JEREMÍAS 49:3 - Dios Rimashca Shimicunami

³ Hesbón pueblopi causajcuna, huacaichigari. Hai pueblotaca, ñamari tucuchishcacuna. Rabá pueblopi causajcunalla, cancunapaj Milcom diostaca paipaj curacunandij, paipaj mandajcunandij ñamari prezu apashcacuna. Jatunta caparishpa, yupashpa yupashpa huacaichigari. Cañamazuta churarishpa, huacaihuan pirca jahuata muyuichigari.

JEREMÍAS 49:3 Iomraidhean Croise

2 SAMUEL 11:1

Chai q'uipa huataca cashnami tucurca: Cozicha punllacuna tucurijpi jatun mandajcuna macanacuiman llujshina punllacunapimi Davidca Joabtaca paipajta rurajcunandij, tucui israelcunandij cachajpi amonitacunata ñutuchishca q'uipaca, Rabá pueblo muyundijpi shayarircacuna. Davidca Jerusalenllapitajmi saquirirca.

1 REYES 11:33

Salomonca sidoniocunapaj Astoret huarmi diosta, moabitacunapaj Quemos diosta, amonitacunapaj Moloc diosta adorashpami ñuca chaitataj pajtachichun nishcata mana pajtachishpa, pajtachinguitaj nishcatapish mana pajtachirca. Paipaj yaya David maiman mana anchurishpa, purishca shinaca mana ñuca ñanpi purishpami ñucamanta anchurirca.

1 REYES 11:5

Chaimi Salomonca, Sidón llajtapi causajcunapaj Astoret dios nishca huarmi diosta, amonitacunapaj Milcom shuti millanana manapish diosta catirca.

2 REYES 23:13

Jatun mandaj Josiasca Jerusalén ch'imbapurapi caj chingarinapaj urcu alli ladopi caj altarcunatapishmi yangata rurarca. Chai altarcunataca israelcunata jatun mandaj Salomonmi sidoniocunapaj Astoret millanana rurashcalla diosta, moabitacunapaj Quemos millanana rurashcalla diosta, amonitacunapaj Milcom millanana rurashcalla diosta yuyarichun rurachishca carca.

ESDRAS 2:28

Bet-elmanta, Haimantaca 223 runacunami carca.

ISAÍAS 13:6

Caparirishpa huacaichigari. Mandaj Dios llaquichina punllaca ñamari c'uchullapi. Tucuita Rurai Tucuj Diosca chingachingapajmi shamunga.

ISAÍAS 14:31

Filisteapi caj pungucuna caparishpa huacaichigari. Chai llajtapi tucui causajcuna caparichigari. Tucui filisteocunami yacuyachishca canguichij. Cushni shinami janaj ladomanta soldadocuna shamucun. Chai soldadocunapurapica, filamanta llujshijca shujllapish mana tiyangachu.

ISAÍAS 15:2

Bayit, Dibón pueblocunapaj jatun urcucunapi caj altarcunapi huacanamanmi huichiyangacuna. Nebo, Medeba pueblocunata tucuchishcamantapishmi, Moabpi causajcunaca caparishpa huacangacuna. Tucuicunami umata rutushca, barbasta anchuchishca cangacuna.

ISAÍAS 16:7

Chaimantami moabitacunaca caparishpa huacangacuna. Moabitacunaca caparishpami huacangacuna. Kir-haresetpi tiyaj uva tandata yuyarishpami aij nishpa huacangacuna. Yallitaj llaquichishcacunami cangacuna.

ISAÍAS 23:1

Tiro pueblo imalla tucunata huillachishcami: Tarsis barcocuna huacaichigari. Tiro pueblotaca shuj huasillatapish mana saquishpamari chingachishca. Maiman yaicunapish mana tiyangacamami chingachishca. Quitim llajtamantami huillashca.

ISAÍAS 23:6

Tarsis pueblopipish huillagrichij. Mama cucha uripi causajcuna caparishpa huacaichij.

JEREMÍAS 4:8

Mandaj Diosca, ñucanchijhuanca p'iñarajmi, manaraj alli tucushcachu. Chashna cashcamantaca cañamazuta churarishpa, aij nishpa huacaichigari.

JEREMÍAS 46:25

Tucuita Mandaj, israelcunapaj Diosca cashnami nin: Ñucaca Tebas pueblopi caj Amón shuti diosta llaquichigrini. Faraontapish, pai mandacun Egipto llajtatapish, chaipi causajcunapaj dioscunatapish, paicunapaj jatun mandajcunatapish llaquichigrinimi. Faraontaca, tucui paipi shunguta churajcunandijmi llaquichisha.

JEREMÍAS 48:2

Cunanca Moabpi causajcunaca, ña mana jatun tucungacunachu. Paicunata p'iñajcunaca Hesbón pueblopimari: Jacuchij chai llajtata tucuchishunchij nishpa yuyarinacushca. Madmena pueblolla, canpish tucuringuillatajmi. Canpi causajcunataca espadahuanmari huañuchigringacuna.

JEREMÍAS 48:20

Moab llajtamari, jatunta llaquichijpi yallitaj pingai tucushca. Jatunta caparirishpa huacaichigari. Moab llajta llaqui tucushcataca, Arnón yacu uripi causajcunamanpish huillaichigari ninmi.

JEREMÍAS 48:37

Tucuicunamari uma ajchata rasparingacuna, barbastapish p'icharishpami, tucuicuna cañamazuta churaringacuna. Maquicunapish chugri chugrimi cangacuna.

JEREMÍAS 48:7

Cancunaca imalla charishcallapi, cullquillapimari shunguta churarcanguichij. Chaimantami cancunapish shujtajpaj maquipi urmanguichij. Cancunapaj Quemos shuti diospish paipaj curacunandij, paipaj mandajcunandij prezu apashca cangami.

JEREMÍAS 49:1

Mandaj Diosca, Amón llajta runacunamantaca cashnami nin: “Israelcunaca, ¿manachu huahuacunata charin imatagari? Paicunapaj allpacunataca ¿manachu piman cunata charin imatagari? ¿Imamantataj Milcom diosca, Gad aillu israelcunataca llajtata quichushcari? ¿Imamantataj cunanca paipaj runacuna chai pueblocunapi causancunari?” ninmi.

JEREMÍAS 51:8

Shina cashpapish Babilonia llajtaca, paipaj maquimanta ñapish urmashpa ñuturishcallamari. Paimanta huacaichigari, bálsamo aceiteta mashcaichigari. Chaihuan jambijpica, paipaj chugricuna alliyangapishchari.

JEREMÍAS 6:26

Ñuca llajtapi causajcunalla, llaquirishpa cañamazuta churarichigari, ushpapi singurichigari. Shujlla churitaj huañushca cajpi shina caparirishpa huacaichigari. Ñucanchijta tucuchijca ñallamari chayamugrin.

AMÓS 1:15

Paicunata jatun mandajpish, pai churashca mandajcunandijmi prezu ringacuna” ninmi Mandaj Diosca.

SOFONÍAS 1:5

Huasi jahuaman huichiyashpa luzerocunata cungurijcunatapish, Mandaj Diospish, Milcom diospish ricucunmi nishpa llullashpa cungurijcunatapishmi chingachisha ninmi.

Santiago 5:1

¡Achcata charijcuna, uyaichij! Cancunata llaquicuna japina cashcamanta huacaichij, caparichij.

JOSUÉ 7:2

Chai q'uipami Josueca Jericomanta Hai puebloman maijan runacunata cacharca. Chai puebloca, Bet-el pueblomanta inti llujshin ladoman caj Bet-avén pueblo c'uchullapimi carca. Paicunataca cashna nishpami cacharca: “Hai puebloman huichiyashpa chai pueblo ima shinalla cashcata ricumugrichij” nijpi, paicuna Hai puebloman huichiyashpaca ima shinalla cashcatami ricurcacuna.

JOSUÉ 8:1

Mandaj Diosca Josuetaca: “Josué, ama manchaichu. Chai llajtapi causajcunataca ña mana mishashunchu nishpa ama yuyaichu. Hai pueblota jatun mandajtaca chai pueblondij, pai mandacun gentecunandij, tucui paipaj llajtandijmi cambaj maquipi churani. Chaimanta tucui macanacuj runacunata pushashpa Hai puebloman huichiyashpa macanacugri.

JOSUÉ 8:28

Hai pueblota Josué tucui rupachijpica, ushpa montonllami saquirirca. Chashnami chai puebloca tucui ñutuchishca shitashca saquirirca. Chaica cunancama chashnallatajmi.