JONÁS 1:4 - Dios Rimashca Shimicunami

⁴ Chashna ricujpimi, Mandaj Diosca achca huairata cacharca. Chai huaira mama cuchata caiman chaiman cuyuchijpimi, chai barcoca ñalla p'aquiricuj shina yuyachirca.

JONÁS 1:4 Iomraidhean Croise

SALMOS 135:6

Mandaj Diosca tucui pai rurasha nishcatami ruran. Jahua pachapipish, cai pachapipish, mama cuchapipish, yacu ucujman cajcunapipish pai rurasha nishcatami ruran.

SALMOS 135:7

Paimari cai allpa tucurimanta p'uyutapish huichiyachin. Tamyapaj relampacunatapish paimari ruran. Huairatapish paimari huaquichishcamanta llujshichin.

SALMOS 148:8

Taita Dios mandashcata ruraj rayopish, rundupish alabaichigari. Rasupish p'uyupish, jatun huairandij tamyapish alabaichigari.

ÉXODO 10:13

Egipto llajta jahuata Moisés paipaj caspita chutajpica, Mandaj Diosca inti llujshin lado huairatami tucui tuta, tucui punlla huairachun apamurca. Chai huairaca cayandij punllaca langostacunatami apamurca.

ÉXODO 10:19

Mandaj Diosca, inti huashicun lado sinchi huairata apamushpami, langostacunataca chai huairahuan apashpa Puca Cuchapi shitarca. Egipto llajtapica shuj langostallapish mana saquirircachu.

ÉXODO 14:21

Moisesca jatun cucha jahuatami paipaj maquita chutarca. Mandaj Diosca tucui tutami inti llujshin lado sinchi huairata cacharca. Chai huaira tucui tuta p'ucujpimi, jatun cucha yacuca ishquipi chaupirirca. Chai cucha yacu cada ladoman chaupirijpimi chaquishca allpa tucurca.

ÉXODO 15:10

Ashtahuanpish cambaj huairahuan p'ucushpami, yacuhuan tapachircangui. Jatun yacupica plomo shinami huashicurcacuna.

JEREMÍAS 51:16

Pai mandajpimi yacucunapish jahua pachapica, culun nishpa uyarin. Huairatapish huaquichishcamantami llujshichin, p'uyutapish cai pacha tucurimantami huichiyachin. Shinallataj paimi achij nichishpa tamyachin.

AMÓS 4:13

Mandaj Diosca urcucunatapish, huairatapish rurajmari, runacunamanpish pai imata yuyashcata huillajmi. Paica tutayachijpish, punllayachijpishmari. Paica tucui urcucunatapish purijmari. Paica tucuita Mandaj Taita Dios shutimari.

NÚMEROS 11:31

Mandaj Dios cachashca huairami, mama cuchamanta codornizcunata apamushpa israelcunapaj carpa huasicuna maipi canman apamushpa chaipi saquirca. Carpa huasicuna muyundijtaca shuj punlla puri carucamami urmarca. Altomanpish shuj metro shinacamami montonarirca.