JEREMÍAS 39:1 - Dios Rimashca Shimicunami

¹ Jatun mandaj Sedequiasca, Judá llajtataca ñami iscun huatata mandacurca. Chai huatapaj chunga quillapimi, Babilonia llajtata jatun mandaj Nabucodonosorca, paipaj tucui soldadocunahuan shamushpa, Jerusalén pueblo muyundijta shayarishpa macanacuita callarircacuna.

JEREMÍAS 39:1 Iomraidhean Croise

2 CRÓNICAS 36:17

Mandaj Diosca yallitaj p'iñarishca cashpami, Judapi causajcunata llaquichichun caldeocunata jatun mandajta cacharca. Pai shamushpami q'uipa huiñaicunataca, Diospaj huasi ucullapitaj espadacunahuan huañuchirca. Mosocunatapish, solteracunatapish, yuyajcunatapish, ungushcacunatapishmi tucuicunata chai jatun mandajpaj maquipi churarca.

JEREMÍAS 32:1

Jatun mandaj Sedequías, Judá llajtata ña chunga huatata mandacujpica, Nabucodonosorca Babilonia llajtataca, ñami chunga pusaj huatata mandacurca. Mandaj Dios chai huatapi Jeremiasta huillachishca shimicunami caipica tiyacun.

JEREMÍAS 34:1

Babilonia llajtata jatun mandaj Nabucodonosorca, pai mandacushca tucui llajtacunamanta ch'ican ch'ican runacunapuramanta tandachishca paipaj tucui soldadocunandijmi Jerusalenpi causajcunahuanpish, tucui caishuj pueblocunapi causajcunahuanpish macanacurca. Mandaj Dios chai punllacunapi Jeremiasta huillachishca shimicunami caipica tiyacun.

JEREMÍAS 34:22

Cunan rishca cajpipish, ñucallatajmi cutin cai puebloman tigrachimusha. Paimi cancunahuan macanacushpa mishanga, cai pueblotaca ninahuanmi tucui rupachinga. Chashna rurashpami, cai Judá llajta pueblocunataca shuj runallatapish mana saquishpa, shitashca, chushajta saquisha ninmi Mandaj Diosca” nircami.

JEREMÍAS 42:18

Tucuita Mandaj, israelcunapaj Diosca cashnapishmi nin: Cancuna Egipto llajtaman rijpica, Jerusalenpi causajcunata ñuca yallitaj p'iñarishpa jatunta llaquichishca shinallatajmi, cancunatapish yallitaj llaquichisha. Chaipimi cancunaca tucuicuna millanachina, mancharina, shujtajcunatapish paicuna shina tucushca alli canman nina, chanzata rurashpa asina tucunguichij. Cai llajtataca, manataj cutin ricunguichijchu ninmi.

JEREMÍAS 52:1

Sedequiasca, ishqui chunga shuj huatayuj cashpami, Jerusalenpi Judá llajtata mandai callarirca. Paica chunga shuj huatatami, Jerusalenpi mandarca. Paipaj mamaca, Libna pueblomanta caj Jeremiaspaj ushushi Hamutal shutimi carca.

JEREMÍAS 6:6

Tucuita Mandaj Diostajmi, paicunata cashna mandashca: “Yuracunata p'itishpa Jerusalén pueblo muyundij torrecunata rurashpa macanacuichij. Cai pueblopi causajcunaca tucuicuna yallitaj millaicunami. Chaimantami paicunataca llaquichinataj canguichij.

EZEQUIEL 33:21

Ñucanchijca ñami chunga ishqui huatata prezu tiyarcanchij. Chunga ishqui huata chunga quillapaj pichca punllapimi, ñapish shuj runaca Jerusalenmanta miticushpa ñucapajman shamurca. Chai runaca: “Pueblotaca shujtajcuna quichunmi” nishpami huillarca.

EZEQUIEL 4:3

Shinallataj tablajlla fierrota japishpa, canhuan chai pueblotatajlla rurashcahuan chaupipi pircata shina churangui. Chai q'uipaca, cambaj ñahuita chai ladoman churangui. Chai fierroca can ama ricuchun, jarca shinami canga. Israelcuna ricuchunmi, chashna rurachun nini nircami.

EZEQUIEL 40:1

Ñucanchijca ñami ishqui chunga pichca huatacunata prezu causacurcanchij. Chai huata callari quillapaj chunga punllapimi, Mandaj Diosca paipaj maquita ñuca jahuapi churashpa israelcunapaj llajtaman pusharca. Jerusalén pueblota quichushcapish, ñami chunga chuscu huata tucurca.

EZEQUIEL 5:2

Macanacuna punllacuna ña tucurijpica, quimsapi chaupishca shuj mirgataca, chai pueblo chaupillapitaj ninahuan rupachingui. Caishuj mirgataca, chai pueblo muyundijpi espadahuan p'itingui. Caishuj mirga ajchataca, tsirapashpa huairapi cachangui. Ñucami paicunataca espadahuan catishpa risha.

ZACARÍAS 8:19

“Tucuita Mandaj Dios ñucaca, cashnami nini: Judá llajtapi causajcunapajca chuscu quillapi, pichca quillapi, canchis quillapi, chunga quillapi ayunanaca jatun micuita rurashpa cushicuna punllacunami tucunga. Shinallataj jatun fiestata rurashpa micuna punllapishmi tucunga. Shina cajpica cancunaca cashcata ruranatapish, sumajta causanatapish c'uyashpa causaichijlla ninimi” nircami.

DEUTERONOMIO 28:36

Mandaj Diosca cancunapish cancunapaj ñaupa yayacunapish mana rijsishca llajtamanmi cancunatapish cancunata mandaj cachun cancunapaj jahuapi churashca mandajtapish apanga. Chai llajtapimi cancunaca caspimanta, rumimanta rurashca dioscunapaj ruranacunata ruranguichij.