Juan 14:27 - Dios Rimashca Shimicunami

²⁷ Cancunamanca ñuca sumaj causaitami cuni, sumajta causachunmi chaitaca saquini. Cai pachapaj cajcuna cushca shinaca mana cunichu. Chaimanta cancunapaj shungupica ama musparinguichijchu, ama mancharinguichijchu.

Mushuj Testamento Diospaj Shimi

²⁷ Cancunataca sumaj causaipimi saquini, Ñuca charishca sumaj causaitami cuni. Mana cai pacha sumaj causaita shina causachun saquinichu. Shina cajpipish ama musparichij, ama manchaichijchu.

Juan 14:27 Iomraidhean Croise

2 CRÓNICAS 20:30

Tucui muyundij llajtacunapi causajcuna llaquichinamanta Taita Dios huaquichishpa sumaj causaita cujpimi, Josafat mandacujpica mana macanacui tiyarca.

JOB 34:29

Taita Dios samachijpica ¿pitaj p'iñachi tucungari? Paipaj ñahuita pacajpica ¿pitaj catishpa ricui tucungari? Paica jatun llajtahuan cashpapish, shuj runallahuan cashpapish chai shinallatajmi.

SALMOS 11:1

Ñucaca Mandaj Diospimi shunguta churani. Ñucataca maitataj: “Pajarocuna shina urcucunapi miticugri” ninguichigari.

SALMOS 112:7

Llaquicunami shamugrin nishpa huillajpipish, paica mana manchangachu. Mandaj Diospi paipaj shunguta churashpami imata mana manchashpa causanga.

SALMOS 27:1

Mandaj Diosca ñucata achijyachij luzmi, ñucata quishpichijmi. Pitataj manchashari. Mandaj Diosca muyundijta pircashca shinami ñuca causaita huaquichin. Pita mana manchanichu.

SALMOS 28:3

Millaicunahuan tandallaca ñucataca ama llaquichihuaichu. Millaita rurajcunahuan chagruca ama llaquichihuaichu. Paicunaca pihuanpish sumaj causaimantami rimaj tucuncuna. Ashtahuanpish paicunapaj shungupica millaitami yuyancuna.

SALMOS 29:11

Mandaj Diosca, paipaj cajcunamanca podertami cunga. Mandaj Diosca paipaj cajcunamanca sumaj causaihuanmi bendicianga.

SALMOS 56:11

Mana manchashachu Taita Diospimi shunguta churani. Runaca ¿imatataj rurai tucungari?

SALMOS 56:3

Manchaihuan cai punllapica quiquinpimi shunguta churani.

SALMOS 72:2

Quiquinpaj cajcunataca cashcata rurashpa mandaj canata cuhuai. Quiquinpaj cajcuna llaquilla cajcunatapish cashcata rurashpa mandaj canata cuhuai.

SALMOS 72:7

Paipaj punllacunapica cashcata ruranacunallami sisanga. Sumaj causaillami yallitaj tiyanga. Luna mana tiyangacamami chashnaca canga.

SALMOS 85:10

Llaquij canahuan, mana llulla canahuanca tupanacurcamari. Cashcata ruranahuan, sumaj causaihuanca muchanacurcami.

SALMOS 91:5

Tutapish imata mana manchanguichu. Flechacunata punlla shitacujpipish mana manchanguichu.

PROVERBIOS 3:25

Cungaillapi ima llaqui japinatapish mana sustaringuichu. Diosta mana manchajcunapaj shamuj llaquitapish mana manchanguichu.

ISAÍAS 12:2

Taita Diosmi ñucata Quishpichij. Paillapimi shunguta churani, pita mana manchanichu. Paica ñucapaj muyundij pirca shinami. Ñuca cantanaca Mandaj Diosmari. Paimari ñucata quishpichijca cashca” ninguimi.

ISAÍAS 41:10

Ñuca canhuan cashcamanta ama manchaichu, ama shaicurichu. Ñucami canman fuerzata cuj Taita Dios cani. Cantaca ayudacushallami. Ñuca alli maquipi cashcata rurajhuanmi cantaca charirasha.

ISAÍAS 41:14

Jacobpaj c'uritucuna ama manchaichijchu. Israelcuna ashalla cashpapish cancunaca ama manchaichijchu. Ñucami cancunata ayudaj cani ninmi Mandaj Diosca. Israelcunapaj jucha illaj Diosmi cancunata Quishpichijca.

ISAÍAS 54:13

Cambaj huahuacunaca tucuicuna Mandaj Dios yachachishcami canga. Cambaj huahuacunapaj sumaj causaica ashtahuanmi miraringa.

ISAÍAS 55:12

Cushicushpami llujshiringuichij, sumajllatami tigranguichij. Urcucunapish, lomacunapish cancunapaj ñaupajpimi cushicuihuan cantangacuna. Chagracunapi tiyaj tucui yuracunapish cushicushpami maquipi huajtangacuna.

ISAÍAS 57:19

Paicunapaj shimipica: Carupi causajcunapajpish, c'uchullapi causajcunapajpish sumaj causai, sumaj causai tiyachun nishpa cantana yuyaitami paicunamanca cusha. Paicunataca ñucami alliyachisha” ninmi Mandaj Diosca.

ISAÍAS 9:6

Ñucanchijmanca churitamari cushca, chai huahuamari huacharishca. Paipaj maquipimari mandanataca churashca. Paica cashna shuticunami canga: “Mancharinata cunaj, tucuita rurai tucuj Dios, huiñaita causaj Yaya, sumaj causaita Mandaj” nishcami canga.

JEREMÍAS 1:8

Canca ama pita manchaichu, ñucami canhuan casha. Ñucami cantaca imamantapish quishpichisha” nircami Mandaj Diosca.

LAMENTACIONES 3:17

Sumaj causai tiyashcataca ña cungarinimi, cushicui tiyashcataca mana yuyarinillapishchu.

EZEQUIEL 2:6

Huañujlla aichayuj runalla, canca paicunataca ama manchangui, paicuna rimajpipish ama mancharingui. Zarza casha yuracuna chaupipi cashpapish, casha chaupipi cashpapish, escorpioncunapaj chaupipi causashpapish ama manchanguichu. Paicuna rimajpipish, paicunata ricushpapish ama mancharingui. Paicunaca mana cazujcunami.

DANIEL 4:1

Jatun mandaj Nabucodonosormi cai pacha tucui gentecunata, llajtacunata, ch'ican ch'ican rimaita rimajcunataca: “Sumaj causai cancunapi mirarishca cachun” nini.

DANIEL 6:25

Chaimi jatun mandaj Darioca, tucui cai pachapi causaj gentecunaman, llajtacunaman, ch'ican ch'ican rimaita rimajcunaman cashna nishpa quillcarca: “Cancunapica sumaj causai mirarishca cachun.

ZACARÍAS 6:13

Paimi, Mandaj Diospaj huasitaca shayachinga. Paica tucuicuna jatunyachishcami canga. Paica paipaj tiyarinapi tiyarishpami, tucuicunata mandanga. Paipaj c'uchupica, shujtaj curapishmi canga. Paicunaca ishquindijmanta cunanacushpami, sumajta causangacuna.

NÚMEROS 6:26

Mandaj Dios cancunata c'uyaj ñahuihuan ricuchun, sumaj causaita cancunapi churachun ningui nircami.

Mateo 10:26

Chaimanta ama manchaichijchu. Pacalla cashcacunaca ima pacalla mana saquiringachu, tucuimi yacharishca canga. Shinallataj pacallapi cashcaca ricuchishcami canga.

Lucas 1:79

Huañuna manchaihuan amsapi causacujcunapica achijyachichunmi luzta churanga. Ñucanchijtaca sumaj causaipimi punllanta pushanga” nircami.

Lucas 10:5

Maijan huasiman yaicushpaca: “Cai huasipica, sumaj causai tiyashca cachun” ninguichijraj.

Lucas 12:4

Ñucahuan apanacujcuna cancunamanca caitami huillani: Cuerpota huañuchijcunataca, ama manchaichijchu. Huañuchishca q'uipaca, imata mana ashtahuan rurai tucungacunachu.

Lucas 2:14

“¡Jahua pachapi caj Diostaca tucuicuna alli nishca cachun! ¡Cai pachapipish pai c'uyashpalla cushcata chasquijcunaca sumaj causaita charichun!” nircacunami.

Juan 14:1

–Ñuca rigrini nijpipish ama mancharichijchu. Yaya Diostapish crichij, ñucatapish crichij.

Juan 16:33

Ñucahuan shujlla cashpa sumaj causaita charichunmi, caicunataca rimarcani. Cancunaca cai pachapica llaquita apanguichijmi. Shina cajpipish cai pachata mandajtaca ñami misharcani, ñucapi shunguta churaichijlla– nircami.

Juan 20:19

Chai punllallataj semana callari ña tutayacujpimi, yachacujcunaca judiocunata manchashcamanta pungucunata huichcashpa tandanacushpa tiyacurcacuna. Chaipimi Jesusca paicunapaj chaupipi shayarishpaca: –¡Sumaj causai cancunahuan cachun!– nirca.

Juan 20:21

Jesusca cutinllatajmi paicunataca: –¡Sumaj causai cancunahuan cachun! Ima shinami Yaya ñucata cacharca, chashnallatajmi ñucapish cancunataca cachani– nircami.

Juan 20:26

Pusaj punlla q'uipami, cutin chai yachacujcunaca, Tomasndij huasi pungucunata huichcarishca tiyacurcacuna. Jesusca pungucuna huichcashca cajllapitaj yaicushpa paicunapaj chaupipi shayarishpaca: –¡Sumaj causai cancunahuan cachun!– nirca.

Hechos 10:36

Taita Diosca shuj huillanatami israelcunamanca cacharca. Chaica Jesucristomanta sumaj causaita charina cashcata huillanami. Paica tucuicunata Mandajmi.

Hechos 18:9

Shuj tutami Mandaj Jesusca, Pablomanca muscuipi shina ricurishpa cashna nirca: “Ama manchaichu, ama upallashpa huillacunguilla.

Romanos 1:7

Romapi tucui cajcuna, Dios c'uyashpa jucha illaj cachun cayashcacuna: Ñucanchij Dios Yayapaj, Mandaj Jesucristopaj mana c'uyaipajta c'uyaj canapish, sumaj causaipish cancunahuan cashca cachun ninimi.

Romanos 15:13

Cancuna pai yuyailla cashca Diosllataj paipi crijcunamanca cushi canata, sumaj causaita, jundachichun. Chashna cashpami, jucha illaj Espiritupaj poderhuanca Diospi ashtahuan shunguta churanguichij.

Romanos 5:1

Crishcamanta justificashcacuna cashpami, ñucanchijta Mandaj Jesucristomanta Dioshuan sumaj causaita charinchij.

Romanos 5:10

Diosta p'iñajcuna cajpipish, paipaj Churi huañushcamantami, Diosca ñucanchijhuan alli tucurca. Ashtahuancarin ña alli tucushca cashcamantaca, Jesús causacushcamantaca quishpichishcami cashun.

Romanos 8:6

Aichapaj munaita yuyanaca huañuimanmi apan. Ashtahuanpish Espiritupajta yuyanaca alli causai, sumaj causaimanmi apan.

1 Corintios 1:3

Ñucanchij Dios Yayapaj, Mandaj Jesucristopaj mana c'uyaipajta c'uyaj canapish, sumaj causaipish cancunahuan cashca cachun ninchijmi.

Gálatas 1:3

Dios Yayapaj, ñucanchijta Mandaj Jesucristopaj mana c'uyaipajta c'uyaj canapish, sumaj causaipish cancunahuan cashca cachun ninchij.

Gálatas 5:22

Ashtahuanpish Espiritupaj granoca c'uyaimi, cushimi, sumaj causaimi, mana utca p'iñarinami, alli shungumi, alli cajmi, crijmi,

Gálatas 6:16

Maijanpish cai mandashcapi nishca shina purijcunahuan, Diospaj israelcunahuanca sumaj causaipish, llaquij canapish cashca cachun.

Filipenses 4:7

Chashna rurajpimi pipish mana yachaipaj Diospaj sumaj causaica, cancunapaj shungucunata, cancunapaj yuyaicunatapish Cristo Jesuspi huaquichinga.

Colosenses 1:2

Cristohuan shujlla tucushpa Colosapi alli caticuj jucha illaj huauquicunahuanca: Dios ñucanchij Yayapaj, Mandaj Jesucristopaj mana c'uyajpajta c'uyaj canapish, sumaj causaipish cancunahuan cashca cachun ninchijmi.

Colosenses 1:20

Diosca Cristomantami tucui imalla tiyajcunahuan cutin alli tucurca. Cai pachapi cajcunahuanpish, jahua pachapi cajcunahuanpishmi alli tucurca. Cristo cruzpi yahuarta jichashcahuanmi Diosca chashna alli tucurca.

Colosenses 3:15

Cristomanta Dioshuan sumaj causaica cancunapaj shungucunapi mandachun. Chashna cachun cayashpa shujlla cuerpota rurashcacunami carcanguichij. Chaimanta pagui nijcuna caichij.

2 Tesalonicenses 1:2

Ñucanchij Dios Yayapaj, Mandaj Jesucristopaj mana c'uyaipajta c'uyaj canapish, sumaj causaipish cancunahuan cashca cachun ninchijmi.

2 Tesalonicenses 3:16

Sumaj causaita cuj Mandaj Jesusllataj cancunamanca, tucuipi sumaj causaita cushpa caticuchunlla. Mandaj Jesusca tucui cancunahuan cachun.

2 Timoteo 1:7

Diosca ñucanchijmanca, manchana yuyaita cuj espiritutaca mana cushcachu. Ashtahuanpish poderta cuj, c'uyaita cuj, quiquinllataj jarcarij canata cuj espiritutami cushca.

Hebreos 13:20

Sumaj causaita cuj Taita Diosmi, ñucanchijta Mandaj Jesucristotaca huañushcacunapaj chaupimanta causachirca. Ovejacunata jatun michijca, Dios cushami nishpa mushujta ari nishcatami paipaj yahuarta jichashpa huiñaipaj pajtachirca.

Hebreos 7:2

Abrahamca macanacushpa tucui japishcacunamantaca chungamanta shujtami Melquisedecmanca cushca. Melquisedec nishpaca puntaca: “Cashcata ruraj Jatun Mandaj” nisha ninmi. Shinallataj: “Salem llajtata Jatun Mandaj” nishcapish, “Sumaj causaiyuj Jatun Mandaj” nisha ninmi.

Apocalipsis 1:4

Ñucaca Juanmi cani. Asia llajtapi caj canchis pueblopi tandanacushca crijcunamanmi quillcani: Diosca cunanpish, sarunpish shamunapaj cajpish paillatajmi. Paipaj jatun tiyarina ñaupajpi caj canchis espiritupaj mana c'uyaipajta c'uyashcapish sumaj causaita cushcapish cancunahuan cachun.

Apocalipsis 2:10

Llaquita apanataca ama manchaichu. Diabloca maijacunataca, crijtaj cashcata yachachun, carcelpimi churachinga. Chaipica chunga punllacunatami llaquita apanguichij. ¡Chashna cashpapish huañungacama catijmanca ñucaca causaita ricuchij coronatami cusha!

Apocalipsis 21:8

Shina cajpipish manchajcunaca, mana crijcunaca, millashcacunaca, huañuchijcunaca, apanacushpalla causajcunaca, brujocunaca, rurashcalla dioscunata adorajcunaca, tucui llullajcunapish paicuna japina cashcataca azufrehuan rupacuj nina cuchatami japingacuna. Chaica q'uipa huañuimi” nircami.