Juan 17:2 - Dios Rimashca Shimicunami

² Quiquinca ñucataca cai pachapi tucui causajcunata mandaj cachunmi churarcangui. Maijanllata quiquin ñucaman cushcacunamanca tucuicunaman huiñai causaita cuchunmi ñucamanca curcangui.

Mushuj Testamento Diospaj Shimi

² Quiquin Ñucaman cushcacunaman huiñai causaita cuchunmi, tucuicunata Ñuca maquipi churashcangui.

Juan 17:2 Iomraidhean Croise

SALMOS 110:1

Mandaj Diosca ñucata mandajtaca: “Quiquinta p'iñajcunata quiquinpaj chaqui sarunapi churangacama ñuca alli ladopi tiyarilla” nircami.

DANIEL 7:14

Paimanca mandai tucunata, jatun nishca canata, mandanatami curca. Tucui gentecuna, llajtacuna, ch'ican ch'ican rimaita rimajcuna paipajta rurachunmi chashna rurarca. Pai mandaj canaca huiñaita mandaj canami. Manataj tucuringachu. Pai mandanallatami pi mana chingachishca canga.

Mateo 11:27

Ñuca Yayaca tucuitami ñucamanca curca. Churi pi cashcatapish pi mana rijsinchu, Yayallami rijsin. Yayatapish pi mana rijsinchu, Churillami rijsin. Pi cashpapish Churi rijsichisha nishcacunallami, Yayataca rijsin.

Mateo 25:46

Chashnacunaca, huiñaipaj llaquimanmi ringacuna. Shinallataj cashcata rurajcunaca, huiñai causaimanmi ringacuna– nircami.

Mateo 28:18

Chaipi Jesús paicunapajman c'uchuyashpaca: “Jahua pachapi, cai pachapipish tucuita mandanataca ñucamanmi curca.

Juan 17:24

Ñuca Yayitu, can cushca ñucata catijcunaca, can ñucaman cushca rurai tucunata ricuchun, ñuca maipimi cani paicunapish chaipi cachunmi munani. Canca cai pachata manaraj rurashpami ñucataca c'uyarcangui.

Juan 17:6

Cai pachapi causajcunamanta agllashpa ñucaman cushcacunamanca quiquin ima shina cashcatami huillarcani. Paicunaca quiquinpajmi carca. Quiquinpaj Shimitapish cazurcacunami.

Juan 17:9

Ñucaca paicunamantami mañacuni. Cai pachapaj cajcunamantaca mana mañanichu. Ashtahuanpish quiquin ñucaman cushcacunaca, quiquinpaj cajpimi paicunamanta mañacuni.

Juan 3:35

Yayaca Churita c'uyashpami, tucui imatapish paipaj maquipi churarca.

Juan 4:14

Maijanpish ñuca cushca yacuta ubyajca, manataj yacunachingachu. Ñuca cushca yacuca huiñai causaita cushpa huiñaita llujshicungallami– nijpimi,

Juan 6:27

Chingarijlla micunataca ama mashcaichijchu, ashtahuanpish mana tucurij huiñai causaipaj micunata mashcaichij. Chaitaca, Runa Aichayujmi cancunamanca cunga. Chaita cuj cachunca, Dios Yayami churarca– nircami.

Juan 6:37

Ñuca Yaya agllashcacunallami ñucapajmanca shamunga. Ñucapajman shamujtaca mana tigrachishpa cachashachu.

Juan 6:39

Ñucata cachaj Yayaca, pai agllashpa cushcacunataca shujllatapish chingachichunca mana munanchu. Ashtahuanpish shamuj punllapi causachichunmi munan.

Romanos 6:23

Juchaca huañuitami cun. Ashtahuanpish Taita Dios c'uyashpalla cushcaca, ñucanchij Mandaj Cristo Jesuspi huiñai causaimi.

1 Corintios 15:25

Tucui paita p'iñajcunata paipaj chaqui sarunapi churangacamami, paillataj mandacungalla.

Efesios 1:20

Cristotaca huañushcacunapaj chaupimanta causachishpami, jahua pacha paipaj alli ladoman tiyachishpa, chai poderyuj cashcataca ricuchirca.

Filipenses 2:10

Jahua pachapi cajcuna, cai pachapi cajcuna, allpa ucupi cajcunapish tucuicuna Jesuspaj shutipi cungurichunmi chai shutitaca curca.

1 Timoteo 1:16

Chashna cajpipish Diosmari ñucataca llaquishpa chasquirca. Dios llaquij cashcatami, Jesucristoca ñucapi ricuchirca. Ñuca ima shina cajta ricushpa, q'uipata crina cajcuna huiñai causaita charichunmi chashna rurarca.

Hebreos 1:2

Chai tucuipaj q'uipa cunan punllacunapica, paipaj Churitami ñucanchijmanca Diosca huillachirca. Paitami tucui imalla tiyajcunatapish japij cachun churarca. Paillahuantajmi cai pachata, jahua pachata tucui imalla tiyajcunatapish rurarca.

1 Pedro 3:22

Paica jahua pachaman huichiyashpami, Diospaj alli ladopi tiyacun. Chaipica paitami angelcuna, mandajcuna, poderyujcunapish cazucuncuna.

1 Juan 1:2

(Chai causaiyujta ricuchijpimi, ñucanchijca ricurcanchij. Chaitami huillacunchij. Paica Yayahuanmi carca. Paita ñucanchijman ricuchijpimi, chai huiñai causaiyujmanta cancunamanca huillacunchij).

1 Juan 2:25

Ñucanchijman pai cusha nishcaca huiñai causaimi.

1 Juan 5:20

Ashtahuanpish Diospaj Churi shamushcatami yachanchij. Paimari mana llullaj Diosta rijsi tucunata curca. Chaimantami paipaj mana llullaj Churi Jesucristohuan shujlla canchij. Paimi mana llullaj Dios, huiñai causaitapish cuj.

Judas 1:21

Ñucanchijta Mandaj Jesucristo c'uyashpa cushca huiñai causaita shuyacushcataca pai cungacama Taita Diospaj c'uyaipi catiraichij.