Lucas 9:41 - Dios Rimashca Shimicunami

⁴¹ Chaimi Jesusca: –¡Huahua huahuami mana crij millaicuna canguichij! ¿Maicamataj cancunahuan causacushalla? ¿Maicamataj cancunataca yachachicushalla? nishpaca, chai runataca cambaj huahuata caiman pushamui– nirca.

Mushuj Testamento Diospaj Shimi

⁴¹ Chashna nijpi, Jesusca: —¡Mana crij, millai runacuna! ¿Maicamataj cancunahuan puricuchunlla ninguichij? ¿Maicamataj chashnalla catishpa Ñucata llaquichigringuichij? Chai huambrata caiman pushamuichij— nircami.

Lucas 9:41 Iomraidhean Croise

2 REYES 5:8

Diospaj runa Eliseo Israel llajtata jatun mandaj paipaj churanata lliquirishcata uyashpaca: “¿Ima nishpataj cambaj churanata lliquirircangui? Chai runataca ñucapajman shamui ni. Caiman shamushpami paica Israel llajtapica, profeta tiyashcata yachanga” nichunmi jatun mandajpajman cacharca.

SALMOS 78:8

Cancunaca cancunapaj ñaupa yayacuna shina Diosta c'ariyaj, rumi shungucunaca ama canguichijchu. Paicuna shina shungutapish, yuyaitapish Diosmanta anchuchijcunaca ama canguichijchu.

ÉXODO 10:3

Shina nijpimi Moiseshuan, Aaronhuanca faraonpajman rishpaca: –Mandaj Dios hebreocunapaj Taita Diosmi cashna nin: Ñuca agllashcacuna richun saquiyari. ¿Maicamataj ñuca ñaupajpica mana cumurisha ninguiyari?

ÉXODO 16:28

Chaimi Mandaj Diosca Moisestaca: –¿Cancunaca maicamataj ñuca yachachishcacunata, mandashcacunata chaitataj ruranataca mana rurashun ninguichij?

JEREMÍAS 4:14

Jerusalenpi causajcunalla, ¿maicamataj millaita rurana yuyailla canguichigari? Cancunata quishpichichun nishpaca, shungumanta tucui millai yuyaita maillarichigari.

NÚMEROS 14:11

Chaipimi Mandaj Diosca, Moisestaca cashna nirca: –Cai israelcunaca ¿maicamataj ñucataca p'iñachicungallari? Paicunapaj chaupipi cai tucui señalcunata rurajpipish ¿maicamataj ñucataca mana cringacunari?

NÚMEROS 14:27

–Yallitaj millaita rurana yuyailla caj cai tucui achcacuna ñucata juchachishpa rimashcataca ¿maicamataj uyacushalla? Cai israelcuna ñucata juchachishpa rimashcataca ñami cai tucuita uyashcani.

Mateo 11:28

Tucui imalla ruranacunahuan shaicushcacuna, aparishcacuna tucuicuna ñucapajman shamuichij. Ñucami cancunataca samachisha.

Mateo 12:39

Jesusca: –Huahua huahua millaita ruraj, huainayaj runacunaca, shuj señalta rurashpa ricuchichunmi mañancuna. Paicunamanca manataj ricuchishcachu canga. Ashtahuanpish profeta Jonás shina tucushcallatami ricungacuna.

Mateo 12:45

Chashna cajta ricushpaca, paita yalli millai canchis supaicunata pushamushpami, chai runaman yaicushpa causancuna. Chaimantami chai runaca ñaupa ima shina cashcatapish yalli millai tucun. Cunan punllacunapi causacuj millaicunapish chashnallatajmi tucungacuna” nircami.

Mateo 16:4

Huahua huahua millaita ruraj huainayajcunaca, shuj señalta rurashpa ricuchichunmi mañancuna. Paicunamanca manataj ricuchishcachu canga. Ashtahuanpish profeta Jonás shina tucushcallatami ricungacuna” nishpaca, paicunata saquishpa rircallami.

Mateo 17:17

Jesús cutichishpaca: –¡Huahua huahuami mana crij millaicuna canguichij! ¿Maicamataj cancunahuan causacushalla? ¿Maicamataj cancunataca yachachicushalla? Chai huambrata caiman pushamuichij– nircami.

Mateo 23:36

Chai tucui mana allita rurashcamantaca, cunan punlla causajcunatami jatun llaquicunaca japinga. Chashnatajmi canga.

Mateo 3:7

Achca fariseocunapish, saduceocunapish bautizachun nishpa shamujta Juan ricushpaca, cashnami nirca: “¡Culebrapaj huahua huahuacuna! Taita Dios p'iñarishpa llaquichina punllamanta quishpirisha nichunca ¿pitaj huillarca?

Marcos 10:14

Chaita Jesús ricushpaca, p'iñarishpami: –Huahuacuna ñucapajman shamuchun saquichij, ama jarcaichijchu. Cai huahuacuna shina cajcunami jahua pacha Taita Dios mandacujpica yaicunga.

Marcos 10:49

Chaita uyashpa Jesús chaipi shayarishpaca: –Paita pushamugrichij– nijpi chai pushanaman rijcunaca: –Cushicushpa jatari, cayacunmari– nircacunami.

Marcos 9:19

Jesusca: –¡Huahua huahuami mana crijcuna canguichij! ¿Maicamataj cancunahuan causacushalla? ¿Maicamataj cancunataca yachachicushalla? Chai huambrata caiman pushamuichij– nirca.

Lucas 8:25

Chaimi Jesusca: –¿Ima nishpataj mana cringuichij?– nijpi, paicunaca chujchushpa mancharishpaca, caishuj chaishuj: –Cai runaca ¿pitagari? huairapish, yacupish pai mandajpica cazunllamari– ninacurcacuna.

Lucas 9:40

Chaimari cambaj yachacujcunataca chai millai espirituta llujshichipaichij nishpa rogarcani. Ashtahuanpish mana llujshichi tucuncunachu– nircami.

Lucas 9:42

Shina nijpi huambrata Jesuspajman c'uchuyachigrijpica, supaica chujchuchishpami pambaman urmachirca. Chaimi Jesusca millai espirituta sinchita rimashpa, huambrata alliyachishpa paipaj yayaman curca.

Juan 14:9

Chaimi Jesusca: –Unitami cancunahuan carcani. Felipe ¿manarajchu ñucataca rijsingui? Pipish ñucata rijsijca, ñuca Yayatapish ñami rijsin. ¿Ima nishpataj canca: “Yayata ñucanchijman ricuchi” ningui?

Juan 20:27

Chaipimi Jesusca Tomastaca: –Cambaj dedota ñuca maqui chugripi churashpa ricui. Cambaj maquita chutashpa, ñuca costillas quinripi sati. Ama mana crij caichu, ashtahuanpish crij cairi– nijpimi,

Hechos 13:18

Chaimanta llujshichishpaca, chuscu chunga huatacunatami paicuna ima mana allita rurajpipish shitashca pambapica paicunataca mana shitarca.

Hechos 2:40

Pedroca ashtahuan shujtaj shimicunahuan cunashpa yuyachishpaca: –Cai punllapi causacuj millaicunahuan, ama llaquichishca cangapajca llujshimuichij– nircami.

Romanos 2:4

¿Paica alli canata, mana utca p'iñarij canata, millaita rurajpipish mana utca llaquichij canata achcata charij cashcatachu yanganchingui? Mana cashpaca, paica paipaj alli cashcahuan cutirinaman pushacushcatachu mana yachashca shina tucungui.

DEUTERONOMIO 32:5

Ashtahuanpish paipaj huahuacunamari Diospajca ismucuj shina tucushcanchij. Huahua huahua millaicunami tucushcanchij.

Hebreos 3:19

Paicunaca, mana crijcuna cashcamanta mana yaicui tucushcatami ricunchij.

Hebreos 4:11

Chaimanta ñucanchijpish paipaj samarinaman yaicuna yuyailla cashunchij. Chai mana cazujcuna urmashca shinaca, maijanpish amataj urmashunchijchu.

Hebreos 4:2

Alli huillaitaca paicunaman shinallatajmi ñucanchijmanpish huillarca. Uyashpapish mana crishcamantami, chai uyashca shimica paicunapajca yangalla tucurca.

Hebreos 7:25

Chaimantami maijanpish paimanta Diosman c'uchuyajtaca, huiñaipaj quishpichi tucun. Jesusca paicunamanta Diosta mañashpami huiñaita causacun.