunata cantashaj arpacunata arpa-mallwacunata tucashpä.

Salmos 78:40

¡Achca cutimi chunyajcho Tayta Diostaga rabyachiran! ¡Chayno rurashpanmi llaquicachiran!

Salmos 78:41

¡Achca cutimi Tayta Diostaga musyaparan! ¡Israelcunaga Santo Diosninta llaquicachiran!

Salmos 78:57

Paycunaga unay caj awiluncunanömi Tayta Diospa contran ricacuran. Manami ruraranchu Pay munashannöga. Wicsu lëcha aywar llutanman chayajno Tayta Diostaga manana wiyacurannachu.

Salmos 78:8

Chaura unay caj awilunchïcuna mana wiyacoj, mana tantiyaj cashannöga mananami cashunnachu. Awilunchïcunaga caran Tayta Diosman mana yäracojmi; Tayta Dios munashancunataga mana ruraj runacunami.

Salmos 89:18

¡Tayta Dios, gammi canqui chapacuna escüdö! ¡Israelpa Santo Diosnin, gammi canqui nogacunapa raynë!

Éxodo 32:7

Chaymi Tayta Diosga Moisesta niran: «Uraman juclla cutiy. Egiptupita jorgamushayqui runacunaga jucha ruraymannami churacasha.

Isaías 1:23

Mandajniquicunapis Tayta Diosta manami wiyacunchu. Paycunaga suwacunapa amiställanmi. Paycunaga munarcaycan pacayllapa päguta chasquiytami. Munarcaycan imapitapis imallatapis päganantami. Wacchacunataga manami alli arriglanchu. Biyüdacuna dimandacuptinpis manami cäsunchu.

Isaías 1:28

Mana wiyacojcunawan juchasapacunami ichanga wañuchicanga. Tayta Diosta gongaycoj cajcunaga llapanmi wañonga.

Isaías 10:6

Paytami cachä acrashä juchasapa runacunata magananpaj. Rabyachimaj nasyun runacunamanmi cachä. Chayman cachä ima-aycantapis suwapänanpaj, guechunanpaj, cällicho caycaj mituta-jina lluchcargärinanpämi.

Isaías 12:6

Sioncho tiyajcuna, cushicuypita gaparpay, cantay. Chayno ruranqui Israelpa Santo Tayta Diosnin gamcunacho fiyupa munayninwan captinmi.»

Isaías 14:20

Gamtaga manami waquin raycunatanöchu pampashunquipaj nasyunniquita mana alliman churashayquipita, marca-masiquicunata wañuchishayquipita. Mana allita rurajcunapita mirajcunataga manami pipis yarpanganachu.

Isaías 29:19

Tayta Dios yanapaptinmi umildicunaga cushiconga. Pobricunapis cushishami goyangapaj Israelcuna sirbishan Santo Tayta Dios yanapaptin.

Isaías 3:8

Rasunpami Jerusalenga juchonga. Judá nasyunnami pasaypa mana allicho ricaconga. Chaynöga canga munayniyoj Tayta Dios nishanta mana cäsushpan llutancunata rurashanpitami, Tayta Diospa contran mana allicunata rimashanpitami.

Isaías 30:1

Tayta Diosmi nin: «¡Ay imanöraj canga mana wiyacoj wamräcuna! Mana tapucamayllapami jucwan-jucwan parlacusha. Chaynöpami jananman-jananman juchata rurarcaycan.

Isaías 30:15

Israelcunapa Santo Tayta Diosnenga nin: «Nogaman cutimushpayqui jamaycäriyna ari. Nogaman yäracamorga salbashanami canquipaj. Chayno nishuptiquipis gamcunaga manami munashcanquichu.

Isaías 30:9

Cay nasyun runacunaga mana wiyacoj llullami. Tayta Dios yachachishantapis manami wiyayta munanchu.

Isaías 31:2

Tayta Diosga fiyupa yarpaysapami. Chaymi musyan imanöpa disigrasyata chayachiytapis. Imano rurananpäpis nishantaga simrimi cumplin. Fiyu runacunataga castigangami. Mana allita rurajcunata yanapajcunatapis castigangami.

Isaías 37:23

¿Pitataj ashllishcanquega? ¿Pitataj gayapashcanquega? ¿Pitataj gayarashcanqui alli-tucushpayquega? ¡Israelpa Santo Diosninpa contranmi rimashcanqui!

Isaías 41:14

Jacobpita mirar aywaj Israelcuna, curunölla cashpayquipis ama manchacuychu. Nogami yanapäshayqui. Nogami gamcunapa Santo Tayta Diosniqui caycä. Nogami imapitapis jorgoj caycä.

Isaías 41:16

Paycunaga wayra apacuptin illgashannömi ushacangapaj. Löcu wayra shamur wacpa-caypa machirishannömi illgangapaj. Chaynöpami Tayta Dios yanapäshushayquipita fiyupa cushicunquipaj. Santo Diosniquipäga fiyupa cushishami caycanquipaj.

Isaías 41:20

Chaura intërucho tiyaj runacunami ricashpan tantiyaconga Noga Tayta Dios munaynëwan chaycunata rurashäta, gam Israelcunapa Santo Tayta Diosniqui chaycunata camashäta.»

Isaías 5:19

Gamcunaga nircaycanqui: «Ricananchïpaj Diosga juclla rurachun rurananpaj cajcunata. Musyananchïpaj Israelcunapa Santo Diosnenga juclla rurachun rurananpaj yarpaycashancunata» nir.

Isaías 5:24

Chaypitami nina ogshata rupacurcushanno, chaqui öjacunatapis ushacurcushanno gamcunapis ushacanquipaj. Sapinpita ismoj lantacunanömi, ismuptin waytancuna allpaman ticrashannömi ticranquipaj. Chaynöga canquipaj munayniyoj Tayta Dios yachachishushayquita mana wiyacushayquipitami, Santo Tayta Diospa layninta mana cäsushayquipitami.

Isaías 57:17

Israelcuna juchata rurashanpitami juc timpu rabyasha caycarä. Chaynöpami paycunataga castigarcur cachaycurä. Chaura paycunaga quiquincuna munashannöna goyaran.

Isaías 58:2

Paycunaga waran-waranmi nogaman mañacaycämun. Munashäno rurananpaj cajta musyarmi paycunaga cushisha caycan, allita ruraj runacunanöraj, laynëcunatapis mana cachaypa cumlejnöraj. ‹Alli cajta ruranäpaj laycunata musyachimay› nir mañacaman. Chayno mañacamarmi paycunaga alli-tucurcaycan.

Isaías 65:11

Ichanga nogata gamcuna cachaycamashcanquimi. Rispitädu jircätapis gongaycushcanquimi. Gamcunaga ‹alli surtita tarichicoj diospaj› nirmi garaycanqui. ‹Alli distïnuta tarichicoj diospämi› nir bïnutapis jichapaycanqui.

Isaías 65:3

Chay runacunaga imay örapis rabyaycächimanmi. Wertacunachömi dioscunapaj sacrifisyu uywacunata churan. Ladrillupita pergashan altarchömi insinsutapis rupachin.

Isaías 9:17

Chaypitami Tayta Diosga mösucunata mana cuyapashachu. Wacchacunata ni biyüdacunatapis mana cuyapashachu. Chayno mana cuyapashachu llapanpis mana yäracojlla, mana allita rurajcunalla cashanpita, llapanpis manacajcunallata parlashanpitami. Chaypis, Tayta Dios rabyashanpitaga manami allchacanrächu. Payga jinallarämi castigananpaj rimaycan.

Jeremías 15:6

Gamcunami cachaycamashcanqui. Gamcunami chiquicarcamashcanqui. Chayno cashayquipita mana awantarnami castigar illgächishayqui. Noga Tayta Diosmi chayno në.

Jeremías 2:13

Acrashä runacunaga ishcay casta juchatami rurasha. Mana chaquej yacu pashtajno caycaptëpis Nogaman yäracaycämashanpita cachaycamasha. Y quiquincunami ïdulucunata adurasha sagra pösuncunata rurajno. Chay pösuncunaga yacuta manami juntachinchu.

Jeremías 2:17

Chaynöga rurasha-cashunqui Noga Tayta Diosniqui caycaptë, caminunpapis pushaj caycaptë cachaycäramashayquipitami.

Jeremías 2:19

Quiquiquicunapa juchayquipitami castïgu chayashunqui. Mana wiyacamashayquipitami mana allimanpis chayanqui. Imata rurashayquitapis sumaj yarpachacushpayqui mä tincuchiy. Chaymi tantiyacunquipaj Tayta Diosniquita cachaycuyga fiyu mana alli cashanta. Nogataga manami rispitamashcanquinachu. Noga Tayta Diosmi chayno në.

Jeremías 2:31

«Canan wichan caycaj runacunapis sumaj tantiyacuy Tayta Dios willacaycächishanta. Israelcuna, gamcunapäga ¿chunyaj jircachu cashcä? ¿Chacajno llantuy ñitishachu cashcä? ¿Imanirtaj nogapaj nircaycanqui ‹Nogacunaga manami pipa munayninchöpis cächu. Manami yapay gammanga yäracamushänachu› nir?

Jeremías 2:33

«Juccunata cuyanayquipaj ashiytaga sumajmi yachanqui. Chaymi guellaypaj cacoj warmicunapis gampita yachacusha.

Jeremías 2:5

Tayta Diosga gamcunapaj caynömi nin: «¿Ima mana allitataj rurashcä gamcunapa unay awiluyquicuna cachaycamänanpäga? Mana bälej dioscunata adurajmi aywacuran. Chaymi quiquincunapis mana bälejna ricacuran.

Jeremías 32:32

Chaynöga rurashaj llapan mana allita rurashpan rabyachimashanpitami. Rabyachimaran Israelcuna, Judäcuna, raynincuna, mandaj autoridänincuna, cürancuna, profëtancuna, Judächo tiyajcuna, Jerusalencho tiyajcunapis.

Jeremías 50:29

«¡Lëchawan illapay yachajcunata llapanta shuntay Babiloniaman magaj yaycupaycärinanpaj! ¡Siudä cantunpa tiyacaycäriy pipis mana gueshpinanpaj! ¡Rurashanmanno ayñita cutichiy! ¡Imanömi jucta ruraran chayno paycunatapis ruray! Paycunaga Israelcunapa Santo Tayta Diosnin caycaptëmi mana rispitamashpan rabyachimasha.

Jeremías 51:5

Chaynöga canga Israelcunatawan Judá runacunata Noga, munayniyoj Tayta Dios, mana gongaycusha captëmi. Nasyunnincho pasaypa juchata rurasha captinpis Noga, Santo Tayta Diosnenga manami gongaycushcächu.

Jeremías 7:19

Chay rurashancunawan ¿Nogatachuraj rabyachiman? ¡Manami! Chaypa ruquin quiquincunami mana alliman chayashpan pengaycho cangapaj. Noga Tayta Diosmi chayno në.

Jeremías 7:26

Chaypis gamcunaga manami wiyacushcanquichu. Chaypa ruquin unay caj awiluyquicunapitaga mas piyur mana wiyacojraj ricacushcanqui.

Ezequiel 14:5

Chayno ruraptë Israelcunaga capaschari arpinticunmanpis ïdulucunata adurashanpita, nogata gongaycamashanpitapis› nir.

Ezequiel 16:33

Guellaypaj piwanpis cacoj warmitaga chay warmiwan cacoj runa päganmi. Gammi ichanga pägashunayquipa ruquin pï-maytapis cacushayqui cajtaga quiquiqui pägashcanqui. Gamwan juchata ruraj maypita shamunanpäpis pägajmi-canqui.

Ezequiel 16:45

Gampa mamayquega casha Het nasyunpita, papäniquina Amorreo nasyunpita. Gampis runanta, wamrancunata chiquej warmipa wawanmi caycanqui. Chaynömi ñañayquicunapis runanta y wamrancunata chiquej.

Daniel 9:11

Gam yachachimashayquita Israelcunaga llapanëmi mana wiyacushcächu. Nishayquicunatapis manami cumlishcäcunachu. Nogacunaga ricaycämaptiquimi fiyupa mana allita rurashcäcuna. Chaynöpami canan nogacunamanga maldisyun chayamasha sirbishojniqui Moisés isquirbishan laycho niycashanno.

Sofonías 1:6

Illgächishämi nogata gongaycamajcunata, Noga nishäta rurananpaj mana yarpachacojcunata, mana tapucamajcunatapis.»

Números 32:14

«¿Canan gamcunapis Tayta Diosta rabyachej unay Israel-masiquicunanöllachu guellanächiyta munaycanqui? Chayno guellanächiptiquega yapaymi Israelcunapaj Tayta Dios rabyacurcongapaj.

Mateo 11:28

«Lasaj yüguta apar ñacaycajcuna yüguyquita cachaycuyna. Nogamanna shamuy. Nogaman shamuptiquega jamaytami tarichishayqui.

Mateo 23:33

«¡Culebra casta runacuna! Infiernucho castigasha canayquipaj cajpita ¿imanöparaj salbacunqui?

Mateo 3:7

Juan bautisaycashan cajman achcaj fariseucunawan saduceocuna aywaran. Chaymi Juan niran: «¡Culebra casta runacuna! ¿Pitaj gamcunata willasha-cashunqui Tayta Diospa castïgunpita gueshpinayquipaj cashanta?

Romanos 8:7

Juchata rurajcunaga shongun munashallanta ashir Tayta Diosninchïpa contranmi carcaycan. Paycunaga laycuna nishanta wiyacuyta manami munanchu, ni camäpacunpischu.

1 Corintios 10:22

¿Tayta Diosninchïta rabyachiytachu munarcaycanqui? ¿Noganchëga paypita mas munayniyojchu canchi?

Deuteronomio 29:25

Niptin nenga: ‹Egiptupita unay caj awiluncunata Tayta Dios jorgamur conträtu rurashanta mana cumlishanpitami.

Deuteronomio 31:16

Tayta Diosga Moisesta niran: «Wañunayquipäga wallcanami pishin. Cay runacunaga mana allitanami ruranga. Tiyananpaj caycaj nasyuncho caycaj dioscunata adurarmi pirdicanga. Nogataga gongaycamanganami. Paycunawan conträtu rurashätapis manami cumlenganachu.

Deuteronomio 32:19

Chaypitami Tayta Diosga rabyacurcusha. Wamrancuna captiquipis mana yanapäshurayquinachu.

Deuteronomio 32:5

«Fiyu, juchasapa runacuna, Tayta Diosta rabyachej, Paypa ‹wamran› ninäpäpis manami allichu canqui.

Colosenses 1:24

Jesucristupa willacuyninta runacuna chasquicuptinmi willacushäpita runacuna ñacachimaptinpis mana llaquicöchu. Jesucristo gamcunapaj ñacashannömi nogapis gamcuna-raycu ñacar cushisha caycä.

Apocalipsis 18:5

Payga pasaypa juchasapami caycan. Mana alli rurashancunataga Tayta Dios llapantami musyaycan.

Jueces 10:10

Chayrämi Israelcunaga Tayta Diosta mañacuran yanapänanpaj. Chaymi niran: «Tayta Dios, gamta gongaycärir juchatami rurashcä. Manacajcunatami rispitar adurashcä.»