JOEL 2:1 - Dios Rimashca Shimicunami

¹ Sión urcupica, trompetapi tocaichigari. Ñucapajlla urcupica, caparichigari. Cai llajtapi causajcuna, tucuicuna chujchuichigari. Mandaj Dios shamuna punllaca ñamari pajtamucun, ñamari quichquiyamucun.

JOEL 2:1 Iomraidhean Croise

1 CRÓNICAS 15:28

Chashnami Mandaj Dioshuan ari ninacushca quillcata huaquichina arcata apacushpaca, tucui israelcuna cushicuihuan caparishpa, bocinacunapi, trompetacunapi, cimbalocunapi, salteriocunapi, arpacunapipish sinchita tocashpa aparcacuna.

SALMOS 119:120

Ñuca aichaca quiquinta manchashcamanta chujchucunmari. Quiquin mandashcacunataca manchacunimari.

SALMOS 87:1

Sión puebloca Diospajlla urcupi callari rumicunata churashpa shayachishcami.

ÉXODO 10:14

Langostacuna tucui Egipto llajtata huichiyashpaca tucui chai llajtatami taparca. Chashna yallitaj langostacunaca ñaupamanpish mana tiyashcachu q'uipatapish mana tiyangachu.

ISAÍAS 13:6

Caparirishpa huacaichigari. Mandaj Dios llaquichina punllaca ñamari c'uchullapi. Tucuita Rurai Tucuj Diosca chingachingapajmi shamunga.

ISAÍAS 13:9

Mandaj Dios llaquichina punllaca ñamari shamucun. Chaipica: Mandaj Diosca nina sindirij shina yallitaj p'iñarishpa llaquichijni shitajpica yallitaj mancharinami canga. Allpataca shitashca pambatami saquinga. Allpapi causacuj juchayujcunataca tucuita chingachingapajmi chashna shamucun.

ISAÍAS 2:12

Tucuita Mandaj Dios llaquichina punllaca, atirishcacunata, jatun tucushcacunata, caimi jatun nishcacunata cumurichingapajmi shamunga.

ISAÍAS 66:2

Tucui caicunataca ñuca maquimi rurarca. Chaimantami tucui tiyai callarirca ninmi Mandaj Diosca. “Shina cajpipish ñucaca huajchacunapi, mana jatun tucushcacunapi, ñuca mandashcata manchaihuan cazujcunapimi ñuca ñahuita churani.

ISAÍAS 66:5

Mandaj Dios rimashcata manchajcuna paipaj rimashcata uyaichigari. Paica cashnami nin: “Ñuca shutita mañajcunataca ñucata mana rijsinichu nij cancunapaj huauquicunaca: Mandaj Diosca pai jatun cashcata ricuchichun, chaipi cancuna cushicushcata ñucanchij ricungapaj ningacunami. Ashtahuanpish paicunaca chashna nicushpapish pingachishcami cangacuna.

JEREMÍAS 16:10

Judá llajtapi causajcunaman tucui caicunata huillajpica, paicunaca cashnami ningacuna: Ñucanchijca ¿ima millaitataj rurashcanchigari? Mana cashpaca ¿ima juchata rurashpataj, ñucanchijta Mandaj Diostaca p'iñachishcanchigari? Mandaj Diosca ¿imamantataj ñucanchijtaca cashna jatun llaquihuan ñacachisha ninchu imamí? ningacunami.

JEREMÍAS 16:7

Huañushcacunapaj familiapuracunatapish pi mana imallatapish carashpa cushichigringachu. Yaya, mana cashpaca mama huañujpipish, pi mana ima ubyanallahuanpish cushichigringachu.

JEREMÍAS 4:5

Judá llajtapipish, Jerusalenpipish huillaichigari. Trompetacunapi tocashpa tucui llajtapi yachaj chayachichigari. Tucuicuna tandanacushpa, jatun pircayuj pueblocunaman yaicuichigari nishpa caparichij.

JEREMÍAS 5:22

Mandaj Diosca cashnami nin: Ñucataca manamari manchanguichijchu, manamari ñuca ñaupajpica chujchunguichijchu. Ñucamari mama cucha maicama canatapish churarcani. T'iyullatamari huiñaita yacu muyundijta tiyachun churarcani. Shina cajpipish, ñuca mandashcamantaca mana pasanchu. Jatun huairahuan yacu huajiashpa jatarishpapish, mana maitapish rinllachu. Mana chai t'iyumanta pasanchu.

EZEQUIEL 12:23

Chaimanta paicunamanca cashna nishpa huillai: Mandaj Jatun Diosca cashnami nin: Cai yuyachij shimicunataca chingachishami, cai yuyachij shimicunataca Israel llajtapica, ña mana ashtahuan rimangacunachu. Chai punllacunaca ñamari chayamushca, muscuipi shina ricushcacunapish tucuimi pajtamushca ninmi nishpa huillangui.

EZEQUIEL 21:12

Huañujlla aichayuj runalla, canca caparirishpa huacayari. Chai espadataca ñuca agllashcacunata huañuchingapajmari, ña allichishca tiyacun. Chai espadallatajmi Israel llajtata mandajcunatapish huañuchinga. Chai mandajcunapish ñuca agllashcacunandijmi, tandalla espadapi urmangacuna. Chaimanta cambaj mama changata chugrichiyari,

EZEQUIEL 30:3

Chai punllaca ñamari pajtamucun. Mandaj Dios llaquichina punllaca, ñamari quichquiyamucun. Chai punllaca p'uyu punllami canga, llajtacunata llaquichina punllami canga.

EZEQUIEL 33:3

Chai runaca, ñuca espada chai llajtaman shamucujta ricushpaca, tocashpami huillanga.

EZEQUIEL 33:6

Ashtahuanpish cai llajtapi causajcunata espada chugrichinaman shamucujta ricushca jahua, chai chapaj runa mana trompetapi tocashpa yachaj chayachishcamantaca, maijanta chai espada huañuchijpica, paipaj yahuarca chai chapaj runapaj jahuami canga.

EZEQUIEL 7:10

Riquichij, cancunata chingachina punllaca ñamari chayamucun. Chai punllaca ñamari achijyamucun. Varapish ñamari sisashca. Jatun tucunapish ashtahuanmari mirashca.

EZEQUIEL 7:12

Ñamari chai punllaca pajtamushca, ñamari chai punllaca quichquiyamushca. Pi imata randishpapish ama cushicuchun, pi imata c'atushpapish ama huacachun. Ñuca p'iñarishpa cachashca llaquicunaca tucuicunallatatajmi japinga.

DANIEL 6:26

Ñucatajmi cancunataca caita mandani: Ñuca mandacun tucui llajtacunapica tucuicuna Danielpaj Taita Diosta alli nishpa manchachuncuna, nishpami cashna nirca: Paica causaj Taita Diosmi. Huiñai huiñaita causajmi. Pai mandanaca manataj chingachishca cangachu. Pai mandanaca huiñaitami canga.

DANIEL 9:16

Jatun Dios, quiquinca ima shina cashcatataj ricushpa rurajmi cangui. Cunanca quiquinpaj Jerusalén pueblotapish, quiquinpaj jucha illaj urcutapish quiquin yallitaj p'iñarishpa mana ricunachicushcataca cungaripaiyari. Ñucanchij juchacunamanta, ñucanchij yayacuna mana allita rurashcamantami Jerusalén pueblopish, quiquinpaj agllashcacunapish ñucanchij muyundijpi causaj tucuicuna c'amishca causanchij.

DANIEL 9:20

Ñucaca ñuca juchallishcatapish, ñuca aillupura israelcuna juchallishcatapish ñucata Mandaj Taita Diospaj ñaupajpi huillashpa tucui shunguhuan rogarishpami mañacurcani. Ñuca Diospaj jucha illaj urcumantapishmi mañacurcani.

OSEAS 5:8

¡Gabaa pueblopica, bocinapi tocaichigari. Ramá pueblopica, trompetapi tocaichigari! ¡Bet-avén pueblopica, sinchita caparichigari! ¡Benjamín manchaihuan chaparayari!

OSEAS 8:1

Ñucahuan ari ninacushcata p'aquishcamanta, ñuca mandashcacunata mana cazushpa c'ariyashcamantami Mandaj Diospaj huasi jahuamanca shuj águila shamucun. Chaitaca trompetapi tocashpa huillayari.

JOEL 1:15

¡Aij, Mandaj Dios shamuna punllaca ñamari pajtamucun! Tucuita Rurai Tucuj Mandaj Dios jatunta llaquichina punllaca ñamari chayamucun.

JOEL 2:11

Mandaj Diosca paipaj soldadocunatami mandanga. Paipaj soldadocunaca yallitaj achcacunami. Pai mandashcata rurajcunaca, yallitaj c'ari c'aricunami. Mandaj Dios shamuna punllaca, jatun mancharina punllamari. Chai jatun llaquicunataca ¿pitaj apai tucungari?

JOEL 2:15

Sión urcupica, trompetapi tocaichigari. Ayunangapaj tandanacuchun, tucuicunaman huillaichigari.

JOEL 2:31

Mandaj Dios agllashca jatun mancharina punlla manaraj chayamujpica, intica amsayanga, lunapish yahuarmi tucunga.

JOEL 3:14

Rurashcata ricuchina pambapica, achcacunami tandanacushca. Mandaj Diosmi paicuna imalla rurashcata ricuchina pambapi ricuchinga. Chai punllaca ñami quichquiyamucun.

JOEL 3:17

“Chashna rurajpimi, cancunata Mandaj Taita Diostaj cashcataca rijsinguichij. Ñucapajlla Sión urcupi causacushcatami ricunguichij, Jerusalenpish ñucapajllami tucunga. Shujtajcunaca ña mana ashtahuan chaita puringacunachu.

AMÓS 3:6

Trompetapi tocashca pueblopi uyarijpica ¿manachu gentecunaca mancharishpa caparincuna? Mandaj Dios manapish llaquichijpica, pueblopica ¿ima llaqui tiyangallachu imashi?

AMÓS 5:18

Mandaj Dios shamuna punllata shuyacujcunalla, ¡aij imachari tucunguichij! Mandaj Dios shamuna punllataca ¿imapajtaj shuyanguichigari? Pai shamui punllaca, amsa tutami canga. Ima achijyachijpish, mana tiyangachu.

AMÓS 8:2

Chashna ricuchishpaca: –Amós, ¿imatataj ricungui?– nijpica ñucaca: –Usya punllacuna p'ucushca granocunatami, taza junda tiyacujta ricuni– nircanimi. Chashna nijpica, Mandaj Diosca cashnami nirca: –Ñuca agllashca israelcuna tucurinami ña chayamushca. Cunantajca mana uniyashachu.

ABDÍAS 1:15

Tucui llajtacunata Mandaj Dios jatunta llaquichina punllaca, ñamari quichquiyamucun. Ima shinami shujtajcunata jatunta llaquichircangui, chashnallatajmi cantapish llaquichinga. Can japina cashcataca, apanallatajmi cangui.

SOFONÍAS 1:14

Mandaj Dios jatunta llaquichina punllaca ñallamari chayamucun. Chai punllaca ñallamari pajtamucun. Mandaj Dios llaquichicui punllaca, jatun llaqui, huacai punllami canga. Chai punllapica, c'ari c'ari tucushca runacunapish capariringacunami.

SOFONÍAS 1:16

Chai punllaca trompetapi tocashcapish, pueblo muyundij jatun pirca jahuacunamanta caparirinacushpa huacashcapish, jatun torrecuna jahuamanta caparirinacushcapishmi uyaringa.

SOFONÍAS 1:7

Mandaj Jatun Diospaj ñaupajpica upalla caichigari. Mandaj Dios shamuna punllaca ñallamari pajtamucun. Mandaj Diosca, paita p'iñachijcunata huañuchichunca ñamari agllashcata charicun.

SOFONÍAS 3:11

Cancunapaj chaupimantaca, jatun tucushpa cushicujcunataca anchuchishami. Chaimantami ñucapajlla urcupica, ña mana cutinca jatun tucunguichij. Chashnami chai punllapica, cancunaca millaita rurashpa ñucata c'ariyashcamanta ña mana pingachishca canguichij.

ZACARÍAS 14:1

Riquichij, Mandaj Dios shamuna punllaca ñallamari chayamucun. Cancuna imalla charishcacunata quichushcataca, cancuna ricucujllapitajmi chaupingacuna.

ZACARÍAS 8:3

Mandaj Diosca cashnapishmi nin: “Sionman tigrashpaca, Jerusalén chaupipimi causasha. Jerusalenca: Imata mana llullaj Pueblo shutimi canga. Tucuita Mandaj Diospajlla Sión urcuca: Jucha illaj Urcu shutimi canga” ninmi.

MALAQUÍAS 4:1

Tucuita Mandaj Diosca cashnami nin: “Riquichij, hornopi nina lunyacuj shina punllaca ñallami chayamugrin. Chai punllapimi jatun tucushcacunapish, millaita rurajcunapish ujsha shina tucui rupangacuna. Chaipica sapillapish, shuj ramallapish mana saquiringachu.

NÚMEROS 10:2

“Cullqui trompetacunata ishquita rurai: Chaicunataca martillohuan labrashpa rurangui. Chaicunaca israelcunata tandachingapaj, carpa huasicunata shujtajman apana cashcata huillangapajmi canga.

NÚMEROS 10:3

Trompetacunapi tocajpica, tucui israelcunami Dioshuan tupanacuna carpa huasi punguman cambaj ñaupajpi tandanacungacuna.

1 Corintios 14:8

Macanacuiman rinataj shina tono trompetapi mana uyarijpica ¿pitaj macanacunapajca allichiringari?

Filipenses 2:12

Chaimanta ñuca c'uyashcacunalla, cazucujlla cashca shinallataj cazucuichijlla. Ama ñuca chaipi cajllapi cazujcuna caichijchu. Ashtahuanpish cunancarin ñuca mana chaipi cajpica, ashtahuan alli cazujcuna caichij. Cancunaca quishpichishca cashcamanta manchaihuan, chujchuihuan causaichij.

1 Tesalonicenses 5:2

Cancunaca allimi yachanguichij. Mandaj Jesusca shuhua shinami tuta shamunga.

Santiago 5:8

Mandaj Jesús shamunaca c'uchullapi cashcamanta, cancunapish sinchi crij tucushpa mana p'iñarishpa chai yuyailla shuyaichijlla.

1 Pedro 4:7

Tucui imalla tiyajcuna tucurinaca chayamucunmi. Chaimanta alli yuyaiyujcuna caichij. Diosta mañashpa chaparaichij.

Apocalipsis 6:17

Pai p'iñarishpa jatunta llaquichina punllamari ña chayamushca ¿pitaj chai jatun llaquitaca apai tucungari?” nircacunami.