JEREMÍAS 27:10 - Dios Rimashca Shimicunami

¹⁰ Paicunaca cancunapaj llajtamanta cancunata llujshichishpa cachangapajllamari, llullashpalla imatapish huillancuna. Ñuca llujshichishpa cachajpi, cancuna chingarichunllamari chashna nincuna.

JEREMÍAS 27:10 Iomraidhean Croise

ÉXODO 22:18

Bruja huarmitaca ama causachun saquinguichij.

JEREMÍAS 14:14

Chashna nijpimi, Mandaj Diosca cashna nirca: “Chai huillajcunaca llullashpallamari, ñuca shutipi chashna huillancuna. Paicunataca manapish ñuca huillanaman cachashcanichu, imallatapish mana nishcanichu. Manapish muscuipi shina ñuca ricuchishcata ricuncunachu. Ashtahuanpish adivinashpallamari, paicunapaj shungu yuyashcata huillashpa cancunataca umacuncuna.

JEREMÍAS 23:16

Tucuita Mandaj Diosca cashnapishmi nin: “Chaimanta chai huillajcuna huillashcataca ama uyaichijchu. Paicunaca mana ñuca shimimanta llujshishca shimicunata huillancunachu. Ashtahuanpish cancunapaj yuyai samarichun llullanllacunamari. Paicunapaj shungu yuyashcallatamari muscuipi ricushcata shina huillancuna.

JEREMÍAS 23:25

Ñucaca chai huillajcunataca: Muscunimari, muscunimari nishpa, llullashpalla ñuca shutipi huillajtami uyani.

JEREMÍAS 27:14

Chai Babilonia llajtata jatun mandajta servijcunaca mana tucunguichijchu nishpa huillajcunataca ama uyaichijchu. Paicunaca llullacunllamari.

JEREMÍAS 27:15

Paicunataca mana ñuca cacharcanichu. Llullashpallamari ñuca shutipi huillancuna. Chashna cashcamantaca cancunatapish, cancunaman huillacuj huillajcunatapishmi caimanta llujshichishpa, caita chaita cachasha. Chashna cachajpica, chingaringuichijmi ninmi Mandaj Diosca” nircanimi.

JEREMÍAS 27:16

Shinallataj curacunatapish, tucui chaipi cajcunatapish cashnami nircani: “Mandaj Diosca cashnami nin: Mandaj Diospaj huasimanta apashca charinacunataca, ñallami chai Babilonia llajtamantaca tigrachingacuna nishpa cancunaman huillacuj huillajcunataca ama uyaichijchu. Paicunaca llullanllamari.

JEREMÍAS 28:11

Chai q'uipaca Hananiasca, tucui chaipi cajcunapaj ñaupajpimi cashna nirca: –Mandaj Diosca cashnami nin: Babilonia llajtata jatun mandaj Nabucodonosor churashca yugotaca, tucui llajtacunapaj cungamanta anchuchishpami, cai yugota p'aquishca shina p'aquigrini. Cunanmanta ishqui huatallapimi chaita ruragrini ninmi– nijpica, Jeremiasca rircallami.

JEREMÍAS 28:16

Chaimanta Mandaj Diostajmi cashna nin: Canca paicunamanca ñucata c'ariyashpa shayarina yuyaitamari cushcangui. Chaimanta cantaca cai pachamanta anchuchigrinimi. Cai huatallatajmi huañungui ninmi– nircami.

JEREMÍAS 32:31

Cai pueblopish shayachi callarimantapacha cunancama, ñucata p'iñachishpallami tiyan. Chaimantami cunanca ñuca ñaupajmanta anchuchigrini.

JEREMÍAS 8:19

¡Aij, ñuca llajtapi causajcunalla! Manchanayajta caparirishcamari carucunamanta uyaricun. “¿Mandaj Diosca Sionmantaca illanchu imatagari? Sionta Jatun Mandajca ¿ñachu mana chaipi tiyacun imatagari?” nincunamari. Mandaj Diosca: “¿Imamantataj rurashcalla shujtaj yanga dioscunata cungurishpa ñucata p'iñachircacuna?” nircami.

LAMENTACIONES 2:14

Cancunaman huillajcunaca cancuna juchata ruracujta jarcashpaca, cancuna prezu rinata jarcanmanmari carca. Chaipaj randica manapish cashcallatamari Dios ricuchishcata shina huillashpa umarcacuna. Chashna llullata huillashpamari, cancunata pandachircacuna.

DANIEL 4:7

Chaipica jatun yachajcunapish, luzerocunamanta yachajcunapish, caldeocunapish, adivinocunapishmi ñucapajman shamurcacuna. Paicunaman ñuca muscushcata parlajpipish chai imata nisha nishcataca, mana huillai tucurcacunachu.

ZACARÍAS 10:2

Terafín nishca dioscunaca llullallatami huillachishcacuna. Adivinajcunapish llullallatami ricushcacuna. Paicunaca yanga muscuicunallatami huillashcacuna. Paicuna cushichishcapish yangallami. Chaimantami runacunaca ovejacuna shina yanga purincuna. Paicunaca michijta mana charishcamantami, llaquilla causancuna.

MALAQUÍAS 3:5

Tucuita Mandaj Diostajmi cashna nini: Ñucami cancuna imalla rurashcacunata ricuj shamusha. Chai punllapimi yumbucunatapish, huainayajcunatapish, llullashpa huillajcunatapish, trabajajcunaman cullquita mana tucui pagajcunatapish, viudacunata, yaya mama illajcunata p'iñajcunatapish, caru llajta runacunata llaquichijcunatapish, ñucata mana manchajcunatapish llaquichisha.

DEUTERONOMIO 18:10

Cancunapuramanta maijanpish rurashcalla dioscunaman paipaj churita cashpa, ushushita cashpa cushpa rupachijca ama tiyachun. Shinallataj adivinaj canata, brujo canata, yumbu canata, muspachij canata yachashpa rurajcunaca ama tiyachun.