JOEL 2:22 - Dios Rimashca Shimicunami

²² Sachapi causaj animalcunapish, ama manchaichijchu. Cancuna micuchunca, shitashca pambacunapi q'uihuacunaca cutinmi huiñanga. Yuracunapipish cutinllatajmi p'ucunga. Higocunapish, uvacunapish achcatami p'ucunga.

JOEL 2:22 Iomraidhean Croise

GÉNESIS 4:12

Chaimanta allpapi tarpujpipish ña mana alli p'ucungachu. Chai allpapica maipi causanata mana charij, caru llajtamanta shina puricunguillami– nircami.

SALMOS 36:6

Mandaj Dios quiquin cashcata ruraj cashcaca Diospaj urcucuna shinami. Quiquin llaquichinacunaca ucujta jutcu shinami. Mandaj Dioslla, runacunatapish quiquinmi huaquichingui. Animalcunatapish quiquinmi cuidangui.

SALMOS 65:12

Shitashca pambacunapi michinacunatapish shullayachinmi. Lomacunaca cushicunahuanmi chumbillirin.

SALMOS 65:13

Pambacunaca canlla animalcuna jundami. Pugru pambacunaca granocunahuan jundami. ¡Cushijllatami caparincuna. Cushijllatami cantancuna!

SALMOS 67:6

Allpaca p'ucungami. Taita Diosca alli cashca cachun ningami. Paica ñucanchij Taita Diosmari.

ISAÍAS 51:3

Mandaj Diosca Siontaca cushichingami. Chaica chashnatajmi canga. Ñuturishcacunataca cushichingami. Shitashca pambataca sumaj huertatami ruranga. Mana p'ucuj allpataca Mandaj Diospaj huertatami ruranga. Chaipica cushicushpa alabana, cushicushpa cantanacunami tiyanga.

EZEQUIEL 36:30

Shujtaj llajtapi causajcuna, ama cutin cancuna yaricaihuan cajta ricushpa chanzata rurashpa asichunmi, yuracunapipish allpacunapipish granocunataca achcata p'ucuchisha.

EZEQUIEL 36:35

Chaita purijcuna ricushpaca, cashnami ningacuna: Cai shitashca allpacunaca, Edén huerta shinamari tucushca. Pueblocunapish urmachishca, shitashca, llaquinayajmari carca. Cunanca huasichishpamari, muyujta pircashpa causacuncuna ningacunami.

EZEQUIEL 36:8

Israel llajtapi tiyaj urcucunalla, ashtahuanpish cancunaca ñuca agllashca israelcunapajca, yuracunata huiñachishpa micuna granocunata p'ucuchicuichijlla, ñallami paicunaca tigramunga.

JONÁS 4:11

Nínive pueblotacarin maitataj mana llaquishari. Chai jatun pueblopica, 120.000 runacunami causancuna. Paicunaca maijan alli maqui cashcata, maijan lluqui maqui cashcatapish mana yachashca shinami causancuna. Shinallataj achca animalcunapishmi tiyan– nircami.

HAGEO 2:16

Manaraj caita ruranata callarishpaca, ¿imamantataj maijanpish ishqui chunga efa tiyana montón granota pallai callarishpaca, chunga efallata japij carcanguichigari? ¿Imamantataj pichca chunga puñu vino llujshina pajta uvata capishpapish, ishqui chunga puñullata vinotaca japij carcanguichigari?

ZACARÍAS 8:12

Ashtahuanpish paicunapajca, sumaj causaimi tarpushca shina saquiringa. Uvapish achcatami p'ucunga. Allpacunapish achca granocunatami p'ucunga. Jahua pachapish tamyata cachangami. Chai tucui allicunatami, cai pueblopi causajcunapuramanta saquirishcacunamanca cusha.

1 Corintios 3:7

Chashnami tarpujpish, yacuta churajpish mana ima canchij, ashtahuanpish huiñachijca Diosmari.