JEREMÍAS 42:2 - Dios Rimashca Shimicunami

² Dios imalla nishcata huillaj Jeremiaspajman c'uchuyashpa cashna nircacuna: –Ñucanchijca canta shuj mañanahuanmi shamunchij, chaitaca ama mana nipangui. Ñucanchijca achcacuna cashca cashpapish, cai ashallacunami saquirishcanchij. Chaitaca canllataj ricunguimi. Chashna cashcamantaca canta Mandaj Diostaca, caipi saquirishca tucui ñucanchijmanta mañapai.

JEREMÍAS 42:2 Iomraidhean Croise

1 REYES 13:6

Chashna tucujpimi jatun mandajca, Taita Diospaj runataca: –Ñuca maqui alli tucuchun canta Mandaj Taita Diosta ñucamanta rogashpa mañai– nijpi Diospaj runa, Mandaj Diosta mañajpica, jatun mandajpaj maquica ñaupa shinallataj alli saquirircallami.

SALMOS 119:170

Ñuca mañashcaca quiquinpaj ñaupajman chayashca cachun. Quiquinpaj shimipi nishca shinallataj ñucataca quishpichihuailla.

ÉXODO 8:28

Chaimi faraonca: –Cancunata Mandaj Diosman shitashca pambapi animalcunata cushpa rupachinaman richun ñucaca saquinimi. Ashtahuanca ama yalli caruta ringuichijchu. Ñucamantapish mañapanguichij– nirca.

ÉXODO 9:28

Taita Dios c'ulun nichicushcapish, runduchicushcapish pararichun Mandaj Diosta mañai. Cancuna richun saquishallami. Ña mana ashtahuan caipi charicushallachu– nirca.

ISAÍAS 1:15

Cancunapaj maquicunaca yahuarhuan jundamari. Chashna cashca cashpa ñucaman maquicunata chutajpipish ñuca ñahuitaca shujmanmi churani. Cancuna achcata mañacujpipish, manataj uyanichu.

ISAÍAS 1:9

Tucuita Mandaj Dios ñucanchijta ashallatapish mana saquishca cajpica, p'ichillatapish mana puchuchishca cajpica, Sodoma pueblo shina illanchijmanmi. Gomorra pueblo shina mana tiyanchijmanchu.

ISAÍAS 37:4

Rabsaces nishca mandaj tucui imalla nishcacunata Mandaj cambaj Taita Dios uyashpa paicunahuan p'iñaringapishchari. Paitaca Asiria llajtata jatun mandaj paipaj amomi causaj Diosta p'iñashpa c'amichun cachashca. Mandaj cambaj Dios chaita ña uyashcami. Mana huañushpa puchushca caipi caj israelcunamanta Diosta mañai ninmi” nichunmi cacharca.

ISAÍAS 42:20

Chai tucuita ricushpapish ima cashcataca mana entendinchu. Rinrinta pascashpapish manataj uyanchu.

JEREMÍAS 15:11

Mandaj Dioslla, ñucata p'iñajcunata llaqui japijpi llaquilla puricujpica, cantamari paicunata ayudachun mañarcani. Paicunamanta mana chashna mañashca cajpica, paicuna ñucata llaqui tucuchun nishca shina pajtachunlla.

JEREMÍAS 2:27

Paicunaca yanta caspillatami: Canmi ñucanchij yaya cangui nincuna. Shinallataj rumillatami: Canmi ñucanchijta huachaj mama cangui nincuna. Ashtahuanpish ñucamanca ñahuita ricuchinapaj randica, huashatami ricuchincuna. Jatun llaqui japijllapimi ñucataca: Quishpichinaman jataripayari nincuna.

JEREMÍAS 36:7

Mandaj Dios jatunta p'iñarishpa paicunata chashna mancharinata llaquichisha nicujta uyashpaca, Mandaj Dios uyana shinata tucui shunguhuan mañangacunapishchari. Paicunapaj millai causaitapish saquishpa cutiringacunapishchari” nircami.

JEREMÍAS 37:20

Jatun mandaj ñuca amitolla, cunanca caillatami mañagripani. Ñuca mañashcata ari nihuailla: Ñucaca quillcaj Jonatanpaj huasipica mana huañusha ninichu. Ama chaiman tigrachishpa cachahuaichu– nircami.

JEREMÍAS 37:3

Jatun mandaj Sedequiasca: “Ñucanchijta Mandaj Diosta ñucanchijmanta mañapai” nichunmi, Selemiaspaj churi Jucaltapish, Maasiaspaj churi Sofonías curatapish Dios ima nishcata huillaj Jeremiaspajman cacharca.

JEREMÍAS 38:14

Jutcumanta llujshichishca q'uipami, jatun mandaj Sedequiasca, Dios ima nishcata huillaj Jeremiastaca pai tiyacunman pushaj cacharca. Paica Mandaj Diospaj huasiman yaicuna ishqui pungu huashanij pungupimi tiyacurca. Chaipimi jatun mandajca Jeremiastaca: –Ñucami canta shuj tapunata charini, ama imata pacashpa tucuita huillai– nircami.

JEREMÍAS 40:15

Chaimantami Careapaj churi Johananca Mizpa pueblollapitaj Gedaliasllata cashna nirca: Netaniaspaj churi Ismaeltaca pi mana yachajllapi cunantaj rishpa huañuchimugrisha. ¿Maitataj canta huañuchichunca saquinguiyari? Canhuan tandanacushpa, cai Judá llajtapi causacujcunaca caita, chaitamari ringacuna. Huaquincunallapish saquirishca cai Judá runacunaca chingaringamari– nircami.

JEREMÍAS 42:20

¿Imamantataj cancunallataj cashna yallitaj umaringuichigari? Cancunallatajmari ñucataca: Ñucanchijta Mandaj Diosta ñucanchijmanta mañapai. Chaimantaca ñucanchijta Mandaj Dios imata mandajpipish, chaitataj huillahuai. Ñucanchijca pai mandashcatami rurashun nircanguichij.

LAMENTACIONES 1:1

¡Aij, achcacuna causacushca puebloca shitashcamari saquirishca! Tucui llajtacuna rijsishca jatun pueblomari carca. Cunanca cusa huañujpi viuda saquirishca huarmi shinamari. Tauca llajtacunata mandana pueblomari carca. Cunanca impuestota pagajmari tucushca.

EZEQUIEL 12:16

Paicunapuramantaca ashacunallatami, espadahuan, yaricaihuan, ungüihuan huañunamantaca quishpichisha. Paicunami mai llajtaman chayashpapish: Ñucanchijca yallitaj millaitami rurashcanchij nishpa, tucuita huillangacuna. Chaimantami ñucataca, Mandaj Diostaj cashcatapish yachangacuna” nircami.

OSEAS 8:10

Llajtacunapura alquilachinacushca cajpipish, cunanca ñucami tandachisha. Jatun mandajpish, q'uipa mandajcunapishmi asha huatacunata llaquichingacuna.

LEVÍTICO 26:22

Millai sacha animalcunatapishmi cancunapaj huahuacunata apachun cancunapajman cachasha. Cancunapaj animalcunatapish chingachingami. Chaimanta cancunapaj ñancunapi purijcunaca ashacunallami tucunga.

AMÓS 7:2

Chai langostacuna ñalla tucuita micucujta ricushpami ñucaca: –¡Mandaj Jatun Dioslla, perdonahuailla! Yaya Jacobopaj huahua huahuacunaca ashallamari ¿pitaj ayudai tucungari?– nishpami mañarcani.

Mateo 24:22

Chai llaqui punllacunata Dios mana utca tucuchijpica, pi mana causanmanchu. Ashtahuanpish Diosca pai agllashcacunata c'uyashcamantami, chai llaqui punllacunataca utca tucuchinga.

Hechos 8:24

Simonca: –Cancuna nishca shina ama tucungapaj ñucamanta Jatun Diosta rogashpa mañaichij– nirca.

DEUTERONOMIO 28:62

Mandaj Dios cancunapaj Taita Dios rimashcacunata mana cazushcamantami cancunaca, jahua pachapi tiyaj luzerocuna shina yallitaj achcacuna cana cashca cashpapish ashacunalla saquiringuichij.

DEUTERONOMIO 28:63

Mandaj Diosca allicunata rurashpa, cancunata achcata mirachishpa cushicuj cashca shinallatajmi, cancunata jatunta llaquichishpa tucuchishpapish cushicunga. Cancuna japigricun llajtamantaca sapimanta aisashpa shitaj shinami anchuchinga.

DEUTERONOMIO 4:27

Mandaj Diosllataj cancunataca shujtaj llajtacunaman urata janajta cachajpimi urata janajta rishpaca chaicunapica ashacunalla saquiringuichij.

Santiago 5:16

Chaimanta cancunapaj juchacunataca caishuj chaishuj huillanacuichij. Tucuicuna alliyachishcacuna cangapajca, caishujmanta chaishujmanta Diosta mañaichij. Cashcata ruraj tucui shunguhuan Diosta mañashcaca, imatapish rurai tucunmi.

1 SAMUEL 12:19

Tucui israelcunami Samueltaca: –Cambajta rurajcuna ama huañuchun Mandaj cambaj Diosta mañapaiyari. Tucui ñucanchijmari juchata rurashca jahua ñucanchijta mandachun jatun mandajta churai nishpa mañashpaca millaita rurashcanchij– nircacuna.

1 SAMUEL 12:23

Ñucapish Mandaj Diosta cancunamanta mañanataca mana saquishachu. Chaita saquinaca Mandaj Diosta p'iñachishpa juchallinami canga. Cancunata saquinapaj randica alli ñanpi mana pandashpa causanatami yachachisha.

1 SAMUEL 7:8

Samueltaca: “Ñucanchijta filisteocunapaj maquimanta huaquichichun, ñucanchijmanta Mandaj Diosta mañanataca ama shaicushpa mañacuilla” nircacuna.