Juan 13:18 - Dios Rimashca Shimicunami

¹⁸ Mana tucui cancunatachu chashna nini. Maijanlla ñuca agllashcataj cajtaca yachanimi. Ashtahuanpish: “Ñucahuan micujllatajmi, ñucataca jaitanga” nishpa Quillcachishca pajtachunmi chashna tucun.

Mushuj Testamento Diospaj Shimi

¹⁸ Mana tucui cancunatachu chashna nini. Maijanllata Ñuca agllashcataca yachanimi. Dios Quillcachishcapi: “Ñucahuan tandata micujllatajmi, Ñucata pʼiñashpa huashaman jaitarca” nishcaca, pajtanatajmi can.

Juan 13:18 Iomraidhean Croise

SALMOS 41:9

Ñucahuan alli apanacuj runa, ñuca paipi shunguta churashca runa, ñuca micunata micujllatajmi, ñucata p'iñashpa chaqui talonhuan jaitarca.

JEREMÍAS 41:2

Ña micushpaca Netaniaspaj churi Ismaelca, paihuan caj chunga runacunandij jatarishpami, Ahicampaj churi Gedaliastaca espadahuan chugrichishpa huañuchircacuna. Chashnami Safanpaj nieto Gedaliastaca huañuchircacuna. Paitaca Babilonia llajtata jatun mandajllatajmi Judá llajtata mandaj cachun churashpa saquishca carca.

Mateo 10:36

Runacunapi chashna p'iñajca quiquin huasi ucupurallapitajmi canga.

Mateo 26:21

micucushpami Jesusca: –Cancunapuramanta shujmi, ñucataca huañuchichun entregagrin. Chashnatajmi canga– nirca.

Mateo 26:23

Jesusca: –Ñucahuan platopi maquita satij, chaimi ñucataca huañuchichun entreganga.

Marcos 14:17

Ña tutayamucujpica, chunga ishqui yachacujcunandijmi Jesusca chayarca.

Marcos 14:18

Mezapi ña micucushpami Jesusca: –Cancunapuramanta ñucahuan micucuj shujmi, ñucataca huañuchichun entregagrin. Chashnatajmi canga– nircami.

Marcos 14:20

Chaimi Jesusca cashna nirca: –Chunga ishquipuramanta shuj, ñucahuan cai platopi tandata jucuchijmi japichinga.

Lucas 22:21

Ñucata japichij maquica, ñucallahuantajmi cai mezapi.

Juan 13:21

Chashna nishca q'uipami Jesusca yallitaj llaquirishpa: –Cancunamanta shujmi ñucataca huañuchichun cunga. Chaica chashnatajmi canga– nirca.

Juan 13:22

Chaimi yachacujcunaca, maijanta chashna nicushcata mana yachashpa caishuj chaishuj ricunacurcacuna.

Juan 13:26

Jesusca: –Tandata ñuca pimanmi nuyuchishpa cuni, chaimi canga– nirca. Tandata nuyuchishpaca, Simonpaj churi Judas Iscariotemanmi curca.

Juan 15:16

Mana cancunachu ñucataca agllarcanguichij, ñucami cancunata agllarcani. Cancuna rishpa granota p'ucuchun, chai granoca cancunapi p'ucushpa caticuchunllami agllarcani. Chashna cashpa ñucamanta imatapish Yayata mañajpica, paica cungallami.

Juan 15:19

Cai pachapaj cajpica, cai pachapaj cajcunaca paicunapaj cashcamanta c'uyanmanmi. Cai pachapaj cajcunahuan cajpipish ñuca agllajpimi, mana cai pachapaj canguichij. Chaimantami cancunataca cai pachapaj cajcunaca p'iñancuna.

Juan 15:25

Quillcachishpa paicunaman cushca mandashcapi: “Mana ima cajpipish ñucataca p'iñancunami” nishca pajtachunmi chashnaca rurancuna.

Juan 17:12

Paicunahuan cai pachapi cashpaca, quiquin ñucaman cushcacunataca quiquinpaj maquipimi huaquichircani. Paicunaca shujllapish mana chingarircachu. Quillcachishcapi nishca pajtachunmi, chai chingarina cashca runalla chingarirca.

Juan 18:32

Paicuna chashna nishpaca, Jesús ima shina pai huañuna cashcata ñaupaman huillashca pajtachunmi chashna nircacuna.

Juan 19:24

Chaimantami caishuj chaishuj cashna nircacuna: –Caitaca ama lliquishpa chaupishunchijchu, maijanpaj urmachunpish chai churana jahuallapitaj sorteashunchij– nircacunami. Chashna rurajpica: “Ñuca churanacunataca, paicunapurami chaupircacuna. Ñuca churana jahuallapitajmi sortearcacuna” nishpa Quillcachishcami pajtarca. Soldadocunaca chashnatajmi rurarcacuna.

Juan 19:36

Tucui caicunaca: “Paipaj tulluca shujllapish mana p'aquishcachu canga” nishpa Quillcachishcapi nishca pajtachunmi, chashnaca tucurca.

Juan 21:17

Jesusca caihuanca quimsa cutinmi: –Jonaspaj churi Simón, ¿Ñucataca c'uyanguichu?– nirca. Caihuanca quimsa cutin: “¿Ñucataca c'uyanguichu?” nijpimi Pedroca llaquirishpa: –Mandaj Jesús, quiquinca tucuitami yachangui. Quiquinta ñuca ima shina c'uyaj cashcataca quiquinllataj yachanguimi– nijpi Jesusca: –Ñuca ovejacunata cuidangui.

Juan 6:70

Chaimi Jesusca: –Ñucaca cancunataca, chunga ishquitamari agllarcani. Ashtahuanpish cancunamanta shujca diablomari– nirca.

Hechos 1:16

–Huauquicuna, jucha illaj Espíritu Davidta quillcachishcapi Judasmanta huillashcaca pajtanataj cashcamanta ñami pajtarca. Jesusta japijcunataca Judasmi Jesús maipi canman pushashpa rirca.

Hechos 1:2

jahua pachaman rina punllacama pai imallata rurashcataca ñami quillcarcani. Paica manaraj jahua pachaman rishpami pai agllashca apostolcunataca jucha illaj Espirituhuan imallata rurana cashcata mandarca.

2 Corintios 4:5

Ñucanchijca mana ñucanchij quiquinmantachu huillacunchij, ashtahuanpish Jesucristoca Mandaj cashcata, ñucanchijca Jesuspaj c'uyaihuan cancunapajta rurajcuna cashcatami huillacunchij.

Hebreos 4:13

Imalla rurashcacunapish Diospaj ñaupajpica ima mana pacallachu. Ashtahuanpish tucui imapish paipaj ñahuipica lluchulla, pascashca ricunallami tiyacun. Ñucanchijca paimanmi tucui imalla rurashcataca ricuchishun.

Apocalipsis 2:23

Paipaj huahuacunataca huañuchishami. Chashna rurajpimi ñucataca tucuipi tandanacushca crijcunaca paicunapaj yuyaita, shunguta rijsij cashcata yachangacuna. Cancunamanca ima shina rurashca shinallatajmi cusha.