JEREMÍAS 5:9 - Dios Rimashca Shimicunami

⁹ Cashna juchamantaca ¿manachu llaquichina cani imatagari? Chashna millai runacunataca ¿manachu p'iñarishpa ñacachisha imatagari? Mandaj Diostajmi chashna nini.

JEREMÍAS 5:9 Iomraidhean Croise

PROVERBIOS 6:29

Maijanpish shujtajpaj huarmihuan churarishpaca, chai shinamari tucun. Cusayuj huarmipi chayarishpaca, paillatajmi jatun llaquipi yaicun.

ISAÍAS 1:24

Chaimanta Jatun Diosca, tucuita Mandaj Diosca, israelcunapaj tucuita rurai tucuj Diosca cashnami nin: “Aij, cunantajca ñucata p'iñajcunataca llaquichishpatajmi cushicugrini. Paicunatapish tigra llaquichishpatajmi alli cagrini.

ISAÍAS 57:6

Canca pugru pambapi tiyaj llambu rumicunatami adorangui. Chaicunami canmanca imatapish cun yuyanguimi. Chai rumicunamanmi vinotapish tallircangui. Granocunatapishmi cushpa rupachircangui. Chai tucui millaita rurashcamantaca, ¿manachu llaquichisha imatagari?

JEREMÍAS 23:2

Israelcunata Mandaj Diosca paipaj agllashcacunata michijcunataca cashnami nin: “Cancunamari ñuca ovejacunata cuidanapaj randica manchachishpa caita, chaita cachashcanguichij. Cancunataca chashna millaicuna cashcamanta llaquichigrinitajmi. Ñuca, Mandaj Diostajmi chashna nini.

JEREMÍAS 32:31

Cai pueblopish shayachi callarimantapacha cunancama, ñucata p'iñachishpallami tiyan. Chaimantami cunanca ñuca ñaupajmanta anchuchigrini.

JEREMÍAS 44:22

Ashtahuanpish Mandaj Diosca cancuna yallitaj millaita rurajpimi, cancunata ña manataj chari tucurca. Chai millananacunata rurashpa causajpimari, ña manataj ricusha nirca. Chaimantami cancunapaj llajtataca tucui ima tiyashcata tucuchishpa, jatun mancharinata rurarca. Chaimantami chai llajtaca, cunan punllacunacama Dios mana alli nishpa shitashca, shuj runallapish illaj siricun.

JEREMÍAS 5:10

Cai pueblo muyundij pircacunaman huichiyashpa t'unichij. Chai pircacunaca mana ñucapajchu, jahua umamanta callarishpa urmachichijlla. Shina cashpapish ama tucui chingachichijchu.

JEREMÍAS 5:29

Chashna rurashcamantaca ¿manachu llaquichisha imatagari? Chashna millai runacunamanca ¿manachu paicuna chasquina cashcata cusha imatagari? Mandaj Diostajmi chashna nini.

JEREMÍAS 6:11

Mandaj Diosca cashnapishmi nirca: “Chashna mana cazushcamantaca, p'iñarishpa huañucunimi. Caita ricushpa casijlla tiyacunallataca shaicunimi. Cunantajca callecunapi puricuj huahuacunapaj jahuapipish, chairaj runacuna tandanacushcapipish jatun llaquitami talligrini. Cusacunatapish, huarmicunatapish, ña yuyajyacujcunatapish, yallitaj yuyajcunatapishmi prezu cachagrini.

JEREMÍAS 6:6

Tucuita Mandaj Diostajmi, paicunata cashna mandashca: “Yuracunata p'itishpa Jerusalén pueblo muyundij torrecunata rurashpa macanacuichij. Cai pueblopi causajcunaca tucuicuna yallitaj millaicunami. Chaimantami paicunataca llaquichinataj canguichij.

JEREMÍAS 9:8

Paicunapaj c'alluca llullashpa umangapajca, filosapa espada shinami. Shimihuanca apanacujcunapurapish sumajtami rimanacuncuna. Ashtahuanpish shungupica, ima llaquita ruranallatami yuyarincuna.

JEREMÍAS 9:9

Chashna rurashcamantaca ¿manachu llaquichisha imatagari? Chashna millai runacunataca ¿manachu p'iñarishpa ñacachisha imatagari?” ninmi Mandaj Diosca.

LAMENTACIONES 3:42

Ñucanchijmari cantaca yallitaj mana cazushcanchij. Ñucanchijmari canmanta anchurishcanchij. Chaimantamari ñucanchijca llaquita apanataj tucushcanchij.

LAMENTACIONES 4:22

Sión pueblopi causajcunalla, cancuna llaquita apanaca ña tucurinmi. Cunanmantaca ña manataj prezu cachangachu. Edom llajtapi causajcunalla, cancuna millaita rurashcatapish ricuchingami, chai juchata ricuchishpami llaquichinga.

EZEQUIEL 7:9

Ñuca ñahuimantaca manataj quishpiringuichijchu, cancunataca manataj llaquishachu. Can imallata rurashca shinallatajmi llaquichisha. Chai tucui millaita rurashcacunataca, cancunapaj jahuallapitajmi shitasha. Chaipimi Mandaj Dios ñucataj llaquichicushcataca yachanguichij.

OSEAS 2:13

Baal nishca dioscunaman inciensota rupachishcamantaca llaquichishatajmi. Ñucata cungarishpa ashtahuanpish sortijascunahuan, ima aparina sumajcunahuan sumajta allichirishpa paita c'uyajcunata catishpa rishcamantaca llaquichishatajmi” ninmi Mandaj Diosca.

OSEAS 8:13

Ñucaman cushpa rupachinacunatapish, aichata cushpami rupachincuna. Aichataca micuncunami. Mandaj Diosca chaitaca mana munarcachu. Cunanca paicuna millaita rurashcataca callarishpa yuyarishpami, paicuna juchallishcamantaca llaquichisha. Egiptomanmi tigrachishpa cachasha.

LEVÍTICO 18:25

llajtapish yallitaj millai mapa tucurca. Paicuna millaita rurashcata ñuca ricugrijpica, chai llajtaca chai llajtapi causajcunataca shungu tigrarcami.

LEVÍTICO 26:25

Ñucahuan ari ninacushcata p'aquishcamanta cancunata llaquichij cachunca, cancunata p'iñajcunatami macanacushpa huañuchichun pushamusha. Paicuna mishajpi cancunapaj pueblocunapi miticujpipish, cancunaman llaquichij ungüita cushpami cancunata p'iñajcunapaj maquipi churasha.

NAHUM 1:2

Mandaj Diosca, jatunta p'iñarishpa llaquichij Diosmari. Mandaj Diosca jatunta llaquichijmi, jatunta p'iñarijmi. Millaita rurajcunatapish jatunta llaquichijmi. Paita p'iñajcunapajmi, p'iñarishpa llaquichinataca huaquichin.

DEUTERONOMIO 32:35

Chai tucuimantaca ñucami paicunatapish llaquichisha. Paicuna rurashca shinallatajmi cusha. Paicunapaj llaqui punllaca ñallami chayamugrin. Paicunaman cunataca allichishcatami charicuni.

DEUTERONOMIO 32:43

Llajtacunapi causajcuna, Diospajlla cajcunahuan tucushpa cushicuichigari. Paipajta rurajcunata huañuchijcunataca, Taita Diosmari huañuchinga. Paita p'iñajcunataca llaquichingatajmi. Pai agllashca llajtamantapish, paipajlla cajcunamantapish juchata anchuchingami” nircami.