JEREMÍAS 5:5 - Dios Rimashca Shimicunami

⁵ Cunanca yachajcunapajman rishpa paicunata rimasha. Paicunaca paicunata Mandaj Dios mandashcatapish, ima shina causachun pai munashcatapish yachangacunami yuyarcanimi. Ashtahuanpish paicunapish yugota p'aquircacunami, yugushca angucunata p'itircacunami.

JEREMÍAS 5:5 Iomraidhean Croise

2 CRÓNICAS 36:14

Chashnallataj Judá llajtapi causajcunapish, curacunapish, tucui shujtajcunapishmi Diosta manataj cazushpa paimanta anchurircacuna. Tucuicunami shujtaj llajtacunapi causajcuna shinallataj ashtahuan millaita rurarcacuna. Diospaj huasillapitajmi jatun millaita rurarcacuna. Jerusalenpi caj chai huasitaca, Mandaj Diosmi ñaupamanca paillata yuyarinapaj cachun chasquishca carca.

ÉXODO 32:25

Israelcunataca yallitaj cacharishcacuna cajta ricushpa, paicunata p'iñajcunapi pingai tucungapajllataj Aaronpish israelcuna mañashcata rurashcata ricushpami,

ISAÍAS 1:23

Cancunata mandajcunaca c'ariyajcunami tucushca. Shuhuajcunapurami tucushca. Tucuicunami camarita japinallata munancuna. Tucuicunami imata cujcunapuralla tucunata munancuna. Yaya mama illaj huahuacunata llaquichicujpipish mana mitsancunachu. Viuda huarmicunata pi llaquichicujpipish paicunaca ricucunllacunami.

JEREMÍAS 2:20

Cancunaca ñaupamantapachami ñuca churashca yugotaca p'aquircanguichij, cinta angucunatapish p'itircanguichij. Chashna rurashpami: Cantaca ña manataj servishachu nircanguichij. Chashna rurashca jahuapish tucui maipi tiyaj lomacunapi, tucui p'angasapa yura ucucunapimi huainayaj huarmi shina siririshpa huainayarcanguichij.

JEREMÍAS 2:31

Cunan punlla causacuj israelcunalla, caita uyaichij. Mandaj Diostajmi cashna nini: Can israelcunaca ñuca agllashcacunamari canguichij. ¿Ñucaca cancunapajca shitashca pamba shina, mana cashpaca amsa llajta shinachu carcani imatagari? ¿Imamantataj cancunaca: Cunantajca cacharirinchijtajmi, manataj cutinca cambajman tigrashunchu ninguichigari?

JEREMÍAS 30:14

Cantaca tucui c'uyajcunami cungarincuna. Cunanca pipish ña mana mashcanchu. Cantaca ñucamari p'iñaj runa shina chugrichircani. Mana llaquishpa macaj p'iña runa shinami macarcani. Canllataj jatun millaita rurashcamanta, yallitaj juchacunata rurashcamantami chashna rurarcani.

JEREMÍAS 6:13

Cunanca ashtahuan uchillacunamanta callarishpa, ashtahuan jatuncunacama tucuicunami jahuanpi jahuanpi charijyanallata yuyancuna. Ñucamanta huillajcunamanta callarishpa, curacunacama tucuicuna umajcunami.

JEREMÍAS 8:7

Cigüeñacunapish, jahua pachata ricushpa ima quillapi shujtajman rina cashcata yachanmi. Urpicunapish, grullacunapish, golondrinacunapish ima quillapi quiquin llajtaman tigranata yachancunami. Ashtahuanpish ñuca agllashca cancunaca, Mandaj Dios ñuca mandashcataca mana rijsinguichijchu.

JEREMÍAS 9:3

Mandaj Diosca cashnami nin: “Paicunapaj c'alluhuanca puntajlla caspita arcohuan shitaj shinamari llullancuna. Cai llajtapi charijyashpapish, ima allitaca mana rurancunachu. Ashtahuanpish ashtahuan millaicuna tucushpami, ñucataca ña mana rijsincuna.

EZEQUIEL 11:2

Chaimantaca ñucataca cashnami nirca: “Huañujlla aichayuj runalla, cai pueblopi causajcunataca cai runacunami ima shinalla millaita ruranata yachachicuncuna.

AMÓS 4:1

Samaria urcupi causaj huarmicuna, cancunaca Basán llajta vacacuna shinami canguichij. Caita alli uyaichij: Cancunaca imata mana charij huajchacunataca, quichushpa jatunta llaquichijcunami canguichij. Cancunapaj cusacunatapish, machangapaj vinota apamuichij nishpa mañajcunami canguichij.

AMÓS 6:1

Sión pueblopi cushicushpa causajcunapish, Samaria urcupi causajcunapish urcucunapi imata mana manchashpa causajcunami canguichij. ¡Aij imachari tucunguichij! Cancunaca llajtacunapipish alli nishca mandajcunami canguichij. Chaimantami tucui israelcuna cancunapajllaman shamuncuna.

MIQUEAS 3:11

Paicunata mandajcunaca camarita japishpallami, millaita rurajcunataca mana imata nincuna. Curacunapish cullquiraicullami imatapish yachachincuna. Dios ima nishcata huillajcunapish cullquiraicullami huillancuna. Chai jahuamari paicunaca: “Mandaj Diosca ñucanchijhuanmari. Ima llaquipish mana tiyangachu” nishpa, Mandaj Diospi shunguta churancuna.

MALAQUÍAS 2:7

Cura yachachishcamantami, yachaisapa tucungacuna. Pai huillashcamantami, tucuicunallataj mandashcata yachanata munangacuna. Paica tucuita Mandaj Diosmanta huillajmi.

Lucas 18:24

Achcata llaquirijta Jesús ricushpaca cashnami nirca: –¡Achcata charijcunaca Taita Dios mandacujpica, mana jahualla yaicui tucungacunachu!

Lucas 19:14

Chai llajtapi causajcuna chaita yachashpaca p'iñarishpami: “Ñucanchijta pai mandaj cachunca mana ninchijchu” nishpa huillajcunata catichishpa cacharcacuna.