JEREMÍAS 22:3 - Dios Rimashca Shimicunami

³ Mandaj Diosca cashnami nin: Cashcata rurashpa, alli mandaichigari. Huajchacunataca llaquichicujcunapaj maquimanta mitsaichigari. Ama pita umaichijchu. Shujtaj llajtamanta shamushcacunatapish, yaya mana illaj huahuacunatapish, viudacunatapish ama imata quichuichijchu. Cai llajtapica, ama manapish ima millaita rurajcunata huañuchishpa yahuarta jichaichijchu.

JEREMÍAS 22:3 Iomraidhean Croise

2 SAMUEL 23:3

Israelcunapaj Taita Diosmari rimashca. Israelcunapaj pacatucuna Rumimi ñucaman cashna riman: Runacunapaj chaupipica, cashcata rurashpa mandajmi tiyanga. Taita Diosta manchashpami mandanga.

2 REYES 24:4

Ashtahuancarin manapish ima mana allita rurajcunapaj yahuarta jichachishpa Jerusalenpi yahuarta jundachishcamantapishmi, Mandaj Diosca judacunataca mana perdonashpa chashna llaquitaca cacharca.

JOB 22:9

Viuda huarmicunatapish chushaj maquitami tigrachishpa cacharcangui. Yaya mama illaj huahuacunatapish maquita p'aquircanguimi.

JOB 24:9

Yaya illaj huahuacunatapish chuchucujtami quichuncuna. Huajcha cashcata ricushca jahuami prendatapish apashpa rincuna.

SALMOS 68:5

Paica yaya mama illajcunapaj yayami, viudacunapaj randi shayarijmi. Taita Diosca paipajlla huasipi causajmi.

SALMOS 82:4

Llaquihuan cajcunata, ima illajllacunata cacharichichigari. Millaicunapaj maquimanta cacharichichigari.

SALMOS 94:21

Cashcata rurajta huañuchingapajmi tandanacushpa yuyarincuna. Manapish ima millaita rurajtami huañunami can nincuna.

SALMOS 94:6

Viudacunata, shujtaj llajtamanta cajcunatamari huañuchincuna. Yaya mama illaj huahuacunatamari causaita quichuncuna.

ÉXODO 22:21

Shujtaj llajtamanta cajcunatapish ama umanguichijchu, ama llaquichinguichijchu. Cancunapish Egipto llajtapi cashpaca, caru llajtamanta cajcunallatajmi carcanguichij.

ÉXODO 22:22

Viudacunatapish, yaya mama illajlla huahuacunatapish pita ama llaquichinguichijchu.

PROVERBIOS 23:10

Ñaupaman cambaj allpa muyundijpi churashca rumicunataca, ama caishujpaj allpaman tanganguichu. Yaya mama illaj huahuacunatapish allpata ama quichunguichu.

PROVERBIOS 6:17

Jatun tucujta, llulla c'allucunata, manapish ima millaita rurajpi yanga huañuchijta,

ISAÍAS 1:23

Cancunata mandajcunaca c'ariyajcunami tucushca. Shuhuajcunapurami tucushca. Tucuicunami camarita japinallata munancuna. Tucuicunami imata cujcunapuralla tucunata munancuna. Yaya mama illaj huahuacunata llaquichicujpipish mana mitsancunachu. Viuda huarmicunata pi llaquichicujpipish paicunaca ricucunllacunami.

ISAÍAS 58:6

Ñucaca ashtahuanpish cashna ayunachunmi mandarcani. Diosta mana rijsij canapi huatashca canamanta cachariringapaj. Llaquichicushcata cacharingapaj. Llaquichicushcacuna richun cacharishpa saquingapaj. Yugoshcacunata yugota p'aquingapaj.

ISAÍAS 58:7

Yaricaihuan cajman cambaj micunata caraj cangapaj. Huasita mana charij puricujcunaman pozachij cangapaj. Lluchulla cajta ricushpa churachij cangapaj. Cambaj huauqui ima llaquihuan cajta ricushca jahua, ñahuita ama shujman churaj cangapaj ayunachunmi mandarcani. Chaitaca ¿manachu yuyaringui?

JEREMÍAS 19:4

Judá runacunamari ñucamanta anchurishpa, cai llajtatapish shujtajpaj maquipi churarcacuna. Paicunapish, paicunapaj ñaupa yayacunapish, Judá llajtata jatun mandajcunapish shujtajcunapaj dioscunamanmi inciensota cushpa rupachincuna. Shinallataj alli shungu runacunata huañuchishpapishmi, caipica yahuarta jichancuna.

JEREMÍAS 21:12

Davidpaj tucui huasi ucupuracunataca, Mandaj Diosca cashnami nin: Cada tutamanta mandanapi tiyarishpaca, huajchacunata llaquichijcunapaj maquimanta mitsashpa allita ruraichigari. Ñataj cancuna mana chashna rurajpica, cancuna millaita rurashcamanta ñuca yallitaj p'iñarijpi nina lunyanman. Chaitaca pi mana huañuchi tucungachu ninmi.

JEREMÍAS 26:16

Chashna nijpimi, mandajcunaca tucui chaipi tandanacushcacunatapish, curacunatapish, Dios ima nishcata huillajcunatapish cashna nircacuna: “Cai runaca ñucanchijta Mandaj Diostaj cachajpimi huillashca. Chashna cashcamantaca, imamanta mana huañuna canchu” nircacunami.

JEREMÍAS 5:28

Caruman achij nicujtami huirayancuna. Chashna millaicuna tucushpami, yallitaj llaquicunata rurancuna. Yaya mama illaj huahuacunapajca, ima allita mana rurancunachu. Huajchacunata llaquichicujpipish, mana mitsancunachu. Ashtahuanpish tucui paicunata quichushcahuanmi charijyancuna.

JEREMÍAS 7:23

Ashtahuanpish cashna nishpami mandarcani: Cancunaca ñuca rimashcata cazunguichij. Cancuna cazujpica, cancunapaj Dios cashami. Cancunapish ñuca agllashca runacunami canguichij. Ñuca imalla mandashcata chaitataj rurashpaca, allimi causanguichij nircanimi.

JEREMÍAS 9:24

Ashtahuanpish maijan cushicusha nishpaca, Mandaj Dios ñucata rijsishpa, ñuca ima nishcatapish cazuj cashpa, cai pachapipish ñucaca c'uyaihuan tucuicunapaj allita ricushpa, cashcata ruracujta rijsij cashpa cushicuchun. Ñucaca chaimanta cushicuchunmi munani” ninmi Mandaj Diosca.

LAMENTACIONES 3:36

manapish llaquichina runata mandajcuna llaquichichunpish, Jatun Diosca manataj ricunachinchu.

EZEQUIEL 18:12

huajchacunata, imata mana charijcunatapish llaquichij cangachari, shuhua cangachari, prendashcatapish mana cutichij cangachari, rurashcalla dioscunatapish adoraj cangachari, ima millananatapish ruraj cangachari.

EZEQUIEL 18:7

Pitapish mana llaquichinchu, divijta prendashcatapish cutichinmi. Mana shuhuanchu, yaricaihuan cajcunamanpish carajmi, churana illajllacunamanpish churachijmi.

EZEQUIEL 22:7

Paicunaca yayatapish, mamatapish p'iñarcacunami. Caru llajtamanta shamujcunatapish llaquichircacunami. Yaya mama illajtapish, viudatapish imalla charishcatapish quichurcacunami.

EZEQUIEL 45:9

Mandaj Jatun Dios ñucatajmi cashnapish nini: Israel llajtata mandajcunalla, ña chailla millaitaca ruraichigari. Huañuchinatapish, shuhuanatapish saquichigari. Ashtahuanpish imatapish allita, cashcata rurashpa causaichigari, ñuca agllashcacunata mandashpa llaquichishpa causanataca saquichigari. Mandaj Jatun Diostajmi chashna nini.

JOEL 3:19

Egiptoca tucuimi chingaringa. Edomca shitashca llaquinayaj pambami saquiringa. Paicunallataj Judá llajtapi causajcunata ima juchachina illajlla cashca jahua, huañuchishpa yahuarta jichashcamantami chashna tucungacuna.

LEVÍTICO 19:15

Maijan ima mana allita rurashcata allichichun nijpica, imata mana charij huajchapuralla ama tucunguichijchu. Achcata charijpurallapish ama tucunguichijchu. Ashtahuanpish maijanmanpish ama tucushpa, imatapish cashcata ricuchinguichij.

AMÓS 5:15

Imapish millaitaca p'iñaichij, imapish allitaca ashtahuan ruraichijlla. Juezcunapish, cashcata rurana yuyailla caichij. Cancuna chashna tucuita allita rurajpica, tucuita Mandaj Diosca Josepaj huahua huahuacuna maijan saquirishcacunallatapish llaquingapishchari.

AMÓS 5:24

Ashtahuanpish cancunaca uri ricuj yacu mana chaquirij shinapish, pugyu yacu mana chaquirij shinapishmi cashcata ruranataca mana cungarina canguichij.

MIQUEAS 3:11

Paicunata mandajcunaca camarita japishpallami, millaita rurajcunataca mana imata nincuna. Curacunapish cullquiraicullami imatapish yachachincuna. Dios ima nishcata huillajcunapish cullquiraicullami huillancuna. Chai jahuamari paicunaca: “Mandaj Diosca ñucanchijhuanmari. Ima llaquipish mana tiyangachu” nishpa, Mandaj Diospi shunguta churancuna.

MIQUEAS 6:8

Huañujlla aichayuj runalla, paica canmanca imalla alli cana cashcataca ñamari huillarca. Mandaj Diosca cantaca caillatamari rurachun mañan: “Imatapish cashcata ruraj cachun, c'uyaj cachun, llaquij cachun, cambaj Taita Diospaj ñaupajpi llaquirishpa cazuj cachunmi munan.

MALAQUÍAS 3:5

Tucuita Mandaj Diostajmi cashna nini: Ñucami cancuna imalla rurashcacunata ricuj shamusha. Chai punllapimi yumbucunatapish, huainayajcunatapish, llullashpa huillajcunatapish, trabajajcunaman cullquita mana tucui pagajcunatapish, viudacunata, yaya mama illajcunata p'iñajcunatapish, caru llajta runacunata llaquichijcunatapish, ñucata mana manchajcunatapish llaquichisha.

Mateo 23:23

Mandashcacunata quillcajcuna, fariseocuna, mishqui shimi jayaj shungucuna ¡aij cancunalla! Mentata, anista, cominotapish chungamanta shujta cujcunami canguichij. Ashtahuanpish cashcata ruranata, llaquij canata, crinatapish, chai ashtahuan alli Mandashcatarajmari saquishcanguichij. Diosman cunatapish mana saquishpami, chai Mandashcacunataraj rurana carcanguichij.

DEUTERONOMIO 10:18

Paica yaya mama illaj huahuacunapaj, viudacunapaj cashcata rurajmi. Shujtaj llajtamanta shamujtapish c'uyashpa micunata, churanata cujmi.

DEUTERONOMIO 24:17

Cancunaca shujtaj llajtamanta cajcunatapish, yaya mama illajcunatapish paicunapaj ima shinalla rurana cashcataca ñataj mana ruranguichijman. Viuda huarmi imata mañajpica tigrachingacama ama ima prendata apanguichijchu.

DEUTERONOMIO 24:7

Israelcunapurallamantataj maijan runa paipajta rurachun, mana cashpaca shujtajcunaman c'atungapaj maijan runata shuhuashcata japishpaca, chai runataca huañuchinami canguichij. Chashnami cancunapuramanta, millaita anchuchinguichij.

DEUTERONOMIO 25:1

Maijancunapi p'iñanacui tiyajpica, juezcunapajman ringuichij. Paicunami ima mana juchachinayujtaca cacharingacuna. Imapish juchachinayujtaca llaquichingacuna.

DEUTERONOMIO 27:19

Shujtaj llajtamanta shamujcunata, yaya mama illaj huahuacunata, viudacunata, maijanpish chaicunapaj imalla rurana cashcata mana rurashpa, ashtahuanpish shujtajman tucujca llaqui tucushca cachun nijpica, tucuicuna: Chashnataj cashca cachun ninguichij.

Santiago 1:27

Dios Yayata crijtaj cashcata paipaj ñaupajpi ricuchingapajca caitami rurana: Yaya mama illajcunata, llaquihuan caj viudacunatapish ayudana, cai pacha mapacunamantapish huaquichirinami.