NÚMEROS 17:5 - Dios Rimashca Shimicunami

⁵ Chaipica maijantami ñucapajta rurachun agllani chaipaj tauna caspipimi sisa huiñanga. Chashna rurashpami, ñuca ñaupajpi israelcuna cancunata p'iñashpa juchachishpa rimajcunataca upallachisha” nircami.

NÚMEROS 17:5 Iomraidhean Croise

2 CRÓNICAS 26:16

Uziasca, ña tucuita mandai callarishpaca, jatun tucushpami llaqui tucurca. Paita Mandaj Taita Diosta c'ariyashpami, Mandaj Diospaj huasi ucuman yaicushpaca inciensota rupachina altarpi inciensota rupachirca.

ESDRAS 2:62

Chai runacunami, quiquin aillucunapurapi shuticunata quillcachishcacunapi mashcachishpapish mana japircacuna. Chaimantami paicunataca cura canamanta anchuchircacuna.

SALMOS 105:26

Chaimanca paipajta ruraj Moisestami cacharca. Pai agllashca Aarontapishmi cacharca.

ÉXODO 16:7

Mandaj Diosca cancuna paita juchachishpa rimacushcatami uyashca. Cunan pacarijpica Mandaj Dios tucuita rurai tucuj cashcatami ricunguichij. Shina cajpica ñucanchijca ¿imataj canchigari cancuna juchachishpa rimachunca?– nircami.

ISAÍAS 11:1

Yaya Isaipaj troncomantaca shuj yurami huiñanga. Paipaj sapicunamantaca mushuj yurami retoñanga.

ISAÍAS 13:11

Cai pachapi causajcunataca, millaita rurashcamantami llaquichigrini. Ñucata mana rijsijcunataca paicuna millaita rurashcamantami llaquichigrini. Jatun tucushcacuna jatun tucunataca tucuchigrinimi. Mana mitsari tucuipajcunata jatun tucushpa llaquichijcunataca cumurichigrinimi.

ISAÍAS 27:6

Jacobpaj sapi urata janajta rigarina punllacuna chayamungami. Israelcunamantaca retoñashpami sisanga. Tucui cai pachapimi p'ucushca granoca jundanga.

ISAÍAS 5:24

Nina lunyacuj c'allucunami rastrojo ujshata shina tucuchinga. Ujshata nina tucuchij shinami tucuchinga. Chashnami sapi ismushca yura shina chingaringa. Paicuna sumaj sisacuna shina cashcapish ñutu allpa shinami chingaringa. Tucuita Mandaj Diospaj mandashcata yanganchishcamantami chashna tucunga. Israelcunapaj jucha illaj Diospaj shimita millashcamantami chashna tucunga.

EZEQUIEL 16:41

Cambaj huasicunatapish ninahuanmi rupachingacuna. Achca huarmicuna ricucunpimi, cantaca llaquichingacuna. Chashna llaquichishpami, cantaca huainayashpalla causanamantapish cambaj c'uyashcacunaman allicunata cunatapish saquichisha.

EZEQUIEL 23:27

Egipto llajtapi causacuipachamantami huainayana yuyailla causarcangui. Chashna huainayana munaitaca chingachishami. Chaimanta ña mana ashtahuan cambaj ñahuitaca paicunaman ricuchinguichu, ña mana ashtahuan Egipto llajta runacunataca yuyaringuichu.

OSEAS 14:5

Ñucaca israelcunapajca shulla shinami casha. Paicunaca lirio shinami sisanga. Paicunaca Líbano yuracunapaj sapicuna shinami ucujta ringa.

NÚMEROS 1:51

Diospaj carpa huasita shujtajman apana tucujpica, levitacuna pascashpa apachun. Diospaj carpa huasita ña maipi shayachina tucujpica, paicuna shayachichun. Manapish levita caj c'uchuyashpaca huañungami.

NÚMEROS 11:1

Chaipimi israelcunaca Mandaj Dios uyajta paita juchachishpa rimajpi, Mandaj Dios chaita uyashpa nina sindirij shina yallitaj p'iñarirca. Chaimi Mandaj Diosca nina sindirishpa israelcunapaj carpa huasicuna shuj ladota rupachishpa tucuchirca.

NÚMEROS 16:11

Aaronca ¿pi cajpitaj juchachishpa rimanguichigari? Ashtahuanpish canpish, canhuan tucushpa jatarijcunapish Mandaj Diostamari p'iñashpa rimanguichij– nircami.

NÚMEROS 16:5

Coré runatapish, Coré runahuan tucushpa jatarijcunatapish cashnami nirca: –Mandaj Diosca maijanlla paipaj cashcata, maijanlla jucha illaj cashcataca cayami paipajman c'uchuyachishpa ricuchinga. Mandaj Dios agllashcacunallami paipajmanca c'uchuyangacuna.

NÚMEROS 17:10

Mandaj Diosca, Moisestaca cashnami nirca: “Aaronpaj tauna caspitaca Dioshuan ari ninacushca quillcata huaquichina arca ñaupajllapitaj cachun churai. Diosta c'ariyajcunaca chai tauna caspita ricushpa Diostaca mana c'ariyanalla cashcata yuyarinapajmi canga. Chashna rurashpami, ñuca ñaupajpi juchachishpa cancunata rimacujcunataca upallachingui. Chaimi paicunaca mana huañungacuna” nircami.

NÚMEROS 17:6

Israelcunaman Moisés chashna nijpica, israelcunata pushajcunaca tucuicunami paicunapaj quiquin tauna caspicunata curcacuna. Paicunaca cada yayamanta ima shina mirarimushcata ricuchij tauna caspitami curcacuna. Tucuimantaca chunga ishqui tauna caspicunami carca. Aaronpaj tauna caspipish, paicunapaj tauna caspicunahuanmi carca.

NÚMEROS 17:8

Chai cayandij tutamantata Mandaj Diospaj carpa huasiman Moisés rishpaca, Leví aillumanta caj Aaronpaj caspipica, verdijlla ramacuna huiñashcata, sisashcata, retoñashca ramacunapica almendracuna p'ucushcatami ricurca.

1 Corintios 10:10

Paicunamanta maijancuna shina ama huashalla rimajcuna caichijchu. Chashnacunataca tucuchijpaj maquimi huañuchirca.

JOSUÉ 4:7

cashna huillanguichij: Mandaj Dioshuan ari ninacushca quillcata huaquichina arcata apashca Jordán yacuta ch'imbacujpimari chai yacuca p'itirishpa chaquirirca ninguichij. Chai rumicunami caya mincha cancunapaj tucui huahua huahua israelcunapaj yuyarina canga” nircami.