PROVERBIOS 3:3 - Dios Rimashca Shimicunami

³ Llaquij canata, mana umaj canataca, amataj saquinguichu. Cungapi aparishca shina, shungupi quillcashca shina chai yuyai puringui.

PROVERBIOS 3:3 Iomraidhean Croise

2 SAMUEL 15:20

Canca cainallamari shamurcangui. ¿Maitataj ñucanchijhuan rinatajmi cangui nishari? Ñucapish ri tucushca camallami rigrini. Canpish tigrailla. Cambaj huauquicunatapish tigrachishpa rilla. Mandaj Diosca c'uyaj, pajtachij canata cambaj tucui causaipi ricuchichun– nirca.

SALMOS 119:11

Ama juchallishpa quiquinta p'iñachingapajca quiquin imalla nishcacunataca ñuca shungupimi huaquichircani.

SALMOS 25:10

Mandaj Dioshuan ari ninacushcata huaquichijcunapaj, pai ima shina cashcata ricuchishpa causajcunapajca, Mandaj Diospaj ñancunaca llaquij canahuan, mana llullahuan jundami.

SALMOS 85:10

Llaquij canahuan, mana llulla canahuanca tupanacurcamari. Cashcata ruranahuan, sumaj causaihuanca muchanacurcami.

ÉXODO 13:9

Cai ruraicunaca Mandaj Dios tucuita rurai tucuj maquihuan Egiptomanta canta llujshichimushcataca cambaj maquipi, mana cashpaca ñahui patapi ricunapaj churashca shinami yuyachicungalla. Mandaj Dios mandashca cambaj shimipi cachunmi chashna canga.

ÉXODO 34:6

Mandaj Diosca Moisespaj ñaupajta pasacushpaca cashnami nirca: –Mandaj Dios, Mandaj Dios. Tucuita rurai tucuj Dios, llaquij, c'uyaj shungu, mana utca p'iñarij, yallitaj llaquij, mana llullaj Diosmi cani.

PROVERBIOS 1:9

Chai shimicunaca sumaj coronata cambaj umapi churachishca shinami canga, sumaj huallcata cungapi aparishca shinami canga.

PROVERBIOS 14:22

Millaita ruranata yuyajcunaca, ¿manachu pandarincuna? Allita ruranapi yuyaita churajcunaca, pipish c'uyashpa, allita cushcami causancuna.

PROVERBIOS 16:6

Juchata ruracujtaca llaquishpa allita rurana yuyaihuanmi jarcan. Maijanpish Mandaj Diosta manchashpami, millai causaimantaca anchurin.

PROVERBIOS 20:28

Jatun mandajca, llaquishpataj tucuicunapaj allita ruraj, c'uyaj cashpallami, pai mandanataca piman mana quichuchishpa mandashpa causanlla.

PROVERBIOS 6:21

Cambaj shungupi aparingui. Cunga uripi aparishca shina puringui.

PROVERBIOS 7:3

Cai shimicunataca maquipi huatashca shina, shungupi quillcashca shina chai yuyailla causangui.

JEREMÍAS 17:1

Judá runacunalla, cancunapaj shungupica fierropi churashca diamante puntahuan rumipi quillcashca shinami juchaca tiyacun. Cancuna shayachishca altar gachucunapipishmi chashna quillcashca tiyacun.

OSEAS 4:1

Israelcuna, Mandaj Dios rimashcata uyaichij. Mandaj Diosca cai llajtapi causajcunataca p'iñarishpami rimacun. Cai llajtapica cashcata rurajcunapish, llaquijcunapish, Diosta rijsijcunapish mana tiyanchu.

MALAQUÍAS 2:6

Levitacunaca mana llullashpallami, ñuca mandashcataca yachachircacuna. Paicunaca, ima millai shimicunatapish mana rimarcacunachu. Ñucahuan cashpaca sumajta causashpa, cashcata rurashpami purircacuna. Millai ruranamantapish achcacunatami anchuchircacuna.

Mateo 23:23

Mandashcacunata quillcajcuna, fariseocuna, mishqui shimi jayaj shungucuna ¡aij cancunalla! Mentata, anista, cominotapish chungamanta shujta cujcunami canguichij. Ashtahuanpish cashcata ruranata, llaquij canata, crinatapish, chai ashtahuan alli Mandashcatarajmari saquishcanguichij. Diosman cunatapish mana saquishpami, chai Mandashcacunataraj rurana carcanguichij.

2 Corintios 3:3

Cancunaca Cristo quillcashca, ricunalla quillcami canguichij. Ñucanchijmi chaitaca cancunaman curcanchij. Cancunaca mana tintahuan quillcashcachu canguichij, ashtahuanpish causaj Diospaj Espirituhuanmi quillcashca canguichij. Shinallataj mana tablajlla rumipi quillcashcachu, ashtahuanpish tablajlla aicha shungupimi quillcashca canguichij.

Efesios 5:9

(Espiritupaj granoca, tucuipi alli cajmi, cashcata rurajmi, mana llulla canapishmi).

DEUTERONOMIO 6:8

Cai mandashcacunataca ima ricunacunata shina cambaj maquipi, cambaj frentepi huataringui.

Hebreos 10:16

“Chai punllacuna q'uipaca, paicunaman cusha nishpa ari nishcaca cashnami canga: Ñuca mandashcacunataca, paicunapaj shungucunapimi churasha. Paicunapaj yuyaicunapimi quillcasha” ninmi Jatun Diosca.