JEREMÍAS 4:7 - Dios Rimashca Shimicunami

⁷ Leonmari sachamanta llujshimucun. Llajtacunata tucuchijmari caiman shamungapaj ñanpi yaicushca. Cancunapaj llajtata tucuchingapajmari pai tiyanamanta llujshimushca. Cancunapaj tucui pueblocunamari shuj runallapish illaj, shitashca saquiringa” ninmi.

JEREMÍAS 4:7 Iomraidhean Croise

2 REYES 24:1

Joacim mandacui huatacunami Babilonia llajtata jatun mandaj Nabucodonosorca, Judá llajtapi causajcunahuan macanacungapaj paipaj soldadocunandij huichiyarca. Joacimca Nabucodonosorpaj ucupi tucushpami quimsa huatacunata paipajta rurashpa causarca. Chashna causacushpapish Joacimca Nabucodonosorta c'ariyanata yuyarishpami jatarirca.

2 REYES 25:1

Sedequías Judá llajtata iscun huatata ña mandacujpi, chai huatapaj chunga quillapi, chai quillapaj chunga punllapimi, Babilonia llajtata jatun mandaj Nabucodonosorca, Jerusalenta llaquichingapaj paipaj tucui soldadocunandij shamushpa chai pueblo muyundijta shayarircacuna. Chaipica tucui pueblo muyundijtami macanacungapaj torrecunata shayachircacuna.

ISAÍAS 1:7

Cancunapaj allpapish tucuchishca ima illajmari saquirishca. Pueblocunapish ninahuan rupachishcamari. Cancunapaj allpapi p'ucushcacunatapish caru llajtamanta cajcunamari micushcacuna. Cancunapaj ñaupajllapitajmi micushcacuna. Mana rijsishcacunamari shitashca pambata saquishcacuna.

ISAÍAS 5:9

Achca huasicunami urmachishca saquiringa. Sumaj jatun huasicuna cashca cashpapish shitashcami saquiringa nishpa tucuita Mandaj Dios nishcami ñuca rinrinman uyarirca.

ISAÍAS 6:11

Chaimi ñucaca: “Jatun Dios ¿maicamataj chashna cangari?” nircani. Shina nijpi paica: “Pueblocunapish urmachishca cangacama. Chaipi causajcunapish mana tiyangacama. Huasicunapipish pi mana causaj tiyangacama, allpapish shitashca pamba saquiringacamami chashna canga.

JEREMÍAS 2:15

Malta leoncunamari huacarishpa shamurcacuna. Paicunata llaquichingapaj huacarishpa shamushpamari, chushaj llajtata saquincuna. Tucui pueblocunatamari rupachishpa, shujllapish chaipi causachun mana saquincuna.

JEREMÍAS 22:6

Mandaj Diosca Judá llajtata jatun mandajpaj huasitaca cashnami nin: “Canca ñucapajca Galaad urcu shinami cangui. Líbano jatun urcu punta shinapishmi cangui. Shina cajpipish shitashcatami saquigrini, shuj runallapish illaj pueblotami saquigrini.

JEREMÍAS 22:7

Canta urmachichunca, alli macanacunayuj runacunatami apamusha. Paicunami cambaj ashtahuan sumaj cedro caspicunataca, p'itishpa tucui rupachingacuna.

JEREMÍAS 25:38

Shuj león paipaj jutcumanta llujshishca shinami rurarca. Paicunata p'iñajcuna shamushpami, tucui llajtata llaquichirca. Jatunta p'iñarishpami, tucuchirca ninmi nishpa huillai” nircami.

JEREMÍAS 25:9

Chaimanta cunanca tucui janaj lado llajtacunapi causaj ch'ican ch'ican aillucunatapish, Babilonia llajtata jatun mandaj ñucata servij Nabucodonosortapishmi caiman pushamugrini. Paitami cai llajtapi causajcunatapish, cai muyundij tucui llajtacunatapish llaquichishpa tucuchichun churagrini. Chashna huiñaipaj shitashcata saquishpami, chanzata rurashpa asinata rurasha. Ñuca Mandaj Diostajmi chashna nini.

JEREMÍAS 26:9

¿Imamantataj canca: Cai huasica Silo shinami saquiringa, cai pueblopish tucui urmachishcami canga. Shujllapish causangapaj mana saquiringachu nishpa, Mandaj Diospaj shutipi huillanguiyari?” nircacunami. Mandaj Diospaj huasipica, tucuicuna chashna nishpami, Jeremiasta huañuchishun nicurcacuna.

JEREMÍAS 27:8

Maijan runacuna, mana cashpaca maijan llajta, chai Babilonia llajtata jatun mandaj Nabucodonosorpaj yugota mana aparisha nijpica, chai llajtataca jatuntami llaquichisha. Espadahuan, yaricaihuan, ungüihuanmi llaquichisha. Chashna rurashpami paipaj maquillapitaj tucuchisha. Mandaj Diostajmi chashna nini.

JEREMÍAS 33:10

Mandaj Diosca cashnapishmi nin: “Cancunaca cai Jerusalén pueblotapish, Judá llajtapi caj caishuj pueblocunatapish: Shuj runallapish, animalcunallapish illaj, shitashcami saquirin ninguichijmi. Tucui pueblo callecunaca cancuna nishca shina runacunapish, animalcunapish illaj shitashcamari saquirin.

JEREMÍAS 34:22

Cunan rishca cajpipish, ñucallatajmi cutin cai puebloman tigrachimusha. Paimi cancunahuan macanacushpa mishanga, cai pueblotaca ninahuanmi tucui rupachinga. Chashna rurashpami, cai Judá llajta pueblocunataca shuj runallatapish mana saquishpa, shitashca, chushajta saquisha ninmi Mandaj Diosca” nircami.

JEREMÍAS 4:29

Caballocunapi tiyarishca soldadocunapish, puntajlla caspicunata shitajcunapish manchanayajta c'ulun nishpa shamujta uyashpami, pueblopi causajcunaca tucuicuna llujshishpa jatun sachacunapi, c'aca jahuacunapi miticugrircacuna. Tucui pueblocunamanta chashna llujshishpami, shujllapish mana saquirishpa shitashcata saquircacuna.

JEREMÍAS 44:2

“Tucuita Mandaj, israelcunapaj Diosca cashnami nin: Jerusalenpi causajcunatapish, Judá llajtallapitaj tucui caishuj pueblocunapi causajcunatapish, ñuca ima shinalla llaquichijtaca cancunallataj ricurcanguichijmi. Cunanca tucui chai pueblocuna urmachishca, pi mana causaipaj shitashca saquirishcataca ricurcanguichijllatajmi.

JEREMÍAS 46:18

Tucuita Mandaj shuti Jatun Mandajca cashnami nin: Ñuca causaj Diostajmi cashna nini: Tucui urcucunata yalli jatun Tabor urcu shina jatunmi shamunga. Mama cucha uripi ricurij Carmelo urcu shina jatunmi chayamunga.

JEREMÍAS 49:19

Huirayashca sumaj animalta japinaman, Jordán yacu uri sachamanta león llujshij shinami, paicunataca llaquichinaman huichiyasha. Ñallami ñuca agllashca runata cachashpa, chai llajtamanta callpachigrini. ¿Pitaj ñuca shina cangari? Ñucahuanca ¿pitaj ch'imbapurai tucungari? Ñuca llaquichicujpica ¿pi michijtaj mitsai tucungari?” ninmi.

JEREMÍAS 5:6

Chashna cashcamantaca, sachamanta león llujshishpa huañuchingatajmi. Shitashca pambapi causaj atuj shamushpa tucuchingatajmi. Leopardomari paicunapaj pueblo muyundijta chapanga. Maijanpish pueblomanta llujshijpica, japishcahuan micungallami. Paicunallataj Diosta yallitaj mana cazushpa, paimanta ashtahuan ashtahuan caruyashcamantamari chai llaquica japinga.

JEREMÍAS 50:17

Israelcunaca, leoncuna catijpi chingarishca ovejacuna shinami. Puntaca Asiria llajtata jatun mandajmi micurca. Pai saquishcacunataca, Babilonia llajtata jatun mandaj Nabucodonosormi tucui tullucunata p'aquishpa micurca.

JEREMÍAS 50:44

Jordán yacu uri sachamanta león llujshij shinamari chai jatun pircayuj pueblota llaquichigrini. Ñallami manchachishpa chaimanta callpachigrini. Ñuca agllashca runatami chashna rurachun mingasha. ¿Pitaj ñuca shina cangari? Ñucahuanca ¿pitaj ch'imbapurai tucungari? Ñuca llaquichicujpica ¿pi michijtaj mitsangapaj shayari tucungari?” ninmi.

JEREMÍAS 8:16

P'iñajcunaca ñamari shamuncuna. Paicunapaj caballocunaca ñamari p'ucurishpa Dan llajtata shamucun. Chai caballocunaca allpa chujchujtamari huacarishpa callpamuncuna. Paicuna chayamushpaca allpapi tucui imalla tiyajtami tucuchicun. Tucui pueblocunatapish, chaicunapi causajcunatapishmi tucuchicun.

JEREMÍAS 9:11

Jerusalén pueblotaca rumi montonllatami saquisha. Judá llajtapi caj tucui caishuj pueblocunatapish chacal nishca animalcuna causanallatami rurasha. Shuj runallapish mana chaipi causangapaj saquiringachu.

EZEQUIEL 12:20

Runacuna causacun pueblocunapish, shitashcami saquiringa. Chashnami cai llajtaca llaquinayaj saquiringa. Chashna rurajpimi ñucataca, Mandaj Diostaj cashcataca yachangacuna ninmi ni” nircami.

EZEQUIEL 21:31

Shinallataj ñuca p'iñarishcataca, cancunapimi churasha. Nina lunyacuj shina ñuca p'iñarishcataca, canpimi shitasha. Cancunataca yallitaj llaquichij, millai runacunamanmi chingachichun cusha.

EZEQUIEL 32:2

“Huañujlla aichayuj runalla, Egipto llajtata jatun mandaj faraonmanta cashna yupashpa yupashpa huacai: Canca shujtaj llajtacunapajca, malta león shinamari carcangui. Mama cucha yacucunapi causaj dragón shinamari carcangui. Jatun yacucunatapish chaquichircanguimi. Cambaj chaquicunahuan sarushpami, chai yacucunatapish mapayachircangui, yacu uricunatapishmi sarushpa purircangui.

DANIEL 5:19

Jatun canata cushcamantami tucui gentecunapish, llajtacunapish, ch'ican ch'ican rimaita rimajcunapish paipaj ñaupajpica manchaihuan chujchujcuna carca. Paica maijanta huañuchisha nishpaca, huañuchircallami. Maijanta causachun saquisha nishpaca causachun saquircallami. Jatun canapi maijanta churasha nishpaca, churarcallami. Maijanta cumurichisha nishpaca cumurichircallami.

DANIEL 7:4

Punta animalca leonman rijchajmi carca. Chaica aguilapaj alasyujmi carca. Ñuca ricucujllapitajmi, paipaj alasta p'itishpa paitaca pambamanta jatarichirca. Paica shuj runa shinami ishqui chaquihuan shayarirca. Paipaj yuyaitaca gentepaj yuyai shinatami rurarca.

LEVÍTICO 26:31

Cancunapaj pueblocunatapish shitashcatami saquisha. Diospaj huasitapish shitashcatami saquisha. Cancuna ñucaman cushca mishquijllata ashnacujtapish ña mana ashnachishachu.

LEVÍTICO 26:33

Cancunataca shujtaj llajtacunamanmi urajta janajta cachasha. Espadata llujshichishpa catirashpa llaquichishpami chashna rurasha. Cancunapaj llajtapish chushajllami saquiringa. Cancunapaj pueblocunapish shitashca pambacunami saquiringa.