JEREMÍAS 5:7 - Dios Rimashca Shimicunami

⁷ “Paicunapaj huahuacunapish ñucamanta anchurishpami, manapish Dios cajta ñucanchij Dios nincuna. Ñuca paicunaman sajsajta carashpa charijpica, ashtahuanpish paicunaca chai dioscunahuanmari huainayancuna. Tandanacushpamari huainayaj huarmicunapaj huasiman rincuna. Chai juchamantaca ¿maitataj mana ima nishpa saquishallari?

JEREMÍAS 5:7 Iomraidhean Croise

2 CRÓNICAS 13:9

Cancunaca Aaronpaj huahua huahuapura curacunatapish, levitacunatapishmi cancunapaj llajtamanta llujshichishpa cacharcanguichij. Mandaj Diospajta ruraj curacunata, levitacunata chashna llujshichishpa cachashpaca, shujtaj llajta runacuna shinallatajmari chai dioscunapaj curacuna cachun pitapish churashcanguichij. Maijanpish shuj bizita, canchis carnerocunata cushpa, chai manapish dios cajcunapaj curacuna tucunaman shamuchunmari chashna ruranguichij.

JOB 31:12

Chai juchaca, Abadonpipish rupachij ninami canman carca. Chaillatajmi ñuca imalla charishcacunatapish tucuita rupachinman carca.

SALMOS 50:18

Shuhuata ricushpapish paihuanmi callparcangui. Huainayajcunahuanmi shuj yuyailla tucushpa purircangui.

JEREMÍAS 12:16

Chai llajtacunapi causajcunami ñuca runacunataca: Baalpish ricucunmi ninata yachachircacuna. Q'uipataca chai shinallataj paicunapish ñuca agllashcacunaman ñuca cushca yachanata yachachuncuna. Tucui shunguhuan chaita yachashpa, ñucatapish: Mandaj Dios ricucunmi nichuncuna. Chashnaca ñuca agllashcacunapurapi causangallacunami.

JEREMÍAS 13:27

Tucui lomacunapipish, tucui pambacunapipish huainayanallata yuyashpami, huacarishpa purircangui. Ñucaca chaitaca ricucurcanimari. ¡Aij, Jerusalenlla! ¿Mashna huata llaquita apashpachari chuya saquiringui? ¿Ima horaschari mapa illajlla saquiringui?” ninmi.

JEREMÍAS 16:11

Chashna nijpica cashna ningui: Mandaj Diosca cashnami nin: Cancunapaj yayacunamari ñucata shitashpa, shujtajcunapaj dioscunapajman rishpa chaicunata cungurircacuna. Chaicunatami servircacuna. Chashna ñucata saquishpami, ñuca mandashcatapish mana pajtachircacuna.

JEREMÍAS 16:20

¿Pitaj pai quiquinpaj shuj diostatajca rurai tucungari? Paicuna rurashcacunaca, mana dioscunatajchu” ningacunami.

JEREMÍAS 2:11

Shujtaj runacunapaj dioscunaca mana dioscunatajchu. ¿Shina cajpipish paicunapaj dioscunata shitashpa, shujtaj dioscunata catijta maipi ricushcanguichijchu? Ashtahuanpish ñuca agllashcacunaca paicunata sumajyachij Diosta saquishpamari, imata mana cuj dioscunata catincuna.

JEREMÍAS 2:31

Cunan punlla causacuj israelcunalla, caita uyaichij. Mandaj Diostajmi cashna nini: Can israelcunaca ñuca agllashcacunamari canguichij. ¿Ñucaca cancunapajca shitashca pamba shina, mana cashpaca amsa llajta shinachu carcani imatagari? ¿Imamantataj cancunaca: Cunantajca cacharirinchijtajmi, manataj cutinca cambajman tigrashunchu ninguichigari?

JEREMÍAS 23:10

Cai llajtaca huainayajcunahuan jundamari. Millaita ruranallatami yachancuna, mandanapipish shujtajcunata llaquichishpallami tiyacuncuna. Chaimanta Dios llaqui tucuchun nijpimi, allpapish shitashca pamba shina chaquishca, michina pambacunapish tucui chaquishcami.

JEREMÍAS 3:19

Ñucaca: ¿Ima shinataj cancunataca ñuca huahuacunata rurashpa, tucui llajtacunamanta yalli munananqui sumaj llajtata cushari? nishpami tapurcani. Shina nicushpapish ñucallatajmi: Ñucataca ñucanchij Yayitu nichijlla. Ñucamantaca amataj anchuringuichijchu nircani.

JEREMÍAS 3:8

Paipaj ñaña Israeltaca ñucata mana cazushcamantami, shitanimi nishpa quillcata rurashpa curcani. Chaita cushpa llujshichishpa cachajtaca, paipaj ñahuihuantajmi ricurca. Chaita ricushpapish, cai mana cazuj Judá huarmica mana mancharcachu. Ashtahuanpish paipish ñaña shinallatajmari huainayanaman rirca.

JEREMÍAS 7:9

Chaimantami shuhuashpa, huañuchishpa, huainayashpa, llullangapaj ñuca shutita rimashpa, Baalmanpish inciensota cushpa rupachinguichij. Cancuna mana rijsishca, shujtajcunapaj dioscunatapishmi catinguichij.

JEREMÍAS 9:1

Ñuca uma pugyu tucujpica, ñuca ñahuicunamanta yacu huiñacuj shina huiqui llujshicujllapica, ñuca llajtapi causajcuna huañushcamantaca, tutapish punllapish huacacuimanllachari.

JEREMÍAS 9:2

Mana cashpaca shitashca pambapi ñanta purijcuna llandurina shinallatapish ñuca causanapaj maijan cujpica, ñuca llajtapi causajcunata saquishpa chaimanchari riman. Chaipitajca paicunamanta ch'icanyaimanmi. Paicunaca tucuicuna huainayajcuna, mana cazujcunamari.

LAMENTACIONES 3:42

Ñucanchijmari cantaca yallitaj mana cazushcanchij. Ñucanchijmari canmanta anchurishcanchij. Chaimantamari ñucanchijca llaquita apanataj tucushcanchij.

EZEQUIEL 22:11

Tucuicunallatajmi shujtajpaj huarmihuan, millanana juchata rurarcacuna, quiquin nuerahuanpish millai munaita rurashpa mapayachircacunami. Shinallataj yayamanta lapanitapish japirircallami.

OSEAS 11:8

Efraín ¿maitataj cantaca saquishari? Israel cantaca shujtajcunapaj maquipica mana churai tucunichu. Cancunataca Adma pueblota shinapish mana llaquichi tucunichu. Zeboim pueblota shinapish mana llaquichi tucunichu. Cancunataca ñuca shungu rupajyashpamari jatun c'uyaihuan c'uyanayanlla.

OSEAS 13:6

Ña paicunapaj micunata mana nijta micucushpaca, paicunapaj shungupica jatun tucurcacunami. Chashna cashpami ñucataca cungarircacuna.

OSEAS 4:2

Ashtahuanpish ari nishcata mana pajtachina, llullana, huañuchina, shuhuana, huainayanami tiyan. Caishuj chaishuj huañuchinacunami tiyan.

OSEAS 7:4

Tucui paicunami huainayajcuna. Rupajyachishca horno shinami. Tandata ruraj harinata chapushpa chai chapu p'unguilliringacama samarij shinallami pararincuna.

LEVÍTICO 20:10

Maijanpish shujtajpaj huarmihuan huainayajpica, c'aritapish huarmitapish mana llaquishpalla huañuchichun.

AMÓS 8:14

Samaria pueblopi caj juchapaj shutipi imatapish nishpami: Dan runacunalla, cancunapaj Diosmanta nincuna. Shinallataj: Beerseba ñanmanta nincunapishmi. Paicuna urmashpaca, manataj jataringacunachu” ninmi.

SOFONÍAS 1:5

Huasi jahuaman huichiyashpa luzerocunata cungurijcunatapish, Mandaj Diospish, Milcom diospish ricucunmi nishpa llullashpa cungurijcunatapishmi chingachisha ninmi.

MALAQUÍAS 3:5

Tucuita Mandaj Diostajmi cashna nini: Ñucami cancuna imalla rurashcacunata ricuj shamusha. Chai punllapimi yumbucunatapish, huainayajcunatapish, llullashpa huillajcunatapish, trabajajcunaman cullquita mana tucui pagajcunatapish, viudacunata, yaya mama illajcunata p'iñajcunatapish, caru llajta runacunata llaquichijcunatapish, ñucata mana manchajcunatapish llaquichisha.

1 Corintios 6:9

Millaita rurajcunaca, Dios mandanapica imata mana japina cashcataca ¿manachu yachanguichij? Ama umarichijchu: Apanacushpa causajcuna, rurashcalla dioscunata adorajcuna, huainayajcuna, huarmi shina casha nijcuna, c'aripurallataj siririjcuna,

1 Corintios 8:4

Rurashcalla dioscunaman rupachinapaj cushca micuicunamantaca caitami yachanchij. Rurashcalla diosca cai pachapica, ima mana canchu. Shujlla Diosmi tiyan.

Gálatas 4:8

Ñaupaca, Diosta manaraj rijsishpaca, manapish dioscunapajtami rurajcuna carcanguichij.

DEUTERONOMIO 32:15

Ashtahuanpish Jesurún huirayashpaca, huashamanmi jaitarca. Yallitajmi gordoyarcangui, huirami taparca. Ashtahuanpish paita ruraj Taita Diosmantami anchurirca. Paita quishpichij jatun Rumitapish yanganchircami.

DEUTERONOMIO 32:21

Paicunaca manapish dios cajta mañashpami ñucataca yallitaj p'iñachircacuna. Paicunapaj rurashcalla dioscunata cungurishpami ñucataca p'iñachircacuna. Ñucapish paicunataca manapish ñucapaj cajcunahuanmi llaquichisha. Ch'ahuan runacunahuanmi llaquichisha.

Hebreos 13:4

Cazaranaca tucuicuna alli nishca cachun. Paicuna chayarinacunapish chuya cachun. Ashtahuanpish apanacushpa causajcunata, huainayajcunataca Diosmi paicuna ima shina cashcataca ricuchinga.

Santiago 4:4

¡Cai pachahuan huainayajcuna! ¿Manachu cai pachahuan apanacunaca, Diosta p'iñachij cashcataca yachanguichij? Maijanpish cai pachapaj amigo tucushpaca, Diosta p'iñajmi tucun.

JOSUÉ 23:7

Cancuna, causacun cai llajtapi causaj saquirishca mana israelcunahuan ama tandanacungapajmi chashna cana canguichij. Paicunapaj dioscunatapish ama adoranguichijchu. Chai dioscunapaj shutipipish ama imata ninguichijchu, chai dioscunapajtaca ama ruranguichijchu, paicunapaj ñaupajpipish, ama cunguringuichijchu.