JOEL 2:28 - Dios Rimashca Shimicunami

²⁸ Cai tucuita rurashca q'uipaca, ñuca Espiritutaca tucuicunapimi churasha. Chashna churajpimi cancunapaj churicunapish, ushushicunapish ñucamanta huillangacuna. Cancunata cunaj yuyajcunapish muscungacunami. Q'uipa huiñaicunapish ñuca ricuchishcatami, muscuipi shina ricungacuna.

JOEL 2:28 Iomraidhean Croise

PROVERBIOS 1:23

Ñuca jarcashcata uyashpa cutirichigari. Chaita rurajpica, ñuca Espiritutaca cancunapi churashami. Ñuca shimicunata yachachishami.

ISAÍAS 32:15

Jahua pachamanta paipaj Espirituta Dios cachashpa, ñucanchijpi churangacamami chashna canga. Espíritu ñucanchijpi cajpica shitashca pambacunapish, alli granota p'ucuj allpacunami tucunga. Alli granota p'ucuj allpacarin yallitaj alli granota p'ucujmi tucunga.

ISAÍAS 40:5

Chaipimi Mandaj Dios sumaj achij nicuj cashcaca ricuringa. Chaitaca tucui gentecunami tandanacushpa ricungacuna”. Mandaj Diosca, paipaj shimihuantajmi chashna nishca.

ISAÍAS 44:3

Chaquishca pambacunapica yacu callpacujtami rurasha. Chaquishca allpacunataca jatun yacumi callpacunga. Cambaj huahua huahuacunapica ñuca Espiritutami tallisha. Cambaj huahua huahuacunapica allicunatami tallisha.

ISAÍAS 49:26

Can imalla charishcacunata quichujcunataca, paicunapaj quiquin aichallatatajmi micuchisha. Paicunapaj yahuarhuanca vinohuan shinami machangacuna. Chaipimi tucuicuna Mandaj Dios ñucataca canta Quishpichij cashcata, canta cacharichij cashcata, Jacobpaj Tucuita Rurai tucuj Dios cashcata yachangacuna” ninmi.

ISAÍAS 49:6

Paimi cashna nin: “Jacobpaj huahua huahuacunata jatarichij, mana huañushca israelcunata tigrachimuj, ñucapajta ruraj cachunllaca mana churanichu. Ashtahuanpish tucui mama llajtacunapaj luz cachun, tucui cai pachapi causajcunata quishpichij cachunmi churani” ninmi.

ISAÍAS 54:13

Cambaj huahuacunaca tucuicuna Mandaj Dios yachachishcami canga. Cambaj huahuacunapaj sumaj causaica ashtahuanmi miraringa.

JEREMÍAS 23:25

Ñucaca chai huillajcunataca: Muscunimari, muscunimari nishpa, llullashpalla ñuca shutipi huillajtami uyani.

JEREMÍAS 23:28

Maijan huillaj muscushpaca muscunillami nishpa parlachun. Ñuca shimicunatataj chasquishpa huillajpish, ñuca shimi cashcallata huillachun. Ujshaca trigohuanca, mana chai shinallatajchu” ninmi Mandaj Diosca.

EZEQUIEL 36:27

Chashna rurashpa ñuca Espirituta shungupi churajpimi, cancunaca ñuca quillcachishcapi nishca shina causanguichij, ñuca imalla rurai nishcatapish pajtachinguichijmi.

EZEQUIEL 37:14

Cancunapi ñuca Espirituta churajpimi, causaringuichij. Quiquin llajtallapitaj samarichunmi churasha. Chashna rurajpimi Mandaj Dios ñucataj chashna nishcataca yachanguichij. Chaitaca pajtachishatajmi ninmi Mandaj Diosca ni” nircami.

EZEQUIEL 39:29

Paicunamantaca ñuca ñahuitaca, ña mana cutinca anchuchishachu, ashtahuanpish israelcunapica ñuca Espiritutami churasha ninmi Mandaj Jatun Diosca ningui” nircami.

DANIEL 7:1

Jatun mandaj Belsasar Babilonia llajtata mandai callari huatami Danielca paipaj camapi cashpa muscuipi ricuchishcata ricurca. Rijcharishpaca chaitaca huillana cashcallatami quillcarca.

ZACARÍAS 12:10

Chaimantaca Davidpaj huahua huahuacunamanpish, Jerusalenpi causajcunamanpish tucui shunguhuan mañana yuyaitami cusha. Ñucataca, paicuna pasajta tujsichijcunallatajmi ricungacuna. Chaimantaca manchanayajta llaquirishpa, shujlla churi huañushcamanta huacacuj shinami huacangacuna. Paicunaca punta churimanta manchanayajta llaquirij shinami llaquiringacuna.

NÚMEROS 11:17

Chaipi uriyamushpa ñuca canhuan rimashpami, canpi tiyaj Espirituta japishpa paicunapi ñuca churasha. Israelcuna llaquichishca cargata canhuan apachunmi chashna rurasha. Chaipica ña mana canlla apanguichu.

NÚMEROS 12:6

Mandaj Diosca paicunataca cashnami nirca: “Cunanca ñuca rimashcata uyaichij. Mandaj Dios huillachishcata huillaj cancunapurapi tiyajpica, paimanca muscuipi shinami ricurisha. Muscuillapimi rimasha.

Lucas 1:67

Juanpaj yaya Zacariasca, jucha illaj Espíritu rimachijpimi, ima shina tucunata cashna nishpa huillarca:

Lucas 3:6

Tucuicunami Dios cachashca Quishpichijtaca ricungacuna” ninmi”.

Juan 7:39

Shina nishpaca, paita crijcuna Taita Diospaj Espirituta chasquina cashcatami huillarca. Jesusta manaraj sumajyachijpimi, jucha illaj Espirituca manaraj shamurca.

Hechos 2:33

Paitami Taita Diosca jatun canapi churashpa, paipaj alli ladoman tiyachirca. Chaimantami Taita Diosca pai cusha nishca jucha illaj Espirituta Jesusman cujpi, paica ñucanchijman cun. Chaitami cunan cancunaca ricucunguichij, uyacunguichij.

Hechos 2:39

Taita Dios cusha nishcaca cancunapajpish, cancunapaj huahuacunapajpish, tucui cai pachapi cajcunata ñucanchij Jatun Dios maijanllata quishpichisha nishcacunapajpishmi– nircami.

Hechos 21:9

Felipeca, chuscu soltera ushushicunatami charirca. Paicunaca profetacunami carca.

Gálatas 3:28

Chaimanta judiopish, griegopish, esclavopish, mana esclavopish, c'aripish, huarmipish ña mana tiyanchu. Cancunaca tucuicunami Cristo Jesuspi shujlla canguichij.

Hebreos 1:1

Ñaupa punllacunapica ñucanchij yayacunamanca, achca cutin tucui layami profetacunata huillachishpa Diosca rimarca.

1 SAMUEL 19:20

Chaimi Saulca huillashpa purij runacunataca Davidta pushamuchun cacharca. Paicunaca Dios huillachijpi huillaj achcacuna huillacujtami ricurcacuna. Samuelpish chaipi cajta, paicunataca Samuel pushacujtami ricurca. Ashtahuanpish Saúl cachashca huillashpa purijcunapaj jahuamanpish Diospaj Espíritu shamujpimi, paicunapish Dios huillachishcata huillarcacuna.

1 SAMUEL 19:21

Chaita Saúl yachaj chayashpaca, paipaj huillashpa purij shujtajcunatapish cachajpica paicunapish caishujcuna shinallatajmi Dios huillachishcata huillarcacuna. Chaimantami Saulca huillashpa purij shujtaj runacunata caihuanca quimsa cutin cachajpi, paicunapish caishujcuna shinallataj Dios huillachishcata huillarcacuna.

1 SAMUEL 28:6

Saulca Mandaj Diostami tapurca. Ashtahuanpish Mandaj Diosca muscuipipish, Urimpi tapujpipish, Dios ima nishcata huillajcunata tapuchijpipish imata mana cutichircachu.