JEREMÍAS 23:2 - Dios Rimashca Shimicunami

² Israelcunata Mandaj Diosca paipaj agllashcacunata michijcunataca cashnami nin: “Cancunamari ñuca ovejacunata cuidanapaj randica manchachishpa caita, chaita cachashcanguichij. Cancunataca chashna millaicuna cashcamanta llaquichigrinitajmi. Ñuca, Mandaj Diostajmi chashna nini.

JEREMÍAS 23:2 Iomraidhean Croise

ÉXODO 32:34

Cunanca israelcunata ñuca maiman pushashpa richun nishcaman pushashpa rilla. Ñuca angelmi canta ñaupashpa ringa. Paicunata llaquichina punlla chayajpimi, paicunapaj juchamantaca llaquichisha– nircami.

JEREMÍAS 10:21

Paicunata michijcunamari ch'ahuan shungu tucushpa, Mandaj Diostaca mana mashcarcacuna. Chaimantamari llaqui tucuncuna. Cunanca paicunapaj tucui oveja canllamari caita chaita rincuna.

JEREMÍAS 11:22

Tucuita Mandaj Diosca cashnami nirca: “Ñucami paicunataca llaquichigrini. Chairaj runacunaca espadapimi huañungacuna. Huambraraj churicunahuan, ushushicunahuanca yaricaihuanmi huañungacuna.

JEREMÍAS 13:17

Cancuna jatun tucushpa caita mana uyajpica imatataj rurashapish, cancunamantaca pacallapi huacashpa saquirishatajchari. Mandaj Diospaj oveja canllata prezu apajpica, ñuca ñahuicuna yacuyashpa tucuringacama jatunta huacacushallatajchari.

JEREMÍAS 13:20

Janaj lado llajtamanta shamujcunata huichilla ricuichigari. Jatun canlla, sumaj ovejacunatamari canmanca curcani. ¿Chai ovejacunaca maipitagari?

JEREMÍAS 13:21

Jerusalén, canhuan unita alli apanacushcacunata canta mandachun Dios churajpica ¿imatataj yuyanguiman? ¿Manachu cambaj shungutaca huachana nanai japishca huarmita shina nananga imashi?

JEREMÍAS 17:10

Mandaj Dios ñucami tucuicunapaj shunguta, yuyaita callarishpa ricuni, yachani. Tucuicunamanmi imallata rurashcamantapish, ima shina causashcamantapish chasquina cashcatataj cusha” ninmi.

JEREMÍAS 21:12

Davidpaj tucui huasi ucupuracunataca, Mandaj Diosca cashnami nin: Cada tutamanta mandanapi tiyarishpaca, huajchacunata llaquichijcunapaj maquimanta mitsashpa allita ruraichigari. Ñataj cancuna mana chashna rurajpica, cancuna millaita rurashcamanta ñuca yallitaj p'iñarijpi nina lunyanman. Chaitaca pi mana huañuchi tucungachu ninmi.

JEREMÍAS 23:34

Shinallataj maijan huillajpish, maijan curapish, mana cashpaca caipi causajcunapuramanta maijan cashpapish: Mandaj Diosmi cashna huillaj cachan nijtaca paitapish, paipaj familiacunatapishmi jatunta llaquichisha ninmi.

JEREMÍAS 44:22

Ashtahuanpish Mandaj Diosca cancuna yallitaj millaita rurajpimi, cancunata ña manataj chari tucurca. Chai millananacunata rurashpa causajpimari, ña manataj ricusha nirca. Chaimantami cancunapaj llajtataca tucui ima tiyashcata tucuchishpa, jatun mancharinata rurarca. Chaimantami chai llajtaca, cunan punllacunacama Dios mana alli nishpa shitashca, shuj runallapish illaj siricun.

JEREMÍAS 5:29

Chashna rurashcamantaca ¿manachu llaquichisha imatagari? Chashna millai runacunamanca ¿manachu paicuna chasquina cashcata cusha imatagari? Mandaj Diostajmi chashna nini.

JEREMÍAS 5:9

Cashna juchamantaca ¿manachu llaquichina cani imatagari? Chashna millai runacunataca ¿manachu p'iñarishpa ñacachisha imatagari? Mandaj Diostajmi chashna nini.

JEREMÍAS 8:12

Millaicunata rurashcamantaca ¿pingarincunachu imatagari? Mana yangamanta nicunichu, paicunaca manataj pingarincunachu. Ashallatapish mana pingarincunachu. Pingarina ima cashcatapish mana yachancunachu. Chaimanta ñuca llaquichi punllapica, caishujcuna shinallatajmi urmangacuna” ninmi Mandaj Diosca.

EZEQUIEL 34:5

Paicunaca michij illashcamantami, musparishpa caita chaita purincuna. Sachapi causaj p'iña animalcuna japishpa micunallami puricuncuna, caita chaitami rishcacuna.

OSEAS 2:13

Baal nishca dioscunaman inciensota rupachishcamantaca llaquichishatajmi. Ñucata cungarishpa ashtahuanpish sortijascunahuan, ima aparina sumajcunahuan sumajta allichirishpa paita c'uyajcunata catishpa rishcamantaca llaquichishatajmi” ninmi Mandaj Diosca.

MIQUEAS 7:4

Paicunapura alli nishca runaca casha shinamari. Allita ruraj runapish, zarza casha yuracuna shinamari. Chapajcuna huillashca shinallatajmari llaquichina punllaca pajtamucun. Cunanca cambajca, caita chaita musparinami canga.

ZACARÍAS 10:3

“Chaita ricushpami, chai michijcunahuanca nina lunyacuj shina p'iñarini. Paicunata pushajcunatapish llaquichishatajmi. Shina cajpipish tucuita Mandaj Diosmi, pai agllashca Judá llajtapi causajcunataca ricugringa. Paicunataca paipaj alli nishca caballota shinami macanacuipica churanga.

ZACARÍAS 11:16

Riqui, cai llajtapimi chashna mana alli michijta churagrini. Chai michijca chingarishcacunatapish mana ricugringachu, uchillacunatapish mana mashcagringachu. Chaqui p'aquirishcatapish mana jambingachu, shaicushcacunatapish mana rigra jahuashpa apangachu. Ashtahuanpish huirayashca oveja aichataca pairajmi micunga. Sillucunatapish p'aquingami.

Mateo 25:36

Churana illajlla ñuca cajpipish, churachircanguichijmi. Ungushca cajpipish, carcelpi tiyacujpipish ñucataca ricuj shamurcanguichijmi” ningami.

Mateo 25:43

Shujtaj llajtamanta shamushpa ñuca puricujpipish, mana chasquircanguichijchu. Churana illajlla ñuca cajpipish, mana churachircanguichijchu. Ungushca cajpipish, carcelpi tiyacujpipish ñucataca mana ricuj shamurcanguichijchu” ningami.

Santiago 1:27

Dios Yayata crijtaj cashcata paipaj ñaupajpi ricuchingapajca caitami rurana: Yaya mama illajcunata, llaquihuan caj viudacunatapish ayudana, cai pacha mapacunamantapish huaquichirinami.