Lucas 1:8 - Dios Rimashca Shimicunami

⁸ Zacarías curaca paicunapurapaj chai punllacunapi Diospajta rurana tucujpi chaipi Diospajta ruracujpimi,

Mushuj Testamento Diospaj Shimi

⁸ Zacariasca, paipura curacuna servina cashca shinallatajmi, Diosta servicurca. Chai horasmi cashna tucurca:

Lucas 1:8 Iomraidhean Croise

1 CRÓNICAS 24:19

Mandaj Diospajta huashan huashan rurashpa catichunca chaicunatami churarca. Mandaj Diospaj huasiman yaicushpa ruranapajca paicunapaj ñaupa yaya Aaronta israelcunata Mandaj Dios mandashca shinallatajmi rurarcacuna.

1 CRÓNICAS 24:2

Nadabhuan, Abiuhuanca huahuacunata manaraj charishpami, paicunapaj yaya manaraj huañujpi huañurca. Chaimantami cura canataca Eleazarhuan, Itamarllahuan japircacuna.

2 CRÓNICAS 11:14

Jeroboam, paipaj churicunahuanmi curacunatapish, levitacunatapish, Diospajta ruracushcamanta llujshichircacuna. Chaimantami paicunaca Israelmantaca, michina allpacunatapish, ima shujtaj charishcacunatapish shitashpa, Judapi caj caishuj pueblocunapipish, Jerusalenpipish causanaman shamurcacuna.

2 CRÓNICAS 31:19

Aaronpaj huahua huahua curacunaca pueblocunapipish, chai muyundijcunapipishmi causajcuna carca. Paicunamanpish, tucui levitacunamanpish paicuna japina cashcata cungapajca, tucui chai pueblocunapimi raquijcuna tiyarca.

2 CRÓNICAS 31:2

Q'uipatami Ezequiasca curacunata, levitacunataca paicuna imata ruranata yachashca shinallataj Diospajta rurachun churarca. Paicunataca animalcunata Diosman cushpa tucui rupachichunpish, Dioshuan alli cangapaj animalcunata cushpa huañuchichunpish, Mandaj Diosta pagui nishpa alabachunpishmi mandarca. Diospaj huasiman huashan huashan shamushpa, chashna rurachunmi churarca.

2 CRÓNICAS 8:14

Shinallataj curacunatapish Diospajta rurachunca, paipaj yaya David mandashca shinallatajmi huashan huashan shamushpa paipajta rurachun churarca. Levitacunatapish, curacunahuan Diosta alabachunpish, punllanta paicuna imallata rurana cashcata rurachunpishmi, chai ruranacunallapitaj churarca. Diospaj huasi punguta cuidajcunatapish tucui pungucunapimi, huashan huashan shamushpa cuidana cashca shinallataj churarca. Diospajta ruraj Davidllatajmi, chashna mandashca carca.

ESDRAS 6:18

Chai q'uipaca, Moisés mandashpa quillcashcapi nishca shinallatajmi Jerusalenpi Diospajta rurajcunataca curacunatapish, paicunapaj ima horasllapi rurana cashcapi ruranaman huashan huashan yaicuchun churarcacuna. Levitacunatapish, paicuna imallata rurana cashcapimi churarcacuna.

ÉXODO 28:1

Cambaj huauqui Aarontaca paipaj churicuna Nadab, Abiú, Eleazar, Itamarndij cambaj ñaupajman cayai. Tucui israelcunamantaca paicunami ñucapaj curacuna canga.

ÉXODO 28:41

Cambaj huauqui Aaronmanpish, paipaj churicunamanpish chashna churanacunatami churachina cangui. Ñucapajlla curacuna cachun aceitehuan churashpa ch'icanchingui.

ÉXODO 29:1

Ñucapajlla curacuna cachun ch'icanchingapajca cashnami rurana cangui: Huagracunamanta ima mana tucushca shuj malta huagrata, ishqui carnerocunata,

ÉXODO 29:44

Dioshuan tupanacuna carpa huasitapish, chaipi tiyaj altartapish ñucapajllatami rurasha. Aarontapish, paipaj churicunatapish ñucapajta ruraj curacuna cachunmi ñucapajllata rurasha.

ÉXODO 29:9

Aarontapish, paipaj churicunatapish chumbillinahuan chumbillichingui. Tiaracunatapish huatangui. Aarontapish, paipaj churicunatapish ñucapajlla cachun chashna ch'icanchingui. Curacuna canaca huiñai huiñaita paicunapajllami saquiringa.

ÉXODO 30:30

Aarontapish, paipaj churicunatapish chai aceitehuan llihuishpa Mandaj Diospajta ruraj curacunami canguichij nishpa ch'icanchingui.

NÚMEROS 18:7

Ashtahuanpish curacuna imalla rurana cashcata rurashpa Mandaj Diospajta ruranataca altarpipish, linsohuan jarcachishca ucupipish canhuan, cambaj churicunallahuanmi rurana canguichij. Curacuna imalla rurana cashcata ruranataca ñucami curcani. Manapish cura caj chaiman c'uchuyashpaca huañungami” nircami.

Lucas 1:5

Judea llajtata jatun mandaj Herodes mandacui punllacunapimi, Zacarías shuti cura causarca. Paica Abías curapaj huahua huahuacunapurami carca. Paipaj huarmica, Aaronpaj huahua huahuapuramanta Elisabetmi carca.

Lucas 1:7

Elisabet mana huachaj cashcamantami paicunaca huahua illajcuna carca. Ishquindijtaj ña yuyajcunapishmi carca.