JEREMÍAS 7:6 - Dios Rimashca Shimicunami

⁶ Mana cancunapura cajcunatapish, yaya mama illaj huahuacunatapish, viudatapish ama imatapish quichushpa llaquichichijchu. Cai llajtapica manapish ima millaita ruracujcunataca, ña ama japishcahuan huañuchishpa yahuarta jichaichijchu. Shujtajcunapaj dioscunatapish ña ama catichijchu. Cancunapaj llaquipajllatajmari chaicunataca ruracunguichij.

JEREMÍAS 7:6 Iomraidhean Croise

2 REYES 21:6

Manasesca paipaj churitapish rurashcalla diosman cushpami rupachirca. Imalla punllacunapi imalla tucunata yachaj canata, brujo canata, muspachij yumbu canata, adivinaj canata yachanatapishmi churarca. Chashna pai rurashcacunahuan yallitaj millaita mirachishpami Mandaj Diostaca p'iñachirca.

2 REYES 24:4

Ashtahuancarin manapish ima mana allita rurajcunapaj yahuarta jichachishpa Jerusalenpi yahuarta jundachishcamantapishmi, Mandaj Diosca judacunataca mana perdonashpa chashna llaquitaca cacharca.

SALMOS 106:38

Canaán llajtapi causajcunapaj manapish dioscunaman paicunapaj churicunata, ushushicunata cushpami imamanta mana huañuipajcunapaj yahuarta jicharcacuna. Chai yahuarhuanmi chai llajtaca mapayarca.

PROVERBIOS 23:10

Ñaupaman cambaj allpa muyundijpi churashca rumicunataca, ama caishujpaj allpaman tanganguichu. Yaya mama illaj huahuacunatapish allpata ama quichunguichu.

ISAÍAS 59:7

Paicunapaj chaquicunaca millaita ruranallamanmi callpan. Ima juchachina illajlla runacunata huañuchingapajmi callpancuna. Paicunapaj yuyaicunaca millaita ruranallatami yuyancuna. Paicunapaj ñancunapica, chingachina llaquichinallami tiyan.

JEREMÍAS 13:10

Cai runacunaca ñuca yachachishcata mana uyashun nij millai runcunami. Paicunapaj shungu yuyashcatami rurashpa causancuna. Shujtajcunapaj dioscunata mashcashpami, chaicunata servincuna, chaicunatami cungurincuna. Chashna rurashcamantaca, cai ismushca chumbi shina imapaj mana valijcunami.

JEREMÍAS 19:4

Judá runacunamari ñucamanta anchurishpa, cai llajtatapish shujtajpaj maquipi churarcacuna. Paicunapish, paicunapaj ñaupa yayacunapish, Judá llajtata jatun mandajcunapish shujtajcunapaj dioscunamanmi inciensota cushpa rupachincuna. Shinallataj alli shungu runacunata huañuchishpapishmi, caipica yahuarta jichancuna.

JEREMÍAS 2:30

Ñucaca yangamari cancunapaj huahuacunataca macashpa llaquichishcani. Manamari alli tucunguichijchu. Cancunapaj espadacunahuanmari ñuca ima nishcata cancunaman huillajcunataca, jatun p'iña león shina tucuchircanguichij.

JEREMÍAS 2:34

Cambaj changa uri churanacunapish, ima millaita mana ruraj huajchacunata huañuchishca yahuarhuan c'ahuirishcami. Paicunataca ima juchachinallatapish mana charishca jahuami huañuchircangui. Chashna rurashca jahuami cashna ningui:

JEREMÍAS 26:15

Shina cajpipish, cancunataca caillatami nisha nini: Ñucataca Mandaj Diosmari chai tucui shimicunataca, cancunapaj rinrinpi caparichun cacharca. Imata mana ñuca yuyaimanta llujshichishpa huillashcanichu. Chashna cashcamantaca, ñucata yanga huañuchishpaca, cancunallatajmi llaqui tucunguichij. Cai pueblotapish, cai pueblopi causajcunatapishmi llaquipi churanguichij” nircami.

JEREMÍAS 26:23

Paicunaca Uriastaca, Egiptomanta llujshichimushpami, jatun mandaj Joacimpaj maquipi churarcacuna. Paica espadahuan huañuchichishpami, huajchacuna huañujpi pambana jutcupi shitachirca.

JEREMÍAS 35:15

Ñucata servij ñuca ima nishcata huillajcunataca, ñaupamantapacha cunancama huashan huashan cachashpa huillachicunillami. Chai tucui huillajcunahuanmi: Tucuicuna cancunapaj millai causaita saquishpa, ñucaman cutirichij. Mana allita ruranata saquichij. Ña ama chai shujtajcunapaj dioscunapajman rishpa cungurichijchu, ama chaicunata servichijchu. Tucui chaicunata saquishpaca cancunapaj yayacunamanpish, cancunamanpish ñuca cushca cai llajtapi causanguichijmi nishpa huillachircani. Shina cajpipish, cancunaca manataj uyanguichijchu, manataj cazunguichijchu.

JEREMÍAS 5:28

Caruman achij nicujtami huirayancuna. Chashna millaicuna tucushpami, yallitaj llaquicunata rurancuna. Yaya mama illaj huahuacunapajca, ima allita mana rurancunachu. Huajchacunata llaquichicujpipish, mana mitsancunachu. Ashtahuanpish tucui paicunata quichushcahuanmi charijyancuna.

JEREMÍAS 7:5

Ashtahuanpish cancunaca causaita allichishpa, allita ruraichij. Tucui shunguhuantaj caishuj chaishujhuan alli caichij.

JEREMÍAS 7:9

Chaimantami shuhuashpa, huañuchishpa, huainayashpa, llullangapaj ñuca shutita rimashpa, Baalmanpish inciensota cushpa rupachinguichij. Cancuna mana rijsishca, shujtajcunapaj dioscunatapishmi catinguichij.

LAMENTACIONES 4:13

Jerusalenpica paicunapaj huillajcuna, curacunamari yallitaj juchata rurarcacuna. Paicunamari cashcata rurajcunataca, cai pueblo chaupipi huañuchishpa yahuarta jicharcacuna. Chaimantamari chashna llaqui tucurcacuna.

EZEQUIEL 18:6

Lomacunapi tiyaj altar c'uchucunapica mana micunchu, israelcuna rurashca dioscunata mana adoranchu, shujtajpaj huarmitapish mana japirinchu, quilla ungüihuan caj huarmipipish mana chayarinchu.

EZEQUIEL 22:7

Paicunaca yayatapish, mamatapish p'iñarcacunami. Caru llajtamanta shamujcunatapish llaquichircacunami. Yaya mama illajtapish, viudatapish imalla charishcatapish quichurcacunami.

LEVÍTICO 19:33

Mana israelcuna cancunapaj llajtapi cancunahuan causacujpica ama llaquichinguichijchu.

LEVÍTICO 25:17

Maijanpish pita ama umanguichijchu. Ashtahuanpish cancunapaj Taita Diosta manchanguichij. Ñucami Mandaj Dios cancunapaj Dios cani.

MALAQUÍAS 3:5

Tucuita Mandaj Diostajmi cashna nini: Ñucami cancuna imalla rurashcacunata ricuj shamusha. Chai punllapimi yumbucunatapish, huainayajcunatapish, llullashpa huillajcunatapish, trabajajcunaman cullquita mana tucui pagajcunatapish, viudacunata, yaya mama illajcunata p'iñajcunatapish, caru llajta runacunata llaquichijcunatapish, ñucata mana manchajcunatapish llaquichisha.

Mateo 27:25

Tucui chaipi cajcunaca: –Paita huañuchishcamanta yahuarca ñucanchijpaj, ñucanchij huahuacunapaj jahuami canga– nircacuna.

Mateo 27:4

cashna nishpa tigrachigrirca: –Ima millaita mana ruraj runata huañuchichun entregashpaca ñucaca juchallishcanimari– nijpi, paicunaca: –¿Ñucanchijpajca imataj cangapish? ¡Chaitaca can ricui!– nijpimi,

DEUTERONOMIO 11:28

Manapish cancunapaj dios shujtajcunapaj dioscunata catishpa chaicunata catingapaj, Mandaj Dios cancunapaj Taita Dios mandashcacunata mana cazushpa, cunan ñuca yachachishca shina mana purishpaca llaquicunatami chasquinguichij.

DEUTERONOMIO 24:17

Cancunaca shujtaj llajtamanta cajcunatapish, yaya mama illajcunatapish paicunapaj ima shinalla rurana cashcataca ñataj mana ruranguichijman. Viuda huarmi imata mañajpica tigrachingacama ama ima prendata apanguichijchu.

DEUTERONOMIO 27:19

Shujtaj llajtamanta shamujcunata, yaya mama illaj huahuacunata, viudacunata, maijanpish chaicunapaj imalla rurana cashcata mana rurashpa, ashtahuanpish shujtajman tucujca llaqui tucushca cachun nijpica, tucuicuna: Chashnataj cashca cachun ninguichij.

DEUTERONOMIO 8:19

Mandaj Diosta cungarij canaman chayashpa chai dioscunata catishpa paicunapajta ruraj tucushpa chaicunata cungurishpaca cancuna ima llaqui tucushpa chingarinatami huillani.

Santiago 1:27

Dios Yayata crijtaj cashcata paipaj ñaupajpi ricuchingapajca caitami rurana: Yaya mama illajcunata, llaquihuan caj viudacunatapish ayudana, cai pacha mapacunamantapish huaquichirinami.