RUT 2:12 - Dios Rimashca Shimicunami

¹² Can chashna allicunata rurashcamantaca, Mandaj Diosmi canmanca allicunata cunga. Israelcunata Mandaj Dios paipaj alas ucupi canta huaquichichunmi mashcaj shamushcangui. Paimi tucui imalla cuna cashcataca cunga– nirca.

RUT 2:12 Iomraidhean Croise

SALMOS 17:8

Cambaj ñahui angelta shina cuidahuayari. Cambaj alas llandushca ucullapi pacahuayari.

SALMOS 19:11

Cambajta rurajca chai shimicunahuan cunashcapishmi cani. Chaicunata cazujpajca, sumaj japinami tiyan.

SALMOS 36:7

¡Taita Dioslla, quiquin llaquij cashcaca yallitaj sumajmari! Chaimantami huañujlla aichayujcunaca, quiquinpaj alas ucupi miticuncuna.

SALMOS 57:1

Taita Dios ñucata llaquihuayari. Ñucata llaquihuayari. Ñuca almaca quiquinpimari shunguta churan. Quiquinpaj alas llandupimi miticusha. Llaquicuna tucuringacamami miticusha.

SALMOS 58:11

Chaimi gentecunaca: “Cashcata rurajpajca japinaca tiyashcatajmi. Cai pachapi imalla rurashcacunata ricuchij Taita Diosca tiyashcatajmi” ningacuna.

SALMOS 61:4

Ñucaca quiquinpaj carpa huasipimi causacushalla. Quiquinpaj alas ucupica imata mana manchashachu. Selah

SALMOS 63:7

Quiquinca ñucata ayudajmi cangui. Chaimantami quiquinpaj alascuna llandupi cushicusha.

SALMOS 91:4

Paipaj plumacunahuanmi cantaca pacanga. Paipaj alas ucupica imata mana manchashpami causangui. Paipaj mana llullaj shimica escudo shina, cara churana shinami huaquichinga.

PROVERBIOS 11:18

Diosta mana manchaj runaca, umarishpami causan. Ashtahuanpish allita tarpucujca, mana tucurij allicunatami japinga.

PROVERBIOS 23:18

Chashna rurashpami canca alli causangui. Can imata shuyacushcatapish, mana yanga shuyashpalla saquiringuichu.

JEREMÍAS 31:16

Mandaj Diosllatajmi paitaca cashna nin: “Ña ama ashtahuan huacaichu. Cambaj ñahuimanta huiquita p'icharilla. Can llaquita apashcamantaca, allita cushami. P'iñajcunapaj llajtamantaca tigramungacunami” ninmi Mandaj Diosca.

Mateo 23:37

¡Jerusalenpi causajcunalla, Jerusalenpi causajcunalla cancunaca profetacunata huañuchijcuna, Dios cachashca huillajcunata rumihuan shitajcunapishmi canguichij! ¡Tauca cutinmi mama atillpa paipaj huahuacunata alas ucupi ugllaj shina tandachisha nircani! Ashtahuanpish mana uyarcanguichijchu.

Mateo 5:12

Chashna rurajpipish jatunta cushicushpa contentarichij. Cancuna jahua pachapi japina cashcaca tucuita yalli jatunmari. Cancunapaj ñaupa shamuj profetacunatapish, chashnallatajmi llaquichircacuna.

Mateo 6:1

Runacunapi alli ricuringa raiculla paicunapaj ñaupajpi allita ruraj canamantaca huaquichirichij. Chai raiculla rurashpaca jahua pachapi caj cancunapaj Yayapajta japina cashcataca mana japinguichijchu.

Lucas 6:35

Ashtahuanpish cancunata p'iñajcunata c'uyashpa, paicunapaj allita ruraichij. Imata mañachishpaca chaimanta imata japinataca ama yuyaichijchu. Cancuna japinaca tucuimanta alli jatunmi. Jahua pachapi caj Taita Diospaj huahuacunami canguichij. Taita Diosca mana pagui nijcunatapish, mana allicunatapish llaquijmi.

Colosenses 2:18

Mana jatun tucushca shinalla, angelcunata adorajcuna shina tucushpa cancuna japina cashcata ñataj pi umashpa quichunman. (Paicunaca manapish ricushpami muscuipi shina ricunchij nishpa) quiquin yuyaillamanta surcushpa jatun tucuncuna.

2 Timoteo 1:18

Efesopipish, ñucanchijtaca achcatami ayudarca. Chaitaca allimi yachangui. Chaimanta Mandaj Jesusca, paitaca shamuj punllapi llaquishca cachun.

2 Timoteo 4:8

Chaimantami, cashcata ruraj cashcata ricuchij corona ñucapajca ch'icanchishca tiyacun. Chaitaca cashcata ruraj Mandaj Jesusmi shamuj punllapi cunga. Mana ñucallamanchu cunga, ashtahuanpish pai shamunata tucui c'uyajcunamanpishmi cunga.

Hebreos 11:26

Cristomanta mana alli nishpa rimashca canaca, Egiptopi achcata charij canatapish ashtahuan yalli alli cajpimi, chaitaca agllarca. Dios paiman cuna cashcataca ña ricuracuj shina cashpami, chaitaca agllarca.

Hebreos 11:6

Ashtahuanpish mana crishpaca, Dios munashcataca ima shina mana rurai tucuipajmi. Diospajman maijanpish c'uchuyangapajca pai tiyashcatapish crina, paita mashcajcunamanca ima illashcata cuj cashcatapishmi crinataj can.

Hebreos 6:10

Diosca cashcata ruraj cashcamantaca, cancunapaj rurashcacunata paipaj shutipi c'uyaihuan trabajashpa ricuchishcata, jucha illajcunapajta rurashpa cunancamapish ruracushcamantaca manataj cungaringachu.

RUT 1:16

Ashtahuanpish Rutca: –¿Ima nishpataj ñucataca canmanta ch'icanyashpa tigrachuntaj ningui? Can maiman rishcamanmi ñucapish risha. Can maipi causashcapimi ñucapish canhuan causasha. Cambaj familiapish ñuca familiami canga, cambaj Diospish ñuca Diosmi canga.

RUT 2:11

Boozca: –Cambaj cusa huañujpipish, cambaj suegrata llaquishpa paipaj imallata rurashcataca yachanimi. Cambaj yaya mamatapish, can huacharishca llajtatapish saquishpa, can mana rijsishca llajtapi causanamanmi shamushcangui.

RUT 2:13

Chaimi Rutca: –Ñuca amito, ñucaca cambajta ruraj maijan shuj huarmi shinallapish mana canichu. Chashna cajpipish can alli cashcata ricuchishpami, cambajta ruraj ñucataca sumaj shimicunahuan rimashpa ñuca shungutaca cushichingui– nirca.

RUT 4:15

Cai huahuami cambaj alma llaquihuan huañucujtaca cushichinga. Can yuyaj cajpipish, paimi cuidanga. Cambaj nueraca canta c'uyashcamantami cai huahuataca huachashca. Paica can canchis churicunata charishcatapish ashtahuan yalli allimari– nircacunami.

1 SAMUEL 24:19

¿Maijan runataj paita p'iñajta japishpaca imata mana rurashpa, ima mana tucushca quishpirishpa richun saquinmanlla? Can chashna ñucapaj allita rurashcamantaca, Mandaj Dios canmanca allicunata cuchun.

1 SAMUEL 24:20

Cunantajca israelcunata can mandana cashcata yachanimi. Israelca can mandacun maquipi cashpaca pi mana cuyuchipaj sinchimi canga.