JOSUÉ 2:11 - Dios Rimashca Shimicunami

¹¹ Chaicunata uyashpami, cancunataca tucuicuna manchanchij. Cancunahuan macanacunataca pi mana c'ariyanchu. Cancunata Mandaj Diosca jahua pachapipish cai pachapipish caj Diosmi.

JOSUÉ 2:11 Iomraidhean Croise

1 REYES 8:60

Chashna cajpimi, tucui cai pachapi causajcunaca Mandaj Diosca Taita Diostaj cashcata, pai shina pi shujtajca mana tiyashcata yachangacuna.

2 REYES 5:15

Chai q'uipaca paipish, paihuan tucui cajcunapish Diospaj runapajman tigrashpa paipaj ñaupajpi shayarishpami: –Shujtaj llajtacunapica maipi mana Diostajca tiyashcachu. Israel llajtallapi Diostajca tiyashcatami cunantajca yachani. Cunanca cambajta ruraj canman cungapaj apamushcacunata chasquipai– nircami.

NEHEMÍAS 6:16

Tucui chaicunata uyajcunaca ñucanchijta p'iñajcunapish, ñucanchij muyundij tucui llajtacunapish mancharishpami cumurircacuna. Tucui chaicunata rurashcata ricushpaca, paicunapaj Taita Diosmari chai tucuitaca ruran nircacunami.

ESTER 8:17

Tucui llajtacunapipish, pueblocunapipishmi jatun mandaj mandashcahuan chayajpica, judiocunaca yallitaj cushicushpa jatun micuita rurarcacuna. Shinallataj chai llajtacunapi causajcunaca, judiocunata yallitaj manchashpami, paicunapura tucurcacuna.

SALMOS 102:15

Llajtacunaca Mandaj Diospaj shutitaca manchangacunami. Tucui cai pacha jatun mandajcunami quiquin jatun mandajtaca paimi jatun mandaj ningacuna.

SALMOS 22:14

Yacu shinami talliricuni. Ñuca tullucunapish mucucunamanta llujshishca shinami. Ñuca shungupish ñuca ucupica huira shinami yacuyacun.

SALMOS 58:7

Callpacuj yacucuna ñapish chingarishca shina cachun. Puntajlla caspicunahuan paicuna shitajpipish, mirga mirgapi p'aquirishca cachun.

SALMOS 83:18

Chaipimi quiquinpaj shutica Mandaj Dios cashcata yachangacuna. Jahua pachapi caj Taita Diosca quiquinlla cashcata, quiquinlla tucui cai pachata mandaj cashcata yachangacuna.

ÉXODO 15:14

Tucui llajtacunami uyanga. Chujchungacunami. Filisteocunaca jatun nanaihuanmi huañucungacuna.

ÉXODO 15:15

Edom llajtata mandajcunaca musparicungacunami. C'ari c'ari moabitacunataca manchaimi chujchuchicunga. Canaanpi causajcunapish tucuicunami imata mana rurai tucuj cangacuna.

ISAÍAS 13:7

Chashna llaquichicujpica tucuicunapaj maquicunami imata mana rurai tucuj saquiringa. Tucuicunapaj shungucunami manchaihuan cangacuna.

ISAÍAS 19:1

Egipto llajta ima tucuna cashcataca cashnami huillachishca: Mandaj Diosca callpacuj p'uyupi tiyarishcami Egiptomanca yaicunga. Egiptopi tiyaj rurashcalla dioscunaca paipaj ñaupajpimi chujchungacuna. Egipciocunapish tucuicunami manchaihuan huañucungacuna.

EZEQUIEL 21:15

Chaita ricushpaca mancharinguichijmi, ashtahuan achcacunami huañungacuna. Chai manchachij espadataca, tucuicunapaj pungucunapimi churarcani. ¡Aij, huañuchingapajca ñamari achijllata rurashca tiyacun! Cungata p'itingapajmari ña allichishca tiyacun.

NAHUM 2:10

Chushajlla, huañucuj, llaquinayajmari saquirishca. Shungupish huañushcamari. Cunguri mucucunapish chujchucunmari, huijsatapish nanachicunmari. Ñahuicunapish quillu quillumari tucushca.

DEUTERONOMIO 1:28

Cunanca ¿maimantaj huichiyashunyari? Ñucanchij huauquicunapish ñucanchijmanca cashna nishpami mancharinata huillancuna: “Chai llajtapi causajcunaca ñucanchijta yalli c'ari c'ari jatun runacunamari. Chai pueblocunaca yallitaj jatun, muyundijta pircacunapish jahua pachaman tupajta yallitaj jatunmi. Chaipica Anacpaj huahua huahuacunatapishmari ricumunchij nincunami” nircanguichijmi.

DEUTERONOMIO 20:8

Mandajcunaca cutinllataj chaipi cajcunata cashna nishpaca: Cancunapurapi ¿maijantaj manchacujcuna, mana c'ari c'ari cajcuna canguichij? Chaicunaca cancunapaj huasiman tigrashpa richijlla. Cancuna manchacujta ricushpa caishujcunapish manchacujcuna tucunman ningacunami.

DEUTERONOMIO 4:39

“Cunanca chaita alli yachashpa cancunapaj shungupi alli yuyaringuichij. Jahua pachapipish, cai pachapipish Taita Diosca Mandaj Dios cashcata yuyaringuichij. Pi shujtajca mana tiyanchu.

JOSUÉ 14:8

Ñucahuan rij huauquicunami israelcunamanca mancharinata parlashpa mana shamuna yuyaita curca. Shina cajpipish, ñucata Mandaj Dios ñucanchijhuantaj cashcata tucui shunguhuan crishpa, pai nishcata rurarcanillami.

JOSUÉ 2:24

Josuemanca: “Mandaj Diosca tucui chai llajtatami ñucanchijman cushpa ñucanchij maquipi churashca. Tucui chai llajtapi causajcunami ñucanchijta manchashpa manchaihuan huañucuncuna” nircacuna.

JOSUÉ 5:1

Jordán jatun yacumanta inti huashicun ladoman causaj amorreocunata jatun mandajcunapish, mama cucha c'uchuman causaj cananeocunata jatun mandajcunapish, Jordán jatun yacuta israelcuna tucui ch'imbangacama Mandaj Dios chaquichishpa ch'imbachishcatami yachaj chayarcacuna. Chaimi yallitaj manchashpa israelcunahuan, macanacunataca manataj yuyarcacuna.

JOSUÉ 7:5

Hai pueblopi causajcunaca quimsa chunga sujta israelcunatami huañuchircacuna. Caishujcunatapish chai pueblo pungumantaca, Sebarim pambacama catishpa rishpami chaimanta rina uripi macarcacuna. Chashna rurajpimi tucui israelcunapaj shunguca yacuyaj shina tucushpa paicunaca mana macanacushun nircacuna.

JOSUÉ 9:24

Chaimi paicunaca Josuemanca: –Cancunata Mandaj Diosca paipajta ruraj Moisestaca cancunamanmi cai llajtacunata cuni. Cancunaca cai llajtapi causajcunataca tucuita chingachichij nishcata cancunapajta ruraj ñucanchij yachaj chayashpami, ñucanchijta huañuchinata manchashcamanta chashna nircanchij.

Apocalipsis 6:16

Paicunaca urcucunatapish, c'acacunatapish: “Ñucanchij jahuapi urmaichij, jatun tiyarinapi tiyacujpaj ñaupajmanta, Oveja p'iñarishpa llaquichinamantapish pacahuaichigari.