JEREMÍAS 24:10 - Dios Rimashca Shimicunami

¹⁰ Paicunapaj ñaupa yayacunamanpish, paicunamanpish cushca cai llajtapica shujllatapish mana saquishachu. Jatun macanacuita, yaricaita, ungüita cachashpami tucui chingachisha” ninmi.

JEREMÍAS 24:10 Iomraidhean Croise

1 REYES 14:15

Asera huarmi diostajllata rurashpa Mandaj Diosta p'iñachishcamantaca israelcunataca yacupi tiyaj carrizota shina caiman chaiman cuyuchishpami, paicunapaj ñaupa yayacunaman cushca allpamanta anchuchishpa Éufrates yacu chaininijman caita chaita cachanga.

ISAÍAS 51:19

Cai ishqui jatun llaquimari cantaca japirca: Ñutuchishca chingachishca cashpa yaricaihuan cana, espadahuan huañuchishca canami tucushca. ¿Pitaj cantaca llaquingari? ¿Pitaj cantaca cushichingari?

JEREMÍAS 14:12

Paicuna mana micushpa ñucata mañajpipish, manataj uyashachu. Animalcunata huañuchishpa tucui rupachijpipish, imata cujpipish manataj chasquishachu. Ashtahuanpish espadahuan, yaricaihuan, jatun ungüihuanmi tucuchisha” nircami.

JEREMÍAS 15:2

¿Maimantaj rishunri? nijpica, cashna ningui: Mandaj Diosca cashnami nin: Ungüihuan huañuna tiyacujcunaca, ungüihuan huañugrichijlla. Espadapi huañuna tiyacujcunaca, espadapi huañugrichijlla. Yaricaihuan huañuna tiyacujcunaca, yaricaihuan huañugrichijlla. Prezu apana tiyacujcunaca, prezu richijlla ninmi ningui” nircami.

JEREMÍAS 16:4

Mancharina ungüicunahuanmi huañungacuna. Paicunamantaca pi mana huacangachu, mana pambangacunallapishchu. Majada shinallami allpa jahuapi shitashca siringacuna. Shinallataj espadahuanpish, yaricaihuanpishmi huañungacuna. Paicunapaj aichacunaca huairata purij pajarocunapaj, sacha animalcunapaj micunami canga” nircami.

JEREMÍAS 19:7

Chai pambapimi Judá llajtapi causajcuna, Jerusalenpi causajcuna imata yuyarinacushcataca chingachisha. Paicunata p'iñashpa huañuchingapaj shamuj runacunapaj maquipi churashpami, espadahuan huañuchichisha. Chai huañushca aichacunataca huairata purij pajarocunaman, sachapi causaj animalcunamanmi carasha.

JEREMÍAS 21:9

Cai pueblopi saquirijcunaca espadapi cashpa, yaricaihuan cashpa, ungüihuan cashpapish huañungacunatajmi. Ashtahuanpish caimanta llujshishpa, cancunata muyujta chapacuj caldeo soldadocunapajman rishpaca causangacunami. Quiquin chaquihuan llujshishpa, paicunapaj maquipi yaicugrijcunaca huañunallamantapish quishpiringuichijmi.

JEREMÍAS 27:8

Maijan runacuna, mana cashpaca maijan llajta, chai Babilonia llajtata jatun mandaj Nabucodonosorpaj yugota mana aparisha nijpica, chai llajtataca jatuntami llaquichisha. Espadahuan, yaricaihuan, ungüihuanmi llaquichisha. Chashna rurashpami paipaj maquillapitaj tucuchisha. Mandaj Diostajmi chashna nini.

JEREMÍAS 29:17

Tucuita Mandaj Diosca cashnami nin: Ñucaca paicunapajca espadata, yaricaita, ungüitapishmi cugrini. Mana micui tucuipaj yallitaj ismushca higocunata shinami ruragrini.

JEREMÍAS 29:18

Espadahuan, yaricaihuan, ungüihuanmi llaquichigrini. Tucui cai pacha llajtacunamanmi, mancharinapish, chanzata rurashpa asinapish, c'amishpa pingachinapish cachun cugrini. Shinallataj pi llaqui tucuchun nishpaca, paicuna shina tucushca alli cachun ningacunami. Ñuca mai llajtaman shitajpipish, chashnami canga ninmi.

JEREMÍAS 32:24

Cunanca caldeocunaca mishashpa japingapajmari, cai pueblo tucui muyundijta caspicunahuan arietecunata rurancuna. Jatun macanacuipi huañushpa tucurishcamantapish, yaricaimantapish cai puebloca chai caldeocunapaj maquipi urmagrinca. Mandaj Dioslla, can huillashca ña pajtacujtaca canllataj ricunguimi.

JEREMÍAS 32:25

¡Mandaj Jatun Dioslla!, cai llajtataca caldeocunapaj maquipi churashca jahuaca ¿imapajtaj ñucataca cambaj familia charishca allpataca cullquihuan randishpa ricujcunata churai nihuarcangui?” nishpami Diosta mañarca.

JEREMÍAS 34:17

Cancuna chashna rurashcamantami, Mandaj Diosca cashna nin: “Cancunaca ñucata mana cazushpami, cancunapaj familiacunataca servichicushcamanta mana cacharishpa cachanguichij. Chaimantami ñucapish espadahuan huañuchijcunatapish, jatun yaricaitapish, ungüitapish cancunata llaquichichun cachagrini. Chai jatun llaquihuanmi cancunataca, tucui cai pacha llajtacunapaj chaupipi jatunta pingachigrini. Ñuca, Mandaj Diostajmi chashna nini.

JEREMÍAS 42:17

Egipto llajtaman rinata yuyarishpa chaipi causagrijcunaca, tucuicunami espadapipish, yaricaihuanpish, jatun ungüihuanpish huañunguichij. Shujllapish mana causaj saquiringuichijchu. Ñuca cancunapaj cachashca tucui llaquicunamantaca, shujllapish manataj quishpiringuichijchu ninmi.

JEREMÍAS 42:22

Chaimanta cancuna causagrinata munashca llajtapica espadapipish, yaricaihuanpish, jatun ungüihuanpish huañunguichijtajmi. Chaitaca cunantajmi cancunaman huillani” nircami.

JEREMÍAS 5:12

Mandaj Diosca mana tiyanchu nishpami cashna nincuna: “Mandaj Diosca mana tiyanchu. Ñucanchijtaca ima llaqui mana japingachu. Pi mana espadahuan huañuchingapaj shamungachu, yaricaipish mana tiyangachu.

JEREMÍAS 9:15

Chaimanta cunanca tucuita Mandaj, can israelcunapaj Diostajmi cashna nin: “Cai runacunamanca ajenjotami cashtuchigrini, hielhuan chagrushca yacutami ubyachigrini.

JEREMÍAS 9:16

Shinallataj paicunapaj yayacunapish, paicunapish mana rijsishca llajtacunamanmi paicunataca caita chaita cachagrini. Maipi cajpipish, tucuringacamami espadahuan huañuchichisha” ninmi.

EZEQUIEL 33:27

Paicunamanca cashnapish ningui: Mandaj Jatun Diosca cashnami nin: Ñucaca causacunimi, chai llaquinayaj llajtapi causacujcunataca espadahuanmi huañuchichisha, urcucunapi causacujcunataca p'iña animalcunamanmi carasha, jatun patacunayuj pueblocunapi, jatun jutcucunapi causajcunataca jatun ungüihuanmi huañuchisha.

EZEQUIEL 6:11

Mandaj Jatun Diosca cashnapishmi nirca: “Cambaj maquicunahuan huajtarishpa, chaquicunahuan jaitarishpa cashna ningui: Cai tucui millaita ruraj israelcunalla, ¡aij imachari tucunguichij! ningui. Paicunataca espadapish, yaricaipish, ungüipishmi huañuchinga.

EZEQUIEL 7:15

Canllamantaca espadami shamunga, ucupica ungüipish, yaricaipishmi tiyanga. Urcupi cajcunataca espadahuanmi huañuchinga, pueblo ucupi cajcunataca yaricaipish, ungüipishmi tucuchinga.

DEUTERONOMIO 28:21

Cancunapaj cachun cancuna japigricun llajtamanta tucui chingachingacamami, Mandaj Diosca cancunapaj jahuamanca huañuchij ungüita cachanga.

Apocalipsis 6:8

Chaita ricushpaca, shuj quillu caballotami ricurcani. Chai caballopi tiyarishcaca, Huañuchij shutimi carca. Hadespish caticurcami: Paicunamanca cai pachata chuscupi chaupishca shuj partetaca jatun macanacuihuan, yaricaihuan, jatun ungüihuan, cai pachapi millai animalhuan huañuchi tucunatami curca.