LEVÍTICO 10:6 - Dios Rimashca Shimicunami

⁶ Chaimi Moisesca Aarontapish, paipaj churicuna Eleazartapish, Itamartapish: –Paicunamanta cancuna llaquilla cashcata ama ricuchingapajca cancunapaj uma ajchatapish alli allichiringuichij, cancunapaj churanacunatapish ama lliquirichijchu. Chashna rurashpami cancunapish mana huañunguichij. Diospaj p'iñarishcapish tucui israelcunapaj jahuamanca mana shamunga. Mandaj Dios rupachishpa huañuchishcamantaca, tucui Israel cancunapaj huauquicuna huacangallacunami.

LEVÍTICO 10:6 Iomraidhean Croise

2 SAMUEL 24:1

Mandaj Diosca israelcunahuan cutinllataj nina sindirij shina p'iñarishpami, Davidmanca israelcunapish, judacunapish mashna cashcata yupana yuyaita curca.

ESDRAS 7:5

Buquica Abisuapaj churimi. Abisuaca Fineespaj churimi. Fineesca Eleazarpaj churimi. Eleazarca curacunata punta pushaj Aaronpaj churimi carca.

ÉXODO 33:5

Mandaj Diosca Moisestaca: –Israelcunataca cashna ni: Cancunaca yallitaj rumi shungucunami canguichij. Ñuca cancunapaj chaupiman ashata huichiyashpaca tucuicunatami chingachiman. Sumajta allichirishcacunata churarishcacunata anchuchichij. Cancunahuan ñuca imata rurana cashcata yuyaringapaj nigri– nircami.

ÉXODO 6:23

Aaronca Aminadabpaj ushushi Elisabettami paipaj huarmi cachun japirca. Elisabetca Naasonpaj panimi carca. Elisabetca Nadab, Abiú, Eleazar, Itamar shuti churicunatami huacharca.

JEREMÍAS 7:29

Jerusalenpi causajcuna, Mandaj Diosca cancunataca paita p'iñachij huahuacuna cajpimari p'iñarishpa shitashca. Cancunapaj uma ajchata rutushpa pambapi shitaichij. Lomacunaman huichiyashpa caparishpa huacaichij.

LEVÍTICO 13:45

Lepra caracha ungüihuan cajca: Lliqui churanacunata churarishpa, umatapish mana ch'ungullishpa, ñahuitapish mana taparishpa, ¡Mapami cani, mapami cani! nishpa caparirichun.

MIQUEAS 1:16

Judá llajtalla, cambaj c'uyashca huahuacunamantaca uma ajchata ruturiyari. Águila shina lluchulla uma tucuyari. Canpi causajcunataca, shujtaj llajtamanmi prezu apangacuna.

NÚMEROS 1:53

Levitacunaca Dioshuan ari ninacushca quillcata huaquichina carpa huasi muyundijpi, paicunapaj carpa huasicunata shayachishpa tiyarichun. Tandanacushca israelcunapaj jahuaman Mandaj Dios p'iñarishca ama shamuchunmi paicunaca chaipi cuidangacuna”.

NÚMEROS 14:6

Canaán llajtata rijsishpa tigramujcunapuramantaca, Nunpaj churi Josuehuan, Jefonepaj churi Calebllahuanmi yallitaj llaquirishpa paicunapaj churanacunata lliquirishpa,

NÚMEROS 16:22

Chaimi paicunaca pambaman tupajta cumurishpa: –Taita Dios, tucuicunaman causaita cuj Dios. ¿Manachu shuj runalla juchallishca canga? ¿Ima nishpataj tucui israelcunahuan p'iñaringuiyari?– nircacuna.

NÚMEROS 18:5

Israelcunapaj jahuaman Dios p'iñarishpa llaquichina ama shamuchunca, Diospajlla ucupi imalla rurana cashcatapish, altarpi imalla rurana cashcatapish cancunalla rurashpami cuidana canguichij.

NÚMEROS 20:25

Chaimanta Aarontapish, paipaj churi Eleazartapish pushashpa Hor urcuman huichiyachishpa,

NÚMEROS 5:18

Mandaj Diospaj ñaupajpi shayacuj huarmitaca chaipi shayacujllapitajmi, curallataj umata llatanashpa, maquicunapica juchata Dios ricuchichun cushca cutata churanga. Chaica juchamanta cushca cutami. Juchamanta llaquita apamuj jayaj yacutaca cura paipaj maquipi charichun.

DEUTERONOMIO 33:9

Paimi paipaj yaya mamataca: 'Mana ricushcanichu' nirca. Paipaj huauquicunataca: 'Mana rijsinichu' nircami. Paipaj huahuacunatapish: 'Pipishchari' nircami. Paicunami cambaj shimicunata cazuncuna. Paicunami canhuan ari ninacushcata pajtachincuna.

JOSUÉ 22:18

Cunan cancunapish chashna rurashpaca ¿Manachu Mandaj Diosta catinamanta caruyashcanguichij? Cancuna chashna Diosta p'iñachishpa c'ariyashcamantaca cayaca Mandaj Diosca tucui israelcunahuanmi nina sindirij shina p'iñaringa.

JOSUÉ 22:20

Zera runapaj churi Acanca, Diospajlla cajta japishpami, juchayuj tucurca. Chai juchamantaca, Mandaj Dios tucui israelcunahuan jatunta p'iñarishcataca ¿manachu yuyaringuichij? Chai runa juchallishcamantaca mana paillachu huañurca– nircacunami.

JOSUÉ 7:1

Chashna cajpipish israelcunaca Mandaj Dios ama rurangui nishcata rurashpami Diospaj ñaupajpi mana alli ricurircacuna. Judapaj aillumanta caj Acanmi chai pueblopi caj chingachinapaj cajcunata apashpa Mandaj Diosta mana cazushca carca. Chaimantami Mandaj Diosca israelcunahuanca yallita p'iñarirca. Acán runaca Carmí runapaj churimi carca. Carmica Zabdi runapaj churimi carca. Zabdi runaca Zera runapaj churimi carca.

JOSUÉ 7:11

Israelcunamari juchallin. Paicunaca mandashcacunata pajtachishunllami nishpa ñucahuan ari ninacushca jahuamari, mana cazushpa p'aquin. Chingachinapajmi nishcatamari japishca. Apanaca mana alli cashcata yachashca jahuamari shuhuashpa, paipaj cashcacunahuan huaquichishpa charicun. Chashnamari llullashpa puricun.