JEREMÍAS 6:12 - Dios Rimashca Shimicunami

¹² Paicunapaj huasicunatapish, allpacunatapish, huarmicunatapishmi shujtajcuna japingacuna. Ñucatajmi cai llajtapi causajcunataca llaquichisha. Mandaj Diostajmi chashna nini.

JEREMÍAS 6:12 Iomraidhean Croise

1 CRÓNICAS 21:16

David huichilla ricushpaca, huaquichinamanta espadata llujshichishpa Jerusalén puebloman espadata chutashpa, jahua pachahuan cai pachahuan chaupipi Mandaj Diospaj ángel shayacujtami ricurca. Chaimi Davidpish, cunaj yuyajcunapish cañamazuta churarishcacuna pambaman tupajta cumurishpa,

ISAÍAS 10:4

Ñuca illajlla cashpaca, prezucunahuanmi cumuringuichij. Huañuchijcunapaj maquipimi urmanguichij. Chashna llaquichishpapish pai p'iñarishcaca manataj pararingachu. Paicunata llaquichingapajca maquita chutashcarajmi.

ISAÍAS 5:25

Mana cazushcamantaca Mandaj Diosca, pai agllashcacunahuanca nina sindirij shinami yallitaj p'iñarirca. Mandaj Diosca paipaj maquita chutashpami chugrichirca. Urcucunapish chujchurcami. Huañushcacunapish chaupi ñancunapimi shitashca saquirircacuna. Chashna llaquichishpapish pai yallitaj p'iñarishcaca manaraj pararircachu. Ashtahuanpish paipaj maquitaca chutaracunrajmi.

ISAÍAS 9:12

Inti llujshin ladomantaca Siriocunatami pushamunga. Inti huashicun ladomantaca filisteocunatami pushamunga. Paicunami israelcunataca, shimi jundata amullishpa millpungacuna. Chashna rurashpapish Mandaj Dios yallitaj p'iñarishcaca manataj pararingachu. Ashtahuanpish paipaj maquica chutashcarajmi canga.

ISAÍAS 9:17

Tucuicunami manapish rimana cajta rimajcuna. Tucuicunami llullacuna, millaicuna. Chaimanta Jatun Diosca, chaipi causaj q'uipa huiñaicunahuanca manataj cushicunchu. Yaya mama illajcunatapish, viudacunatapish manataj llaquingachu. Tucui chaicunata rurashpapish, pai p'iñarishcaca manataj pararingachu. Paicunata llaquichingapajca maquita chutashcarajmi.

ISAÍAS 9:21

Manasesca Efraintami millpunga. Efrainca Manasestami millpunga. Ishquindij tucushpami, Judata p'iñashpa jataringa. Tucui chaicunata rurashpapish, pai p'iñarishcaca manataj pararingachu. Paicunata llaquichingapajca maquita chutashcarajmi.

JEREMÍAS 15:6

Shinallataj Mandaj Diosca cashnami nin: “Cancunamari ñucata shitashpa, huashata ricuchircanguichij. Chaimantami cunanca ñuca maquihuan huajtashpa tucuchigrini. Ña manataj llaquishpa ashtahuan charicushalla ninichu.

JEREMÍAS 21:5

Ñucaca cancunahuanca yallitaj p'iñarishca, llaquirishcami cani. Chaimanta ñucatajmi cancunahuanca, tucuita rurai tucuj ñuca sinchi maquihuan macanacugrini.

JEREMÍAS 38:22

Judá llajtata jatun mandajpaj huasipi caj tucui huarmicunami, Babilonia llajtata jatun mandaj cachashca mandajcunapaj llujshichishca cangacuna. Chai huarmicunallatajmi cashna ningacuna: “Canhuan alli apanacujcunamari cantaca umashpa mishashcacuna. Cambaj chaquicunata lodopi pambashpaca, huashaman tigranllacunamari” ningacunami.

JEREMÍAS 38:23

Cambaj tucui huarmicunatapish, huahuacunatapishmi caldeocunaca caimanta llujshichishpa apangacuna. Canpish paicunapaj maquimantaca manataj quishpiringuichu. Ashtahuanpish Babilonia llajtata jatun mandajpaj maquipi japi tucunguitajmi. Cai pueblopish tucui rupachishca cangatajmi– nircami.

JEREMÍAS 7:20

Chashna cashcamantaca, Mandaj Diosca cashnapishmi nin: “Cunantajca jatunta p'iñarishpami, cai llajtapica jatun llaquita talligrini. Runacunapaj jahuapi, animalcunapaj jahuapi, yuracuna jahuapi, grano chagracuna jahuapimi mana huañuj lunyacuj ninata shina shitagrini” ninmi.

JEREMÍAS 8:10

Paicunapaj huarmicunatapish, chagracunatapish cai llajtata quichunaman shamujcunamanmi cugrini. Jatuncunamanta callarishpaca, ashtahuan uchillacunacamami jahuanpi jahuanpi charinallata yuyancuna. Ñucamanta huillajcunamanta callarishpa, curacunacama tucuicuna umajcunami.

LAMENTACIONES 2:8

Sión pueblo muyundij jatun pircataca, Mandaj Diosmari urmachinata yuyarirca. Cordelta chutashpamari, mana llaquishpa tucuita urmachirca. Canllanij jatun pircatapish, ucunij pircatapish ishquindijtami tandachishpa urmachirca. Jatunta caparirishpa huacanatami rurarca.

LAMENTACIONES 3:3

Tucui punllamari cutin cutin tigrashpa macahuarca.

LAMENTACIONES 5:11

Sión pueblopipish, Judá llajtapi tiyaj caishuj pueblocunapipish jatun huarmicunatapish, c'arihuan manaraj chayarinacushcacunatapish japirishpa llaquichircacunami.

LAMENTACIONES 5:2

Ñucanchij imalla charishcacunaca mana rijsishca runacunapaj maquipimari. Ñucanchij huasicunataca shujtajcunamari charicun.

LAMENTACIONES 5:3

Yaya illajlla, shitashca huahuacunamari canchij, ñucanchij mamacunapish viuda huarmicuna shinamari.

EZEQUIEL 35:3

Cashna ningui: Mandaj Jatun Diosca cashnami nin: Seir urculla, canhuanca p'iñami cani, cantaca ñuca maquita chutashpami llaquichisha, llaquinayajta shitashcatami saquisha.

EZEQUIEL 7:24

Chashna cashcamantaca, shujtaj llajtacunamantami yallitaj millai runacunata pushamusha. Chai runacunami paicunapaj huasicunata quichushpa causangacuna. Jatun tucushca mandajcunatapish chingachishami. Paicuna rurashca dioscunapaj huasicunatapish yangatami rurasha.

MIQUEAS 2:4

Cancuna llaquita apacui punllapica yuyachij shimicunahuanmi, yupashpa yupashpa cashna huacangacuna: “Tucuicunamari llaquichishca canchij. Mandaj Diosmari caipi causajcunataca ashallata rurashca. Ñucanchij allpacunatapish quichushpamari, shujtajcunaman chaupishpa cushca” ningacunami.

SOFONÍAS 1:13

Chaimantami paicuna imalla charishcacunataca, shujtajcuna tucuita quichushpa apangacuna. Paicunapaj huasicunatapish urmachishpami chingachingacuna. Huasicunata rurashpapish, mana chaipi causangacunachu. Uvata tarpushpapish, vinotaca mana ubyangacunachu” ninmi.

SOFONÍAS 1:4

“Shinallataj Judá llajtapi causajcunatapish, Jerusalén pueblopi causajcunatapish tucuicunatami ñuca maquita chutashpa llaquichisha. Baalmanta mirga mirga saquirishcacunatapish, paita servij curacunatapish caimantaca tucuitami anchuchisha.