JEREMÍAS 22:9 - Dios Rimashca Shimicunami

⁹ Shina nijpica shujcunaca: Caipi causajcunami paicunata Mandaj Dioshuan ari ninacushcata p'aquircacuna. Chaimantaca shujtajcunapaj dioscunatamari adorashpa, chaicunata servircacuna ningacunami” ninmi.

JEREMÍAS 22:9 Iomraidhean Croise

1 REYES 9:8

Cai huasica sumaj nishca cashca cashpapish, llaquinayaj siricujta ricushpaca, maijanpish chaita pasajca mancharishpa asishpami: ¿Ima nishpashi Mandaj Diosca cai llajtatapish cai huasitapish chashna rurarca? ningacunami.

2 REYES 22:17

Paicunallataj ñucata saquishpa shujtajcunapaj dioscunaman cushpa inciensota rupachishpa, paicunapaj maquihuan tucui imatapish rurashpa ñucata yallitaj p'iñachishcamantaca cai llajtapi causajcunahuanca, ñucaca nina sindirij shinami yallitaj p'iñarircani. Chai ninaca manataj huañungachu.

2 CRÓNICAS 34:25

Paicunallataj ñucata saquishpa, shujtajcunapaj dioscunaman sacrificiota cushpa, paicunapaj maquihuan tucui imatapish rurashpa ñucata yallitaj p'iñachishcamantaca cai llajtapi causajcunahuanca yallitajmi p'iñarircani. Cancunahuanca manataj alli tucushachu ninmi.

JEREMÍAS 11:10

Tucuicunamari ñuca rimashcata mana cazushun nishpa, shujtaj dioscunata mashcashpa chaicunata cungurij paicunapaj ñaupa yayacuna rurashca juchallatataj rurancuna. Chashna rurashpamari israelcunapish, Judá runacunapish paicunapaj ñaupa yayacunahuan ñuca ari ninacushcata p'aquishcacuna” ninmi.

JEREMÍAS 11:3

Can Jeremiasca cashna ni: Israelcunata Mandaj Diosca cashnami nin: Ñucahuan ari ninacushca cai shimicunata mana cazujcunaca, llaqui tucushca cachun.

JEREMÍAS 16:11

Chashna nijpica cashna ningui: Mandaj Diosca cashnami nin: Cancunapaj yayacunamari ñucata shitashpa, shujtajcunapaj dioscunapajman rishpa chaicunata cungurircacuna. Chaicunatami servircacuna. Chashna ñucata saquishpami, ñuca mandashcatapish mana pajtachircacuna.

JEREMÍAS 50:7

Ñuca ovejacunataca maipi puricujta japishpapish huañuchircacunallami. Paicunata p'iñajcuna chashna huañuchishpaca: Caicunata huañuchishcamanta mana juchachishca cashunchu. Paicunallatajmari paicunata cuidashpa pushashpa causaj Mandaj Diosta mana cazurcacuna. Paicunapaj ñaupa yayacuna shunguta churashca Mandaj Diostamari p'iñachircacuna nircacunami.

JEREMÍAS 9:13

Mandaj Diosllatajmi cashna nin: “Ñucaca paicunapaj maquipimi mandashcacunata curcani. Chaitamari saquincuna. Ñuca rimajpipish, mana uyancunachu. Mana ñuca mandashca shina causancunachu.

EZEQUIEL 12:16

Paicunapuramantaca ashacunallatami, espadahuan, yaricaihuan, ungüihuan huañunamantaca quishpichisha. Paicunami mai llajtaman chayashpapish: Ñucanchijca yallitaj millaitami rurashcanchij nishpa, tucuita huillangacuna. Chaimantami ñucataca, Mandaj Diostaj cashcatapish yachangacuna” nircami.

EZEQUIEL 14:23

Paicuna ima shina causashcata, imata rurashcata ricushpami cushicunguichij. Chashna rurashcata ricushpami, chai pueblopi causajcunataca mana yangamanta llaquichishcata yachanguichij” ninmi Mandaj Diosca.

EZEQUIEL 39:23

Shujtaj llajtapi causajcunaca, israelcuna ñucata c'ariyashpa juchata rurashcamanta prezu apashcatami yachangacuna. Paicunamanta ñuca ñahuita anchuchishpa, p'iñajcunaman cushpa, espadahuan huañuchichishcatami yachangacuna.

EZEQUIEL 5:15

Ñuca yallitaj p'iñarishpa canta llaquichicujpica, cambaj muyundij llajtacunapi causajcunapajca chanzata rurashca, c'amishca, llaquichishca, jatun mancharinami tucungui. Mandaj Dios ñucatajmi chashna nini.

DEUTERONOMIO 29:24

Shujtaj llajtacunapish: “¿Mandaj Diosca ima nishpashi chai llajtataca chashna rurarca? Mandaj Dios chai llajtahuan nina sindirij shina yallitaj p'iñarishcaca ¿imatashi nisha nin?” nishpami tapungacuna.