JEREMÍAS 3:16 - Dios Rimashca Shimicunami

¹⁶ Mandaj Diosca cashnapishmi nin: “Cancuna mirarishpa, cai llajtapi achca huahuacunayuj tucui punllacunapica: Mandaj Dioshuan ari ninacushcata huaquichina cajón nishpa parlanacushcaca, ña mana uyaringachu. Chai cajón tiyashca canman ninallatapish, mana yuyangacunachu. Chai cajontaca mana yuyaringacunallapishchu, ña mana minishtingacunapishchu. Chai cajón shina shujtajtapish, ña mana rurana cangachu.

JEREMÍAS 3:16 Iomraidhean Croise

ISAÍAS 60:22

Uchillaca huaranga huarangami tucunga. Uchilla llajtaca imatapish rurai tucuj pueblomi tucunga. Mandaj Dios ñucami ñuca chashna rurashami nishca punllapi chashna rurajpi chaica utca pajtanga.

ISAÍAS 61:4

Ñaupa punllapi urmashca Jerusalentaca cutinmi shayachingacuna. Uni huatacunata shitashca cashcataca cutinmi jatarichingacuna. Urmachishca pueblocunataca cutinmi allichingacuna. Huahua huahuacunamantapacha rumi montonlla cashcacunatapish cutinmi allichingacuna.

ISAÍAS 65:17

Riquichij, ñucaca mushuj jahua pachata, mushuj cai pachatami ruragrini. Ñaupaman imapish tucushcataca mana yuyaringacunachu. Pipaj yuyaimanpish chaicunaca ña mana shamungachu.

JEREMÍAS 3:17

Ashtahuanpish chai punllacunapica Jerusalentamari: Mandaj Dios mandashpa causana pueblo ningacuna. Tucui llajtacunamanta Jerusalenman shamushpamari, Mandaj Dios ñucataca alabangacuna. Ña mana paicunapaj millai sinchi shungucuna yuyachishcata rurangacunachu.

JEREMÍAS 30:19

Ñucami paicunataca achcata mirachisha. Chaimantaca mana tucuchishca cangachu. Ñuca mirachishcamantaca mana pi huañuchishca cangachu. Paicunaca ñucata diosolopagui nishpa alabangacunami. Tucui llajta cushicushpa cantashcami uyaringa.

JEREMÍAS 31:27

Mandaj Diosca cashnami nin: “Shamuj punllacunapica Israel llajtapipish, Judá llajtapipish runacunata, animalcunata mirachishpa jundachishami.

JEREMÍAS 31:8

Ñucami paicunataca janaj llajtamanta tigrachimusha, tucui cai pacha llajtacunamantami tandachimusha. Ñahui mana ricujcunatapish, patojocunatapish, chichu huarmicunatapish, llullu huahuayujcunatapish tucuicunatamari tandallata caiman tigrachimunga.

JEREMÍAS 7:4

Caica Mandaj Diospaj huasimari, caica Mandaj Diospaj huasimari, caica Mandaj Diospaj huasimari nishpa cancunata inquitajcunapica, ama shunguta churaichijchu.

EZEQUIEL 15:5

Manaraj rupashpapish, imata ruranapajpish mana valircachu, ninapi tucui rupashpacarin ¿imapajtaj valingari?

EZEQUIEL 37:26

Shinallataj sumajta causanatami ari ninacushun, chai ari ninacushcaca huiñaipajmi canga. Paicunataca chaipi causachun churashpaca, yallitaj achcatami mirachisha, ñuca huasitapish huiñaipajmi paicunapaj chaupipi shayachisha.

AMÓS 9:9

Israelcunataca, ajichupi trigota shushushca shina cachunmi shujtaj llajtacunapi llaquita apachun cachasha. Chaipimi paicunaca, racu granolla ajichupi saquirij shina saquiringacuna. Shuj granollapish allpamanca mana urmangachu.

SOFONÍAS 3:11

Cancunapaj chaupimantaca, jatun tucushpa cushicujcunataca anchuchishami. Chaimantami ñucapajlla urcupica, ña mana cutinca jatun tucunguichij. Chashnami chai punllapica, cancunaca millaita rurashpa ñucata c'ariyashcamanta ña mana pingachishca canguichij.

Mateo 1:11

Josiaspaj huahuacunaca Jeconiaspish, chaishuj huauquicunapishmi carca. Paicuna causai punllacunami, Babiloniaman prezu aparcacuna.

Mateo 3:9

Cancunapaj ucu yuyaillapi: “Ñucanchijca Abrahamtami yayata charinchij nishpa” ama nirichijchu. Cashnami nini: Taita Diosca, cai rumicunatapish, Abrahampaj huahua huahuacuna cachun rurai tucunmi.