JUECES 1:1 - Dios Rimashca Shimicunami

¹ Israelcunaca paicunata pushaj Josué huañushca q'uipami, Mandaj Diostaca: “Cananeocunahuanca ¿maijan aillutaj punta macanacugrina canchij?” nishpa tapurcacuna.

JUECES 1:1 Iomraidhean Croise

1 REYES 22:5

Chai q'uipami Josafatca, israelcunata jatun mandajtaca: –Mandaj Dios imata nishcata tapuchunmi rogani– nirca.

ÉXODO 18:15

Shina nijpi Moisesca paipaj suegrotaca: –Paicunaca Taita Diosta tapungapajmari ñucapajman shamuncuna.

ÉXODO 28:30

Ñuca imata rurachun nicushcata mana rurachun nicushcata yachangapaj tapuna Urim nishca, Tumim nishca rumicunataca pecho jahuapi aparina pectoralpi churangui. Mandaj Diospaj ñaupajman Aarón yaicujpica, Mandaj Dios rurachun nishcata mana rurachun nishcata tapuna rumica Aaronpaj shungu jahuapimi Mandaj Diospajman yaicunga. Chashnami Aaronca Mandaj Dios rurachun nicushcata mana rurachun nicushcata tapuna rumicunata paipaj shungu jahuapi aparishca Mandaj Diospaj ñaupajpi puringa.

NÚMEROS 27:21

Josueca Eleazar curapajman richun. Eleazarca Urimhuan Mandaj Diosta tapushpa, chai ricuchishca shina huillachun. Eleazar cura ima nishcallata rurashpa Josuepish, tucui israelcunapish maiman llujshina cajpipish llujshichun, maiman yaicuna cajpipish yaicuchun– nircami.

JUECES 1:27

Manasespaj aillupish Bet-seán, Taanac, Dor, Ibleam, Meguido pueblocunapi causajcunata, chai muyundij llajtacunapi causajcunatapish mana llujshichishpa cacharcacunachu. Chaimantami chaipi causaj cananeocunaca chaillapitaj causashpa catircacuna.

JUECES 2:21

Chaimanta ñucapish Josué causacushpa manaraj llujshichishpa cachashca llajtacunamantaca paicunapaj ñaupajmanta mana llujshichishpa cachashachu” nircami.

JUECES 2:8

Mandaj Diospajta ruraj Nunpaj churi Josueca, 110 huatayuj cashpami huañurca.

JUECES 2:9

Josuetaca, Efrainpaj urcupi caj Timnat-sera shuti pai japishca allpallapitajmi pambarcacuna. Chai allpaca Gaas urcumantaca janaj ladomanmi carca.

JUECES 20:18

Chai q'uipami israelcunaca tucuicuna jatarishpa Diospaj huasiman huichiyashpa: “¿Benjaminpaj ailluhuanca, maijan aillutaj punta macanacugrina canchij?” nishpa Taita Diosta tapujpi paica: “Judapaj ailluraj macanacugrichun” nirca.

JUECES 20:23

Chaimantaca israelcunaca Mandaj Diospaj ñaupajpi tutayangacama huacashpami Mandaj Diostaca: “¿Benjaminpaj aillu ñucanchij huauquicunahuanca cutin macanacugrishunchu?” nishpa tapujpi, Mandaj Diosca: “Ari, macanacunaman huichiyaichijlla” nirca.

JUECES 20:27

Mandaj Dioshuan ari ninacushca quillcata huaquichina arcaca, chai punllacunaca chaipi cajpimi israelcunaca Mandaj Diostaca tapurcacuna.

JUECES 20:28

Chai punllacunaca Eleazarpaj churi Finees Aaronpaj nietomi Mandaj Dioshuan ari ninacushca quillcata huaquichina arca ñaupajpica Taita Diospajta ruracurca. Chaipimi israelcunaca Mandaj Diostaca: “Benjaminpaj aillu ñucanchij huauquicunahuanca ¿cutinllataj macanacugrinachu canchij, mana cashpaca saquinallachu canchij?” nijpi, Mandaj Diosca: “Macanacunaman huichiyaichijlla, cayaca ñucami paicunataca cancunapaj maquipi churasha” nirca.

1 SAMUEL 10:22

Chaimi Saúl chayamushcata, manaraj chayamushcata yachangapaj Mandaj Diosta cutin tapujpi Mandaj Diosca: “Saulca chaillapitajmi. Tucuicuna apamushcacuna chaupipimi miticushpa tiyacun” nirca.