JEREMÍAS 5:6 - Dios Rimashca Shimicunami

⁶ Chashna cashcamantaca, sachamanta león llujshishpa huañuchingatajmi. Shitashca pambapi causaj atuj shamushpa tucuchingatajmi. Leopardomari paicunapaj pueblo muyundijta chapanga. Maijanpish pueblomanta llujshijpica, japishcahuan micungallami. Paicunallataj Diosta yallitaj mana cazushpa, paimanta ashtahuan ashtahuan caruyashcamantamari chai llaquica japinga.

JEREMÍAS 5:6 Iomraidhean Croise

2 CRÓNICAS 36:14

Chashnallataj Judá llajtapi causajcunapish, curacunapish, tucui shujtajcunapishmi Diosta manataj cazushpa paimanta anchurircacuna. Tucuicunami shujtaj llajtacunapi causajcuna shinallataj ashtahuan millaita rurarcacuna. Diospaj huasillapitajmi jatun millaita rurarcacuna. Jerusalenpi caj chai huasitaca, Mandaj Diosmi ñaupamanca paillata yuyarinapaj cachun chasquishca carca.

ESDRAS 10:10

Chaipi Esdras cura jatarishpaca: –Cancunaca manapish Israel huarmicunata cancunapaj huarmicuna cachun japishpami juchallishcanguichij. Chashnami Israelpica juchaca yallitaj mirarishca.

ESDRAS 9:6

cashna nircani: “Ñuca Dioslla, ñuca Dioslla, canta huichilla ricushpa mañangapajca yallitaj musparishca yallitaj pingaihuanmi cani. Millaita ñucanchij rurashpaca yallitaj jucha aparishcami tucushcanchij. Ñucanchij juchacunaca jahua pachacamami chayashca.

JOB 10:16

Ñuca umata alzajpica, león shinamari japingui. Japishpaca cutinllatajmi ñucapica, ima mancharinata rurangui.

SALMOS 104:20

Amsayanatami churangui, chaica tutami. Chaipimi sacha animalcunaca caita chaita callpancuna.

SALMOS 80:13

Sacha c'uchicunamari c'utsashpa apancuna. Urcu animalcunamari millpucuncuna.

ISAÍAS 1:23

Cancunata mandajcunaca c'ariyajcunami tucushca. Shuhuajcunapurami tucushca. Tucuicunami camarita japinallata munancuna. Tucuicunami imata cujcunapuralla tucunata munancuna. Yaya mama illaj huahuacunata llaquichicujpipish mana mitsancunachu. Viuda huarmicunata pi llaquichicujpipish paicunaca ricucunllacunami.

ISAÍAS 59:12

Ñucanchij canta c'ariyashcacunamari cambaj ñaupajpica mirarishca. Ñucanchij juchacunallatajmi ñucanchij juchayuj cashcataca ricuchin. Ñucanchij millaita rurashcacunaca ñucanchijllahuantajmari. Ñucanchij juchallishcacunataca allimi rijsinchij.

JEREMÍAS 14:7

Mandaj Dioslla, ñucanchij juchacunahuanca cantamari p'iñachishcanchij. Chai juchacunallatajmari ñucanchijtaca llaquipi churashca. Cai tucui huatacunatamari canta mana cazushpa causashcanchij. Shina cajpipish, canta jatunyachingapaj ayudahuayari.

JEREMÍAS 2:15

Malta leoncunamari huacarishpa shamurcacuna. Paicunata llaquichingapaj huacarishpa shamushpamari, chushaj llajtata saquincuna. Tucui pueblocunatamari rupachishpa, shujllapish chaipi causachun mana saquincuna.

JEREMÍAS 2:17

¿Manachu cancunata Mandaj Dios ñanta pushacujpi, cancuna paimanta anchurishcamanta, cashna llaqui tucunguichij imashi?

JEREMÍAS 2:19

Cancunapaj juchallatajmi llaquichinga. Ñucata mana cazushca juchallatajmari cancunataca llaquipi churanga. Chaipimi cancunaca ñuca cancunata Mandaj Diosmanta anchurinapish, ñucata mana cazunapish, yallitaj mana alli cashcata, llaqui tucuna cashcata yachanguichij. Tucuita Mandaj Jatun Diostajmi chashna nini.

JEREMÍAS 2:31

Cunan punlla causacuj israelcunalla, caita uyaichij. Mandaj Diostajmi cashna nini: Can israelcunaca ñuca agllashcacunamari canguichij. ¿Ñucaca cancunapajca shitashca pamba shina, mana cashpaca amsa llajta shinachu carcani imatagari? ¿Imamantataj cancunaca: Cunantajca cacharirinchijtajmi, manataj cutinca cambajman tigrashunchu ninguichigari?

JEREMÍAS 25:38

Shuj león paipaj jutcumanta llujshishca shinami rurarca. Paicunata p'iñajcuna shamushpami, tucui llajtata llaquichirca. Jatunta p'iñarishpami, tucuchirca ninmi nishpa huillai” nircami.

JEREMÍAS 30:14

Cantaca tucui c'uyajcunami cungarincuna. Cunanca pipish ña mana mashcanchu. Cantaca ñucamari p'iñaj runa shina chugrichircani. Mana llaquishpa macaj p'iña runa shinami macarcani. Canllataj jatun millaita rurashcamanta, yallitaj juchacunata rurashcamantami chashna rurarcani.

JEREMÍAS 30:15

Canta llaquichishcamantaca ¿imapajtaj capariringuiyari? Cambaj nanaica imahuan mana jambipajchu. Canllataj jatun mana allita, yallitaj juchacunata rurashcamantami ñucataj chashna llaquichircani.

JEREMÍAS 30:24

Mandaj Diosca jatuntami p'iñaringa. Chaimantaca pai ima shinalla llaquichisha nicushca shinataj rurangacama manataj alli tucungachu. Pai yuyarishcataca pajtachingatajmi. Tucuri punllacunapimi chaitaca tucuita yachanguichij.

JEREMÍAS 4:7

Leonmari sachamanta llujshimucun. Llajtacunata tucuchijmari caiman shamungapaj ñanpi yaicushca. Cancunapaj llajtata tucuchingapajmari pai tiyanamanta llujshimushca. Cancunapaj tucui pueblocunamari shuj runallapish illaj, shitashca saquiringa” ninmi.

JEREMÍAS 49:19

Huirayashca sumaj animalta japinaman, Jordán yacu uri sachamanta león llujshij shinami, paicunataca llaquichinaman huichiyasha. Ñallami ñuca agllashca runata cachashpa, chai llajtamanta callpachigrini. ¿Pitaj ñuca shina cangari? Ñucahuanca ¿pitaj ch'imbapurai tucungari? Ñuca llaquichicujpica ¿pi michijtaj mitsai tucungari?” ninmi.

JEREMÍAS 8:5

Chashna cashcamantaca ¿imamantataj cai Jerusalenpi causajcunaca, huiñaita ñucahuan p'iñarishpa, manataj ñucapajman tigrancunachu imamí?

JEREMÍAS 8:7

Cigüeñacunapish, jahua pachata ricushpa ima quillapi shujtajman rina cashcata yachanmi. Urpicunapish, grullacunapish, golondrinacunapish ima quillapi quiquin llajtaman tigranata yachancunami. Ashtahuanpish ñuca agllashca cancunaca, Mandaj Dios ñuca mandashcataca mana rijsinguichijchu.

LAMENTACIONES 1:5

Paita p'iñajcunamari mandajcuna tucurca, paita mana ricunachijcunamari misharca. Paillataj yallitaj millaita rurashcamantami, Mandaj Diosllataj chashna llaquichirca. Chaimantamari paipaj huahuacunataca paicunata p'iñaj ñaupachishpa prezu aparca.

EZEQUIEL 16:25

Ñan callaricunapipish rurashcalla diospajmi lomacunapi altarcunata rurarcangui. Chaipimi can sumaj cashcataca mapayachircangui. Mashna chaita purijcunamanmi, cambaj aichata ricuchircangui. Chashnami ashtahuan ashtahuan huainayashpa catircangui.

EZEQUIEL 22:27

Paicunata mandajcunaca shuhuashpalla imatapish japingapajmi, aichata mashcashpa purij atujcuna shina runacunata chaparashpa huañuchishpa chingachircacuna.

EZEQUIEL 23:19

Chairaj cashpa Egipto llajta runacunahuan huainayashcata manataj cungarishpami, ashtahuan huainayarca.

DANIEL 7:4

Punta animalca leonman rijchajmi carca. Chaica aguilapaj alasyujmi carca. Ñuca ricucujllapitajmi, paipaj alasta p'itishpa paitaca pambamanta jatarichirca. Paica shuj runa shinami ishqui chaquihuan shayarirca. Paipaj yuyaitaca gentepaj yuyai shinatami rurarca.

DANIEL 7:6

Ishquipaj q'uipa llujshij animaltaca, leopardoman rijchajtami ricurcani. Paipaj huashapica chuscu alastami charirca. Chai animalca chuscu umayujmi carca. Paimanca mandai tucunatami curca.

OSEAS 5:14

Efrainpajca ñucaca jatun león shinami casha. Judapajca huahua león shinami casha. Paicunataca ñucatajmi mirga mirgata rurasha. Chai q'uipaca rishallami. Paicunata chashna ruracujpica, pi mana quishpichi tucungachu.

HABACUC 1:8

Paicunapaj caballocunaca leopardotapish yalli callpajcunami cangacuna. Tuta purij atujcunatapish yalli p'iñacunami cangacuna. Macanacujcunapish chai caru llajtamantaca caballocunapimi tiyarishpa yallitaj achcacuna shamungacuna. Paicunaca, aguilacuna huañuchinaman callpacuj shinami callpamungacuna.

SOFONÍAS 3:3

Jerusalenpi causajcunata mandajcunapish, paicunapaj chaupipica huacaricuj leoncuna shinami. Juezcunapish tuta purij atujcuna shinami cayandijpajca, shuj tullullatapish mana saquincunachu.

NÚMEROS 32:14

Cancunaca juchata rurajcunapaj huahuacuna cashpami, cunanpish cancunapaj yayacuna rurashca shinallataj rurashun ninguichij. Mandaj Dios israelcunahuan p'iñarishcata ashtahuan mirachingapajllami chashna ruranguichij.

Apocalipsis 13:2

Ñuca ricushca animalca, leopardoman rijchajmi carca. Paipaj chaquicunaca, osopaj shinami carca. Paipaj shimica leonpaj shimi shinami carca. Dragonca chai animalmanca pai rurai tucunata, paipaj jatun tiyarinata, jatun mandaj canatapishmi curca.