JEREMÍAS 9:4 - Dios Rimashca Shimicunami

⁴ Maijanpish: Ñucahuan apanacujhuanmi cani nishpa, ama cungailla purichun. Quiquin huauquillapitajpish ama shunguta churachun. Huauquillatataj umanllacunami, alli apanacujcunapish llullashpa llaquipi churanllacunami.

JEREMÍAS 9:4 Iomraidhean Croise

GÉNESIS 32:28

Chaipimi chai runaca: –Canca cunanca ña mana Jacob shutichu cangui. Taita Dioshuanpish, runacunahuanpish macanacushpa mishashcamanta, Israel shutimi cangui– nirca.

SALMOS 101:5

Shujtajta huashalla rimajtaca chingachishami. Shujtajcunata yallimi canchij nishpa jatun tucujcunataca ñucaca mana ricucushallachu. Yangalla jatun tucushcacunataca mana ricucushallachu.

SALMOS 15:3

paipaj c'alluhuan pita mana yanga llaquichij, pitapish millaita mana ruraj, paipaj c'uchullapi causajcunatapish llaquichishpa mana rimajllami chaipica causagringa.

PROVERBIOS 10:18

Shungupi p'iñacuj runaca, mishqui shimi tucushca llulla runami. Pita yanga juchachishpa uraman, janajman parlarijca rumi shungu runami.

PROVERBIOS 25:18

Pitapish yanga juchachishpa mandajcunaman huillagrij runaca, martillohuan huajtaj shina, cuchillohuan satij shina, puntajlla caspihuan shitaj shinami llaquichin.

PROVERBIOS 4:16

Paicunaca ima millaita mana rurashpaca, mana dormincunachu. Pita mana urmachishpaca, dormitapish mana japincunachu.

PROVERBIOS 4:17

Millaita rurashcallahuanmi micuncuna, vinotapish shuhuashcallatami ubyancuna.

PROVERBIOS 6:16

Mandaj Diosca mana allita rurashcataca, cai sujtatami yallitaj p'iñan, canchistapishmari manataj ricunachin.

PROVERBIOS 6:19

llullashpa pitapish llaquipi churajta, huauquindijpuratapish p'iñanacuipi churajtaca, manataj ricunachinchu.

ISAÍAS 59:13

Mandaj Diostamari c'ariyashcanchij, mana rijsishca shinami tucushcanchij, ñucanchij Taita Diosmanca huashatamari ricuchishcanchij. Ashtahuan huashalla llaquichinatami yuyarircanchij. Ñucanchij shungupi llullanata chichushcatami rimarcanchij.

ISAÍAS 9:16

Cai gentecunata mandajcunaca umajcunami. Chaimi paicuna mandacushcaca chingarin.

JEREMÍAS 12:6

Cambaj yayapaj familiapura cambaj quiquin huauquicunallatajmari canta huañuchingapaj jatarishcacuna. Paicunamari canta japingapaj caparinacushpa catincuna. Paicuna sumajta rimajpipish, ama shunguta churanguichu.

JEREMÍAS 6:28

Tucuicunallataj ñucata mana cazujcuna, huashalla parlarishpa purij millaicunami. Tucuicunallataj bronce shina, fierro shinallami. Tucuicunallataj imatapish ismuchij mapa shinami.

JEREMÍAS 9:8

Paicunapaj c'alluca llullashpa umangapajca, filosapa espada shinami. Shimihuanca apanacujcunapurapish sumajtami rimanacuncuna. Ashtahuanpish shungupica, ima llaquita ruranallatami yuyarincuna.

EZEQUIEL 22:9

Chashna yangamanta juchachishpa huañuchijcunapish, lomacunapi tiyaj altar c'uchucunapi micujcunapish, yallitaj millaita rurajcunapishmi carcacuna.

LEVÍTICO 19:16

Cambaj llajtapica ama huashalla parlashpa purij cangui. Pita ama huañuchisha nishpa puringui. Ñucami Mandaj Dios cani.

MALAQUÍAS 2:10

¿Manachu tucuicunallataj shujlla yayata charinchij? ¿Manachu tucuicunallataj Taita Dios rurashca canchij? Shina cajpica, ¿ima nishpataj ñucanchij ñaupa yayacunahuan ari ninacushcataca yangata rurashpa, caishuj chaishuj mana cazunacunchigari?

Mateo 10:17

Runacunamanta huaquichiringuichij. Cancunataca mandajcunapuralla tandanacushcaman apangacunami. Paicunapaj sinagogacunapi azotingacunami.

Mateo 10:21

Huauquita huañuchichunca huauquillatajmi japichinga. Yayaca churitami japichinga. Huahuacunapish, yaya mamata p'iñashpa jatarishpami huañuchichinga.

Lucas 21:16

Cancunataca yaya mamallataj, huauquicunallataj, quiquin familiacunallataj, alli rijsishcacunallatajmi llaquichichun japichingacuna. Chaipimi maijancunataca huañuchingacuna.

1 Tesalonicenses 4:6

Maijanpish paipaj huauquita umashpa imapipish ama llaquichichun. Ña cancunaman nishca, huillashca shinallataj chashna rurajcunataca Mandaj Jesusmi paicunatapish llaquichinga.