Lucas 24:27 - Dios Rimashca Shimicunami

²⁷ Moisés quillcashcamanta callarishpa, tucui profetacuna quillcashcacamami, Quillcachishcacunapi pai imalla tucuna cashcata huillacushcata yuyachirca.

Mushuj Testamento Diospaj Shimi

²⁷ Chashna nishpaca, Moisés Quillcashcamanta callarishpa, Dios ima nishcata tucui huillajcuna quillcashcacamami, Dios tucui Quillcachishcacunapi Paimanta imalla nishcataca huillashpa yuyachirca.

Lucas 24:27 Iomraidhean Croise

GÉNESIS 12:3

Canta c'uyajcunataca c'uyashami. Canta p'iñajcunataca p'iñashami. Cai pachapi tucui causajcunaca canmantami alli nishca cangacuna” nircami.

GÉNESIS 22:18

Ñuca mandashcata can cazushcamantami, cambaj huahua huahuacunamantaca tucui cai pachapi causajcunapish alli nishca cangacuna– nircami.

GÉNESIS 26:4

Cambaj huahua huahuacunataca jahua pacha luzerocunata shina yallitaj achcata mirachishpami, tucui chai llajtacunataca cambaj huahua huahuacunaman cusha. Cambaj huahua huahuacunamantami tucui llajtacuna alli nishca canga.

GÉNESIS 3:15

Cunanca canhuan, huarmihuanca p'iñanacuipimi churani. Cambaj huahua huahuacunahuanpish, huarmipaj huahua huahuacunahuanpish p'iñanacuipimi churani. Huarmipaj huahua huahuapurami cantaca umapi sarunga. Canca chaqui talonllapimi chugrichingui– nirca.

GÉNESIS 49:10

Judapaj mandana caspitaca manataj quichushca cangachu. Pai mandana varatapish paipaj chaqui chaupimantaca manataj quichushca cangachu. Siloh mandaj shamungacamami tucuicuna paipajllaman tandanacungacuna.

SALMOS 132:11

Mandaj Diosca pajtachingapajtajmi Davidmanca cambajca cashnami rurasha nirca. Pai cashna nishcataca manataj p'aquingachu: “Can mandashpa tiyanapica, cambaj huahua huahuacunatami churasha.

ISAÍAS 1:23

Cancunata mandajcunaca c'ariyajcunami tucushca. Shuhuajcunapurami tucushca. Tucuicunami camarita japinallata munancuna. Tucuicunami imata cujcunapuralla tucunata munancuna. Yaya mama illaj huahuacunata llaquichicujpipish mana mitsancunachu. Viuda huarmicunata pi llaquichicujpipish paicunaca ricucunllacunami.

ISAÍAS 50:6

Chugrichijcunamanca, ñuca huashata ricuchircanillami. Barbasta chutajcunamanpish ñuca quijadusta ricuchircanillami. C'amishpa ch'ucajpipish, ñuca ñahuita ricuchircanillami.

ISAÍAS 7:14

Chaimanta Jatun Diosllatajmi, cancunamanca shuj ricuchinata ricuchigrin: C'arita manaraj rijsij shuj huarmimi chichunga. Paica shuj c'ari huahuatami huachanga. Chai huahuataca Emanuel shutitami shutichinga.

ISAÍAS 8:17

Mandaj Diosca Jacobpaj huahua huahuacunamanta paipaj ñahuita pacajpipish ñuca Mandaj Diosllatami shuyasha. Paillapimi shunguta churasha.

ISAÍAS 9:1

Cunan llaquihuan cajcunaca mana chashna amsallapitajca causacungallacunachu. Zabulón llajtata, Neftalí llajtata punta cutin llaquichicui punllacunapi llaquichishca shinaca mana llaquichicungallachu. Ashtahuanpish Jordán yacu ladopi caj mama cuchaman rina ñanpi causajcunapaj, Diosta mana rijsijcunapajca Galilea llajtapica jatun cushicuimi tiyanga.

EZEQUIEL 34:23

Shinallataj chai ovejacunata michichunca, ñucami shuj michijta agllasha. Ñucata servij Davidtami churasha, paimi chai ovejacunataca michinga.

EZEQUIEL 37:25

Ñucata servij Jacoboman cushca llajtapimi causangacuna. Chai llajtapimi cancunapaj ñaupa yayacunapish causarcacuna. Chai llajtallapitajmi paicunapish, paicunapaj huahuacunapaj huahuacunapish, chai huahuacunapaj huahua huahuacunapish huiñaita causangacuna. Ñucata servij Davidmi paicunapajca, huiñaita mandaj canga.

DANIEL 7:13

Muscuipi shina ricucui tutallatajmi, jahua pacha p'uyupi Runa Aichayujman rijchaj shamucujta ricurcani. Uni huatacunayuj Yuyajpajman shamucujtami ricurcani. Paitaca uni huatayujpaj ñaupajmanmi c'uchuyachirca.

MIQUEAS 5:6

Paicunami Nimrodpaj Asiria llajtapi causajcunataca, espadacunahuan huañuchingacuna. Chashnami ñucanchij llajtata quichushpa mishacuj Asiria llajta runacunamantaca quishpichinga.

MIQUEAS 7:20

Mandaj Dioslla, ñucanchij ñaupa yaya Abrahammanpish, yaya Jacobmanpish c'uyashcamanta allicunata rurashami nishcataca amataj cungarishpa pajtachipangui.

ZACARÍAS 13:7

Tucuita Mandaj Diosca cashnapishmi nin: “Espadalla, ovejacunata michijtapish, ñucahuan alli apanacujtapish manchachiyari. Can chai michijta chugrichijpica, ovejacunaca caita chaitami ringacuna. Bachujcunataca ñuca maquihuanmi llaquichisha” ninmi.

ZACARÍAS 9:9

Siónpi causajcunalla, achcata cushicuichigari. Jerusalenpi causajcunalla, cushicushpa caparichigari. Cancunapajmanmi jatun mandajca shamunga. Paica cashcata rurajpish, quishpichijpishmi canga. Jatun mandajca, alli shungumi. Burropi tiyarishcami shamunga, aparij burropaj huahua, malta burropimi paica tiyarishpa shamunga.

MALAQUÍAS 4:2

Ashtahuanpish ñucata manchashpa causajcunapajca, cashcata ruraj Intimi llujshinga. Paipaj alascunapimi quishpirinataca apamunga. Canlla malta c'ari bizicuna saltacuj shinami saltarishpa llujshinguichij.

NÚMEROS 21:14

Chaimantami Mandaj Diospaj macanacuimanta quillcashca libropica, cashna nishca tiyacun: “Puca Cuchapi imallata rurashcata. Arnón jatun yacupi imallata rurashcata.

Marcos 4:34

Yuyachij parlocuna illajllaca mana parlarcachu. Chai parlocuna imata nisha nishcataca paipaj yachacujcunallamanmi alli huillarca.

Lucas 24:25

Chaimi Jesusca: –¡Cancunaca ¿upacunachu canguichij? Profetacuna huillashcacunata crinamari cancunapajca sinchiraj cashca!

Lucas 24:44

Chai q'uipaca Jesusca paicunataca: –Moisés Mandashcapipish, Profetacuna quillcashcapipish, Salmocunapipish ñucamanta tucui imalla tucuna cashcata huillashcacuna pajtachunmi chashna tucurca. Tucui chaicuna chashna tucuna cashcataca cancunahuan cashparajmi huillarcani– nircami.

Juan 1:45

Felipeca, Natanaelta mashcashpa paihuan tupashpaca: –Moisés quillcashpa mandashcapi, Profetacuna quillcashpa huillashcapi nishca runahuanmari tupashcanchij: Paica, Nazaret pueblomanta Josepaj churi Jesusmi cashca– nircami.

Juan 12:41

Isaiasca Jesustaca tucuita rurai tucuj cashcata ña ricushcamantami chashna nirca.

Juan 5:37

Ñucata cachaj Yayapish ñucamantaca huillarcami. Pai rimashcataca manataj uyashcanguichijchu. Pai ima shina cajtapish manataj ricushcanguichijchu.

Juan 5:39

Quillcachishcacunata yachashpami huiñai causaita charishun yuyanguichijmi. Chai Quillcallatataj callarishpa alli ricuichij. Chai Quillcachishcacunaca ñucamantamari huillacun.

Hechos 10:43

Profetacunapish Jesusmanta huillashpaca, paita crijcunallatami juchacunata perdonanga nishpami tucuicunallataj huillarcacuna– nircami.

Hechos 3:18

“Cristoca jatun llaquita apangami” nishpa profetacunata ñaupaman pai huillashcatami Taita Diosca pajtachishca.

Hechos 3:22

Chaimi Moisespish ñucanchij ñaupa yayacunamanca cashna nishca: “Cancunapaj Mandaj Jatun Diosca, ñucata cachashca shinallatajmi cancunapuramanta shuj profetata cachanga. Tucui pai ima nishcata cazunguichij.

Hechos 3:24

Samuelmanta callarishpami profetacunaca tucuicuna cai punllacuna imalla tucuna cashcataca ña huillarcacuna.

Hechos 7:37

Chai Moisesmi israelcunataca: “Cancunata Mandaj Taita Diosca ñucata cachashca shinallatajmi, cancunapuramanta shuj profetata cachanga. Pai ima nishcata cazunguichij” nircami.

Hechos 8:35

Felipeca, chai rezacushca Quillcallamantataj callarishpa Jesusmanta alli huillaita huillarca.

DEUTERONOMIO 1:45

Cancuna tigrashpaca, Mandaj Diospaj ñaupajpimi huacarcanguichij. Ashtahuanpish Mandaj Diosca cancuna mañashcataca mana uyasha nishpa manataj uyarcachu.

DEUTERONOMIO 18:15

Mandaj Dios cancunapaj Taita Diosca cancunapuramanta cancunapaj huauquicunatami ñuca shinallataj huillajta shujtajta jatarichinga. Paita uyanguichij.

Apocalipsis 19:10

Chaimi ñucaca chai angelta adorangapaj cumurircani. Ashtahuanpish paica ñucataca: “¡Riqui, ama chashna ruraichu! Ñucapish can shinallataj, cambaj huauquicuna shinallataj Diospajta rurajllami cani. ¡Diosta adorai!” nircami. (Jesús ima shina cashcata huillanaca profetacunaman espíritu huillachishca pajtashcami).