JUECES 6:10 - Dios Rimashca Shimicunami

¹⁰ Amorreocunapaj llajtapi cancuna causacushpaca, paicunapaj dioscunataca ama manchanguichijchu. Ñucami cancunata Mandaj Dios cani nircanimi. Ashtahuanpish cancunaca ñuca rimashcataca manamari uyashcanguichijchu” ninmi nircami.

JUECES 6:10 Iomraidhean Croise

2 REYES 17:13

Mandaj Diosca israelcunatapish, Judá llajtapi causajcunatapish, profetacunahuanpish, paillataj ricuchishpa huillajta huillachishcahuanpish sinchita rimashpaca: “Cancunapaj millai ñancunata saquishpa ñucapajman cutirichij. Cancunapaj ñaupa yayacunaman ñuca mandashcacunata, pajtachinguitaj nishcacunata ñucapajta ruraj profetacunaman huillachishcacunata ima shina mandashca shinataj tucuita pajtachichij” nircami.

2 REYES 17:33

Chashnami chai shujtaj llajtacunamanta cachashca runacunaca, Mandaj Diosta manchanchij nishpapish, paicunapaj llajtapi cashpa ima shina ruraj cashca shinallataj paicunapaj dioscunallatataj adorashpa causarcacuna.

2 REYES 17:7

Israelcunaca Egiptota jatun mandaj faraonpaj maquipi cajpi llujshichimuj Mandaj paicunapaj Diosta p'iñachishpa shujtaj dioscunata manchashcamantami chashna tucurca.

NEHEMÍAS 9:29

Quiquin cushca mandashcaman tigrachunmi rimarcangui. Ashtahuanpish paicunaca jatun tucushcallahuanmi junda tucurcacuna. Quiquin cushca mandashcacunatapish mana uyarcacunachu. Ashtahuanpish cashcata rurashpa mandachun cushca mandashcatapish p'aquishpami juchallircacuna. Chai mandashcacunaca pajtachijcunamanca causaita cunmi. Ashtahuanpish paicunaca quiquinpajta ruranatapish c'ariyashpa ch'ahuanyashpami mana uyarcacuna.

ÉXODO 34:12

Cancuna maipi yaicugrin llajtaman ña yaicushpaca, chai llajtapi causajcuna cancunapaj churarishpa urmana ama cachun paicunahuan imapi tandalla ruranata pajta ari ninacunguichijman.

ÉXODO 34:14

Shujtaj dioscunapaj ñaupajpica ama cunguringuichijchu. Mandaj Diosca paipajlla cachun munaj shutimi. Paipajlla cachun munaj Taita Diosmi.

PROVERBIOS 5:13

Yachachijcuna mashnata yachachishpa cunajpipish, ñucallatajmi mana uyarcani. Ñucallatajmi mana yuyaita churarcani.

JEREMÍAS 10:2

Mandaj Diosca cashnami nin: “Caishuj llajta runacuna ima rurashcataca ama catichijchu. Jahua pachapi ima ricurijpipish, ama caishuj llajta runacuna shina manchaichijchu.

JEREMÍAS 17:23

Paicunapish mana uyarcacunachu, mana cazurcacunachu, sinchi shungucuna tucushpami manataj uyashun nircacuna, imata jarcachunpish manataj munarcacunachu ninmi ningui” nircami.

JEREMÍAS 3:13

Mandaj Diosca cashnapishmi nin: Canta Mandaj ñucatamari mana cazushpa p'iñachircangui. Chai juchata rijsiriyari. Tucui p'angasapa yura ucucunapimari shujtajcunahuan huainayarcangui. Ñuca cayajpica manamari uyarcanguichu ninmi” nircami.

JEREMÍAS 3:25

Ñucanchij ñaupa yayacunapish, ñucanchijpish huambramantapacha cunancamamari juchata rurashpa, ñucanchijta Mandaj Diostaca p'iñachishpa causanchij. Chashna rurashca jahuamari, ñucanchijta Mandaj Dios rimashcatapish manataj uyashun nircanchij. Chaimantamari cunanca maita mana llujshipaj jatun llaqui tucushpa, pingaihuan huañucunchij” nircacunami.

JEREMÍAS 42:21

Chashna nishcamantamari, cancunata Mandaj Dios cancunaman imallata huillachun mingashcataca tucuita huillani. Cunanca ashtahuanpish pai imallata mandashcataca manamari cazunguichijchu.

JEREMÍAS 43:4

Chashna nishpami Careapaj churi Johananpish, chaipi caj soldadocunata tucui mandajcunapish, tucui caishujcunapish Mandaj Dios Judá llajtallapitaj saquirichun nishpa mandashcataca mana cazurcacuna.

JEREMÍAS 43:7

Mandaj Dios mandashcata mana cazushpami, tucui chaicunata pushashpa Egipto llajtaman rircacuna. Chashna rishpaca, Tafnes pueblomanmi chayarcacuna.

JEREMÍAS 9:13

Mandaj Diosllatajmi cashna nin: “Ñucaca paicunapaj maquipimi mandashcacunata curcani. Chaitamari saquincuna. Ñuca rimajpipish, mana uyancunachu. Mana ñuca mandashca shina causancunachu.

SOFONÍAS 3:2

Mandaj Dios rimashcatapish mana uyarcacunachu, alli tucuchun jarcashcatapish mana cazurcacunachu. Mandaj Diospica mana shunguta churarcacunachu. Paicunapaj Diospajmanpish mana c'uchuyarcacunachu.

Romanos 10:16

Ashtahuanpish alli huillaitaca, mana tucuicuna cazurcacunachu. Chaimantami Isaiasca: “Jatun Dios, ¿pitaj ñucanchij huillashcataca crishcari?” nin.

Hebreos 5:9

Chashna tucuita pajtachij cashpami, paita tucui cazujcunapajca huiñaipaj Quishpichij tucurca.

JOSUÉ 24:15

Mandaj Diospajta rurashpa causana mana alli yuyachijpica, cunanllataj maijan diospajta rurasha nishpapish alli yuyaringuichij. Cancunapaj ñaupa yayacuna, Éufrates jatun yacu uripi caj llajtapi causacushpa shujtaj dioscunapajta rurashca shina rurasha nishpapish, mana cashpaca cunan cancuna causacun cai llajtapi causaj amorreocunapaj dioscunapajta rurashun nishpapish alli yuyaringuichij. Ashtahuanpish ñucapish, ñuca huasi familiapish Mandaj Diospajtami rurashun– nircami.

JUECES 2:2

Ashtahuanca cancunaca cai llajtapi causajcunahuan, imata mana ari ninacushpa, paicunapaj altarcunatapish tucui urmachinallami canguichij nircani. Ashtahuanpish cancunaca ñuca mandashcataca manamari uyashcanguichijchu. Riqui manamari chashna rurashcanguichijchu.

JUECES 6:9

Egiptocunapaj maquillamantaca mana llujshichircanichu. Ashtahuanpish tucui cancunata llaquichijcunapaj maquimantapishmi llujshichircani. Paicunata cancunapaj ñaupajmanta anchuchishpaca, paicunapaj allpataca cancunamanmi curcani.